Padma Purana · Chapter 5.74

īśvara uvāca-/
ekadā rahasi śrīmānuddhavo bhagavitpriyaḥ /
sanatkumāramekāṃte hyapṛcchatpārṣadaḥ prabho

yatra krīḍati goviṃdo nityaṃ nityasurāspade /
gopāṃganābhiryatsthānaṃ kutra vā kīdṛśaṃ param

tattatkrīḍanavṛttāṃtamanyadyadyattadadbhutam /
jñātaṃ cettava tatkathyaṃ sneho me yadi varttate

sanatkumāra uvāca-/
kadācidyamunākūle kasyāpi ca tarostale /
suvṛttenopaviṣṭena bhagavatpārṣadena vai

yadraho'nubhavastasya pārthenāpi mahātmanā /
dṛṣṭaṃ kṛtaṃ ca yadyattatprasaṃgātkathitaṃ mayi

tatte'haṃ kathayāmyetacchṛṇuṣvāvahitaḥ param /
kiṃtvetadyatra kutrāpi na prakāśyaṃ kadācana

arjuna uvāca-/
śaṃkarādyairviriṃcyādyairadṛṣṭamaśrutaṃ ca yat /
sarvametatkṛpāṃbhodhe kṛpayā kathaya prabho

kiṃ tvayā kathitaṃ pūrvamābhīryastava vallabhāḥ /
tāstāḥ katividhā deva kati vā saṃkhyayā punaḥ

nāmāni kati vā tāsāṃ kā vā kutra vyavasthitāḥ /
tāsāṃ vā kati karmāṇi vayoveṣaśca kaḥ prabho

kābhiḥ sārddhaṃ kva vā deva vihariṣyasi bho rahaḥ /
nitye nityasukhe nityavibhave ca vane vane

tatsthānaṃ kīdṛśaṃ kutra śāśvataṃ paramaṃ mahat /
kṛpā cettādṛśī tanme sarvaṃ vaktumihārhasi

yadapṛṣṭaṃ mayāpyevamajñātaṃ yadrahastava /
ārtārtighna mahābhāga sarvaṃ tatkathayiṣyasi

śrībhagavānuvāca-/
tatsthānaṃ vallabhāstā me vihārastādṛśo mama /
api prāṇasamānānāṃ satyaṃ puṃsāmagocaraḥ

kathite dṛṣṭumutkaṃṭhā tava vatsa bhaviṣyati /
brahmādīnāmadṛśyaṃ yatkiṃ tadanya janasya vai

tasmādvirama vatsaitatkiṃ nu tena vinā tava /
evaṃ bhagavatastasya śrutvā vākyaṃ sudāruṇam

dīnaḥ pādāṃbujadvaṃdve daṃḍavatpatito'rjunaḥ /
tato vihasya bhagavāndorbhyāmutthāpya taṃ vibhuḥ

uvāca paramapremṇā bhaktāya bhaktavatsalaḥ /
tatkiṃ tatkathanenātra draṣṭavyaṃ cettvayā hi yat

yasyāṃ sarvaṃ samutpannaṃ yasyāmadyāpi tiṣṭhati /
layameṣyati tāṃ devīṃ śrīmattripurasuṃdarīm

ārādhya parayā bhaktyā tasyai svaṃ ca nivedaya /
tāṃ vinaitatpadaṃ dātuṃ na śaknomi kadācana

śrutvaitadbhagavadvākyaṃ pārtho harṣākulekṣaṇaḥ /
śrīmatyāstripurādevyā yayau śrīpādukātalam

tatra gatvā dadarśaināṃ śrīciṃtāmaṇivedikām /
nānāratnairviracitaiḥ sopānairatiśobhitām

tatra kalpataruṃ nānā puṣpaiḥ phalabhavairnatam /
sarvarttukomaladalaiḥ snavanmādhvīkaśīkaraiḥ

varṣadbhirvāyunālolaiḥ pallavairujjvalīkṛtam /
śukaiśca kokilagaṇaiḥ sārikābhiḥ kapotakaiḥ

līlācakorakai ramyaiḥ pakṣibhiśca nināditam /
yatra guṃjadbhṛṃgarāja kolāhalasamākulam

maṇibhirbhāsvarairudyaddāvānala manoharam /
śrīratnamaṃdiraṃ divyaṃ tale tasya mahādbhutam

ratnasiṃhāsanaṃ tatra mahāhaimābhimohanam /
tatra bālārkasaṃkāśāṃ nānālaṃkārabhūṣitām

navayauvanasaṃpannāṃ sṛṇipāśadhanuḥ śaraiḥ /
rājaccaturbhujalatāṃ suprasannāṃ manoharām

brahmaviṣṇumaheśādi kirīṭamaṇiraśmibhiḥ /
virājitapadāṃbhojāmaṇimādibhirāvṛtām

prasannavadanāṃ devīṃ varadāṃ bhaktavatsalām /
arjuno'hamiti jñātaḥ praṇamya ca punaḥpunaḥ

vihitāṃjalirekāṃte sthito bhaktibharānvitaḥ /
sā tasyopāsitaṃ jñātvā prasādaṃ ca kṛpānidhiḥ

uvāca kṛpayā devī tasya smaraṇavihvalā /
bhagavatyuvāca-/
kiṃ vā dānaṃ tvayā vatsa kṛtaṃ pātrāya durlabham

iṣṭaṃ yajñena kenātra tapo vā kimanuṣṭhitam /
bhagavatyamalā bhaktiḥ kā vā prāksamupārjjitā

kiṃ vāsmindurlabhaṃ loke kiṃ vā karma śubhaṃ mahat /
prasādastvayi yenāyaṃ prapanne ca mudā kila

gūḍhātigūḍhaścānanya labhyo bhagavatā kṛtaḥ /
naitādṛṅmartyalokānāṃ na ca bhūtalavāsinām

svargiṇāṃ devatādīnāṃ tapasvīśvarayoginām /
bhaktānāṃ naiva sarveṣāṃ naiva naiva ca naiva ca

prasādastu kṛto vatsa tava viśvātmanā yathā /
tadehi bhaja buddhvaiva kulakuṃḍaṃ saro mama

sarvakāmapradā devī tvanayā saha gamyatām /
tatraiva vidhivatsnātvā drutamāgamyatāmiha

tadaiva tatra gatvā sa snātvā pārthastathāgataḥ /
āgataṃ taṃ kṛtasnānaṃ nyāsamudrārpaṇādikam

kārayitvā tato devyā tasya vai dakṣiṇaśrutau /
sadyaḥ siddhikarī bālā vidyānigaditā parā

hakārārddhaparā dvīpā dvitīyā viśvabhūṣitā /
anuṣṭhānaṃ ca pūjāṃ ca japaṃ ca lakṣasaṃkhyakam

korakaiḥ karavīrāṇāṃ prayogaṃ ca yathātatham /
nirvartya tamuvācedaṃ kṛpayā parameśvarī

anenaiva vidhānena kriyatāṃ madupāsanam /
tato mayi prasannāyāṃ tavānugrahakāraṇāt

tatastu tatra paryyaṃteṣvadhikāro bhaviṣyati /
ityayaṃ niyamaḥ pūrvaṃ svayaṃ bhagavatā kṛtaḥ

śrutvaivamarjunastena varmaṇā tāṃ samarcayat /
tataḥ pūjāṃ japaṃ caiva kṛtvā devī prasāditā

kṛtvā tataḥ śubhaṃ homaṃ snānaṃ ca vidhinā tataḥ /
kṛtakṛtyamivātmānaṃ prāptaprāyamanoratham

karasthāṃ sarvasiddhiṃ ca sa pārthaḥ samamanyata /
asminnavasare devī tamāgatya smitānanā

uvāca gaccha vatsa tvamadhunā tadgṛhāṃtare /
tataḥ sasaṃbhramaḥ pārthaḥ samutthāya mudānvitaḥ

asaṃkhyaharṣapūrṇātmā daṃḍavattāṃ nanāma ha /
ājñaptastu tayā sārddhaṃ devī vayasyayārjunaḥ

gato rādhāpatisthānaṃ yatsiddhairapyagocaram /
tataśca sa upādiṣṭo golokāduparisthitam

sthiraṃ vāyudhṛtaṃ nityaṃ satyaṃ sarvasukhāspadam /
nityaṃ vṛṃdāvanaṃ nāma nityarāsamahotsavam

apaśyatparamaṃ guhyaṃ pūrṇapremarasātmakam /
tasyā hi vacanādeva locanairvīkṣya tadrahaḥ

vivaśaḥ patitastatra vivṛddhapremavihvalaḥ /
tataḥ kṛcchrāllabdhasaṃjño dorbhyāmutthāpitastayā

sāṃtvanāvacanaistasyāḥ kathaṃcitsthairyamāgataḥ /
tatastapaḥ kimanyanme karttavyaṃ vidyate vada

iti taddarśanotkaṃṭhābhareṇa taralo'bhavat /
tatastayā kare tasya dhṛtvā tatpadadakṣiṇe

pratipede sudeśena gatvā coktamidaṃ vacaḥ /
snānāyaitacchubhaṃ pārtha viśa tvaṃ jalavistaram

sahasradalapadmastha saṃsthānaṃ madhyakorakam /
catuḥsaraścaturdhāramāścaryakulasaṃkulam

asyāṃtare praviśyātha viśeṣamiha paśyasi /
etasya dakṣiṇe deśa eṣa cātra sarovaraḥ

madhumādhvīkapānaṃ yannāmnā malayanirjharaḥ /
etacca phullamudyānaṃ vasaṃte madanotsavam

kurute yatra goviṃdo vasaṃtakusumocitam /
yatrāvatāraṃ kṛṣṇasya stuvaṃtyeva divāniśam

bhavedyatsmaraṇādeva muneḥ svāṃte smarāṃkuraḥ /
tato'sminsarasi snātvā gatvā pūrvasarastaṭam

upaspṛśya jalaṃ tasya sādhayasva manoratham /
tatastadvacanaṃ śrutvā tasminsarasi tajjale

kalhārakumudāṃbhojaraktanīlotpalacyutaiḥ /
parāgairaṃjite maṃjuvāsite madhubiṃdubhiḥ

tuṃdile kalahaṃsādi nādairāṃdolite tataḥ /
ratnābaddhacatustīre maṃdānilataraṃgite

magne jalāṃtaḥ pārthe tu tatraivāṃtardadhe'tha sā /
utthāya parito vīkṣya saṃbhrāṃtā cāruhāsinī

sadyaḥ śuddhasvarṇaraśmigaurakāṃtatanūlatām /
sphuratkiśoravarṣīyāṃ śāradeṃdunibhānanām

sunīlakuṭilasnigdhavilasadratnakuṃtalām /
siṃdūrabiṃdukiraṇaprojjvalālakapaṭṭikām

unmīladbhrūlatābhaṃgi jitasmaraśarāsanām /
ghanaśyāmalasallola khelallocanakhaṃjanām

maṇiṃ kuṃḍalatejoṃśu visphuradgaṃḍamaṇḍalām /
mṛṇālakomalabhrājadāścaryabhujavallarīm

śaradaṃburuhāṃ sarvaśrīcaurapāṇipallavām /
vidagdharacitasvarṇakaṭisūtrakṛtāṃtarām

kūjatkāṃcīkalāpāṃta vibhrājajjaghanasthalām /
bhrājaddukūlasaṃvītanitaṃborusumaṃdirām

śiṃjānamaṇimaṃjīrasucārupadapaṃkajām /
sphuradvividhakaṃdarpakalākauśalaśālinīm

sarvalakṣaṇasaṃpannāṃ sarvābharaṇabhūṣitām /
āścaryalalanāśreṣṭhāmātmānaṃ savyalokayat

visasmāra ca yatkiṃcitpaurvadehikameva ca /
māyayā gopikāprāṇanāthasya tadanaṃtaram

iti karttavyatāmūḍhā tasthau tatra suvismitā /
atrāṃtareṃ'bare dhīra dhvanirākasmiko'bhavat

anenaiva pathā subhru gaccha pūrvasarovaram /
upaspṛśya jalaṃ tasya sādhayasva manoratham

tatra saṃti hi sakhyaste mā sīda varavarṇini /
tā hi saṃpādayiṣyaṃti tatraiva varamīpsitam

iti daivīṃ giraṃ śrutvā gatvā pūrvasaro'tha sā /
nānāpūrvapravāhaṃ ca nānāpakṣisamākulam

sphuratkairavakahlārakamaleṃdīvarādibhiḥ /
bhrājitaṃ padmarāgaiśca padmasopānasattaṭam

vividhaiḥ kusumoddāmairmaṃjukuṃjalatādrumaiḥ /
virājitacatustīramupaspṛśya sthitā kṣaṇam

tatrāṃtare kvaṇatkāṃcī maṃjumaṃjīraraṃjitam /
kiṃkiṇīnāṃ jhaṇatkāraṃ śuśrāvotkarṇasaṃpuṭe

tataśca pramadāvṛṃdamāścaryayutayauvanam /
āścaryālaṃkṛtinyāsamāścaryākṛtibhāṣitam

adbhutāṃgamapūrvaṃ sā pṛthagāścaryavibhramam /
citrasaṃbhāṣaṇaṃ citrahasitālokanādikam

madhurādbhutalāvaṇyaṃ sarvamādhuryasevitam /
cillāvaṇyagatānaṃtamāścaryākulasuṃdaram

āścaryasnigdhasauṃdaryamāścaryānugrahādikam /
sarvāścaryasamudayamāścaryālokanādikam

dṛṣṭvā tatparamāścaryaṃ ciṃtayaṃtī hṛdā kiyat /
pādāṃguṣṭhenā likhaṃtī bhuvaṃ namrānanā sthitā

tatastāsāṃ saṃbhramo'bhūddṛṣṭīnāṃ ca parasparam /
keyaṃ madīyajātīyā cireṇānastakautukā

iti sarvāḥ samālokya jñātavyeyamiti kṣaṇam /
āmaṃtrya maṃtraṇābhijñāḥ kautukāddraṣṭumāgatāḥ

āgatya tāsāmekātha nāmnā priyamudā matā /
girā madhurayā prītyā tāmuvāca manasvinī

priyamudovāca-/
kāsi tvaṃ kasya kanyāsi kasya tvaṃ prāṇavallabhā /
jātā kutrāsi kenāsminnānītā vā gatā svayam

etacca sarvamasmākaṃ kathyatāṃ ciṃtayā kimu /
sthāne'sminparamānaṃde kasyāpi duḥkhamasti kim

iti pṛṣṭā tayā sā tu vinayāvanatiṃ gatā /
uvāca susvaraṃ tāsāṃ mohayaṃtī manāṃsi ca

arjuna uvāca- /
kā vāsmi kasya kanyā vā prajātā kasya vallabhā /
ānītā kena vā cātra kiṃ vātha svayamāgatā

etatkiṃcinna jānāmi devī jānātu tatpunaḥ /
kathitaṃ śrūyatāṃ tanme madvākye pratyayo yadi

asyaiva dakṣiṇe pārśve ekamasti sarovaram /
tatrāhaṃ snātumāyātā jātā tatraiva saṃsthitā

viṣamotkaṃṭhitā paścātpaśyaṃtī parito diśam /
ekamākāśasaṃbhūtaṃ dhvanimaśrauṣamadbhutam

anenaiva pathā subhru gaccha pūrvasarovaram /
upaspṛśya jalaṃ tasya sādhayasva manoratham

tatra saṃti hi sakhyaste mā sīda varavārṇini /
tāhi saṃpādayiṣyaṃti tatra te varamīpsitam

ityākarṇya vacastasya tasmādatra samāgatā /
viṣādaharṣapūrṇātmā ciṃtākulasamākulā

āgatāsya jalaṃ spṛṣṭvā nānāvidhaśubhadhvanim /
aśrauṣaṃ ca tataḥ paścādapaśyaṃ bhavatīḥ parāḥ

etanmātraṃ vijānāmi kāyena manasā girā /
etadeva mayā devyaḥ kathitaṃ yadi rocate

kā yūyaṃ tanujāḥ keṣāṃ kva jātāḥ kasya vallabhāḥ /
tacchrutvā vacanaṃ tasyāḥ sā vai priyamudābravīt

astvevaṃ prāṇasakhyaḥ sma tasyaiva ca vayaṃ śubhe /
vṛṃdāvanakalānātha vihāradārikāḥ sukham

tā ātmamuditāstena vrajabālā ihāgatāḥ /
etāḥ śrutigaṇāḥ khyātā etāśca munayastathā

vayaṃ ballavabālā hi kathitāste svarūpataḥ /
atra rādhāpateraṃgātpūrvāyāḥ preyasītamāḥ

nityā nityavihāriṇyo nityakeli bhuvaścarāḥ /
eṣā pūrṇarasā devī eṣā ca rasamaṃtharā

eṣā rasālayā nāma eṣā ca rasavallarī /
rasapīyūṣadhāreyameṣā rasataraṃgiṇī

rasakallolinī caiṣā iyaṃ ca rasavāpikā /
anaṃgasenā eṣaiva iyaṃ cānaṃgamālinī

madayaṃtī iyaṃ bālā eṣā ca rasavihvalā /
iyaṃ ca lalitā nāma iyaṃ lalitayauvanā

anaṃgakusumā caiṣā iyaṃ madanamaṃjarī /
eṣā kalāvatī nāma iyaṃ ratikalā smṛtā

iyaṃ kāmakalā nāma iyaṃ hi kāmadāyinī /
ratilolā iyaṃ bālā iyaṃ bālā ratotsukā

eṣā carati sarvasva raticiṃtāmaṇistvasau /
nityānaṃdāḥ kāścidetā nityapremarasapradāḥ

ataḥparaṃ śrutigaṇāstāsāṃ kāścidimāḥ śṛṇu /
udgītaiṣā sugīteyaṃ kalagītā tviyaṃ priyā

eṣā kalasurākhyātā bāleyaṃ kalakaṃṭhikā /
vipaṃcīyaṃ kramapadā eṣā bahuhutā matā

eṣā bahuprayogeyaṃ khyātā bahukalā balā /
iyaṃ kalāvatī khyātā matā caiṣā kriyāvatī

ataḥparaṃ munigaṇāstāsāṃ katipayā iha /
iyamugratapā nāma eṣā bahuguṇā smṛtā

eṣā priyavratā nāma suvratā ca iyaṃ matā /
surekheyaṃ matā bālā suparveyaṃ bahupradā

ratnarekhā tviyaṃ khyātā maṇigrīvā tvasau matā /
suparṇā ceyamākalpā sukalpā ratnamālikā

iyaṃ saudāminī subhrūriyaṃ ca kāmadāyinī /
eṣā ca bhogadākhyā tā iyaṃ viśvamatā satī

eṣā ca dhāriṇī dhātrī sumedhā kāṃtirapyasau /
aparṇeyaṃ suparṇaiṣā mataiṣā ca sulakṣaṇā

sudatīyaṃ guṇavatī caiṣāsau kalinī matā /
eṣā sulocanā khyātā iyaṃ ca sumanāḥ smṛtā

aśrutā ca suśīlā ca ratisukhapradāyinī /
ataḥ paraṃ gopabālā vayamatrāgatāstu yāḥ

tāsāṃ ca paricīyaṃtāṃ kāścidaṃburuhānane /
asau caṃdrāvalī caiṣā caṃdrikeyaṃ śubhā matā

eṣā caṃdrāvalī caṃdrarekheyaṃ caṃdrikāpyasau /
eṣā khyātā caṃdramālā matā caṃdrālikātviyam

eṣā caṃdraprabhā caṃdrakaleyamabalā smṛtā /
eṣā varṇāvalī varṇamāleyaṃ maṇimālikā

varṇaprabhā samākhyātā suprabheyaṃ maṇiprabhā /
iyaṃ hārāvalī tārā mālinīyaṃ śubhā matā

mālatīyamiyaṃ yūthī vāsaṃtī navamallikā /
mallīyaṃ navamallīyamasau śephālikā matā

saugaṃdhikeyaṃ kastūrī padminīyaṃ kumudvatī /
eṣaiva hi rasollāsā citravṛṃdā samā tviyam

raṃbheyamurvaśī caiṣā surekhā svarṇarekhikā /
eṣā kāṃcanamāleyaṃ satyasaṃtatikā parā

etāḥ parikṛtāḥ sarvāḥ pariceyāḥ parā api /
sahitāsmābhiretābhirvihariṣyasi bhāmini

ehi pūrvasarastīre tatra tvāṃ vidhivatsakhi /
snāpayitvātha dāsyāmi maṃtraṃ siddhipradāyakam

iti tāṃ sahasā nītvā snāpayitvā vidhānataḥ /
vṛṃdāvanakalānātha preyasyā maṃtramuttamam

grāhayāmāsa saṃkṣepāddīkṣāvidhipurassaram /
paraṃ varuṇabījasya vahnibījapuraskṛtam

caturthasvarasaṃyuktaṃ nādabiṃduvibhūṣitam /
puṭitaṃ praṇavābhyāṃ ca trailokye cātidurllabham

maṃtragrahaṇamātreṇa siddhiḥ sarvā prajāyate /
puraścaryāvidhirdhyānaṃ homasaṃkhyājapasya ca

taptakāṃcanagaurāṃgīṃ nānālaṃkārabhūṣitām /
āścaryarūpalāvaṇyāṃ suprasannāṃ varapradām

kalhāraiḥ karavīrādyaiścaṃpakaiḥ sarasīruhaiḥ /
sugaṃdhakusumairanyaiḥ saugaṃdhikasamanvitaiḥ

pādyārghyācamanīyaiśca dhūpadīpairmanoharaiḥ /
naivedyairvividhairdivyaiḥ sakhīvṛṃdāhṛtairmudā

saṃpūjya vidhivaddevīṃ japtvā lakṣamanuṃ tataḥ /
hutvā ca vidhinā stutvā praṇamya daṃḍavadbhuvi

tataḥ sā saṃstutā devī nimeṣarahitāṃtarā /
parikalpya nijāṃ chāyāṃ māyayātmasamīhayā

pārśve'tha preyasīṃ tatra sthāpayitvā balādiva /
sakhībhirāvṛtā hṛṣṭā śuddhaiḥ pūjājapādibhiḥ

stavairbhaktyā praṇāmaiśca kṛpayāvirabhūttadā /
hemacaṃpakavarṇābhā vicitrābharaṇojjvalā

aṃgapratyaṃgalāvaṇya lālitya madhurākṛtiḥ /
niṣkalaṃka śaratpūrṇakalānātha śubhānanā

snigdhamugdhasmitāloka jagattrayamanoharā /
nijayā prabhayātyaṃtaṃ dyotayaṃtī diśo daśa

abravīdatha sā devī varadā bhaktavatsalā /
devyuvāca-/
matsakhīnāṃ vacaḥ satyaṃ tena tvaṃ me priyā sakhī

samuttiṣṭha samāgaccha kāmaṃ te sādhayāmyaham /
arjunī sā vaco devyāḥ śrutvā cātmamanīṣitam

pulakāṃkuramugdhāṃgī bāṣpākulavilocanā /
papāta caraṇe devyāḥ punaśca premavihvalā

tataḥ priyaṃvadāṃ devīṃ samuvāca sakhīmimām /
pāṇau gṛhītvā matsaṃge samāśvāsya samānaya

tataḥ priyaṃvadā devyā ājñayā jātasaṃbhramā /
tāṃ tathaiva samādāya saṃge devyā jagāma ha

gatvottarasarastīre snāpayitvā vidhānataḥ /
saṃkalpādikapūrvaṃ tu pūjayitvā yathāvidhi

śrīgokulakalānāthamaṃtraṃ tacca susiddhidam /
grāhayāmāsa tāṃ devī kṛpayā harivallabhā

vrataṃ gokulanāthākhyaṃ pūrvaṃ mohanabhūṣitam /
sarvasiddhipradaṃ maṃtraṃ sarvataṃtreṣu gopitam

goviṃderitavijñāsau dadau bhaktimacaṃcalām /
dhyānaṃ ca kathitaṃ tasyai maṃtrarājaṃ ca mohanam

uktaṃ ca mohane taṃtre smṛtirapyasya siddhidā /
nīlotpaladalaśyāmaṃ nānālaṃkārabhūṣitam

koṭikaṃdarpalāvaṇyaṃ dhyāyedrāsarasākulam /
priyaṃvadāmuvācedaṃ rahasyaṃ pāvanecchayā

śrīrādhikovāca-/
asyā yāvadbhavetpūrṇaṃ puraścaraṇamuttamam /
tāvaddhi pālayaināṃ tvaṃ sāvadhānā sahālibhiḥ

ityuktvā sā yayau kṛṣṇapādāṃburuhasannidhim /
chāyāmātmabhavāmātmapreyasīnāṃ nidhāya ca

tasthau tatra yathāpūrvaṃ rādhikā kṛṣṇavallabhā /
atra priyaṃvadādeśātpadmamaṣṭadalaṃ śubham

gorocanābhirnirmāya kuṃkumenāpi caṃdanaiḥ /
ebhirnānāvidhairdravyaiḥ saṃmiśraiḥ siddhidāyakam

likhitvā yaṃtrarājaṃ ca śuddhaṃ maṃtraṃ tamadbhutam /
kṛtvā nyāsādikaṃ pādyamarghyaṃ cāpi yathāvidhi

nānartusaṃbhavaiḥ puṣpaiḥ kuṃkumairapi caṃdanaiḥ /
dhūpadīpaiśca naivedyaistāṃbūlairmukhavāsanaiḥ

vāsolaṃkāramālyaiśca saṃpūjya naṃdanaṃdanam /
parivāraiḥ samaṃ sarvaiḥ sāyudhaṃ ca savāhanam

stutvā praṇamya vidhivaccetasā smaraṇaṃ yayau /
tato bhaktivaśo devo yaśodānaṃdanaḥ prabhuḥ

smitāvalokitāpāṃga taraṃgitatareṃgitam /
uvāca rādhikāṃ devīṃ tāmānaya ihāśu ca

ājñaptā caiva sā devī prasthāpya śāradāṃ sakhīm /
tāmānināya sahasā purovāsurasātmanaḥ

śrīkṛṣṇasya purastātsā sametya premavihvalā /
papāta kāṃcanībhūmau paśyaṃtī sarvamadbhutam

kṛcchrātkathaṃcidutthāya śanairunmīlya locane /
svedāṃbhaḥ pulakotkaṃpa bhāvabhārākulāsatī

dadarśa prathamaṃ tatra sthalaṃ citraṃ manoramam /
tataḥ kalpatarustatra lasanmarakatacchadaḥ

pravālapallavairyuktaḥ komalo hemadaṃḍakaḥ /
sphaṭikapravālamūlaśca kāmadaḥ kāmasaṃpadām

prārthakābhīṣṭaphaladastasyādho ratnamaṃdiram /
ratnasiṃhāsanaṃ tatra tatrāṣṭadalapadmakam

śaṃkhapadmanidhī tatra sa vyāpasavyasaṃsthitau /
caturdikṣu yathā sthānaṃ sahitāḥ kāmadhenavaḥ

parito naṃdanodyānaṃ malayānilasevitam /
ṛtūnāṃ caiva sarveṣāṃ kusumānāṃ manoharaiḥ

āmodairvāsitaṃ sarvaṃ kālāguruparājitam /
makaraṃdakaṇāvṛṣṭiśītalaṃ sumanoharam

makaraṃdarasāsvāda mattānāṃ bhṛṃgayoṣitām /
vṛṃdaśo jhaṃkṛtaiḥ śaśvaccaivaṃ mukharitāṃtaram

kalakaṃṭhī kapotānāṃ sārikāśukayoṣitām /
anyāsāṃ patrikāṃtānāṃ kalanādairnināditam

nṛtyairmattamayūrāṇāmākulaṃ smaravarddhanam /
rasāṃbusekasaṃsṛṣṭa tamāṃjanatanudyutim

susnigdhanīlakuṭila kaṣāyāvāsikuṃtalam /
madamattamayūrādya śikhaṃḍābaddhacūḍakam

bhṛṃgasevitasavyopakramapuṣpāvataṃsakam /
lolālakālivilasatkapolādarśakāśitam

vicitratilakoddāma bhālaśobhāvirājitam /
tilapuṣpapataṃgeśa caṃcumaṃjulanāsikam

cārubiṃbādharaṃ maṃdasmitadīpitamanmatham /
vanyaprasūnasaṃkāśa graiveyakamanoharam

madonmattabhramadbhṛṃgī sahasrakṛtasevayā /
suradrumasrajārājanmugdhapīnāṃsakadvayam

muktāhārasphuradvakṣaḥ sthalakaustubhabhūṣitam /
śrīvatsalakṣaṇaṃ jānulaṃbibāhumanoharam

gaṃbhīranābhipaṃcāsya madhyamadhyātisuṃdaram /
sujātadrumasadvṛtta madūrajānumaṃjulam

kaṃkaṇāṃgadamañjīrairbhūṣitaṃ bhūṣaṇaiḥ paraiḥ /
pītāṃśukalayāviṣṭa nitaṃbaghaṭanāyakam

lāvaṇyairapi sauṃdaryajitakoṭimanobhavam /
veṇupravarttitairgītarāgairapi manoharaiḥ

mohayaṃtaṃ sukhāṃbhodhau majjayaṃtaṃ jagattrayam /
pratyaṃgamadanāveśadharaṃ rāsarasālasam

cāmaraṃ vyajanaṃ mālyaṃ gaṃdhaṃcaṃdanameva ca /
tāṃbūlaṃ darpaṇaṃ pānapātraṃ carvitapātrakam

anyatkrīḍābhavaṃ yadyattatsarvaṃ ca pṛthakpṛthak /
rasālaṃ vividhaṃ yaṃtraṃ kalayaṃtībhirādarāt

yathāsthānaniyuktābhiḥ paśyaṃtībhistadiṃgitam /
tanmukhāṃbhojadattākṣi caṃcalābhiranukramāt

śrīmatyā rādhikā devyā vāmabhāge sasaṃbhramam /
ārādhayaṃtyā tāṃbūlamarpayaṃtyā śucismitam

samālokyārjunī yāsau madanāveśavihvalā /
tatastāṃ ca tathā jñātvā hṛṣīkeśo'pi sarvavit

tasyāḥ pāṇiṃ gṛhītvaiva sarvakrīḍāvanāṃtare /
yathākāmaṃ raho reme mahāyogeśvaro vibhuḥ

tatastasyāḥ skaṃdhadeśe pradattabhujapallavaḥ /
āgatya śāradāṃ prāha paścime'sminsarovare

śīghraṃ snāpaya tanvaṃgīṃ krīḍāśrāṃtāṃ mṛdusmitām /
tatastāṃ śāradā devī tasminkrīḍāsarovare

snānaṃ kurvityuvācaināṃ sā ca śrāṃtā tathākarot /
jalābhyaṃtaramāptāsau punararjunatāṃ gataḥ

uttasthau yatra deveśaḥ śrīmadvaikuṃṭhanāyakaḥ /
dṛṣṭvā tamarjunaṃ kṛṣṇo viṣaṇṇaṃ bhagnamānasam

māyayā pāṇinā spṛṣṭvā prakṛtaṃ vidadhe punaḥ /
śrīkṛṣṇa uvāca-/
dhanaṃjaya tvāmāśaṃse bhavānpriyasakho mama

tvatsamo nāsti me kopi rahovettā jagattraye /
yadrahasyaṃ tvayā pṛṣṭamanubhūtaṃ ca tatpunaḥ

kathyate yadi tatkasmai śapase māṃ tadārjuna /
sanatkumāra uvāca-/
iti prasādamāsādya śapathairjātanirṇayaḥ

yayau hṛṣṭamanāstasmātsvadhāmādbhutasaṃsmṛtiḥ /
iti te kathitaṃ sarvaṃ raho yadgocaraṃ mama

goviṃdasya tathā cāsmai kathane śapathastava /
īśvara uvāca-/
iti śrutvā vacastasya siddhimaupagavirgataḥ

naranārāyaṇāvāsaṃ vṛṃdāraṇyamupāvrajat /
tatrāste'dyāpi kṛṣṇasya nityalīlāvihāravit

nāradenāpipṛṣṭo'haṃ nābravaṃ tadrahasyakam /
prāptaṃ tathāpi tenedaṃ prakṛtitvamupetyaca

tubhyaṃ yattu mayā proktaṃ rahasyaṃ snehakāraṇāt /
tannakasmaicidākhyeyaṃ tvayā bhadre svayonivat

imaṃ śrībhagavadbhaktamahimādhyāyamadbhutam /
yaḥ paṭhecchṛṇuyādvāpi sa ratiṃ viṃdate harau

iti śrīpadmapurāṇe pātālakhaṃḍe arjunyanunayonāma catuḥsaptatitamo'dhyāyaḥ