Padma Purana · Chapter 6.120

sūta uvāca/
iti vākyaṃ samākarṇya punaḥ papraccha pāvakiḥ /
śālagrāmārcanaṃ bhūyastacchṛṇudhvaṃ tapodhanāḥ

kārtikeya uvāca/
bhagavanyogināṃ śreṣṭha sarvedharmāḥ śrutā mayā /
śālagrāmārcanaṃ brūhi vistareṇa mama prabho

īśvara uvāca/
sādhusādhu mahāprājña yanmāṃ hi paripṛcchasi /
tadahaṃ saṃpravakṣyāmi śrūyatāṃ mama vatsala

śālagrāmaśilāyāṃ tu trailokyaṃ sacarācaram /
mahāśaya mahāsena nityaṃ tiṣṭhati saṃhitam

dṛṣṭaṃ praṇamitaṃ yena snāpitaṃ pūjitaṃ tathā /
yajñakoṭiguṇaṃ puṇyaṃ gavāṃ koṭiphalaṃ labhet

chinnastena tathā vatsa garbhavāsaḥ sudāruṇaḥ /
pītaṃ yena sadā viṣṇoḥ śālagrāmaśilājalam

kāmāsakto'pi yo nityaṃ bhaktibhāvavivarjitaḥ /
śālagrāmaśilā putra pūjayitvācyuto bhavet

śālagrāmaśilā biṃbaṃ hatvā koṭivināśanam /
smṛtaṃ saṃkīrtitaṃ dhyātaṃ pūjitaṃ ca namaskṛtam

śālagrāmaśilāṃ dṛṣṭvā yāṃti pāpānyanekaśaḥ /
siṃhaṃ dṛṣṭvā yathā yāṃti vane mṛgagaṇā bhayāt

namaskāraṃ tu manujaḥ śālagrāmaśilārcane /
bhaktyā vā yadi vā'bhaktyā kṛtvā muktimavāpnuyāt

vaivasvatabhayaṃ nāsti tathā maraṇajanmanoḥ /
yaḥ karoti naro nityaṃ śālagrāmaśilārcanam

gaṃdhapādyārghanaivedyairdīpairdhūpairvilepanaiḥ /
gītairvādyaistathā stotraiḥ śālagrāmaśilārcanam

kurute mānavo yastu kalau bhaktiparāyaṇaḥ /
kalpakoṭisahasrāṇi ramate viṣṇusadmani

śālagrāmanamaskāro bhāvenāpi naraiḥ kṛtaḥ /
mānuṣatvaṃ kathaṃ teṣāṃ madbhaktā ye narā bhuvi

madbhaktāstīvrapāpiṣṭhā matprabhuṃ na namaṃti ye /
vāsudevaṃ na te jñeyā madbhaktāḥ pāpamohitāḥ

madbhakto'pi ca yo bhūtvā bhuṃkte tvekādaśīdine /
sa yāti hyaṃdhatāmisre nirayaṃ mama ghātakaḥ

malliṃgasparśanaṃ kāryaṃ nānyā śuddhirvidhīyate /
yā tithirdayitā viṣṇoḥ sā tithirmama vallabhā

yastāṃ nopavasenmartyaḥ sa pāpī śvapacādhikaḥ /
śālagrāmaśilāyāṃ tu sadā putra vasāmyaham

dattaṃ devena tuṣṭena svasthānaṃ mama bhaktitaḥ /
padmakoṭisahasraistu pūjite mayi yatphalam

tatphalaṃ koṭiguṇitaṃ śālagrāmaśilārcanāt /
pūjito'haṃ na tairmartyairnamito'haṃ na tairnaraiḥ

na kṛtaṃ martyaloke yaiḥ śālagrāmaśilārcanam /
śālagrāmaśilāgre tu yaḥ karoti mamārcanam

tenārcito'haṃ senānīryugānāmekaviṃśatim /
kimarcitairliṃgaśatairviṣṇubhaktivivarjitaiḥ

śālagrāmaśilābiṃbaṃ nārcitaṃ yadi putraka /
anarhaṃ mama naivedyaṃ patraṃ puṣpaṃ phalaṃ jalam

śālagrāmaśilāgre tu sarvaṃ yāti pavitratām /
bhuktvānyadevanaivedyaṃ dvijaścāṃdrāyaṇaṃ caret

bhuktvā keśavanaivedyaṃ yajñakoṭiphalaṃ labhet /
pādodakena devasya hatyākoṭisamanvitāḥ

śuddhyaṃti nātra saṃdehastathā śaṃkhodakena hi /
yo hi māheśvaro bhūtvā vaiṣṇavaṃ ca na pūjayet

dveṣṭā ca yāti narakaṃ yāvadiṃdrāścaturdaśa /
jyeṣṭhāśramī gṛhe yasya muhūrttamapi viśramet

pitāmahā yugānyaṣṭau bhavatyamṛtabhojinaḥ /
saṃsāre duḥkhakāṃtāre nimajjyaṃte narādhamāḥ

varṣakoṭisahasrāṇi kṛṣṇārādhanavarjitāḥ /
snehādabhyarcitairliṃgaiḥ śālagrāmasamudbhavaiḥ

muktiṃ prayāṃti manujā yogasāṃkhyena varjitāḥ /
malliṃgakoṭibhirdṛṣṭairyatphalaṃ pūjitaiḥ stutaiḥ

śālagrāmaśilāyāṃ tu ekasyāmiha tadbhavet /
dvādaśaiva śilā yo vai śālagrāmasamudbhavāḥ

arcayedvaiṣṇavo nityaṃ tasya puṇyaṃ na bodha me /
koṭiliṃgasahasraistu pūjitairjāhnavī taṭe

kāśīvāse yugānyaṣṭau dinenaikena tadbhavet /
kiṃ punarbahunā yastu pūjayedvaiṣṇavo naraḥ

nāhaṃ brahmādayo devāḥ saṃkhyāṃ kartuṃ samīhate /
tasmādbhaktyā ca madbhaktaiḥ prītyarthaṃ mama putraka

karttavyaṃ mama tadbhaktyā śālagrāmaśilārccanam /
śālagrāmaśilārūpī yatra tiṣṭhati keśavaḥ

tatra devāsurā yakṣā bhuvanāni caturdaśa

surāṇāṃ kīrtanaiḥ sarvaiḥ koṭibhiśca phalaṃ labhet /
tatphalaṃ kīrttanādeva keśave sukṛtaṃ kalau

śālagrāmaśilāgre tu sakṛtpiṃḍena tarpitāḥ /
vasaṃti pitarastasya na saṃkhyā tatra vidyate

ye pibaṃti narā bhaktyā śālagrāmaśilājalam /
paṃcagavyasahasraistu prāśitaiḥ kiṃ prayojanam

prāyaścitte samutpanne kiṃ dānaiḥ kimupoṣaṇaiḥ /
cāṃdrāyaṇaiḥ sucīrṇaiśca pītvā pādodakaṃ hareḥ

yaḥ karoti taḍāge tu pratimāṃ jalaśāyinīm /
koṭibhiścāpi kiṃ kāryamanyadevaiśca pūjitaiḥ

viṣṇumukhyāstu vai devāstatra jalpaṃti vai saha /
pramāṇamasti sarvasya sukṛtasya hi putraka

phalapramāṇaṃ naivāstiśālagrāmaśilārcana /
yo dadāti śilāṃ viṣṇoḥ śālagrāmasamudbhavām

viprāya viṣṇubhaktāya teneṣṭaṃ kratubhiḥ śataiḥ /
gṛhe'pi vasatastasya gaṃgāsnānaṃ dinedine

sa snātaḥ sarvatīrtheṣu sarvayajñeṣu dīkṣitaḥ /
śālagrāmaśilātoyairabhiṣekaṃ samācaret

svarge martye ca pātāle pāṣāṇāḥ saṃti vai guha /
śālagrāmaśilā grāvṇā nāsti nāsti samā punaḥ

mānuṣe durllabhe loke saphalaṃ tasya jīvitam /
tilaprasthaśataṃ bhaktyā yo dadāti dinedine

tatphalaṃ samavāpnoti śālagrāmaśilārcanāt /
patraṃ puṣpaṃ phalaṃ toyaṃ mūlaṃ dūrvādalaṃ tathā

jāyate meruṇā tulyaṃ śālagrāme samarpitam /
vidhihīno'pi yaḥ kaścitkriyāmaṃtravivarjitaḥ

cakrāṃkabhuja āpnoti samyakśāstroditaṃ phalam /
yattu pūrvaṃ mayā dṛṣṭaṃ keśave kleśanāśanam

tatsarvaṃ kathayiṣyāmi tava snehena putraka /
kva tvaṃ vasasi he viṣṇo kimādhāraḥ kimāśrayaḥ

kathaṃ vā prīyase deva tatsarvaṃ kathayasva me /
śrīkṛṣṇa uvāca/
nivasāmi sadā śaṃbho śālagrāmodbhave'śmani

tatraiva rathacakrāṃke yāni nāmāni me śṛṇu /
dvāradeśe same cakre dṛśyete nāṃtaraṃ yadi /
vāsudevaḥ sa vijñeyaḥ śuklaścaivātiśobhanaḥ

pradyumnaḥ sūryavaktrastu nīladīptistathaiva ca /
suṣiraṃ cchidrabahulaṃ dīrghākāraṃ tu tadbhavet

aniruddhastu pītābho varttulaścātiśobhanaḥ /
rekhātrayāṃkito dvāri dṛṣṭapadmena cihnavat

śyāmo nārāyaṇo devo nābhicakre tathonnate /
dīrgha reṣā samopeto dakṣiṇe suṣirānvitaḥ

ūrdhvaṃmukhaṃ ca jānīyātsuṃdaraṃ harirūpiṇam /
kāmadaṃ mokṣadaṃ caiva arthadaṃ ca viśeṣataḥ

parameṣṭhī ca śuklābhaḥ padmacakrasamanvitaḥ /
biṃbākṛtistathā pṛṣṭhe suṣiraṃ cātipuṣkalam

kṛṣṇavarṇastathā viṣṇurmūle cakre suśobhane /
dvāropari tathā rekhā lakṣyate madhyadeśataḥ

kapilo narasiṃhaśca pṛthucakraḥ suśobhitaḥ /
brahmacaryeṇa pūjyosāvanyathā vighnado bhavet

vārāhaḥ śaktiliṃgastu cakre ca viṣame smṛte /
iṃdra nīlanibhaḥ sthūlastrirekho nābhitaḥ śubhaḥ

dīrghākāṃcanavarṇāyā biṃdutrayavibhūṣitā /
matsyākhyā sā śilā jñeyā bhuktimuktiphalapradā

kūrmastathonnataḥ pṛṣṭhe vartulaścakrapūritaḥ /
haritaṃ varṇamādhatte kaustubhena tu cihnitaḥ

hayagrīvo hayākāro rekhāpaṃcakabhūṣitaḥ /
bahubiṃdusamākīrṇaḥ pṛṣṭhe nīlaṃ ca rūpakam

vaikuṃṭhamavibhinnāṃgaṃ cakramekaṃ tathā dhvajam /
dvāropari tathā rekhā guṃjākārā suśobhanā

śrīdharastu tathā devaścihnito vanamālayā /
kadaṃbakusumākāro rekhāpaṃcakabhūṣitaḥ

vartulaścāpi hṛsvaśca vāmanaḥ parikīrtitaḥ /
atasīkusumaprakhyo biṃdunā pariśobhitaḥ

sudarśanastato devaḥ śyāmavarṇo mahādyutiḥ /
vāmapārśve gadācakre rekhā caiva tu dakṣiṇe

dāmodarastathā sthūlo madhye cakraṃ pratiṣṭhitam /
dūrvābhaṃ dvārasaṃkīrṇaṃ pītarekhaṃ tathaiva ca

nānāvarṇo hyanaṃtastu nānābhogena cihnitaḥ /
anekamūrtikobhinnaḥ sarvakāmaphalapradaḥ

vidikṣudikṣusarvāsu yasyordhvaṃ dṛśyate mukham /
puruṣottamaḥ sa vijñeyo bhuktimuktiphalapradaḥ

dṛśyate śikhare liṃgaṃ śālagrāmaśilodbhavam /
yasya yogeśvaro devo brahmahatyāṃ vyapohati

āraktaḥ padmanābhastu paṃkajaṃ vaktrasaṃyutam /
tasyābhyarcanato nityaṃ draridrastvīśvaro bhavet

cakrāṃkitaṃ hiraṇyāṃgaṃ raśmijālaṃ vinirdiśet /
suvarṇarekhābahulaṃ sphāṭikadyutiśobhitam

atisnigdhā siddhikarī kṛṣṇā kīrtiṃ dadāti ca /
pāṃḍurā pāpadahanī pitāputraphalapradā

nīlā prayacchatī lakṣmīṃ raktā rogapradāyinī /
rūkṣā udvegajananī vakrā dāridryabhāginī

ekaṃ sudarśanaṃ jñeyaṃ lakṣmīnārāyaṇaṃ dvayam /
tṛtīyaṃ cācyutaṃ vidyāccaturthaṃ tu janārdanam

paṃcamaṃ vāsudevaṃ ca ṣaṣṭhaṃ pradyumnameva ca /
saṃkarṣarṇaṃ saptamaṃ ca aṣṭamaṃ puruṣottamam

navamaṃ ca navavyūhaṃ daśamaṃ tu tadātmakam /
ekādaśaṃ cāniruddhaṃ dvādaśaṃ dvādaśātmakam

ata ūrdhvaṃ tu cakrāṇi dṛśyaṃte'naṃtasaṃjñake /
khaṃḍite truṭite bhagne sālagrāme na doṣabhāk

iṣṭā ca yasya yā mūrtiḥ sa tāṃ yatnena pūjayet /
skaṃdhe kṛtvā tu yo'dhvānaṃ vahate śailanāyakam

tasya vaśyaṃ bhavetsarvaṃ trailokyaṃ sacarācaram /
śālagrāmaśilā yatra tatra saṃnihito hariḥ

tatra dānaṃ japaḥ snānaṃ vārāṇasyāḥ śatādhikam /
kurukṣetre prayāge ca naimiṣe puṣkare tathā

tatra koṭiguṇaṃ puṇyaṃ vārāṇasyāṃ mahāphalam /
brahmahatyādikaṃ pāpaṃ yatkiṃcitkurute naraḥ

tatsarvaṃ nirdahatyāśu śālagrāmaśilārcanam /
śālagrāmodbhavo devo yatra dvārāvatībhavaḥ

ubhayoḥ saṃgamo yatra muktistatra na saṃśayaḥ /
brahmacāri gṛhasthaiśca vānaprasthaiśca bhikṣubhiḥ

bhoktavyaṃ viṣṇunaivedyaṃ nātra kāryā vicāraṇā /
tatpūjanena maṃtrāśca na japo na ca bhāvanā

na stutirnāpi cācāraḥ śālagrāmaśilārcane /
śālagrāmaśilāgre tu kṛtvā svastikamādarāt

kārtike tu viśeṣeṇa punātyāsaptamaṃ kulam /
aṇumātraṃ tu yaḥ kuryānmaṃḍalaṃ keśavāgrataḥ

mṛdādhātuvikāraiśca kalpakoṭiṃ divaṃ vaset /
yastu saṃvatsaraṃ pūrṇamagnihotramupāsate

kārtike svastikaṃ kṛtvā samametanna saṃśayaḥ /
agamyāgamane caiva hyabhakṣasya tu bhakṣaṇe

tatpāpaṃ nāśamāyāti maṃḍayitvā harergṛham /
maṃḍalaṃ kurute nityaṃ yā nārī keśavāgrataḥ /
saptajanmāni vaidhavyaṃ na prāpnoti kadācana

iti śrīpādmemahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye śrīkṛṣṇasatyabhāmāsaṃvāde śāligrāmamāhātmyaṃnāma viṃśatyadhikaśatatamo'dhyāyaḥ