પદ્મ પુરાણ · અધ્યાય 6.130

પાર્વત્યુવાચ।
શ્રુતં કાર્તિકમાહાત્મ્યં માઘસ્ય ચ મયા વિભો ।
અધુના શ્રોતુમિચ્છામિ મુક્તિદં કર્મ ચોત્તમમ્

શ્રેષ્ઠા ભક્તિસ્તુ કા પ્રોક્તા વદ વિશ્વેશ્વર પ્રભો ।
યેન વિજ્ઞાનમાત્રેણ નરાઃ સુખમવાપ્નુયુઃ

મહાદેવ ઉવાચ।
તલ્લીનચિત્તઃ સ પુમાન્સા ભક્તિઃ પરમા મતા ।
દયાધર્મપરો નિત્યં વિષ્ણુધર્મેષુ તત્પરઃ

ફલમૂલજલાહારી શંખચક્રપ્રધારકઃ ।
ત્રિકાલં પૂજયેદ્વિષ્ણું સા ભક્તિઃ સાત્વિકી મતા

ઉત્તમા સાત્વિકી પ્રોક્તા રાજસી ચૈવ મધ્યમા ।
કનિષ્ઠા તામસી ચૈવ ત્રિવિધા ભક્તિરુચ્યતે

શ્રીધરે તુ પ્રકર્ત્તવ્યા મુક્તિકામફલેપ્સુભિઃ ।
અહંકારેણ રૂપેણ દંભમાત્સર્યમાયયા

યે કુર્વંતિ જના ભક્તિં તામસી સા ઉદાહૃતા ।
પરસ્યોત્સાદનાર્થં વા દંભમુદ્દિશ્યવાઽથવા

યા ભક્તિઃ ક્રિયતે દેવે તામસી સા પ્રકીર્તિતા ।
વિષયાન્પ્રતિસંધાય યશ ઐશ્વર્યમેવ વા

અર્ચાદાવર્ચયેદ્યો માં પૃથગ્ભાવઃ સ રાજસઃ ।
કર્મક્ષયાર્થે કર્ત્તવ્યા બ્રાહ્મણૈર્જ્ઞાનતત્પરૈઃ

વિષ્ણૌ હ્યાત્માર્પણીં બુદ્ધિં સા ભક્તિઃ સાત્વિકી મતા ।
અતો વૈ સર્વથા દેવિ સંસેવ્યઃ સર્વદા હરિઃ

તામસેન તુ ભાવેન તામસત્વં હિ લભ્યતે ।
રાજસો રાજસેનૈવ સાત્વિકેન તુ સાત્વિકઃ

વેદાધ્યાયરતઃ શ્રીમાન્રાગદ્વેષવિવર્જિતઃ ।
શંખચક્રધરો વિપ્રઃ સર્વદા શુચિરુચ્યતે

કર્મકાંડે પ્રવૃત્તો યઃ સર્વદા વિષ્ણુનિંદકઃ ।
નિંદકસ્તજ્જનાનાં ચ મહાચંડાલ ઉચ્યતે

વેદાધ્યાયરતા નિત્યં નિત્યં વૈ યજ્ઞયાજકાઃ ।
અગ્નિહોત્રરતા નિત્યં વિષ્ણુધર્મપરાઙ્મુખાઃ ।
નિંદંતિ વિષ્ણુધર્માંશ્ચ વેદબાહ્યાઃ સુરેશ્વરિ

કુર્વંતિ શાંતિં વિબુધાઃ પ્રહૃષ્ટાઃ ક્ષેમં પ્રકુર્વંતિ પિતામહાદ્યાઃ ।
સ્વસ્તિ પ્રયચ્છંતિ મુનીંદ્રમુખ્યા ગોવિંદભક્તિં વહતાં નરાણામ્

શુભા ગ્રહા ભૂતપિશાચયુક્તા બ્રહ્માદયો દેવગણાઃ પ્રસન્નાઃ ।
લક્ષ્મી સ્થિરા તિષ્ઠતિ મંદિરે ચ ગોવિંદભક્તિં વહતાં નરાણામ્

ગંગા ગયા નૈમિષપુષ્કરાણિ કાશી પ્રયાગં કુરુજાંગલાનિ ।
તિષ્ઠંતિ દેહે કૃતભક્તિપૂર્વં ગોવિંદભક્તિં વહતાં નરાણામ્

એવમારાધયેદ્વિદ્વાન્ભગવંતં શ્રિયા સહ ।
કૃતકૃત્યો ભવેન્નિત્યં સ વિપ્રો નાત્ર સંશયઃ

ક્ષત્રિયો વાથ વૈશ્યો વા શૂદ્રો વાસુરસત્તમે ।
ભક્તિં કુર્વન્વિશેષેણ મુક્તિં યાતિ સ વૈ નરઃ

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે વિષ્ણુ।
ભક્તિમહિમાવર્ણનંનામ ત્રિંશાધિકશતતમોઽધ્યાયઃ