પદ્મ પુરાણ · અધ્યાય 6.149

મહાદેવ ઉવાચ।
તીર્થાદસ્માત્પરં તીર્થં માલાર્કાંતરતઃ સ્થિતમ્ ।
ચંદનેશ્વરમાગચ્છેદામોદસ્થાનમુત્તમમ્

દુઃશાસનસ્ય રુધિરં પીત્વા ભીમો મહાબલઃ ।
પ્રતિજ્ઞામાત્મનઃ સર્વાં પૂરયિત્વા સુદારુણામ્

કરાભ્યાં રુધિરાક્તાભ્યાં દ્રૌપદ્યાઃ કેશબંધનમ્ ।
કૃત્વા દત્ત્વા દ્વિજાતિભ્યો તીર્થયાત્રાં તતોઽગમત્

સાભ્રમત્યાસ્તટે રમ્યે ગતો વૈ ભ્રાતૃભિઃ સહ ।
આનીતઃ સાભ્રમત્યાં યઃ સ્વર્ગાચ્ચંદનપાદપઃ

સ તુ લિંગતયા જાતઃ પુણ્યતીર્થપ્રભાવતઃ ।
તત્ર સ્નાત્વા ચ પીત્વા ચ કૃત્વા વૈ પિતૃતર્પણમ્

ન નરો નિરયં ગચ્છેદ્રુદ્રલોકમવાપ્નુયાત્ ।
ચંદનેશં તતો દૃષ્ટ્વા વિશ્વેશં લોકશંકરમ્

પૂજયેચ્ચ યથાશક્ત્યા યત્ર ગત્વા ન શોચતિ ।
યત્ર કૈવર્તકો રાજા પૂજાં કૃત્વા હ્યનેકશઃ

સ ગતઃ શિવલોકં તં યત્ર ગત્વા ન શોચતિ ।
મજ્જંતિ ઋષયો યત્ર યત્ર દેવઃ સનાતનઃ

સાક્ષાદ્વિષ્ણુઃ પરમાત્મા નિત્યં તિષ્ઠતિ ભૂતિદઃ ।
ઇયં સાભ્રમતી ધન્યા ધન્યો વિશ્વેશ્વરઃ પ્રભુઃ

યત્ર તીર્થાન્યનેકાનિ જાતાનિ ભુવિ પાર્વતિ ।
અત્ર ચામર્દકીપુણ્યૈઃ ફલૈર્નાનાવિધૈઃ શુભૈઃ

કર્ત્તવ્યમર્ઘદાનં ચ વિધિના તત્ર સુંદરિ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે ચંદનેશ્વરમાહાત્મ્યં નામૈકોનપંચાશદધિકશતતમોઽધ્યાયઃ