Padma Purana · Chapter 6.119

īśvara uvāca/
māghasnānasya māhātmyaṃ śṛṇu bhāgavatottama /
tvatsamo nāsti loke'sminviṣṇubhakto mahāmate

cakratīrthe hariṃ dṛṣṭvā mathurāyāṃ ca keśavam /
yatphalaṃ labhate martyo māghasnānena tatphalam

jiteṃdriyaḥ śāṃtamanāḥ sadācāreṇa saṃyutaḥ /
snānaṃ karoti yo māghe saṃsārī na bhavetpunaḥ

śrīkṛṣṇa uvāca/
śūkarasya ca māhātmyaṃ kathayiṣye tavāgrataḥ /
yasya vijñānamātreṇa sānnidhyaṃ mama sarvadā

sūta uvāca/
ityuktvā bhagavānkṛṣṇaḥ satyāyai bahudhā jagau /
tadahaṃ saṃpravakṣyāmi tacchṛṇudhvaṃ tapodhanāḥ

śrīkṛṣṇa uvāca/
paṃcayojanavistīrṇe śūkare harimaṃdire /
yasminvasati yo jīvo gardabho'pi caturbhujaḥ

trīṇi hastasahasrāṇi trīṇi hastaśatāni ca /
trayo hastā śūkarasya parimāṇaṃ vidhīyate

ṣaṣṭivarṣasahasrāṇi yo'nyatra kurute tapaḥ /
tatphalaṃ labhate devi praharārddhena śūkare

sannihatyāṃ kurukṣetre rāhugraste divākare /
tulāpuruṣadānena tatphalaṃ parikīrttitam

kāśyāṃ daśaguṇaṃ proktaṃ veṇyāṃ śataguṇaṃ bhavet /
sahasraguṇitaṃ proktaṃ gaṃgāsāgarasaṃgame

anaṃtaṃ caiva vijñeyaṃ śūkare harimaṃdire /
anyatra dadate lakṣaṃ saṃvidhānena kārtika

ihaivaikena dattena śūkare tatsamaṃ bhavet /
śūkare ca tathā veṇyāṃ gaṃgāsāgarasaṃgame

sakṛdeva naraḥ snātvā brahmahatyāṃ vyapohati /
alarkeṇa purā prāptā saptadvīpā vasuṃdharā /
śūkarakṣetramāhātmyaṃ śrutvā caiva ṣaḍānana

mārgaśīrṣasya dvādaśyāṃ śuklāyāṃ vraja putraka /
kārttikeya uvāca /
bhagavanśrotumicchāmi vratānāmuttamaṃ vratam /
vidhiṃ māsopavāsasya phalaṃ cāsya yathocitam

yathāvidhi naraiḥ kāryā vratacaryā yathā bhavet /
ārabhyate yathāpūrvaṃ samāpyaṃ hi yathāvidhi

yāvatsaṃkhyaṃ tu karttavyaṃ tatprabrūhi maheśvara /
vratametatsukhaśrīdaṃ vistareṇa mamānagha

śrīrudra uvāca/
pāvake sādhu sarvaṃ te yatpṛṣṭaṃ prabruve'nagha /
bhaktyā matimatāṃ śreṣṭha śṛṇuṣva gadato mama

surāṇāṃ ca yathā viṣṇustapatāṃ ca yathā raviḥ /
meruḥśikhariṇāṃ yadvadvainateyaśca pakṣiṇām

tīrthānāṃ tu yathā gaṃgā prajānāṃ tu yathā vaṇik /
śreṣṭhaṃ sarvavratānāṃ tu tadvanmāsopavāsanam

sarvavrateṣu yatpuṇyaṃ sarvatīrtheṣu caiva hi /
sarvadānodbhavaṃ caiva labhenmāsopavāsakṛt

agniṣṭomādibhiryajñairvividhairbhūridakṣiṇaiḥ /
na tatpuṇyamavāpnoti yanmāsaparilaṃghanāt

tena japtaṃ hutaṃ dattaṃ tapastaptaṃ kṛtaṃ svadhā /
yaḥ karoti vidhānena naro māsamupoṣaṇam

uddiśya vaiṣṇavaṃ yajñaṃ māmabhyarcya janārdanam /
gurorājñāṃ tato labdhvā kuryānmāsopavāsanam

vaiṣṇavāni yathoktāni kṛtvā sarvavratāni tu /
dvādaśyādīni puṇyāni tato māsamupāvaset

atikṛcchraṃ ca pārākaṃ kṛtvā cāṃdrāyaṇaṃ tataḥ /
māsopavāsaṃ kurvīta gurorviprājñayā tataḥ

āśvinasyāmale pakṣe ekādaśyāmupoṣitaḥ /
vratamenaṃ tu gṛhṇīyādyāvattriṃśaddināni tu

vāsudevaṃ samabhyarcya kārtikaṃ sakalaṃ naraḥ /
māsaṃ copavasedyastu sa muktiphalabhāgbhavet

acyutasyālaye bhaktyā trikālaṃ kumudaiḥ śubhaiḥ /
mālatīṃdīvarraibudhnaiḥ kamalaiśca sugaṃdhibhiḥ

kusumośīrakarpūrairvilipya varacaṃdanaiḥ /
naivedyāpūpadīpādyairarcayecca janārdanam

manasā karmaṇā vācā pūjayedgaruḍadhvajam /
kurvannaraḥ strī vidhavā bṛhadbhaktirjiteṃdriyaḥ

nāmnāmeva tathālāpaṃ viṣṇoḥ kuryādaharniśam /
bhaktyā viṣṇoḥ stutirvācyā mithyālāpavivarjitā

sarvasatvadayāyuktaḥ śāṃtavṛttirahiṃsakaḥ /
supto bāhyāsanastho vā vāsudevaṃ prakīrtayet

smṛtyālokanagaṃdhādi svādanaṃ parikīrttanam /
annasya varjayedvāsaṃ grāsānāṃ saṃpramokṣaṇam

gātrābhyaṃgaṃ śirobhyaṃgaṃ tāṃbūlaṃ savilepanam /
vratastho varjayetsarvaṃ yaccānyacca nirākṛtam

na vratasthaḥ spṛśetkiṃcidvikarmasthaṃ na cālayet /
devatāyatane tiṣṭhanna gṛhasthaścaretdhruvam

kṛtvā māsopavāsaṃ tu yathoktavidhinā naraḥ /
nārī vā vidhavā sādhvī vāsudevaṃ samarcayet

anyūnādhikamevaṃ tu vrataṃ triṃśaddinairidam /
kṛtvā māsopavāsaṃ tu saṃyatātmā jiteṃdriyaḥ

tato'rcayedeva puṇyaṃ dvādaśyāṃ garuḍadhvajam /
pūjayetpuṣpamālābhirgaṃdhadhūpavilepanaiḥ

vastrālaṃkāravādyaiśca toṣayedacyutaṃ naraḥ /
saṃsnāpayeddhariṃ bhaktyā tīrthacaṃdanavāribhiḥ

caṃdanenānuliptāṃgaṃ dhūpapuṣpairalaṃkṛtam /
vastradānādibhiścaiva bhojayitvā dvijottamān

dadyācca dakṣiṇāṃ tebhyaḥ praṇipatya kṣamāpayet /
evaṃ māsopavāsāddhi kṛtvābhyarcya janārdanam

bhojayitvā dvijāṃścaiva viṣṇuloke mahīyate /
evaṃ māsopavāsāṃte kṛtvā viprāntrayodaśa

niryāpayettatastānvai vidhinā yena tacchṛṇu /
kārayedvaiṣṇavaṃ yajñamekādaśyāmupoṣitaḥ

pūjayitvā tu deveśamācāryānujñayā harim /
arcayitvā yathāśaktyā hyabhivādya guruṃ tathā

tatonubhojayedviprānnamaskārapuraḥsaram /
viśuddhakulacāritra viṣṇupūjanatatparān

pūjayitvā tathā sarvānbhojayitvā trayodaśa /
tāṃbūlavastrayugmāni bhojanācchādanāni ca

yogapaṭṭāni sūtrāṇi brahmasūtrāṇi caiva hi /
dadyāccaiva dvijāgryebhyaḥ pūjayitvā praṇamya ca

tatonupūjayecchaktyā śayyāṃ staraṇasaṃskṛtām /
sācchādanāṃ śubhāṃ śreṣṭhāṃ sopadhānāmalaṃkṛtām

kārayitvātmanomūrtiṃ kāṃcanīṃ tu svaśaktitaḥ /
nyasettasyāṃ tu śayyāyāmarcayitvā sragādibhiḥ

āsanaṃ pādukāṃ chatraṃ vastrayugmamupānahau /
pavitrāṇi ca puṣpāṇi śayāyyāmupakalpayet

evaṃ śayyāṃ tu saṃkalpya praṇipatya ca tāndvijān /
prārthayeccānumodārthaṃ viṣṇulokaṃ vrajāmyaham

tato vrajennaraśreṣṭho viṣṇoḥ sthānamanāmayam /
maṃḍapasthāṃ stutānviprāniti vācyaṃ muhurmuhuḥ

maṃtrahīnaṃ kriyāhīnaṃ sarvahīnaṃ dvijottamāḥ /
sarvaṃsaṃpūrṇatāṃ yātu bhavadvākyaprasādataḥ /
vidhirmāsopavāsasya yathāvatparikīrtitaḥ

iti śrīpādme mahāpurāṇe paṃcapaṃcāśatsahasrasaṃhitāyā/
muttarakhaṃḍe kārtikamāhātmye śrīkṛṣṇasatyabhāmāsaṃvāde māso/
pavāsakathanaṃnāmaikonaviṃśatyadhikaśatatamo'dhyāyaḥ