Scripture Library

Padma Purana · Chapter 5.72

5.72.1

īśvara uvāca-/
tadekāgramanā bhūtvā śṛṇu devi varānane /
āsīdugratapā nāma munireko dṛḍhavrataḥ

5.72.2

sāgniko hyagnibhakṣaśca cacārātyadbhutaṃ tapaḥ /
jajāpa paramaṃ jāpyaṃ maṃtraṃ paṃcadaśākṣaram

5.72.3

kāmamaṃtreṇa puṭitaṃ kāmaṃ kāmavarapradāt /
kṛṣṇāyeti padaṃ svāhā sahitaṃ siddhidaṃ param

5.72.4

dadhyau ca śyāmalaṃ kṛṣṇaṃ rāsonmattaṃ varotsukam /
pītapaṭṭadharaṃ veṇuṃ kareṇādharamarpitam

5.72.5

navayauvanasaṃpannaṃ karṣaṃtaṃ pāṇinā priyām /
evaṃ dhyānaparaḥ kalpaśatāṃte dehamutsṛjan

5.72.6

sunaṃda nāma gopasya kanyābhūtsa mahāmuniḥ /
sunaṃdeti samākhyātā yā vīṇāṃ bibhratī kare

5.72.7

muniranyaḥ satyatapā iti khyāto mahāvrataḥ /
saśuṣkapatraṃ bhuṃkte yaḥ prajajāpa paraṃ manum

5.72.8

ratyaṃtaṃ kāmabījena puṭitaṃ ca daśākṣaram /
sa pradadhyau munivaraścitraveṣadharaṃ harim

5.72.9

dhṛtvā ramāyā dorvallīdvitayaṃ kaṃkaṇojjvalam /
nṛtyaṃtamunmadaṃtaṃ ca saṃśliṣyaṃ taṃ muhurmuhuḥ

5.72.10

hasaṃtamuccairānaṃdataraṃgaṃ jaṭharāṃbare /
dadhataṃ veṇumājānu vaijayaṃtyā virājitam

5.72.11

svedāṃbhaḥ kaṇasaṃsikta lalāṭavalitānanam /
tyaktvā tyaktvā sa vai dehaṃ tapasā ca mahāmuniḥ

5.72.12

daśakalpāṃtare jāto hyayaṃ naṃdavanādiha /
subhadra nāmno gopasya kanyā bhadreti viśrutā

5.72.13

yasyāḥ pṛṣṭhatale divyaṃ vyajanaṃ paridṛśyate /
haridhāmābhidhānastu kaścidāsīnmahāmuniḥ

5.72.14

so'pyatapyattapaḥ kṛcchraṃ nityaṃ patraikabhojanam /
āśusiddhikaraṃ maṃtraṃ viṃśatyarṇaṃ prajaptavān

5.72.15

anaṃtaraṃ kāmabījādadhyārūḍhaṃ tadeva tu /
māyā tatpurato vyoma haṃsāsṛgdyuticaṃdrakam

5.72.16

tato daśākṣaraṃ paścānnamoyuktaṃ smarādikam /
dadhyau vṛṃdāvane ramye mādhavīmaṃḍape prabhum

5.72.17

uttānaśāyinaṃ cārupallavāstaraṇopari /
kayācidatikāmārtta ballavyā raktanetrayā

5.72.18

vakṣojayugamācchādya vipuloraḥ sthalaṃ muhuḥ /
saṃcuṃbyamānagaṃḍāṃtaṃ tṛpyamānaradacchadam

5.72.19

kalayaṃtaṃ priyāṃ dorbhyāṃ sahāsaṃ samudādbhutam /
sa muniśca bahūndehāṃ styaktvā kalpatrayāṃtare

5.72.20

sāraṃganāmno gopasya kanyābhūcchubhalakṣaṇā /
raṃgaveṇīti vikhyātā nipuṇā citrakarmaṇi

5.72.21

yasyā daṃteṣu dṛśyaṃte citritāḥ śoṇabiṃdavaḥ /
brahmavādī muniḥ kaścijjābāliriti viśrutaḥ

5.72.22

satapaḥ surato yogī vicaranpṛthivīmimām /
sa ekasminmahāraṇye yojanāyutavistṛte

5.72.23

yadṛcchayāgato'paśyadekāṃ vāpīṃ suśobhanām /
sarvataḥ sphāṭikābaṃdhataṭāṃ svādujalānvitām

5.72.24

vikāsikamalāmodavāyunā pariśīlitām /
tasyāḥ paścimadigbhāge mūle vaṭamahīruhaḥ

5.72.25

apaśyattāpasīṃ kāṃcitkurvaṃtīṃ dāruṇaṃ tapaḥ /
tāruṇyavayasāyuktāṃ rūpeṇāti manoharām

5.72.26

caṃdrāṃśuṃ sadṛśābhāsāṃ sarvāvayavaśobhanām /
kṛtvā kaṭitaṭe vāmapāṇiṃ dakṣiṇatastadā

5.72.27

jñānamudrāṃ ca bibhrāṇāmanimeṣavilocanām /
tyaktāhāravihārāṃ ca suniścalatayāsthitām

5.72.28

jijñāsustāṃ munivarastasthau tatra śataṃ samāḥ /
tadaṃte tāṃ samutthāpya calitāṃ vinayānmuniḥ

5.72.29

apṛcchatkā tvamāścaryarūpe kiṃ vā cariṣyasi /
yadi yogyaṃ bhavettarhi kṛpayā vaktumarhasi

5.72.30

athābravīcchanairbālā tapasātīva karśitā /
brahmavidyāhamatulā yogīṃdrairyā vimṛgyate

5.72.31

sāhaṃ haripadāmbhojakāmyayā suciraṃ tapaḥ /
carāmyasminvane ghore dhyāyaṃtī puruṣottamam

5.72.32

brahmānaṃdena pūrṇāhaṃ tenānaṃdena tṛptadhīḥ /
tathāpi śūnyamātmānaṃ manye kṛṣṇaratiṃ vinā

5.72.33

idānīmatinirviṇṇā dehasyāsya visarjjanam /
karttumicchāmi puṇyāyāṃ vāpikāyāmihaiva tu

5.72.34

tacchrutvā vacanaṃ tasyā muniratyaṃtavismitaḥ /
patitvā caraṇe tasyāḥ kṛṣṇopāsāvidhiṃ śubham

5.72.35

papraccha paramaprītastyaktvādhyātmavirocanam /
tayoktaṃ maṃtramājñāya jagāma mānasaṃ saraḥ

5.72.36

tato'tiduścaraṃ cakre tapo vismayakārakam /
ekapādasthitaḥ sūryaṃ nirnimeṣaṃ vilokayan

5.72.37

maṃtraṃ jajāpa paramaṃ paṃcaviṃśativarṇakam /
dadhyau paramabhāvena kṛṣṇamānaṃdarūpiṇam

5.72.38

caraṃtaṃ vrajavīthīṣu vicitragatilīlayā /
lalitaiḥ pādavinyāsaiḥ kvaṇayaṃtaṃ ca nūpuram

5.72.39

citrakaṃdarpaceṣṭābhiḥ sasmitāpāṃgavīkṣitaiḥ /
saṃmohanākhyayā vaṃśyā paṃcamāruṇacitrayā

5.72.40

biṃbauṣṭhapuṭacuṃbinyā kalālāpairmanojñayā /
haraṃtaṃ vrajarāmāṇāṃ manāṃsi ca vapūṃṣi ca

5.72.41

ślathannīvībhirāgatya sahasāliṃgitāṃgakam /
divyamālyāṃbaradharaṃ divyagaṃdhānulepanam

5.72.42

śyāmalāṃgaprabhāpūrṇairmohayaṃtaṃ jagattrayam /
sa evaṃ bahudevena samupāsya jagatpatim

5.72.43

navakalpāṃtare jātā gokule divyarūpiṇī /
kanyā pracaṃḍanāmnastu gopasyāti yaśasvinaḥ

5.72.44

citragaṃdheti vikhyātā kumārī ca śubhānanā /
nijāṃgagaṃdhairvividhairmodayaṃtī diśo daśa

5.72.45

tāmenāṃ paśya kalyāṇīṃ vṛṃdaśo madhupāyinīm /
aṃgeṣu svapatiṃ kṛtvā rasāveśasamākulām

5.72.46

asyāḥ stanapariṣvaṃge hāraiḥ sarvairvihanyate /
vakṣaḥsthalātpracyavadbhiścitragaṃdhādisaurabhaiḥ

5.72.47

apare munivaryāstu satataṃ pūtamānasāḥ /
vāyubhakṣāstapastepurjapaṃtaḥ paramaṃ manum

5.72.48

smaraḥ kṛṣṇāya kāmārti kalādivṛttiśāline /
āgneyīsahitaṃ kṛtvā maṃtraṃ paṃcadaśākṣaram

5.72.49

dadhyurmunivarāḥ kaṣṇamūrtiṃ divyavibhūṣaṇām /
divyacitradukūlena pūrṇapīnakaṭisthalām

5.72.50

mayūrapicchakaiḥ kḷptacūḍāmujjvalakuṃḍalām /
savyajaṃghāṃta ādāya dakṣiṇaṃ caraṇāṃbujam

5.72.51

bhramaṃtīṃ saṃpuṭīkṛtya cāruhastāṃbujadvayam /
kakṣadeśavinikṣiptaveṇuṃ paricalatpuṭīm

5.72.52

ānaṃdayaṃtīṃ gopīnāṃ nayanāni manāṃsi ca /
paramāścaryarūpeṇa praviṣṭāṃ raṃgamaṃḍape

5.72.53

prasūnavarṣargopībhiḥ pūryamāṇāṃ ca sarvataḥ /
atha kalpāṃtare dehaṃ tyaktvā jātā ihādhunā

5.72.54

yāsāṃ karṇeṣu dṛśyaṃte tāṭaṃkā raśmidīpitāḥ /
ratnamālyāni kaṃṭheṣu ratnapuṣpāṇi veṇiṣu

5.72.55

muniḥ śuciśravā nāma suvarṇo nāma cāparaḥ /
kuśadhvajasya brahmarṣeḥ putrau tau vedapāragau

5.72.56

ūrdhvapādau tapo ghoraṃ tepatustryakṣaraṃ manum /
hrīṃ haṃsa iti kṛtvaiva japaṃtau yatamānasau

5.72.57

dhyāyaṃtau gokule kṛṣṇaṃ bālakaṃ daśavārṣikam /
kaṃdarpasamarūpeṇa tāruṇyalalitena ca

5.72.58

paśyaṃtīrvrajabiṃboṣṭhīrmohayaṃtamanāratam /
tau kalpāṃte tanūṃ tyaktvā labdhavaṃtau janiṃ vraje

5.72.59

suvīranāma gopasya sute paramaśobhane /
yayorhaste pradṛśyete sārike śubharāviṇī

5.72.60

jaṭilo jaṃghapūtaśca ghṛtāśī karbureva ca /
catvāro munayo dhanyā ihāmutra ca niḥspṛhāḥ

5.72.61

kevalenaikabhāvena prapannā ballavīpatim /
tepuste salile magnā japaṃto manumeva ca

5.72.62

ramātrayeṇa puṭitaṃ smarādyaṃ tadaśākṣaram /
dadhyuśca gāḍhabhāvena ballavībhirvane vane

5.72.63

bhramaṃtaṃ nṛtyagītādyairmānayaṃtaṃ manoharam /
caṃdanāliptasarvāṃgaṃ japāpuṣpāvataṃsakam

5.72.64

kalhāramālayāvītaṃ nīlapītapaṭāvṛtam /
kalpatrayāṃte jātāste gokule śubhalakṣaṇāḥ

5.72.65

imāstāḥ purato ramyā upaviṣṭā natabhruvaḥ /
yāsāṃ dharmakṛtānyeva valayāni prakoṣṭhake

5.72.66

vicitrāṇi ca ratnādyairdivyamuktāphalādibhiḥ /
munirdīrghatapā nāma vyāso'bhūtpūrvakalpake

5.72.67

tatputraḥ śuka ityeva muniḥ khyāto varaḥ sudhīḥ /
so'pi bālo mahāprājñaḥ sadaivānusmaranpadam

5.72.68

vihāya pitṛmātrādi kṛṣṇaṃ dhyātvā vanaṃ gataḥ /
sa tatra mānasairdivyairupacārairaharniśam

5.72.69

anāhāro'rcayadviṣṇuṃ goparūpiṇamīśvaram /
ramayā puṭitaṃ maṃtraṃ japannaṣṭādaśākṣaram

5.72.70

dadhyau paramabhāvena hariṃ haimataroradhaḥ /
haimamaṃḍapikāyāṃ ca hemasiṃhāsanopari

5.72.71

āsīnaṃ hemahastāgrairdadhānaṃ hemavaṃśikām /
dakṣiṇena bhrāmayaṃtaṃ pāṇinā hemapaṃkajam

5.72.72

hemavarṇeṣṭapriyayā parikḷptāṃgacitrakam /
hasaṃtamatiharṣeṇa paśyaṃtaṃ nijamāśramam

5.72.73

harṣāśrupūrṇaḥ pulakācitāṃgaḥ prasīdanātheti vadannathoccaiḥ /
daṃḍapraṇāmāya papāta bhūmau saṃvepamānastrijagadvidhātuḥ

5.72.74

taṃ bhaktikāmaṃ patitaṃ dharaṇyāmāyāsitosmīti vadaṃtamuccaiḥ /
daṃḍapraṇāmasya bhujau gṛhītvā pasparśa harṣopacitekṣaṇena

5.72.75

uvāca ca priyārūpaṃ labdhavaṃtaṃ śukaṃ hariḥ /
tvaṃ me priyatamā bhadre sadā tiṣṭha mamāṃtike

5.72.76

madrūpaṃ ciṃtayaṃtī ca premāspadamupāgatā /
dve ca mukhyatame gopyau samānavayasī śubhe

5.72.77

ekavrate ekaniṣṭhe ekanakṣatranāmanī /
taptajāṃbūnadaprakhyā tatraivānyā taḍitprabhā

5.72.78

ekānidrā yamāṇākṣī parā saumyāyatekṣaṇā /
so'rcayatparayā bhaktyā te hareḥ savyadakṣiṇe

5.72.79

sa kalpāṃte tanuṃ tyaktvā gokule'bhūnmahātmanaḥ /
upanaṃdasya duhitā nīlotpaladalacchaviḥ

5.72.80

seyaṃ śrīkṛṣṇavanitā pītaśāṭīparicchadā /
raktacolikayā pūrṇā śātakuṃbhaghaṭastanī

5.72.81

dadhānā raktasiṃdūraṃ sarvāṃgasyāvaguṃṭhanam /
svarṇakuṃḍalavibhrājadgaṃḍadeśāṃ suśobhanām

5.72.82

svarṇapaṃkajamālāḍhyā kuṃkumāliptasustanī /
yasyā haste carvaṇīyaṃ dṛśyate hariṇārpitam

5.72.83

veṇuvādyātinipuṇā keśavasya niṣevaṇī /
kṛṣṇena parituṣṭena kadācidgītakarmaṇi

5.72.84

vinyastā kaṃbukaṃṭhe'syā bhāti guṃjāvali śubhā /
parokṣepi ca kṛṣṇasya kāṃtibhiśca smarārditā

5.72.85

sakhībhirvādayaṃtībhirgāyaṃtī susvaraṃ param /
narttayetpriyaveṣeṇa veṣayitvā vadhūmimām

5.72.86

vāraṃvāraṃ ca goviṃdaṃ bhāvenāliṃgya cuṃbati /
priyāsau sarvagopīnāṃ kṛṣṇasyāpyativallabhā

5.72.87

śvetaketoḥ sutaḥ kaścidvedavedāṃgapāragaḥ /
sarvameva parityajya pracaṃḍaṃ tapa āsthitaḥ

5.72.88

murāreḥ sevitapadāṃ sudhāmadhuranādinīm /
goviṃdasya priyāṃ śaktiṃ brahmarudrādidurgamām

5.72.89

bhajaṃtīmekabhāvena śriyameva manoharām /
dhyāyañjajāpa satataṃ maṃtramekādaśākṣaram

5.72.90

hasitaṃ sakalaṃ kṛtvā batamāyeṣu yojayan /
kāṃtyādibhirhasaṃtībhirvāsayaṃtyabhito jagat

5.72.91

vasaṃte vasatetyevaṃ maṃtrārthaṃ ciṃtayansadā /
so'pi kalpadvayenaiva siddho'tra janimāptavān

5.72.92

seyaṃ bālāyate putrī kṛśāṃgī kuḍmalastanī /
muktāvalilasatkaṃṭhī śuddhakauśeyavāsinī

5.72.93

muktācchuritamaṃjīrakaṃkaṇāṃgadamudrikā /
bibhratī kuṃḍale divye amṛtasrāviṇī śubhe

5.72.94

vṛttakastūrikāveṇī madhye siṃdūrabiṃduvat /
dadhānā citrakaṃ bhāle sārddhaṃ caṃdanacitrakaiḥ

5.72.95

yā saiva dṛśyate śāṃtā japaṃtī paramaṃ padam /
āsīccaṃdraprabho nāma rājarṣiḥ priyadarśanaḥ

5.72.96

tasya kṛṣṇaprasādena putro'bhūnmadhurākṛtiḥ /
citradhvaja iti khyātaḥ kaumārāvadhi vaiṣṇavaḥ

5.72.97

sa rājā susutaṃ saumyaṃ susthiraṃ dvādaśābdikam /
ādeśayaddvijānmaṃtraṃ paramaṣṭādaśākṣaram

5.72.98

abhiṣicyamānaḥ sa śiśurmaṃtrāmṛtamayairjalaiḥ /
tatkṣaṇe bhūpatiṃ premṇā natvodaśruprakalpitaḥ

5.72.99

tasmindine sa vai bālaḥ śucivastradharaḥ śuciḥ /
hāranūpurasūtrādyairgraiveyāṃgadakaṃkaṇaiḥ

5.72.100

vibhūṣito harerbhaktimupaspṛśyāmalāśayaḥ /
viṣṇorāyatanaṃ gatvā sthitvaikākī vyaciṃtayat

5.72.101

kathaṃ bhajāmi taṃ bhaktaṃ mohanaṃ gopayoṣitām /
vikrīḍaṃtaṃ sadā tābhiḥ kāliṃdīpuline vane

5.72.102

itthamatyākulamatiściṃtayanneva bālakaḥ /
athāpaparamāṃ vidyāṃ svapnaṃ ca samavāpyata

5.72.103

āsītkṛṣṇapratikṛtiḥ puratastasya śobhanā /
śilāmayī svarṇapīṭhe sarvalakṣaṇalakṣitā

5.72.104

sābhūdiṃdīvaraśyāmā snigdhalāvaṇyaśālinī /
tribhaṃgalalitākāra śikhaṃḍī picchabhūṣaṇā

5.72.105

kūjayaṃtī mudā veṇuṃ kāṃcanīmadhare'rpitām /
dakṣasavyagatābhyāṃ ca suṃdarībhyāṃ niṣevitām

5.72.106

varddhayaṃtīṃ tayoḥ kāmaṃ cuṃbanāśleṣaṇādibhiḥ /
dṛṣṭvā citradhvajaḥ kṛṣṇaṃ tādṛgveṣavilāsinam

5.72.107

avanamya śirastasmai puro lajjitamānasaḥ /
athovāca harirdakṣapārśvagāṃ preyasīṃ hasan

5.72.108

salajjaṃ paramaṃ cainaṃ svaśarīrāsanāgatam /
nirmāyātmasamaṃ divyaṃ yuvatīrūpamadbhutam

5.72.109

ciṃtayasva śarīreṇa hyabhedaṃ mṛgalocane /
atho tvadaṃgatejobhiḥ spṛṣṭastvadrūpamāpsyati

5.72.110

tataḥ sā padmapatrākṣī gatvā citradhvajāṃtikam /
nijāṃgakaistadaṃgānāmabhedaṃ dhyāyatī sthitā

5.72.111

athāsyāstvaṃgatejāṃsi tadaṃgaṃ paryapūrayan /
stanayorjyotiṣā jātau pīnau cārupayodharau

5.72.112

nitaṃbajyotiṣā jātaṃ śroṇibiṃbaṃ manoharam /
kuṃtalajyotiṣā keśapāśo'bhūtkarayoḥ karau

5.72.113

sarvamevaṃ susaṃpannaṃ bhūṣāvāsaḥ sragādikam /
kalāsu kuśalā jātā saurabhenāṃtarātmani

5.72.114

dīpāddīpamivālokya subhagāṃ bhuvi kanyakām /
citradhvajāṃ trapābhaṃgi smitaśobhāṃ manoharām

5.72.115

premṇā gṛhītvā karayoḥ sā tāmapaharanmudā /
goviṃdavāmapārśvasthāṃ preyasīṃ parirabhya ca

5.72.116

uvāca tava dāsīyaṃ nāma cāsyāścakāra ya /
sevāṃ cāsyai vada prītyā yathābhirucitāṃ priyām

5.72.117

atha citrakaletyetannāma cātmamatena sā /
cakāra cāha sevārthaṃ dhṛtvā cāpi vipaṃcikām

5.72.118

sadā tvaṃ nikaṭe tiṣṭha gāyasva vividhaiḥ svaraiḥ /
guṇātmanprāṇanāthasya tavāyaṃ vihito vidhiḥ

5.72.119

atha citrakalā tvājñāṃ gṛhītvānamya mādhavam /
tatpreyasyāśca caraṇaṃ gṛhītvā pādayo rajaḥ

5.72.120

jagau sumadhuraṃ gītaṃ tayorānaṃdakāraṇam /
atha prītyopagūḍhā sā kṛṣṇenānaṃdamūrtinā

5.72.121

yāvatsukhāṃbudhau pūrṇā tāvadevāpyabudhyata /
citradhvajo mahāpremavihvalaḥ smaratatparaḥ

5.72.122

tameva paramānaṃdaṃ muktakaṃṭho ruroda ha /
tadārabhya rudanneva muktvā harivicārakam

5.72.123

ābhāṣito'pi pitrādyairnaivāvocadvacaḥ kvacit /
māsamātraṃ gṛhe sthitvā niśīthe kṛṣṇasaṃśrayaḥ

5.72.124

nirgatyāraṇyamacarattapo vai muniduṣkaram /
kalpāṃte dehamutsṛjya tapasaiva mahāmuniḥ

5.72.125

vīraguptābhidhānasya gopasya duhitā śubhā /
jātā citrakaletyeva yasyāḥ skaṃdhe manoharā

5.72.126

vipaṃcī dṛśyate nityaṃ saptasvaravibhūṣitā /
upatiṣṭhati vai vāme ratnabhṛṃgāramadbhutam

5.72.127

dadhānā dakṣiṇe haste sā vai ratnapatadgraham /
ayamāsītpurā sarvaṃ tāpasairabhivaṃditaḥ

5.72.128

muniḥ puṇyaśravā nāma kāśyapaḥ sarvadharmavit /
pitā tasyābhavacchaivaḥ śatarudrīyamanvaham

5.72.129

prastuvandevadeveśaṃ viśveśaṃ bhaktavatsalam /
prasanno bhagavāṃstasya pārvatyā saha śaṃkaraḥ

5.72.130

caturdaśyāmarddharātreḥ pratyakṣaḥ pradadau varam /
tvatputro bhavitā kṛṣṇe bhaktimānbāla eva hi

5.72.131

upanīyāṣṭame varṣe tasmai siddhamanustvayam /
upadiśaikaviṃśatyā yo mayā te nigadyate

5.72.132

gopālavidyānāmāyaṃ maṃtro vāksiddhidāyakaḥ /
etatsādhakajihvāgre līlācaritamadbhutam

5.72.133

anaṃtamūrtirāyāti svayameva varapradaḥ /
kāmamāyā ramākaṃṭha seṃdrā dāmodarojjvalāḥ

5.72.134

madhye daśākṣarīṃ procya punastā eva nirdiśet /
daśākṣaroktaṛṣyādidhyānaṃ cāsya bravīmyaham

5.72.135

pūrṇāmṛtanidhermadhye dvīpaṃ jyotirmayaṃ smaret /
kāliṃdyā veṣṭitaṃ tatra dhyāyedvṛṃdāvane vane

5.72.136

sarvartukusumasrāvi drumavallībhirāvṛtam /
naṭanmattaśikhisvānaṃ gāyatkokilaṣaṭpadam

5.72.137

tasya madhye vasatyekaḥ pārijātatarurmahān /
śākhopaśākhāvistāraiḥ śatayojanamucchritaḥ

5.72.138

tale tasyātha vimale parito dhenumaṃḍalam /
tadaṃtarmaṃḍalaṃ gopabālānāṃ veṇuśṛṃgiṇām

5.72.139

tadaṃtare tu ruciraṃ maṃḍalaṃ vraja subhruvām /
nānopāyanapāṇīnāṃ madavihvalacetasām

5.72.140

kṛtāṃjalipuṭānāṃ ca maṃḍalaṃ śuklavāsasām /
śuklābharaṇabhūṣāṇāṃ premavihvalitātmanām

5.72.141

ciṃtayecchrutikanyānāṃ gṛhṇatīnāṃ vacaḥ priyam /
ratnavedyāṃ tato dhyāyeddukūlāvaraṇaṃ harim

5.72.142

ūrau śayānaṃ rādhāyāḥ kadalīkāṃḍakopari /
tadvaktraṃ caṃdra susmeraṃ vīkṣamāṇaṃ manoharam

5.72.143

kiṃcitkuṃcitavāmāṃghriṃ veṇuyuktena pāṇinā /
vāmenāliṃgya dayitāṃ dakṣeṇa cibukaṃ spṛśan

5.72.144

mahāmārakatābhāsaṃ mauktikacchāyameva ca /
puṃḍarīkaviśālākṣaṃ pītanirmalavāsasam

5.72.145

barhabhāralasacchīrṣaṃ muktāhāramanoharam /
gaṃḍaprāṃtalasaccāru makarākṛtikuṃḍalam

5.72.146

āpādatulasīmālaṃ kaṃkaṇāṃgadabhūṣaṇam /
nūpurairmudrikābhiśca kāṃcyā ca parimaṃḍitam

5.72.147

sukumārataraṃ dhyāyetkiśoravayasānvitam /
pūjā daśākṣaroktaiva vedalakṣaṃ puraskriyā

5.72.148

ityuktvāṃtardadhe devo devī ca girijā satī /
munirāgatya putrāya tathaivopadideśa ha

5.72.149

puṇyaśravāstu tanmaṃtra grahaṇādeva keśavam /
varṇayāmāsa vividhairjitvā sarvānmunīnsvayam

5.72.150

rūpalāvaṇyavaidagdhya sauṃdaryāścaryalakṣaṇam /
tadā hṛṣṭamanā bālo nirgatya svagṛhāttataḥ

5.72.151

vāyubhakṣastapastepe kalpānāmayutatrayam /
tadaṃte gokule jātā naṃdabhrāturgṛhe svayam

5.72.152

lavaṃgā iti tannāma kṛṣṇeṃgita nirīkṣaṇā /
yasyā haste pradṛśyeta mukhamārjanayaṃtrakam

5.72.153

iti te kathitāḥ kāścitpradhānāḥ kṛṣṇavallabhāḥ

5.72.154

harivividharasādyairyuktamadhyāyametadvrajavaratanayābhiścāruhāsekṣaṇābhiḥ /
paṭhati ya iha bhaktyā pāṭhayedvā manuṣyo vrajati bhagavataḥ śrīvāsudevasya dhāma

5.72.72

iti śrīpadmapurāṇe pātālakhaṃḍe śrīkṛṣṇamāhātmye dvisaptatitamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0