Padma Purana · Chapter 5.71

śrīdevyuvāca-
bhagavansarvabhūteśa sarvātmansarvasaṃbhava /
deveśvara mahādeva sarvajña karuṇākara

tvayānukaṃpitaivāhaṃ bhūyo'pyāhānukaṃpayā /
trailokyamohanā maṃtrāstvayā me kathitāḥ prabho

tena devena gopībhirmahāmohanarūpiṇā /
kena kena viśeṣaṇa cikrīḍe tadvadasva me

mahādeva uvāca/
ekadā vādayanvīṇāṃ nārado munipuṃgavaḥ /
kṛṣṇāvatāramājñāya prayayau naṃdagokulam

gatvā tatra mahāyogamayeśaṃ vibhumacyutam /
bālanāṭyadharaṃ devadarśanaṃ naṃdaveśmani

sukomalapaṭāstīrṇahemaparyaṃkikopari /
śayānaṃ gopakanyābhiḥ prekṣamāṇaṃ sadā mudam

atīva sukumārāṃgaṃ mugdhaṃ mugdhavilokanam /
visrastanīlakuṭilakuṃtalāvanimaṃḍalam

kiṃcitsmitāṃkuravyaṃjadekadviradakuḍmalam /
svaprabhābhirbhāsayaṃtaṃ samaṃtādbhavanodaram

digvāsasaṃ samālokya so'tiharṣamavāpa ha /
saṃbhāṣya gopatiṃ naṃdamāha sarvaprabhupriyaḥ

nārāyaṇaparāṇāṃ tu jīvanaṃ hyatidurlabham /
asya prabhāvamatulaṃ na jānaṃtīha kecana

bhava brahmādayo'pyasminratiṃ vāṃcchanti śāśvatīm /
caritaṃ cāsya bālasya sarveṣāmeva harṣaṇam

mudā gāyaṃti śṛṇvaṃti cābhinaṃdaṃti tādṛśāḥ /
asmiṃstava sute'ciṃtyaprabhāve snigdhamānasāḥ

narāḥ saṃti na teṣāṃ vai bhavabādhā bhaviṣyati /
muṃceha paralokecchāḥ sarvā ballavasattama

ekāṃtenaikabhāvena bāle'sminprītimācara /
ityuktvā naṃdabhavanānniṣkrāṃto munipuṃgavaḥ

tenārcito viṣṇubuddhyā praṇamya ca visarjitaḥ /
athāsau ciṃtayāmāsa mahābhāgavato muniḥ

asya kāṃtā bhagavatī lakṣmīrnārāyaṇe harau /
vidhāya gopikārūpaṃ krīḍārthaṃ śārṅgadhanvanaḥ

avaśyamavatīrṇā sā bhaviṣyati na saṃśayaḥ /
tāmahaṃ vicinomyadya gehegehe vrajaukasām

vimṛśyaivaṃ munivaro gehāni vrajavāsinām /
praviveśātithirbhūtvā viṣṇubuddhyā supūjitaḥ

sarveṣāṃ ballavādīnāṃ ratiṃ naṃdasute parām /
dṛṣṭvā munivaraḥ sarvānmanasā praṇanāma ha

gopālānāṃ gṛhe bālāṃ dadarśa śvetarūpiṇīm /
sa dṛṣṭvā tarkayāmāsa ramā hyeṣā na saṃśayaḥ

praviveśa tato dhīmānnaṃdasakhyurmahātmanaḥ /
kasyacidgopavaryyasya bhānunāmno gṛhaṃ mahat

arcito vidhivattena so'pyapṛcchanmahāmanāḥ /
sādho tvamasi vikhyāto dharmaniṣṭhatayā bhuvi

tavāhaṃ dhanadhānyādi samṛddhiṃ saṃvibhāvaye /
kaccitte yogyaḥ putro'sti kanyā vā śubhalakṣaṇā

yataste kīrtirakhilaṃ lokaṃ vyāpya bhaviṣyati /
ityukto munivaryyeṇa bhānurānīya putrakam

mahātejasvinaṃ dṛptaṃ nāradāyābhyavādayat /
dṛṣṭvā munivarastaṃ tu rūpeṇāpratimaṃ bhuvi

padmapatraviśālākṣaṃ sugrīvaṃ suṃdarabhruvam /
cārudaṃtaṃ cārukarṇaṃ sarvāvayavasuṃdaram

taṃ samāśliṣya bāhubhyāṃ snehāśrūṇi vimucya ca /
tataḥ sa gadgada prāha praṇayena mahāmuniḥ

nārada uvāca-/
ayaṃ śiśuste bhavitā susakhā rāmakṛṣṇayoḥ /
vihariṣyati tābhyāṃ ca rātriṃdivamataṃdritaḥ

tata ābhāṣya taṃ gopapravaraṃ munipuṃgavaḥ /
yadā gaṃtuṃ manaścakre tatraivaṃ bhānurabravīt

ekāsti putrikā deva devapatnyupamā mama /
kanīyasī śiśorasya jaḍāṃdhabadhirākṛtiḥ

utsāhādvṛddhaye yāce tvāṃ varaṃ bhagavattama /
prasannadṛṣṭimātreṇa susthirāṃ kuru bālikām

śrutvaivaṃ nārado vākyaṃ kautukākṛṣṭamānasaḥ /
atha praviśya bhavanaṃ luṭhaṃtīṃ bhūtale sutām

utthāpyāṃke nidhāyātisnehavihvalamānasaḥ /
bhānurapyāyayau bhaktinamro munivarāṃtikam

atha bhāgavataśreṣṭhaḥ kṛṣṇasyātipriyo muniḥ /
dṛṣṭvā tasyāḥ paraṃ rūpamadṛṣṭāśrutamadbhutam

abhūtpūrvasamaṃ mugdho haripremā mahāmuniḥ /
vigāhya paramānaṃdasiṃdhumekarasāyanam

muhūrttadvitayaṃ tatra munirāsīcchilopamaḥ /
munīṃdraḥ pratibuddhastu śanairunmīlya locane

mahāvismayamāpannastūṣṇīmeva sthito'bhavat /
aṃtarhṛdi mahābuddhirevamevaṃ vyaciṃtayat

bhrāṃtaṃ sarveṣu lokeṣu mayā svacchaṃdacāriṇā /
asyā rūpeṇa sadṛśī dṛṣṭvā naiva ca kutracit

brahmaloke rudraloka iṃdraloke ca me gatiḥ /
na kopi śobhākoṭyaṃśaḥ kutrāpyasyā vilokitaḥ

mahāmāyā bhagavatī dṛṣṭā śaileṃdranaṃdinī /
yasyā rūpeṇa sakalaṃ muhyate sacarācaram

sāpyasyāḥ sukumārāṃgī lakṣmīṃ nāpnoti karhicit /
lakṣmīḥ sarasvatī kāṃti vidyādyāśca varastriyaḥ

chāyāmapi spṛśaṃtyasyāḥ kadācinnaiva dṛśyate /
viṣṇoryanmohinīrūpaṃ haro yena vimohitaḥ

mayā dṛṣṭaṃ ca tadapi kuto'syāsadṛśaṃ bhavet /
tato'syāstattvamājñātuṃ na me śaktiḥ kathaṃcana

anye cāpi na jānaṃti prāyeṇaināṃ hareḥ priyām /
asyāḥ saṃdarśanādeva goviṃdacaraṇāṃbuje

yā premarddhirabhūtsā me bhūtapūrvā na karhicit /
ekāṃte naumi bhavatīṃ darśayitvātivaibhavam

kṛṣṇasya saṃbhavatyasyā rūpaṃ paramatuṣṭaye /
vimṛśyaivaṃ munirgopapravaraṃ preṣya kutracit

nibhṛte parituṣṭāva bālikāṃ divyarūpiṇīm /
api devi mahāyogamāyeśvari mahāprabhe

mahāmohanadivyāṃgi mahāmādhuryavarṣiṇi /
mahādbhutarasānaṃdaśithilīkṛtamānase

mahābhāgyena kenāpi gatāsi mama dṛkpatham /
nityamaṃtarmukhādṛṣṭistava devi vibhāvyate

aṃtareva mahānaṃdaparitṛptaiva lakṣyase /
prasannaṃ madhuraṃ saumyamidaṃ sumukhamaṃḍanam

vyanaktiparamāścaryaṃ kamapyaṃtaḥ sukhodayam /
rajaḥ saṃbaṃdhikalikā śaktistatvātiśobhane

sṛṣṭisthitisamāhārarūpiṇī tvamadhiṣṭhitā /
tattvaṃ viśuddhasatvāśu śaktirvidyātmikā parā

paramānaṃdasaṃdohaṃ dadhatī vaiṣṇavaṃ param /
kā tvayāścaryavibhave brahmarudrādidurgame

yogīṃdrāṇāṃ dhyānapathaṃ na tvaṃ spṛśasi karhicit /
icchāśaktirjñānaśaktiḥ kriyāśaktistaveśituḥ

tavāṃśamātramityevaṃ manīṣā me pravarttate /
māyāvibhūtayo'ciṃtyāstanmāyārbhakamāyinaḥ

pareśasya mahāviṣṇostāḥ sarvāste kalākalāḥ /
ānaṃdarūpiṇī śaktistvamīśvari na saṃśayaḥ

tvayā ca krīḍate kṛṣṇo nūnaṃ vṛṃdāvane vane /
kaumāreṇaiva rūpeṇa tvaṃ viśvasya ca mohinī

tāruṇyavayasā spṛṣṭaṃ kīdṛkte rūpamadbhutam /
kīdṛśaṃ tava lāvaṇyaṃ līlāhāsekṣaṇānvitam

hari mānuṣalobhena vapurāścaryamaṃḍitam /
draṣṭuṃ tadahamicchāmi rūpaṃ te harivallabhe

yena naṃdasutaḥ kṛṣṇo mohaṃ samupayāsyati /
idānīṃ mama kāruṇyānnijaṃ rūpaṃ maheśvari

praṇatāya prapannāya prakāśayitumarhasi /
ityuktā munivaryyeṇa tadanuvratacetasā

mahāmāheśvarīṃ natvā mahānaṃdamayīṃ parām /
mahāprematarotkaṃṭhā vyākulāṃgīṃ śubhekṣaṇām

īkṣamāṇena goviṃdamevaṃ varṇayatāsthitam /
jayakṛṣṇa manohāriñjaya vṛṃdāvanapriya

jayabhrūbhaṃgalalita jayaveṇuravākula /
jaya barhakṛtottaṃsa jayagopīvimohana

jaya kuṃkumaliptāṃga jaya ratnavibhūṣaṇa /
kadāhaṃ tvatprasādena anayā divyarūpayā

sahitaṃ navatāruṇya manohāri vapuḥśriyā /
vilokayiṣye kaiśore mohanaṃ tvāṃ jagatpate

evaṃ kīrttayatastasya tatkṣaṇādeva sā punaḥ /
babhūva dadhatī divyaṃ rūpamatyaṃtamohanam

caturdaśābdavayasā saṃmitaṃ lalitaṃ param /
samānavayasaścānyāstadaiva vrajabālikāḥ

āgatya veṣṭayāmāsurdivyabhūṣāṃbarasrajaḥ /
munīṃdraḥ sa tu niśceṣṭo babhūvāścaryamohitaḥ

bālāyāstāstadā sakhyaścaraṇāṃbukaṇairmunim /
niṣicya bodhayāmāsurūcuśca kṛpayānvitāḥ

munivarya mahābhāga mahāyogeśvareśvara /
tvayaiva parayā bhaktyā bhagavānharirīśvaraḥ

nūnamārādhito devo bhaktānāṃ kāmapūrakaḥ /
yadiyaṃbrahmarudrādyairdevaiḥ siddhamunīśvaraiḥ

mahābhāgavataiścānyairdurdarśā durgamāpi ca /
atyadbhutavayorūpamohinī harivallabhā

kenāpyaciṃtya bhāgyena tavadṛṣṭipathaṃ gatā /
uttiṣṭhottiṣṭha viprarṣe dhairyamālaṃbya satvaram

enāṃ pradakṣiṇīkṛtya namaskuru punaḥpunaḥ /
kiṃ na paśyasi cārvaṃgīmatyaṃtavyākulāmiva

asminneva kṣaṇe nūnamaṃtardhānaṃ gamiṣyati /
nānayā saha saṃlāpaḥ kathaṃcitte bhaviṣyati

darśanaṃ ca punarnāsyāḥ prāpsyasi brahmavittama /
kiṃtu vṛṃdāvane kāpi bhātyaśokalatā śubhā

sarvakāle'pi puṣpāḍhyā sarvadigvyāpi saurabhā /
govarddhanādadūreṇa kusumākhyasarastaṭe

tanmūle hyarddharātre ca drakṣyasyasmānaśeṣataḥ /
śrutvaivaṃ vacanaṃ tāsāṃ snehavihvalacetasām

yāvatpradakṣiṇīkṛtya praṇameddaṃḍavanmuniḥ /
muhūrttadvitayaṃ bālāṃ nānānirmāṇaśobhanām

āhūya bhānuṃ provāca nāradaḥ sarvaśobhanām /
evaṃ prabhāvā bāleyaṃ na sādhyā daivatairapi

kiṃtu yadgṛhametasyāḥ padacihnavibhūṣitam /
tatra nārāyaṇo devaḥ svayaṃ vasati mādhavaḥ

lakṣmīśca vasate nityaṃ sarvābhiḥ sarvasiddhibhiḥ /
adya enāṃ varārohāṃ sarvābharaṇabhūṣaṇām

devīmiva parāṃ gehe rakṣa yatnena sattama /
ityuktvā manasaivaināṃ mahābhāgavatottamaḥ

tadrūpameva saṃsmṛtya praviṣṭo gahanaṃ vanam /
aśokalatikāmūlamāsādya munisattamaḥ

pratīkṣamāṇo devīṃ tāṃ tatraivāgamanaṃ niśi /
sthito'tra premavikalaściṃtayankṛṣṇavallabhām

atha madhyaniśābhāge yuvatyaḥ paramādbhutāḥ /
pūrvaṃ dṛṣṭvāstathānyāśca vicitrābharaṇasrajaḥ

dṛṣṭvā manasi saṃbhrāṃto daṃḍavatpatito bhuvi /
parivārya muniṃ sarvāstāḥ praviviśuḥ śubhāḥ

praṣṭukāmo'pi sa muniḥ kiṃcitsvābhimataṃ priyam /
nāśakatpremalāvaṇyapriyabhāṣāpradharṣitaḥ

athāgatā muniśreṣṭhaṃ kṛtāṃjalimavasthitam /
bhaktibhārānatagrīvaṃ savismayaṃ sasaṃbhramam

suvinītatamaṃ prāha tatraiva karuṇānvitā /
aśokamālinī nāmnā aśokavanadevatā

aśokamālinyuvāca/
aśokakalikāyāṃ tu vasāmyasyāṃ mahāmune /
raktāṃbaradharā nityaṃ raktamālānulepanā

raktasiṃdūrakalikā raktotpalavataṃsinī /
raktamāṇikyakeyūra mukuṭādivibhūṣitā

ekadā priyayā sārddhaṃ viharaṃtyo madhūtsave /
tatraiva militā gopabālikāścitravāsasaḥ

ahaṃ cāśokamālābhirgopaveṣadharaṃ harim /
ramārūpāśca tāḥ sarvā bhaktyā samyagapūjayam

tataḥ prabhṛti caitāsāṃ madhye tiṣṭhāmi sarvadā /
bhūṣābhirvividhābhiśca toṣayitvā ramāpatim

parātparamahaṃ sarvaṃ vijānāmīha sarvataḥ /
gogopagopikādīnāṃ rahasyaṃ cāpi vedmyaham

tava jijñāsitaṃ sarvaṃ hṛdi pratyabhibhāṣitam /
tāṃ devīmadbhutākārāmadbhutānaṃdadāyinīm

hareḥ priyāṃ hiraṇyābhāṃ hīrakojjvalamudrikām /
kathaṃ paśyāmi lolākṣīṃ kathaṃ vā tatpadāṃbujam

ārādhyate'tibhaktyeti tvayā brahmanvimarśitam /
tatra te kathayiṣyāmi vṛttāṃtaṃ sumahātmanām

mānase sarasi sthitvā tapastīvramupeyuṣām /
japatāṃ siddhamaṃtrāṃśca dhyāyatāṃ harimīśvaram

munīnāṃ kāṃkṣatāṃ nityaṃ tasyā eva padāṃbujam /
ekasaptatisāhasraṃ saṃkhyātānāṃ mahaujasām

tatte'haṃ kathayāmyadya tadrahasyaṃ paraṃ vane

iti śrīpadmapurāṇe pātālakhaṃḍe śrīrādhākṛṣṇa-/
māhātmye ekasaptatitamo'dhyāyaḥ