પદ્મ પુરાણ · અધ્યાય 5.93

નારદ ઉવાચ-
જાતૂકર્ણવચશ્ચિત્રમેવમાકર્ણ્ય ભૂપતિઃ ।
તમુવાચ નમસ્કૃત્ય જ્ઞાનિનં મુનિમાદરાત્

દિવોદાસ ઉવાચ-
કથમેષા વિમુચ્યેત દુઃખાદસ્માન્મુનેધુના ।
જાતૂકર્ણ ઉવાચ-।
કથયામિ મહત્પુણ્યં યેનેયં સુખિતા ભવેત્

અપ્રકાશમપિ પ્રાયઃ પ્રવક્ષ્યામિ તવાગ્રતઃ ।
સ્વલ્પમપ્યદ્ભુતં કર્મ વિકર્મશતનાશનમ્

યથા હરેર્ધ્યાનબલેન પાપં વિનાશમાયાતિ મહત્સમગ્રમ્ ।
પ્રાતસ્તદા માધવમાસદાનસ્નાનેન ઘોરં વિલયં પ્રયાતિ

યથા હરેર્ભીતિભયેન નાગા નશ્યંતિ સર્વે નિચયાસ્તથૈવ ।
નૂનં રવૌ મેષગતે વિભાતિ સ્નાનેન તીર્થે ચ હરિસ્તવેન

તેજસા વૈનતેયસ્ય પન્નગા ઇવ પાતકાઃ ।
વિદ્રવંતિ ચ વૈશાખસ્નાનેનોષસિ નિશ્ચિતમ્

તસ્માદ્દેયાપિ ભૂપાલ દિવ્યાદેવી પુનઃ સ્વયમ્ ।
કૃત્વા વૈશાખશ્રવણં શ્રુત્વા પાપહરં સ્તવમ્

ભવિત્રી ભર્તુઃ સંયોગસુખસંભોગભાગિની ।
સુદેવોઽપિ સ જાતોસ્તિ પાંડ્યદેશાધિપો બલી

વૈશાખમાસિ રેવાયાં સ્નાનપુણ્યેન ભૂપતે ।
તસ્મા એવ સુતાં દેહિ વિશુદ્ધાં સ્નાનતસ્તથા

માધવસ્ય પુનઃ સ્તોત્રં શ્રવણાન્માધવસ્ય ચ ।
સંદેહો નાત્ર કર્તવ્યો વિચિત્રં પશ્ય ભૂપતે

ઇહામુત્રફલં તસ્ય સમાખ્યં પુણ્યકર્મણઃ ।
નારદ ઉવાચ-
ઇત્યાકર્ણ્યૈવ મુદિતો રાજા તમખિલં તતઃ

કારયામાસ તાં પુત્રીં જાતૂકર્ણોદિતં વિધિમ્ ।
વીરસેનેન તેનૈવ પાંડ્યદેશાધિપેન સા

પુરાજન્મૈકસુહૃદા દિવ્યાદેવી વિવાહિતા ।
બુભુજે ભૂરિવિષયાંશ્ચિરં સુચરિતવ્રતા

વીરેસેનેન સુહૃદા પૂર્વજન્મકૃતેન ચ ।
એતત્તે કિંચિદાખ્યાતમંબરીષ સમાસતઃ

વૈશાખસ્નાનમાહાત્મ્યં કિમન્યચ્છ્રોતુમર્હસિ

ઇતિ શ્રીપદ્મપુરાણે પાતાલખંડે વૈશાખમાસમાહાત્મ્યે ચિત્રોપાખ્યાને।
ત્રિનવતિતમોઽધ્યાયઃ