Padma Purana · Chapter 5.35

śeṣa uvāca/
prāpya taṃ vājinaṃ rājā śatrughno rākṣasairhṛtam /
atyaṃtaṃ harṣamāpede puṣkalena samanvitaḥ

rudhiraiḥ siktagātrāste yodhā lakṣmīnidhistathā /
raṇotsāhena saṃyuktaṃ praśaśaṃsurmahānṛpam

hate tasminmahādaitye vidyunmālini durjaye /
surāḥ sarve bhayaṃ tyaktvā sukhamāpurmunemahat

nadyastu vimalā jātā ravistu vimalo'bhavat /
vātā vavuḥ sugaṃdhoda siktā vimalaśuṣmiṇaḥ

sannaddhāste mahāvīrā rathasthā vimalāṃgakāḥ /
rājānamūcuste sarve jayalakṣmyā samanvitāḥ

vīrā ūcuḥ/
diṣṭyā hatastvayā daityo vidyunmālī mahāmate /
yadbhayāttrāsamāpannāḥ surāḥ svargānnirākṛtāḥ

diṣṭyā prāpto mahāvājī raghunāthasya śobhanaḥ /
diṣṭyā gaṃtāsi sarvatra jayaṃ tu kṣitimaṃḍale

svāminmuṃcatvimaṃ vāhaṃ manovegaṃ manoramam /
samayasya vilaṃbo mā bhavatvatra mahāmate

śeṣa uvāca/
iti śrutvā tu tadvākyaṃ vīrāṇāṃ samayocitam /
sādhu sādhu praśasyaitānmumoca hayasattamam

sa muktaścottarāmāśāṃ babhrāmātha surakṣitaḥ /
rathapattihayaśreṣṭhaiḥ sarvaśastrāstrakovidaiḥ

tatra yadvṛttametasya śatrughnasya manoharam /
vātsyāyana śṛṇuṣvaitatpāparāśipradāhakam

revātīramatha prāpto munivṛṃdaniṣevitam /
nīlaratnasamūhasya rasaḥ kiṃ tu payo miṣāt

tāṃstānmunivarānsarvānpraṇamañchūrasevitaḥ /
jagāma hayaratnasya pṛṣṭhataḥ kāmagāminaḥ

gacchaṃstatrāśramaṃ jīrṇaṃ palāśaparṇanirmitam /
revāyājalakallolaiḥ siktaṃ pāpaharāśrayam

taṃ dṛṣṭvā sumatiṃ prāha sarvajñaṃ nayakovidam /
śatrughnaḥ sarvadharmārthakarmakartavyakovidaḥ

rājovāca/
maṃtrinkathaya kasyāyamāśramaḥ puṇyadarśanaḥ /
vicāracaturaśreṣṭha vadaitanmama pṛcchataḥ

śeṣa uvāca/
iti vākyaṃ samākarṇya sumatiḥ prāha taṃ nṛpam /
viśada smerayā vācā darśayannātmasauhṛdam

sumatiruvāca/
enaṃ dṛṣṭvā mahārāja dhūtapāpā vayaṃ khalu /
bhaviṣyāmo muniśreṣṭhaṃ sarvaśāstraparāyaṇam

tasmānnatvā tamāpṛccha sarvaṃ te kathayiṣyati /
raghunāthapadāṃbhojamakaraṃdāti lolupaḥ

nāmnā tvāraṇyakaṃ khyātaṃ raghunāthāṃghrisevakam /
atyugratapasā pūrṇaṃ sarvaśāstrārthakovidam

iti śrutvā tu tadvākyaṃ dharmārthaparibṛṃhitam /
jagāma tamatho draṣṭuṃ svalpasevakasaṃyutaḥ

hanūmānpuṣkalo vīraḥ sumatirmaṃtrisattamaḥ /
lakṣmīnidhiḥ pratāpāgryaḥ subāhuḥ sumadastathā

etaiḥ parivṛto rājā śatrughnaḥ prāpadāśramam /
namaskartuṃ dvijavaramāraṇyakamudāradhīḥ

gatvā taṃ tāpasaśreṣṭhaṃ namaskāramathākarot /
sarvaistaiḥ sahito vīrairvinayānatakaṃdharaiḥ

tāndṛṣṭvā sannatānsarvāñchatrughnapramukhānnṛpān /
arghyapādyādikaṃ cakre phalamūlādibhistadā

uvāca tānnṛpānsarvānbhavaṃtaḥ kutra saṃgatāḥ /
kathamatra samāyātāstatsarvaṃ vadatānaghāḥ

tacchrutvā vākyametasya munivaryasya vāḍava /
sumatiḥ kathayāmāsa vākyaṃ vādavicakṣaṇaḥ

sumatiruvāca/
raghuvaṃśanṛpasyāyamaśvo vai pālyate'khilaiḥ /
yāgaṃ kariṣyate vīraḥ sarvasaṃbhārasaṃbhṛtam

tacchrutvā vacanaṃ teṣāṃ jagāda munisattamaḥ /
daṃtakāṃtyākhilaṃ ghoraṃ tamonirvārayanniva

āraṇyaka uvāca/
kiṃ yāgairvividhairanyaiḥ sarvasaṃbhārasaṃbhṛtaiḥ /
svalpapuṇyapradairnūnaṃ kṣayiṣṇupadadātṛbhiḥ

mūḍho loko hariṃ tyaktvā karotyanyasamarcanam /
raghuvīraṃ ramānāthaṃ sthiraiśvaryapadapradam

yo naraiḥ smṛtamātropi harate pāpaparvatam /
taṃ muktvā kliśyate mūḍho yāgayogavratādibhiḥ

aho paśyata mūḍhatvaṃ lokānāmativaṃcitam /
sulabhaṃ rāmabhajanaṃ muktvā durllabhamācaret

sakāmairyogibhirvāpi ciṃtyate kāmavarjitaiḥ /
apavargapradaṃ nṝṇāṃ smṛtamātrākhilāghaham

purāhaṃ tattvavitsāyāṃ jñāninaṃ suvicārayan /
agamaṃ bahutīrthāni tattvaṃ kopi na me'diśat

tadaikaṃ hi mahadbhāgyātprāptaṃ vai lomaśaṃ munim /
svargalokātsamāyātaṃ tīrthayātrācikīrṣayā

tamahaṃ praṇipatyātha paryapṛcchaṃ mahāmunim /
mahāyuṣaṃ mahāyogisaṃsevitapadadvayam

svāminmayādya mānuṣyaṃ prāptamadbhutadurllabham /
saṃsāraghorajaladhiṃ kiṃ kartavyaṃ titīrṣuṇā

vicārya kathaya tvaṃ tadvrataṃ dānaṃ japo makhaḥ /
devo vā vidyate yo vai saṃsṛtyaṃbhodhitārakaḥ

yajjñātvā saṃsṛtiṃ ghorāṃ tarāmi tvatkṛpābdhitaḥ /
tanme kathaya yogeśa sarvaśāstrārthapāraga

iti madvākyamākarṇya jagāda munisattamaḥ /
śṛṇuṣvaikamanā vipra śraddhayā parayā yutaḥ

saṃti dānāni tīrthāni vratāni niyamā yamāḥ /
yogā yajñāstathāneke vartaṃte svargadāyakāḥ

paraṃ guhyaṃ pravakṣyāmi sarvapāpapraṇāśanam /
tacchṛṇuṣva mahābhāga saṃsārāṃbhodhitārakam

nāstikāya na vaktavyaṃ na cā'śraddhālave punaḥ /
niṃdakāya śaṭhāyāpi na deyaṃ bhaktivairiṇe

rāmabhaktāya śāṃtāya kāmakrodhaviyogine /
vaktavyaṃ sarvaduḥkhasya nāśakārakamuttamam

rāmānnāsti paro devo rāmānnāsti paraṃ vratam /
na hi rāmātparo yogo na hi rāmātparo makhaḥ

taṃ smṛtvā caiva japtvā ca pūjayitvā naraḥ param /
prāpnoti paramāmṛddhimaihikāmuṣmikīṃ tathā

saṃsmṛto manasā dhyātaḥ sarvakāmaphalapradaḥ /
dadāti paramāṃ bhaktiṃ saṃsārāṃbhodhitāriṇīm

śvapākopi hi saṃsmṛtya rāmaṃ yāti parāṃ gatim /
ye vedaśāstraniratāstvādṛśāstatra kiṃ punaḥ

sarveṣāṃ vedaśāstrāṇāṃ rahasyaṃ te prakāśitam /
samācara tathā tvaṃ vai yathā syātte manīṣitam

eko devo rāmacaṃdro vratamekaṃ tadarcanam /
maṃtro'pyekaśca tannāma śāstraṃ taddhyeva tatstutiḥ

tasmātsarvātmanā rāmacaṃdraṃ bhajamanoharam /
yathā goṣpadavattuccho bhavetsaṃsārasāgaraḥ

śrutvā mayā tu tadvākyaṃ punaḥ praśnamakāriṣam /
kathaṃ vā dhyāyate devaḥ kathaṃ vā pūjyate naraiḥ

kathayasva mahābuddhe sarvajña mama vistarāt /
yajjñātvāhaṃ kṛtārthaḥ syāṃ trilokyāṃ munisattama

etacchrutvā tu madvākyaṃ vicārya sa tu lomaśaḥ /
kathayāmāsa me sarvaṃ rāmadhyānapuraḥsaram

śṛṇu vipreṃdra vakṣyāmi yatpṛṣṭaṃ tu tvayānagha /
yathā tuṣyedramānāthaḥ saṃsārajvaradāhakaḥ

ayodhyānagare ramye citramaṃḍapaśobhite /
dhyāyetkalpatarormūle sarvakāmasamṛddhide

mahāmarakatasvarṇanīlaratnādiśobhitam /
siṃhāsanaṃ cittaharaṃ kāṃtyā tāmisranāśanam

tasyopari samāsīnaṃ raghurājaṃ manoramam /
dūrvādalaśyāmatanuṃ devadeveṃdrapūjitam

rākāyāṃ pūrṇaśītāṃśukāṃtidhikkārivaktriṇam /
aṣṭamīcaṃdraśakalasamabhālādhidhāriṇam

nīlakuṃtalaśobhāḍhyaṃ kirīṭamaṇiraṃjitam /
makarākārasauṃdaryakuṃḍalābhyāṃ virājitam

vidrumacchavi satkāṃtiradacchadavirājitam /
tārāpatikarākāra dvijarāji suśobhitam

japāpuṣpābhayā mādhvyā jihvayā śobhitānanam /
yasyāṃ vasaṃti nigamā ṛgādyāḥ śāstrasaṃyutāḥ

kaṃbukāṃtidharagrīvā śobhayā samalaṃkṛtam /
siṃhavaduccakau skandhau māṃsalau bibhrataṃ varam

bāhū dadhānaṃ dīrghāṃgau keyūrakaṭakāṃkitau /
mudrikāhīraśobhābhirbhūṣitau jānulaṃbinau

vakṣo dadhānaṃ vipulaṃ lakṣmīvāsena śobhitam /
śrīvatsādivicitrāṃkairaṃkitaṃ sumanoharam

mahodaraṃ mahānābhiṃ śubhakaṭyāvirājitam /
kāṃcyā vai maṇimatyā ca viśeṣeṇa śriyānvitam

ūrubhyāṃ vimalābhyāṃ vai jānubhyāṃ śobhitaṃ śriyā /
caraṇābhyāṃ vajrarekhā yavāṃkuśasurekhayā

yutābhyāṃ yogidhyeyābhyāṃ komalābhyāṃ virājitam /
dhyātvā smṛtvā ca saṃsārasāgaraṃ tvaṃ tariṣyasi

tameva pūjayannityaṃ caṃdanādibhiricchayā /
prāpnoti paramāmṛddhimaihikāmuṣmikīṃ parām

tvayā pṛṣṭaṃ mahārāja rāmasya dhyānamuttamam /
tatte kathitametadvai saṃsārajaladhiṃ tara

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe āraṇyakopākhyāne lomaśāraṇyakasaṃvādonāma paṃcatriṃśattamo'dhyāyaḥ