Padma Purana · Chapter 6.106

pṛthuruvāca/
setihāsamimaṃ brahmanmāhātmyaṃ kathitaṃ tvayā /
atyāścaryakaraṃ samyaktulasyāstu śrutaṃ mahat

yadūrjavratinaḥ puṃsaḥ phalaṃ mahadudāhṛtam /
tatpunarbrūhi māhātmyaṃ kena cīrṇamidaṃ katham

nārada uvāca/
āsītsahyādriviṣaye karavīrapure purā /
brāhmaṇo dharmavitkaściddharmadatto'tiviśrutaḥ

viṣṇuvratakaraḥ śaśvadviṣṇupūjārataḥ sadā /
dvādaśākṣaravidyāyāṃ japaniṣṭho'tithipriyaḥ

kadācitkārtike māsi harijāgaraṇāya saḥ /
rātryā turyāṃśaśeṣāyāṃ jagāma harimaṃdiram

haripūjopakaraṇānpragṛhya vrajatā tadā /
tena dṛṣṭā samāyātā rākṣasī bhīmaniḥsvanā

vakradaṃṣṭrānanā jihvā nimagnā raktalocanā /
digaṃbarā śuṣkamāṃsā laṃboṣṭhī ghargharasvanā

tāṃ dṛṣṭvā bhayavitrastaḥ kaṃpitāvayavastadā /
pūjopakaraṇairvegātpayobhiścāhanadbhayāt

saṃsmṛtya ca harernāma tulasīyutavāriṇā /
sā hatā pātakaṃ tasmāttasyāḥ sarvamagātkṣayam

atha saṃsmṛtya sā pūrvajanmakarmavipākajam /
svāṃ daśāmabravītsarvāṃ daṃḍavattaṃ praṇamya sā

kalahovāca /
pūrvakarmavipākena daśāmetāṃ gatā hyaham /
tatkathaṃ tu punarvipra yāmyuttamagatiṃ śubhām

nārada uvāca/
tāṃ dṛṣṭvā praṇatāmagre vadamānāṃ svakarma tat /
atīva vismito viprastadā vacanamabravīt

dharmadatta uvāca/
kena karmavipākena tvaṃ daśāmīdṛśīṃ gatā /
kutastvaṃ kā ca kiṃ śīlā tatsarvaṃ kathayasva me

kalahovāca/
saurāṣṭranagare brahmanbhikṣunāmābhavaddvijaḥ /
tasyā'haṃ gṛhiṇī pūrvaṃ kalahākhyāti niṣṭhurā

na kadācinmayā bharturvacasāpi śubhaṃ kṛtam /
nārpitaṃ tasya miṣṭānnaṃ bharturvacanabhaṃgayā

kalahapriyayā nityaṃ bhayodvignastadā dvijaḥ /
pariṇetuṃ tadā'nyā sa matiṃ cakre patirmama

tato garaṃ samādāya prāṇāstyaktā mayā dvija /
atha badhvā badhyamānāṃ māṃ vininyuryamānugāḥ

yamaśca māṃ tadā dṛṣṭvā citraguptamapṛcchata /
yama uvāca/
anayā kiṃ kṛtaṃ karma citragupta vilokaya

prāpnotveṣā karmaphalaṃ śubhaṃ vāśubhameva ca /
citraguptastato vākyaṃ bhartsayansamuvāca ha

citragupta uvāca/
anayā tu śubhaṃ karma kṛtaṃ kiṃcinna vidyate /
miṣṭānnaṃ bhuktamanayā na bhartari tadarpitam

ataśca valgulī yonyāṃ svaviṣṭhādāvatiṣṭhatu /
bharturdveṣakarī tveṣā nityaṃ kalahakāriṇī

viṣṭhādā śūkarī yonyāṃ tatastiṣṭhatviyaṃ hare /
pākabhāṃḍe sadā bhuktaṃ nityaṃ caivānayā yataḥ

tasmāddoṣādbiḍālī tu svajātāpatyabhakṣiṇī /
bhartāramanayoddiśya hyātmaghātaḥ kṛto yataḥ

tasmātpretapiśāceṣu tiṣṭhatveṣātiniṃditā /
tataścaiva maruṃ deśaṃ prāpitavyā bhaṭaiḥ saha

tatra pretaśarīrākhyā ciraṃ tiṣṭhatviyaṃ tataḥ /
itthaṃ yonitrayaṃ tveṣā bhunaktvā śubhakāriṇī

kalahovāca-
sāhaṃ paṃcaśatābdāni pretadehe sthitā kila /
kṣutṛḍbhyāṃ pīḍitā nityaṃ duḥkhitā svena karmaṇā

tataḥ kṣutpīḍitā nityaṃ śarīraṃ vaṇijastvaham /
āyātā dakṣiṇaṃ deśaṃ kṛṣṇāveṇyāstu saṃgame

tattīrasaṃśritā yāvattāvattasya śarīrataḥ /
śivaviṣṇugaṇairdūramapākṛṣṭā balādaham

tataḥ kṣutkṣāmayā dṛṣṭo bhramaṃtyā tvaṃ mayā dvija /
prakṣiptatulasīvārisaṃsargagatapāpayā

tatkṛpāṃ kuru vipreṃdra kathaṃ muktimiyāmyaham /
yonitrayādati bhayādasmācca pretadehataḥ

itthaṃ niśamya kalahā vacanaṃ dvijaśca tatkarmapākabhavavismayaduḥkhayuktaḥ /
tadglānidarśanakṛpācalacittavṛttirdhyātvā ciraṃ sa vacanaṃ nijagāda duḥkhāt

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe kārtikamāhātmye kalahopākhyānaṃnāma ṣaḍadhikaśatatamo'dhyāyaḥ