Padma Purana · Chapter 6.130

pārvatyuvāca/
śrutaṃ kārtikamāhātmyaṃ māghasya ca mayā vibho /
adhunā śrotumicchāmi muktidaṃ karma cottamam

śreṣṭhā bhaktistu kā proktā vada viśveśvara prabho /
yena vijñānamātreṇa narāḥ sukhamavāpnuyuḥ

mahādeva uvāca/
tallīnacittaḥ sa pumānsā bhaktiḥ paramā matā /
dayādharmaparo nityaṃ viṣṇudharmeṣu tatparaḥ

phalamūlajalāhārī śaṃkhacakrapradhārakaḥ /
trikālaṃ pūjayedviṣṇuṃ sā bhaktiḥ sātvikī matā

uttamā sātvikī proktā rājasī caiva madhyamā /
kaniṣṭhā tāmasī caiva trividhā bhaktirucyate

śrīdhare tu prakarttavyā muktikāmaphalepsubhiḥ /
ahaṃkāreṇa rūpeṇa daṃbhamātsaryamāyayā

ye kurvaṃti janā bhaktiṃ tāmasī sā udāhṛtā /
parasyotsādanārthaṃ vā daṃbhamuddiśyavā'thavā

yā bhaktiḥ kriyate deve tāmasī sā prakīrtitā /
viṣayānpratisaṃdhāya yaśa aiśvaryameva vā

arcādāvarcayedyo māṃ pṛthagbhāvaḥ sa rājasaḥ /
karmakṣayārthe karttavyā brāhmaṇairjñānatatparaiḥ

viṣṇau hyātmārpaṇīṃ buddhiṃ sā bhaktiḥ sātvikī matā /
ato vai sarvathā devi saṃsevyaḥ sarvadā hariḥ

tāmasena tu bhāvena tāmasatvaṃ hi labhyate /
rājaso rājasenaiva sātvikena tu sātvikaḥ

vedādhyāyarataḥ śrīmānrāgadveṣavivarjitaḥ /
śaṃkhacakradharo vipraḥ sarvadā śucirucyate

karmakāṃḍe pravṛtto yaḥ sarvadā viṣṇuniṃdakaḥ /
niṃdakastajjanānāṃ ca mahācaṃḍāla ucyate

vedādhyāyaratā nityaṃ nityaṃ vai yajñayājakāḥ /
agnihotraratā nityaṃ viṣṇudharmaparāṅmukhāḥ /
niṃdaṃti viṣṇudharmāṃśca vedabāhyāḥ sureśvari

kurvaṃti śāṃtiṃ vibudhāḥ prahṛṣṭāḥ kṣemaṃ prakurvaṃti pitāmahādyāḥ /
svasti prayacchaṃti munīṃdramukhyā goviṃdabhaktiṃ vahatāṃ narāṇām

śubhā grahā bhūtapiśācayuktā brahmādayo devagaṇāḥ prasannāḥ /
lakṣmī sthirā tiṣṭhati maṃdire ca goviṃdabhaktiṃ vahatāṃ narāṇām

gaṃgā gayā naimiṣapuṣkarāṇi kāśī prayāgaṃ kurujāṃgalāni /
tiṣṭhaṃti dehe kṛtabhaktipūrvaṃ goviṃdabhaktiṃ vahatāṃ narāṇām

evamārādhayedvidvānbhagavaṃtaṃ śriyā saha /
kṛtakṛtyo bhavennityaṃ sa vipro nātra saṃśayaḥ

kṣatriyo vātha vaiśyo vā śūdro vāsurasattame /
bhaktiṃ kurvanviśeṣeṇa muktiṃ yāti sa vai naraḥ

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe viṣṇu/
bhaktimahimāvarṇanaṃnāma triṃśādhikaśatatamo'dhyāyaḥ