Padma Purana · Chapter 5.15

sumatiruvāca/
atharṣiḥ svāśramaṃ gatvā mānavyā saha bhāryayā /
mudaṃ prāpa hatāśeṣa pātako yogayuktayā

sā mānavī taṃ varamātmanaḥ patiṃ /
netreṇahīnaṃ jarasā gataujasam /
siṣeva enaṃ harimedhasottamaṃ /
nijeṣṭadātrīṃ kuladevatāṃ yathā

śūśrūṣatī svaṃ patimiṃgitajñā /
mahānubhāvaṃ tapasāṃ nidhiṃ priyam /
parāṃ mudaṃ prāpa satī manoharā /
śacī yathā śakraniṣevaṇodyatā

caraṇau sevate tanvī sarvalakṣaṇalakṣitā /
rājaputrī suṃdarāṃgī phalamūlodakāśanā

nityaṃ tadvākyakaraṇe tatparā pūjane ratā /
kālakṣepaṃ prakurute sarvabhūtahite ratā

visṛjya kāmaṃ daṃbhaṃ ca dveṣaṃ lobhamaghaṃ madam /
apramattodyatā nityaṃ cyavanaṃ samatoṣayat

evaṃ tasya prakurvāṇā sevāṃ vākkāyakarmabhiḥ /
sahasrābdaṃ mahārāja sā ca kāmaṃ manasyadhāt

kadāciddevabhiṣajāvāgatāvāśrame muneḥ /
svāgatena susaṃbhāvya tayoḥ pūjāṃ cakāra sā

śaryātikanyākṛtapūjanārgha-/
pādyādinā toṣitacittavṛttī /
tāvūcatuḥ snehavaśena suṃdarau /
varaṃ vṛṇuṣveti manoharāṃgīm

tuṣṭau tau vīkṣya bhiṣajau devānāṃ varayācane /
matiṃ cakāra nṛpateḥ putrī matimatāṃ varā

patyabhiprāyamālakṣya vācamūce nṛpātmajā /
dattaṃ me cakṣuṣī patyuryadi tuṣṭau yuvāṃ surau

ityetadvacanaṃ śrutvā sukanyā yā manoharam /
satītvaṃ ca vilokyedamūcaturbhiṣajāṃ varau

tvatpatiryadi devānāṃ bhāgaṃ yajñe dadhātyasau /
āvayoradhunā kurvaścakṣuṣoḥ sphuṭadarśanam

cyavano'pyomiti prāha bhāgadāne varaujasoḥ /
tadā hṛṣṭāvaśvinau tamūcatustapatāṃ varam

nimajjatāṃ bhavānasminhrade siddhavinirmite /
ityukto jarayāgrasta deho dhamanisaṃtataḥ

hradaṃ praveśito'śvibhyāṃ svayaṃ cāmajjatāṃ hrade /
puruṣāstraya uttasthurapīcyā vanitāpriyāḥ

rukmasrajaḥ kuṃḍalinastulyarūpāḥ suvāsasaḥ /
tānnirīkṣya varārohā surūpānsūryavarcasaḥ

ajānatī patiṃ sādhvī hyaśvinau śaraṇaṃ yayau /
darśayitvā patiṃ tasyai pātivratyena toṣitau

ṛṣimāmaṃtrya yayaturvimānena triviṣṭapam /
yakṣyamāṇe kratau svīyabhāgakāryāśayāyutau

kālena bhūyasā kṣāmāṃ karśitāṃ vratacaryayā /
premagadgadayā vācā pīḍitaḥ kṛpayābravīt

tuṣṭo'hamadya tava bhāmini mānadāyāḥ /
śuśrūṣayā paramayā hṛdi caikabhaktyā /
yo dehināmayamatīva suhṛtsvadeho /
nāvekṣitaḥ samucitaḥ kṣapituṃ madarthe

ye me svadharmaniratasya tapaḥ samādhi-/
vidyātmayogavijitā bhagavatprasādāḥ /
tāneva te madanusevanayā'viruddhān /
dṛṣṭiṃ prapaśya vitarāmyabhayānaśokān

anye punarbhagavato bhruva udvijṛṃbha-/
visraṃsitārtharacanāḥ kimurukramasya /
siddhāsi bhuṃkṣva vibhavānnijadharmadohān /
divyānnarairduradhigānnṛpavikriyābhiḥ

evaṃ bruvāṇamabalākhilayogamāyā /
vidyāvicakṣaṇamavekṣya gatādhirāsīt /
saṃpraśrayapraṇayavihvalayā gireṣad /
vrīḍāvilokavilasaddhasitānanāha

sukanyovāca/
rāddhaṃ bata dvijavṛṣaitadamoghayoga-/
māyādhipe tvayi vibho tadavaimi bhartaḥ /
yaste'bhyadhāyi samayaḥ sakṛdaṃgasaṃgo /
bhūyādgarīyasi guṇaḥ prasavaḥ satīnām

tatreti kṛtyamupaśikṣya yathopadeśaṃ /
yenaiṣa karśitatamoti riraṃsayātmā /
sidhyeta te kṛtamanobhava dharṣitāyā /
dīnastadīśabhavanaṃ sadṛśaṃ vicakṣva

sumatiruvāca/
priyāyāḥ priyamanvicchaṃścyavano yogamāsthitaḥ /
vimānaṃ kāmagaṃ rājaṃstarhyevāviracīkarat

sarvakāmadughaṃ ramyaṃ sarvaratnasamanvitam /
sarvārthopacayodarkaṃ maṇistaṃbhairupaskṛtam

divyopastaraṇopetaṃ sarvakālasukhāvaham /
paṭṭikābhiḥ patākābhirvicitrābhiralaṃkṛtam

sragbhirvicitramālābhirmaṃjusiṃjatṣaḍaṃghribhiḥ /
dukūlakṣaumakauśeyairnānāvastrairvirājitam

uparyupari vinyastanilayeṣu pṛthakpṛthak /
kḷptaiḥ kaśipubhiḥ kāṃtaṃ paryaṃkavyajanādibhiḥ

tatratatra vinikṣipta nānāśilpopaśobhitam /
mahāmarakatasthalyā juṣṭaṃ vidrumavedibhiḥ

dvāḥsu vidrumadehalyā bhātaṃ vajrakapāṭakam /
śikhareṣviṃdranīleṣu hemakuṃbhairadhiśritam

cakṣuṣmatpadmarāgāgryairvajrabhittiṣu nirmitaiḥ /
juṣṭaṃ vicitravaitānairmuktāhārāvalaṃbitaiḥ

haṃsapārāvatavrātaistatra tatra nikūjitam /
kṛtrimānmanyamānaistānadhiruhyādhiruhya ca

vihārasthānaviśrāma saṃveśa prāṃgaṇājiraiḥ /
yathopajoṣaṃ racitairvismāpanamivātmanaḥ

evaṃ gṛhaṃ prapaśyaṃtīṃ nātiprītena cetasā /
sarvabhūtāśayābhijñaḥ svayaṃ provāca tāṃ prati

nimajjyāsminhrade bhīru vimānamidamāruha /
subhrūrbhartuḥ samādāya vacaḥ kuvalayekṣaṇā

sarajo bibhratī vāso veṇībhūtāṃśca mūrddhajān /
aṃgaṃ ca malapaṃkena saṃchannaṃ śabalastanam

āviveśa sarastatra mudā śivajalāśayam /
sāṃtaḥsarasi veśmasthāḥ śatāni daśakanyakāḥ

sarvāḥ kiśoravayaso dadarśotpalagaṃdhayaḥ /
tāṃ dṛṣṭvā śīghramutthāya procuḥ prāṃjalayaḥ striyaḥ

vayaṃ karmakarīstubhyaṃ śādhi naḥ karavāma kim /
snānena tā mahārheṇa snāpayitvā manasvinīm

dukūle nirmale nūtne dadurasyai ca mānada /
bhūṣaṇāni parārghyāni varīyāṃsi dyumaṃti ca

annaṃ sarvaguṇopetaṃ pānaṃ caivāmṛtāsavam /
athādarśe svamātmānaṃ sragviṇaṃ virajoṃbaram

tābhiḥ kṛtasvastyayanaṃ kanyābhirbahumānitam /
hāreṇa ca mahārheṇa rucakena ca bhūṣitam

niṣkagrīvaṃ valayinaṃ kvaṇatkāṃcananūpuram /
śroṇyoradhyastayā kāṃcyā kāṃcanyā bahuratnayā

subhruvā sudatā śuklasnigdhāpāṃgena cakṣuṣā /
padmakośaspṛdhā nīlairalakaiśca lasanmukham

yadā sasmāra dayitamṛṣīṇāṃ vallabhaṃ patim /
tatra cāste sahastrībhiryatrāste sa munīśvaraḥ

bhartuḥ purastādātmānaṃ strīsahasravṛtaṃ tadā /
niśāmya tadyogagatiṃ saṃśayaṃ pratyapadyata

satāṃ kṛta malasnānāṃ vibhrājaṃtīmapūrvavat /
ātmano bibhratīṃ rūpaṃ saṃvītarucirastanīm

vidyādharī sahasreṇa sevyamānāṃ suvāsasam /
jātabhāvo vimānaṃ tadārohayadamitrahan

tasminnaluptamahimā priyayānuṣakto /
vidyādharībhirupacīrṇavapurvimāne /
babhrāja utkacakumudgaṇavānapīcya /
stārābhirāvṛta ivoḍupatirnabhaḥsthaḥ

tenāṣṭalokapavihārakulācaleṃdra -/
droṇīṣvanaṃgasakhamārutasaubhagāsu /
siddhairnutodyudhunipātaśivasvanāsu /
reme ciraṃ dhanadavallalanāvarūthī

vaiśraṃbhake suravane naṃdane puṣpabhadrake /
mānase caitrarathye ca sare me rāmayā rataḥ

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe/
cyavanasya tapobhogavarṇanaṃ nāma paṃcadaśo'dhyāyaḥ