Padma Purana · Chapter 5.73

īśvara uvāca-/
yattvayā pṛṣṭamāścaryaṃ tanmayā bhāṣitaṃ kramāt /
yatra muhyaṃti brahmādyāstatra ko vā na muhyati

tathāpi te pravakṣyāmi yaduktaṃ paramarṣiṇā /
mahārājamaṃbarīṣaṃ viṣṇubhaktaṃ śivānvitam

badaryāśramamāsādya samāsīnaṃ jiteṃdriyam /
rājā praṇamya tuṣṭāva viṣṇudharmavivitsayā

vedavyāsaṃ mahābhāgaṃ sarvajñaṃ puruṣottamam /
māṃ tvaṃ saṃsāraduṣpāre paritrātumihārhasi

viṣayeṣu virakto'smi namastebhyo namokhilam /
yattatpadamanudvignaṃ saccidānaṃdavigraham

paraṃ brahma parākāśamanākāśamanāmayam /
yatsākṣātkṛtya munayo bhavāṃbhodhiṃ taraṃti hi

tatrāhaṃ manaso nityaṃ kathaṃ gatimavāpnuyām /
vyāsa uvāca-/
atigopyaṃ tvayā pṛṣṭaṃ yanmayā na śukaṃ prati

gaditaṃ svasutaṃ kiṃtu tvāṃ vakṣyāmi haripriyam /
āsīdidaṃ paraṃ viśvaṃ yadrūpaṃ yatpratiṣṭhitam

avyākṛtamavyathitaṃ tadīśvaramayaṃ śṛṇu /
mayā kṛtaṃ tapaḥ pūrvaṃ bahuvarṣasahasrakam

phalamūlapalāśāṃbu vāyvāhāraniṣeviṇā /
tato māmāhabhagavānsvadhyānanirataṃ hariḥ

kasminnarthe cikīrṣāte vivitsā vā mahāmate /
prasanno'smi vṛṇuṣva tvaṃ varaṃ ca varadarṣabhāt

maddarśanāṃtaḥ saṃsāra iti satyaṃ bravīmi te /
tato'hamabruvaṃ kṛṣṇaṃ pulakotphullavigrahaḥ

tvāmahaṃ draṣṭumicchāmi cakṣurbhyāṃ madhusūdana /
yattatsatyaṃ paraṃ brahma jagajjyotiṃ jagatpatim

vadaṃti vedaśirasaścākṣuṣaṃ nāthamadbhutam /
śrībhagavānuvāca-/
brahmaṇaivaṃ purā pṛṣṭaḥ prārthitaśca yathā purā

yadavocamahaṃ tasmai tattubhyamapi kathyate /
māmeke prakṛtiṃ prāhuḥ puruṣaṃ ca tatheśvaram

dharmameke dhanaṃ caike mokṣameke'kutobhayam /
śūnyameke bhāvameke śivameke sadāśivam

apare vedaśirasi sthitamekaṃ sanātanam /
sadbhāvaṃ vikriyāhīnaṃ saccidānaṃdavigraham

paśyādya darśayiṣyāmi svarūpaṃ vedagopitam /
tato'paśyaṃ bhūpabālamahaṃ kālāṃbudaprabham

gopakanyāvṛtaṃ gopaṃ hasaṃtaṃ gopabālakaiḥ /
kadaṃbamūlaāsīnaṃ pītavāsasamadbhutam

vanaṃ vṛṃdāvanaṃ nāma navapallavamaṃḍitam /
kokilabhramarārāvaṃ manobhava manoharam

nadīmapaśyaṃ kāliṃdīmiṃdīvaradalaprabhām /
govarddhanamathāpaśyaṃ kṛṣṇarāmakaroddhṛtam

maheṃdradarpanāśāya gogopālasukhāvaham /
gopālamabalāsaṃgamuditaṃ veṇuvādinam

dṛṣṭvātihṛṣṭo hyabhavaṃ sarvabhūṣaṇabhūṣaṇam /
tato māmāha bhagavānvṛṃdāvanacaraḥ svayam

yadidaṃ me tvayā dṛṣṭaṃ rūpaṃ divyaṃ sanātanam /
niṣkalaṃ niṣkriyaṃ śāṃtaṃ saccidānaṃdavigraham

pūrṇaṃ padmapalāśākṣaṃ nātaḥ parataraṃ mama /
idamevavadaṃtyetevedāḥkāraṇakāraṇam

satyaṃnityaṃparānaṃdaṃcidghanaṃśāśvataṃśivam /
nityāṃ me mathurāṃ viddhi vanaṃ vṛṃdāvanaṃ tathā

yamunāṃ gopakanyāśca tathā gopālabālakāḥ /
mamāvatāro nityo'yamatra mā saṃśayaṃ kṛthāḥ

mameṣṭā hi sadā rādhā sarvajño'haṃ parātparaḥ /
sarvakāmaśca sarveśaḥ sarvānaṃdaḥ parātparaḥ

mayi sarvamidaṃ viśvaṃ bhāti māyāvijṛṃbhitam /
tato'hamabruvaṃ devaṃ jagatkāraṇakāraṇam

kāśca gopyastu ke gopā vṛkṣo'yaṃ kīdṛśo mataḥ /
vanaṃ kiṃ kokilādyāśca nadī keyaṃ giriśca kaḥ

ko'sau veṇurmahābhāgo lokānaṃdaikabhājanam /
bhagavānāha māṃ prītaḥ prasannavadanāṃbujaḥ

gopyastu śrutayo jñeyā ṛco vai gopakanyakāḥ /
devakanyāśca rājeṃdra tapoyuktā mumukṣavaḥ

gopālā munayaḥ sarve vaikuṃṭhānaṃdamūrttayaḥ /
kalpavṛkṣaḥ kadaṃbo'yaṃ parānaṃdaikabhājanam

vanamānaṃdakākhyaṃ hi mahāpātakanāśanam /
siddhāśca sādhyā gaṃdharvāḥ kokilādyā na saṃśayaḥ

kecidānaṃdahṛdayaṃ sākṣādyamunayā tanum /
anādirharidāso'yaṃ bhūdharo nātra saṃśayaḥ

veṇuryaḥ śṛṇutaṃ vipraṃ tavāpi viditaṃ tathā /
dvija āsīcchāṃtamanāstapaḥ śāṃtiparāyaṇaḥ

nāmnā devavratodāṃtaḥ karmakāṃḍaviśāradaḥ /
sa vaiṣṇavajanavrātamadhyavarttī kriyāparaḥ

sa kadācana śuśrāva yajñeśo'stīti bhūpate /
tasya gehamathābhyāgāddvijo madgataniścayaḥ

sa madbhaktaḥ kvacitpūjāṃ tulasīdalavāriṇā /
kṛtavāṃstadgṛhe kiṃcitphalaṃ mūlaṃ nyavedayat

snānavāriphalaṃ kiṃcittasmai matyā dadau sudhīḥ /
aśraddhayā smitaṃ kṛtvā so'pyagṛhṇāddvijanmanaḥ

tena pāpena saṃjātaṃ veṇutvamatidāruṇam /
tena puṇyena tasyātha madīya priyatāṃ gataḥ

amunā sopi rājeṃdra ketumāniva rājate /
yugāṃte tadviṣṇuparo bhūtvā brahma samāpsyati

aho na jānaṃti narā durāśayāḥ purīṃ madīyāṃ paramāṃ sanātanīm /
sureṃdra nāgeṃdra munīṃdra saṃstutāṃ manoramāṃ tāṃ mathurāṃ purātanīm

kāśyādayo yadyapi saṃti puryastāsāṃ tu madhye mathuraiva dhanyā /
yajjanmamauṃjīvratamṛtyudāhairnṛṇāṃ caturddhā vidadhāti muktim

yadā viśuddhāstapaādinā janāḥ śubhāśayā dhyānadhanā niraṃtaram /
tadaiva paśyaṃti mamottamāṃ purīṃ na cānyathā kalpaśatairdvijottamāḥ

mathurāvāsino dhanyā mānyā api divaukasām /
agaṇyamahimānaste sarva eva caturbhujāḥ

mathurāvāsino ye tu doṣānpaśyaṃti mānavāḥ /
teṣu doṣaṃ na paśyaṃti janmamṛtyusahasrajam

adhanā api te dhanyā mathurāṃ ye smaraṃti te /
yatra bhūteśvaro devo mokṣadaḥ pāpināmapi

mama priyatamo nityaṃ devo bhūteśvaraḥ paraḥ /
yaḥ kadāpi mama prītyai na saṃtyajati tāṃ purīm

bhūteśvaraṃ yo na namenna pūjayenna vāsmaredduścarito manuṣyaḥ /
naināṃ sa paśyenmathurāṃ madīyāṃ svayaṃprakāśāṃ paradevatākhyām

na kathaṃ mayi bhaktiṃ sa labhate pāpapūruṣaḥ /
yo madīyaṃ paraṃ bhaktaṃ śivaṃ saṃpūjayennahi

manmāyāmohitadhiyaḥ prāyaste mānavādhamāḥ /
bhūteśvaraṃ na namaṃti na smaraṃti stuvaṃti ye

bālako'pi dhruvo yatra mamārādhanatatparaḥ /
prāpa sthānaṃ paraṃ śuddhaṃ yatnayuktaṃ pitāmahaiḥ

tāṃ purīṃ prāpya mathurāṃ madīyāṃ suradurlabhām /
khaṃjo bhūtvāṃdhako vāpi prāṇāneva parityajet

vedavyāsamahābhāga mā kṛthāḥ saṃśayaṃ kvacit /
rahasyaṃ vedaśirasāṃ yanmayā te prakāśitam

imaṃ bhagavatā proktamadhyāyaṃ yaḥ paṭhecchuciḥ /
śṛṇuyādvāpi yo bhaktyā muktistasyāpi śāśvatī

iti śrīpadmapurāṇe pātālakhaṃḍe vṛṃdāvanādimathurāmāhātmyakathanaṃnāma trisaptatitamo'dhyāyaḥ