પદ્મ પુરાણ · અધ્યાય 6.159

મહાદેવ ઉવાચ।
તસ્માદ્દૂરતરે દેવિ સિદ્ધક્ષેત્રમનુત્તમમ્ ।
અનિરુદ્ધો વૃતઃ પૂર્વં ઉષાર્થે ચિત્રલેખયા

નીતો બાણાસુરપુરં તિષ્ઠતિ સ્મ ગૃહે પુરા ।
પાશૈર્બાણૈશ્ચ સંરુદ્ધઃ કોટરાક્ષીમથાસ્મરત્

સાક્ષાદ્યા વૈષ્ણવી શક્તિઃ સદા રક્ષણ તત્પરા ।
સેયં દેવી નદીતીરે કૃષ્ણેનાત્ર પ્રતિષ્ઠિતા

જિત્વા બાણાસુરં સંખ્યે દ્વારકાં પ્રતિગચ્છતા ।
અનિરુદ્ધસ્ય સ્તોત્રેણ સાક્ષાત્સાંનિધ્યમાગતા

તત્ર તીર્થે નરઃ સ્નાત્વા વર્ષમેકં પ્રયત્નતઃ ।
કોટરાક્ષીમુખં દૃષ્ટ્વા લક્ષ્મીમાપ્નોતિ પુષ્કલામ્

સિદ્ધતીર્થે નરઃ સ્નાત્વા દૃષ્ટ્વા કોટરવાસિનીમ્ ।
સિંહયુક્તેન યાનેન રુદ્રલોકે મહીયતે

યસ્યાં વૈ સ્મરણાદેવ મુક્તઃ સોઽપિ વરાનને ।
અતોયેઽત્ર પ્રગચ્છંતિ તે નરા મુક્તિભાગિનઃ

તત્ર ગત્વા વિશેષેણ સ્નાનં કૃત્વા તુ પાર્વતિ ।
કોટરાક્ષ્યાસ્તતઃ સ્તોત્રં પઠેદ્વૈ બુદ્ધિપૂર્વકમ્

કોટરાક્ષી વિશ્વરૂપા મહામાયા બલાધિકા ।
ત્રિપુરા ત્રિપુરઘ્ની ચ શિવા વૈ શિવરૂપિણી

કન્યા સારસ્વતી પ્રોક્તા દુર્ગા દુર્ગતિહારિણી ।
ભૈરવી ભૈરવાક્ષી ચ લક્ષ્મી દેવી જનપ્રિયા

એતાનિ બહુધોક્તાનિ નામાનિ ચ સુરેશ્વરિ ।
યે પઠંતિ નરશ્રેષ્ઠાસ્તે યાંતિ શિવસન્નિધૌ

અનિરુદ્ધકૃતં સ્તોત્રં યે જપંતિ મનીષિણઃ ।
મુચ્યંતે કષ્ટબંધાત્તે સત્યંસત્યં વરાનને

તીર્થાનાં પરમં તીર્થં કોટરાનિર્મિતં ભુવિ ।
દર્શનાદેવ નશ્યંતિ પાપાનાં રાશયસ્તથા

ઇતિ શ્રીપાદ્મેમહાપુરાણે પંચપંચાશત્સાહસ્ર્યાં સંહિતાયાં ઉત્તરખંડે કોટરાતીર્થં નામૈકોનષષ્ટ્યધિકશતતમોઽધ્યાયઃ