પદ્મ પુરાણ · અધ્યાય 6.106

પૃથુરુવાચ।
સેતિહાસમિમં બ્રહ્મન્માહાત્મ્યં કથિતં ત્વયા ।
અત્યાશ્ચર્યકરં સમ્યક્તુલસ્યાસ્તુ શ્રુતં મહત્

યદૂર્જવ્રતિનઃ પુંસઃ ફલં મહદુદાહૃતમ્ ।
તત્પુનર્બ્રૂહિ માહાત્મ્યં કેન ચીર્ણમિદં કથમ્

નારદ ઉવાચ।
આસીત્સહ્યાદ્રિવિષયે કરવીરપુરે પુરા ।
બ્રાહ્મણો ધર્મવિત્કશ્ચિદ્ધર્મદત્તોઽતિવિશ્રુતઃ

વિષ્ણુવ્રતકરઃ શશ્વદ્વિષ્ણુપૂજારતઃ સદા ।
દ્વાદશાક્ષરવિદ્યાયાં જપનિષ્ઠોઽતિથિપ્રિયઃ

કદાચિત્કાર્તિકે માસિ હરિજાગરણાય સઃ ।
રાત્ર્યા તુર્યાંશશેષાયાં જગામ હરિમંદિરમ્

હરિપૂજોપકરણાન્પ્રગૃહ્ય વ્રજતા તદા ।
તેન દૃષ્ટા સમાયાતા રાક્ષસી ભીમનિઃસ્વના

વક્રદંષ્ટ્રાનના જિહ્વા નિમગ્ના રક્તલોચના ।
દિગંબરા શુષ્કમાંસા લંબોષ્ઠી ઘર્ઘરસ્વના

તાં દૃષ્ટ્વા ભયવિત્રસ્તઃ કંપિતાવયવસ્તદા ।
પૂજોપકરણૈર્વેગાત્પયોભિશ્ચાહનદ્ભયાત્

સંસ્મૃત્ય ચ હરેર્નામ તુલસીયુતવારિણા ।
સા હતા પાતકં તસ્માત્તસ્યાઃ સર્વમગાત્ક્ષયમ્

અથ સંસ્મૃત્ય સા પૂર્વજન્મકર્મવિપાકજમ્ ।
સ્વાં દશામબ્રવીત્સર્વાં દંડવત્તં પ્રણમ્ય સા

કલહોવાચ ।
પૂર્વકર્મવિપાકેન દશામેતાં ગતા હ્યહમ્ ।
તત્કથં તુ પુનર્વિપ્ર યામ્યુત્તમગતિં શુભામ્

નારદ ઉવાચ।
તાં દૃષ્ટ્વા પ્રણતામગ્રે વદમાનાં સ્વકર્મ તત્ ।
અતીવ વિસ્મિતો વિપ્રસ્તદા વચનમબ્રવીત્

ધર્મદત્ત ઉવાચ।
કેન કર્મવિપાકેન ત્વં દશામીદૃશીં ગતા ।
કુતસ્ત્વં કા ચ કિં શીલા તત્સર્વં કથયસ્વ મે

કલહોવાચ।
સૌરાષ્ટ્રનગરે બ્રહ્મન્ભિક્ષુનામાભવદ્દ્વિજઃ ।
તસ્યાઽહં ગૃહિણી પૂર્વં કલહાખ્યાતિ નિષ્ઠુરા

ન કદાચિન્મયા ભર્તુર્વચસાપિ શુભં કૃતમ્ ।
નાર્પિતં તસ્ય મિષ્ટાન્નં ભર્તુર્વચનભંગયા

કલહપ્રિયયા નિત્યં ભયોદ્વિગ્નસ્તદા દ્વિજઃ ।
પરિણેતું તદાઽન્યા સ મતિં ચક્રે પતિર્મમ

તતો ગરં સમાદાય પ્રાણાસ્ત્યક્તા મયા દ્વિજ ।
અથ બધ્વા બધ્યમાનાં માં વિનિન્યુર્યમાનુગાઃ

યમશ્ચ માં તદા દૃષ્ટ્વા ચિત્રગુપ્તમપૃચ્છત ।
યમ ઉવાચ।
અનયા કિં કૃતં કર્મ ચિત્રગુપ્ત વિલોકય

પ્રાપ્નોત્વેષા કર્મફલં શુભં વાશુભમેવ ચ ।
ચિત્રગુપ્તસ્તતો વાક્યં ભર્ત્સયન્સમુવાચ હ

ચિત્રગુપ્ત ઉવાચ।
અનયા તુ શુભં કર્મ કૃતં કિંચિન્ન વિદ્યતે ।
મિષ્ટાન્નં ભુક્તમનયા ન ભર્તરિ તદર્પિતમ્

અતશ્ચ વલ્ગુલી યોન્યાં સ્વવિષ્ઠાદાવતિષ્ઠતુ ।
ભર્તુર્દ્વેષકરી ત્વેષા નિત્યં કલહકારિણી

વિષ્ઠાદા શૂકરી યોન્યાં તતસ્તિષ્ઠત્વિયં હરે ।
પાકભાંડે સદા ભુક્તં નિત્યં ચૈવાનયા યતઃ

તસ્માદ્દોષાદ્બિડાલી તુ સ્વજાતાપત્યભક્ષિણી ।
ભર્તારમનયોદ્દિશ્ય હ્યાત્મઘાતઃ કૃતો યતઃ

તસ્માત્પ્રેતપિશાચેષુ તિષ્ઠત્વેષાતિનિંદિતા ।
તતશ્ચૈવ મરું દેશં પ્રાપિતવ્યા ભટૈઃ સહ

તત્ર પ્રેતશરીરાખ્યા ચિરં તિષ્ઠત્વિયં તતઃ ।
ઇત્થં યોનિત્રયં ત્વેષા ભુનક્ત્વા શુભકારિણી

કલહોવાચ-
સાહં પંચશતાબ્દાનિ પ્રેતદેહે સ્થિતા કિલ ।
ક્ષુતૃડ્ભ્યાં પીડિતા નિત્યં દુઃખિતા સ્વેન કર્મણા

તતઃ ક્ષુત્પીડિતા નિત્યં શરીરં વણિજસ્ત્વહમ્ ।
આયાતા દક્ષિણં દેશં કૃષ્ણાવેણ્યાસ્તુ સંગમે

તત્તીરસંશ્રિતા યાવત્તાવત્તસ્ય શરીરતઃ ।
શિવવિષ્ણુગણૈર્દૂરમપાકૃષ્ટા બલાદહમ્

તતઃ ક્ષુત્ક્ષામયા દૃષ્ટો ભ્રમંત્યા ત્વં મયા દ્વિજ ।
પ્રક્ષિપ્તતુલસીવારિસંસર્ગગતપાપયા

તત્કૃપાં કુરુ વિપ્રેંદ્ર કથં મુક્તિમિયામ્યહમ્ ।
યોનિત્રયાદતિ ભયાદસ્માચ્ચ પ્રેતદેહતઃ

ઇત્થં નિશમ્ય કલહા વચનં દ્વિજશ્ચ તત્કર્મપાકભવવિસ્મયદુઃખયુક્તઃ ।
તદ્ગ્લાનિદર્શનકૃપાચલચિત્તવૃત્તિર્ધ્યાત્વા ચિરં સ વચનં નિજગાદ દુઃખાત્

ઇતિ શ્રીપાદ્મે મહાપુરાણે પંચપંચાશત્સહસ્રસંહિતાયામુત્તરખંડે કાર્તિકમાહાત્મ્યે કલહોપાખ્યાનંનામ ષડધિકશતતમોઽધ્યાયઃ