Padma Purana · Chapter 5.93

nārada uvāca-
jātūkarṇavacaścitramevamākarṇya bhūpatiḥ /
tamuvāca namaskṛtya jñāninaṃ munimādarāt

divodāsa uvāca-
kathameṣā vimucyeta duḥkhādasmānmunedhunā /
jātūkarṇa uvāca-/
kathayāmi mahatpuṇyaṃ yeneyaṃ sukhitā bhavet

aprakāśamapi prāyaḥ pravakṣyāmi tavāgrataḥ /
svalpamapyadbhutaṃ karma vikarmaśatanāśanam

yathā harerdhyānabalena pāpaṃ vināśamāyāti mahatsamagram /
prātastadā mādhavamāsadānasnānena ghoraṃ vilayaṃ prayāti

yathā harerbhītibhayena nāgā naśyaṃti sarve nicayāstathaiva /
nūnaṃ ravau meṣagate vibhāti snānena tīrthe ca haristavena

tejasā vainateyasya pannagā iva pātakāḥ /
vidravaṃti ca vaiśākhasnānenoṣasi niścitam

tasmāddeyāpi bhūpāla divyādevī punaḥ svayam /
kṛtvā vaiśākhaśravaṇaṃ śrutvā pāpaharaṃ stavam

bhavitrī bhartuḥ saṃyogasukhasaṃbhogabhāginī /
sudevo'pi sa jātosti pāṃḍyadeśādhipo balī

vaiśākhamāsi revāyāṃ snānapuṇyena bhūpate /
tasmā eva sutāṃ dehi viśuddhāṃ snānatastathā

mādhavasya punaḥ stotraṃ śravaṇānmādhavasya ca /
saṃdeho nātra kartavyo vicitraṃ paśya bhūpate

ihāmutraphalaṃ tasya samākhyaṃ puṇyakarmaṇaḥ /
nārada uvāca-
ityākarṇyaiva mudito rājā tamakhilaṃ tataḥ

kārayāmāsa tāṃ putrīṃ jātūkarṇoditaṃ vidhim /
vīrasenena tenaiva pāṃḍyadeśādhipena sā

purājanmaikasuhṛdā divyādevī vivāhitā /
bubhuje bhūriviṣayāṃściraṃ sucaritavratā

vīresenena suhṛdā pūrvajanmakṛtena ca /
etatte kiṃcidākhyātamaṃbarīṣa samāsataḥ

vaiśākhasnānamāhātmyaṃ kimanyacchrotumarhasi

iti śrīpadmapurāṇe pātālakhaṃḍe vaiśākhamāsamāhātmye citropākhyāne/
trinavatitamo'dhyāyaḥ