Padma Purana · Chapter 6.144

mahādeva uvāca/
brahmavallī mahattīrthaṃ tato gacchetsureśvari /
tasya tīrthasya svarūpaṃ sākṣācchṛṇu surottama

yatra sābhramatī toyaṃ brahmavallyaṃbhasā saha /
yujyate brahmatīrthaṃ tatprayāgena samaṃ smṛtam

tatra piṃḍapradānena tṛptirdvādaśavārṣikī /
pitṝṇāṃ jāyate nūnaṃ brahmaṇo vacanaṃ yathā

gayāśrāddhasamaṃpuṇyaṃbrahmavallyāṃviśeṣataḥ /
yatrajñātvāprakurvaṃtipitarastṛptimāpnuyuḥ

godānaṃbhūmidānaṃcaannadānaṃtathaivaca /
etaddānasamaṃ puṇyaṃ brahmavallyāṃ viśeṣataḥ

atraiva sanakādyāstu snātvā ca vidhipūrvakam /
paraṃbrahmapadadhyānādviṣṇulokamavāpnuyuḥ

puṣkare caiva gaṃgāyāṃ kṣetre cāmarakaṃṭake /
tatra gatvā tu deveśi yatphalaṃ labhate naraḥ

tatphalaṃ samavāpnoti brahmavallyāṃ viśeṣataḥ /
caṃdra sūryoparāge ca dānaṃ ye dadate narāḥ

tatphalaṃ samavāpnoti brahmāvallyāṃ sureśvari /
divyarūpadharāste ca śaṃkhacakragadādharāḥ

te'pi svarge hi gacchaṃti snānaṃ kṛtvā sureśvari /
dhṛtvā tulasijāṃ mālāṃ nārāyaṇamanusmaran /
vaikuṃṭhaṃ divyamānaṃdaṃ yāti vai padamavyayam

iti brahmavallītīrthamāhātmyam /
vṛṣatīrthaṃ tato gacchetkhaṃḍatīrthe'tiviśrutam /
tatra snātvā divaṃ gāvo golokaṃ ca purāśritāḥ

khaṃḍarūpeṇa dharmeṇa yā gāvo lokamātaraḥ /
śāpādbhraṣṭāvitāstena khaṃḍatīrthamathocyate

pārvatyuvāca/
śāpo hi lokamātṝṇāṃ gavāṃ kasya purā'bhavat /
kathaṃ lokātparibhraṣṭāḥ kathaṃ dharmeṇa rakṣitāḥ

mahādeva uvāca/
purā vṛṣeṇa goloke krīḍatā saha mātṛbhiḥ /
muktaṃ tathā śakṛnmūtraṃ patitaṃ haramūrddhani

tatastāsāṃ dadau śāpaṃ tena doṣeṇa vai haraḥ /
naṣṭasaṃjñā svalokācca gāvo yāsyatha medinīm

gāvaḥ śaptā bhagavatā saṃprasādya punarharam /
prāpsyāmahe punarlokaṃ iti devaṃ yayācire

yadā sābhramatī tīrthe brahmavallī samīpataḥ /
khaṃḍasaṃjñahrade snātvā svargaṃ vai prāpsyatha dhruvam

tatastasminhrade snātvā gāvo gopatinā saha /
svargaṃ gatā śuddhatamā mahādevasamīpataḥ

gohrade tu naraḥ snātvā kṛtvā vai pitṛtarpaṇam /
gavāṃ lokamavāpnoti dāhapralayavarjitam

tatra sthitvā nirāhāro gopiṃḍaṃ ca dadāti vai /
sa naraḥ sukhamedheta yāvadiṃdrāścaturdaśa

gavāṃkoṭipradānena yatphalaṃ prāpyate dhruvam /
tatphalaṃ samavāpnoti khaṃḍatīrthe na saṃśayaḥ

gṛhītvā vṛṣamūtraṃ ca tīrthaṃ yaḥ pibate naraḥ /
tatkṣaṇādeva śuddhiḥ syātkhaṃḍatīrthe na saṃśayaḥ

khaṃḍatīrthātparaṃ tīrthaṃ na bhūtaṃ na bhaviṣyati /
ye gacchaṃti suraśreṣṭha te narāḥ puṇyabhāginaḥ

tatra gatvā suraśreṣṭhe gavāṃ pūjanamācaret /
vṛṣabhaṃ ca tataḥ pūjya snānaṃ kṛtvā samāhitaḥ

pūjanādvai na saṃdeho goloke tu vasecciram /
tatra gatvā viśeṣeṇa sauvarṇī gāṃ dadaṃti ye

te narā bhuṃjate saukhyaṃ yāvadiṃdrāścaturdaśa /
daśadhenuṃ tataḥ kṛtvā yo dadāti dvijātaye

khaṃḍatīrthe suraśreṣṭhe tadanaṃtaphalaṃ smṛtam /
tatra gatvā tu karttavyaṃ pippalāropaṇaṃ budhaiḥ

tatkṛte sati deveśi pitṛlokaṃ sa gacchati /
paṃca vāmalakīrdivyā ye kurvaṃti praropaṇam

ihaloke sukhaṃ bhuktvā harilokaṃ vrajaṃti te

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāmaheśvarasaṃvāde khaṃḍatīrthaṃnāma catuścatvāriṃśadadhikaśatatamo'dhyāyaḥ