Padma Purana · Chapter 6.162

mahādeva uvāca/
tato gacchettathā devi tīrthaṃ kāpotikaṃ punaḥ /
yatra sābhramatī toyaṃ prācīnaṃ saṃpravarttate

piṃḍaṃ dadāti yastatra pitṛtarpaṇapūrvakam /
vanyaiḥ phalaistathā puṣpaiḥ sadā parvaṇi parvaṇi

kākādibhyaśca śvādibhyo baliṃ saṃdadate tu yaḥ /
yamasya paṃthānaṃ so'pi sasukhaṃ nistarennaraḥ

tatra tīrthe naraḥ snātvā vaiśākhyāṃ gaurasarṣapaiḥ /
pūjayeddevamīśānaṃ prācīneśvaramuttamam

ātmānaṃ tārayetso'tha pitṝnatha pitāmahān /
kapoto yatra cātmānaṃ dattvā cātithaye mudā

stuto devagaṇaiḥ sarvairvimānena divaṃ gataiḥ /
tadā prabhṛti tattīrthaṃ kāpotamiti viśrutam

tatra snātvā naraḥ pītvā brahmahatyāṃ vyapohati /
pārvatyuvāca/
kapotena kathaṃ dattaṃ śarīraṃ ca vada prabho /
nimittaṃ kiṃ tathā deva nāhaṃ vedmi sureśvara

mahādeva uvāca/
atra tīrtheti deveśi vaṭo vai paramo mahān /
tasya śākhā hyanaṃtāśca dṛśyaṃte vipulā bhuvi

tatra jīvā vasaṃtīha pakṣiṇo bahavastathā /
kapotena gṛhaṃ tatra kāritaṃ tu sureśvari

tatra tiṣṭhati pakṣīśo nityaṃ viṣṇuparāyaṇaḥ /
kuṭuṃbena samāyukto śākhāyāṃ vasati dhruvam

ekasminvāsare devi dvādaśyāṃ viṣṇuvāsare /
śyenastatra samāyāto hyatithitvena bhāmini

kapota bho dehi māṃsaṃ tava śārīrakaṃ mama /
nocecchāpaṃ pradāsyāmi ityuktaṃ naganaṃdini

adya vai vāsare viṣṇoḥ kṣudhārto'haṃ samāgataḥ /
tasmāddeyaṃ hi māṃsaṃ tatkṣudhārtāya mama prabho

śyenoktaṃ tattu vai śrutvā kapoto vaiṣṇavo mahān /
tena dattaṃ tadā devi śarīraṃ nātra saṃśayaḥ

tena dānaprabhāvena tīrthaṃ jātaṃ surottame /
kāpotakaṃ mahattīrthaṃ pāvanānāṃ ca pāvanam

atra tīrthe naraḥ snātvā kṛtvā vai śivapūjanam /
dadāti cātithibhyaśca miṣṭamannaṃ surottame

ihaloke sukhaṃ bhuktvā yāti viṣṇoḥ sanātanam /
dattvā vai svaśarīraṃ tu kapoto'tha mahātmane

sa gato vaiṣṇavaṃ tatra yāvaccaṃdra divākarau /
ato gatvā tu bho devi atithiṃ pūjayetsadā /
pūjite cātithau tatra sarvaṃ ca labhate dhruvam

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe kapotatīrthaṃ nāma dviṣaṣṭyadhika śatatamo'dhyāyaḥ