પદ્મ પુરાણ · અધ્યાય 6.161

મહાદેવ ઉવાચ।
સોમતીર્થં તતો ગચ્છેદ્ગુપ્તં સાભ્રમતીતટે ।
પાતાલાત્તત્ર નિર્ગત્ય કાલાગ્નિરભવદ્ભવઃ

સોમતીર્થે નરઃ સ્નાત્વા દૃષ્ટ્વા સોમેશ્વરં શિવમ્ ।
સોમપાનફલં સાક્ષાદ્ભવતીતિ ન સંશયઃ

રૂપવાન્સુભગો ભોગી સર્વશાસ્ત્રવિશારદઃ ।
નરો ભવતિ લોકેઽસ્મિન્પરત્ર ચ શિવં વ્રજેત્

અત્રેતિહાસં વક્ષ્યામિ શૃણુ સુંદરિ તત્વતઃ ।
યં શ્રુત્વા મુચ્યતે ચાત્ર બ્રહ્મહત્યાદિપાતકાત્

કૌષીતકેન ઋષિણા તપસ્તપ્તં વિશેષતઃ ।
નિરાહારી સ વૈ જાતઃ પર્ણાશનરતઃ પરમ્

વાયુભક્ષસ્તતઃ કુર્વન્નાત્મધ્યાનપરાયણઃ ।
એવં બહુયુગં તત્ર તપ્તં તેન મહત્તપઃ

કદાચિદ્દૈવયોગેન સુપ્રસન્નો મહેશ્વરઃ ।
યં યં પ્રાર્થયસે વિપ્ર તત્સર્વં પ્રદદામ્યહમ્

કૌષીતક ઉવાચ।
તવ પ્રસાદાદ્દેવેશ અત્ર લિંગં પ્રજાયતામ્ ।
અત્ર સોમેશ્વર ઇતિ ખ્યાતો દેવો ભવેદ્ધ્રુવમ્

યત્ર સ્નાત્વા ચ ભુક્ત્વા ચ વાંછિતં ફલમાપ્નુયાત્ ।
અત્ર સ્થાને વિશેષેણ રુદ્રજાપ્યાદિકં યદિ

કારયંતિ નરશ્રેષ્ઠા ધર્માનર્થાલ્લઁભંતિ તે ।
અપુત્રો લભતે પુત્રં નિર્ધનો લભતે ધનમ્

રાજ્યકામી તુ તદ્રાજ્યં લભતે નાત્ર સંશયઃ ।
યદિ ચેત્ત્વં પ્રસન્નોઽસિ તત્સર્વં દેહિ મે પ્રભો

ઈશ્વર ઉવાચ।
તદા ચૈવ સુરેશેન સર્વં દત્તં દ્વિજન્મને ।
તદા પ્રભૃતિ તત્તીર્થં સોમલિંગેતિ વિશ્રુતમ્

ચંદનૈર્વા બિલ્વપત્રૈયેઽર્ચયંતિ સદાશિવમ્ ।
લભંતે માનુષે દેહે સૌખ્યં પુત્રાદિસંભવમ્

સોમવારે તથા પ્રાપ્તે યો ગચ્છતિ હરાલયમ્ ।
વાછિતં લભતે નિત્યં સોમલિંગ પ્રસાદતઃ

અત્ર ગત્વા તુ યો દેવિ યદ્દદાતિ ફલાદિકમ્ ।
યયા કામનયા ચૈવ તં તં પ્રાપ્નોતિ નિશ્ચિતમ્

શ્વેતૈર્વા કરવીરૈશ્ચ પારિજાતૈસ્તથા પુનઃ ।
યેઽર્ચયંતિ ચ તં દેવં શ્રીમહેશં પિનાકિનમ્

તે લભંતે સુરશ્રેષ્ઠે શૈવં પદમનુત્તમમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયાં ઉત્તરખંડે સોમતીર્થવર્ણનંનામૈકષષ્ટ્યધિકશતતમોઽધ્યાયઃ