Padma Purana · Chapter 6.131

pārvatyuvāca/
śālagrāmaśilā śuddhā mūrttayaḥ saṃti bhūtale /
tāsāṃ caiva tu mūrtīnāṃ pūjanaṃ katidhā smṛtam

brāhmaṇaiḥ kati pūjyāstāḥ kṣatriyairvā sureśvara /
vaiśyairvāpi kathaṃ śūdraiḥ strībhirvāpi samādiśa

mahādeva uvāca/
śālagrāmaśilā puṇyā pavitrā dharmakāriṇī /
yasyā darśanamātreṇa brahmahā śudhyate naraḥ

tadgṛhaṃ sarvatīrthānāṃ pravaraṃ śrutinoditam /
yatreyaṃ sarvadā mūrtiḥ śālagrāmaśilā śubhā

brāhmaṇaiḥ paṃcapūjyā syuścatasraḥ kṣatriyaistathā /
vaiśyaistisrastathāpūjyāekāpūjyāprayatnataḥ

tasyādarśanamātreṇaśūdro muktimavāpnuyāt /
anena vidhinā devi ye narāḥ pūjayaṃti vai

bhogānsarvāṃstatra bhuktvā yāṃti viṣṇoḥ sanātanam /
iyaṃ sā mahatī mūrtiḥ sarvadā pāpahāriṇī

kailāsādyaṃ phalaṃ devi jāyate pūjanādyataḥ /
tatra gaṃgā ca yamunā godāvarī sarasvatī

tiṣṭhate ca śilā yatra sarvaṃ tatra na saṃśayaḥ /
kimatra bahunoktena bhūyobhūyo varānane

pūjanaṃ manujaiḥ samyakkarttavyaṃ muktimicchubhiḥ /
bhaktibhāvena deveśi ye'rcayaṃti janārdanam

teṣāṃ darśanamātreṇa brahmahā śudhyate janaḥ /
dāsabhāvena ye śūdrāḥ svarcanaṃ kurvate sadā

teṣāṃ puṇyaṃ na jānaṃti brahmādyāśca sureśvari /
bhaktibhāvena ye viprā harimabhyarcayaṃti vai

ekaviṃśatikulaṃ taistu tāritaṃ teṣu janmasu /
śaṃkhacakrāṃkito yastu vipraḥ pūjanamācaret

pūjitaṃ tu jagatsarvaṃ tena viṣṇuprapūjanāt /
pitaraḥ saṃvadaṃtyasmatkule jātāśca vaiṣṇavāḥ

tatkulaṃ tāritaṃ taistu yāvadābhūtasaṃplavam /
te tu cāsmānsamuddhṛtya nayaṃte viṣṇumaṃdiram

sa eva divaso dhanyo dhanyā mātā'tha bāṃdhavāḥ /
pitā tasya ca vai dhanyo dhanyā vai suhṛdastathā

sarve dhanyatamā jñeyā viṣṇubhaktiparāyaṇāḥ /
teṣāṃ darśanamātreṇa mahāpāpātpramucyate

upapātakāni sarvāṇi mahāṃti pātakāni ca /
tāni sarvāṇi naśyaṃti vaiṣṇavānāṃ ca darśanāt

pāvakā iva dīpyaṃte ye narā vaiṣṇavā bhuvi /
vimuktāḥ sarvapāpebhyo meghebhya iva caṃdramāḥ

ārdraśuṣkaṃ laghusthūlaṃ vāṅmanaḥ karmabhiḥ kṛtam /
tatsarvaṃ nāśamāyāti vaiṣṇavānāṃ ca darśanāt

hiṃsādikaṃ ca yatpāpaṃ jñānājñānaṃ kṛtaṃ ca yat /
tatsarvaṃ nāśamāyāti darśanādvaiṣṇavasya ca

niḥpāpāstridivaṃ yāṃti pāpiṣṭhā yāṃti śuddhitām /
darśanādeva sādhūnāṃ satyaṃ tubhyaṃ mayoditam

saṃsārakardamālepaprakṣālanaviśāradaḥ /
pāvanaḥ pāvanānāṃ ca viṣṇubhakto na saṃśayaḥ

pratyahaṃ viṣṇubhaktā ye smaraṃti madhusūdanam /
te tu viṣṇumayā jñeyā viṣṇustatra na saṃśayaḥ

navanīlaghanaśyāmaṃ nalināyatalocanam /
śaṃkhacakragadāpadmadharaṃ pītāṃbarāvṛtam

kaustubhena virājaṃtaṃ vanamālādharaṃ harim /
ullasatkuṃḍalajyotiḥ kapolavadanaśriyā

virājitaṃ kirīṭena valayāṃgadanūpuraiḥ /
prasannavadanāṃbhojaṃ caturbāhuṃ śriyānvitam

evaṃ dhyāyaṃti ye viprā viṣṇuṃ caiva tu pārvati /
te viprā viṣṇurūpāśca vaiṣṇavāste na saṃśayaḥ

teṣāṃ darśanamātreṇa bhaktyā vā bhojanena vā /
pūjanena ca deveśi vaikuṃṭhaṃ labhate dhruvam

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe śālagrāmaśilāpūjanamāhātmyaṃnāmaikatriṃśādhikaśatatamo'dhyāyaḥ