Padma Purana · Chapter 6.145

śrīmahādeva uvāca/
tato gaccheḥ mahattīrthe saṃgameśvaramuttamam /
yatra hastimatī puṇyā sābhramatyā hi saṃgatā

śāpaṃ kauḍinyamunitaḥ prāpya śuṣkābhavannadī /
bahiścaryeti nāmnā vai loke khyātimupāgatā

tattīrthaṃ saṃpravakṣyāmi puṇyaṃ trailokyaviśrutam /
sarvapāpaharaṃ puṇyaṃ trailokye cāpi viśrutam

yatra tīrthe naraḥ snātvā dṛṣṭvā devaṃ maheśvaram /
mucyate sarvapāpebhyo rudralokaṃ pragacchati

śṛṇu devi pravakṣyāmi etacchāpasya kāraṇam /
yathaiha śuṣkarūpā hi jātā śāpasya kāraṇāt

yatra sābhramatī puṇyā gaṃgā nāma mahānadī /
tatra hastimatī nāma gaṃgayā saha saṃgatā

tatrārabdhaṃ ca muninā tapo vai paramaṃ mahat /
evaṃ bahugate kāle ṛṣiṇā paramātmanā

ārādhito hṛṣīkeśo nārāyaṇaniraṃjanaḥ /
tasyāstaṭe tu deveśi varṣāṇi ca bahūnyapi

gatāni ca viśeṣeṇa munestasya tu pārvati /
kadāciddaivayogācca varṣākālaḥ samāgataḥ

nadī tatra tu saṃpūrṇā kālayogena suvrate /
tatkauṃḍinyena ṛṣiṇā sthānaṃ tyaktaṃ tadā niśi

rātrau duḥkhaṃ mahajjātaṃ hāheti karuṇo rudan /
kiṃ kartavyamiti dhyāyannaticiṃtāparo'bhavat

āśramo hi mahādivyo ṛṣiṇaiva samāyutaḥ /
sa gato vāriyogena hastimatyāṃ surottame

phalāni caiva mūlāni pustakāni bahūnyapi /
tāni tasyāṃ gatānyeva vāriyogena suṃdari

sa kauṃḍinyo ṛṣiśreṣṭhaḥ śaśāpa tāṃ nadīṃ kila /
udakena vinā tvaṃ ca bhaviṣyasi kalau yuge

evaṃ sa dattvā vai śāpaṃ hastimatyā maheśvari /
gato'sau viprapravaro viṣṇulokaṃ sanātanam

adyāpi vartate tīrthaṃ saṃgameśvarasaṃjñakam /
yaṃ dṛṣṭvā mucyate pāpī brahmahatyādi pātakāt

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde someśvaratīrthamahimānāma paṃcacatvāriṃśadadhikaśatatamo'dhyāyaḥ