પદ્મ પુરાણ · અધ્યાય 6.145

શ્રીમહાદેવ ઉવાચ।
તતો ગચ્છેઃ મહત્તીર્થે સંગમેશ્વરમુત્તમમ્ ।
યત્ર હસ્તિમતી પુણ્યા સાભ્રમત્યા હિ સંગતા

શાપં કૌડિન્યમુનિતઃ પ્રાપ્ય શુષ્કાભવન્નદી ।
બહિશ્ચર્યેતિ નામ્ના વૈ લોકે ખ્યાતિમુપાગતા

તત્તીર્થં સંપ્રવક્ષ્યામિ પુણ્યં ત્રૈલોક્યવિશ્રુતમ્ ।
સર્વપાપહરં પુણ્યં ત્રૈલોક્યે ચાપિ વિશ્રુતમ્

યત્ર તીર્થે નરઃ સ્નાત્વા દૃષ્ટ્વા દેવં મહેશ્વરમ્ ।
મુચ્યતે સર્વપાપેભ્યો રુદ્રલોકં પ્રગચ્છતિ

શૃણુ દેવિ પ્રવક્ષ્યામિ એતચ્છાપસ્ય કારણમ્ ।
યથૈહ શુષ્કરૂપા હિ જાતા શાપસ્ય કારણાત્

યત્ર સાભ્રમતી પુણ્યા ગંગા નામ મહાનદી ।
તત્ર હસ્તિમતી નામ ગંગયા સહ સંગતા

તત્રારબ્ધં ચ મુનિના તપો વૈ પરમં મહત્ ।
એવં બહુગતે કાલે ઋષિણા પરમાત્મના

આરાધિતો હૃષીકેશો નારાયણનિરંજનઃ ।
તસ્યાસ્તટે તુ દેવેશિ વર્ષાણિ ચ બહૂન્યપિ

ગતાનિ ચ વિશેષેણ મુનેસ્તસ્ય તુ પાર્વતિ ।
કદાચિદ્દૈવયોગાચ્ચ વર્ષાકાલઃ સમાગતઃ

નદી તત્ર તુ સંપૂર્ણા કાલયોગેન સુવ્રતે ।
તત્કૌંડિન્યેન ઋષિણા સ્થાનં ત્યક્તં તદા નિશિ

રાત્રૌ દુઃખં મહજ્જાતં હાહેતિ કરુણો રુદન્ ।
કિં કર્તવ્યમિતિ ધ્યાયન્નતિચિંતાપરોઽભવત્

આશ્રમો હિ મહાદિવ્યો ઋષિણૈવ સમાયુતઃ ।
સ ગતો વારિયોગેન હસ્તિમત્યાં સુરોત્તમે

ફલાનિ ચૈવ મૂલાનિ પુસ્તકાનિ બહૂન્યપિ ।
તાનિ તસ્યાં ગતાન્યેવ વારિયોગેન સુંદરિ

સ કૌંડિન્યો ઋષિશ્રેષ્ઠઃ શશાપ તાં નદીં કિલ ।
ઉદકેન વિના ત્વં ચ ભવિષ્યસિ કલૌ યુગે

એવં સ દત્ત્વા વૈ શાપં હસ્તિમત્યા મહેશ્વરિ ।
ગતોઽસૌ વિપ્રપ્રવરો વિષ્ણુલોકં સનાતનમ્

અદ્યાપિ વર્તતે તીર્થં સંગમેશ્વરસંજ્ઞકમ્ ।
યં દૃષ્ટ્વા મુચ્યતે પાપી બ્રહ્મહત્યાદિ પાતકાત્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે સોમેશ્વરતીર્થમહિમાનામ પંચચત્વારિંશદધિકશતતમોઽધ્યાયઃ