Padma Purana · Chapter 5.113

trayodaśottaraśatatamo'dhyāyaḥ

śrīrāma uvāca-
khe dṛśyaṃte vimānasthā nānārūpadharāḥ śubhāḥ /
sarvakāmaphalopetāḥ subhāryyāḥ śatayoṣitaḥ

sahasranaranārībhiḥ pūjyamānāḥ pade pade /
gāyaṃti viṃśatiryoṣā rūpalāvaṇyakomalāḥ

karaṃkavāhinī caikā cāmarāsaktabāhavaḥ /
tālavṛṃtadvayaṃ nāryyo vījayaṃti pragṛhya vai

sacakre cāṃkamadhye syā upadhānaṃ tathāparaḥ /
ekasyāḥ karayorhastaḥ stāvakānekasaṃyutaḥ

nānāvidhaparīhāsa kṛtotphullamukhāṃbujaḥ /
ekaikatra vimāne tu dṛśyate caṃdradīdhitiḥ

strīśateṣu vimāneṣu dṛśyate īśvaraḥ śubhaḥ /
ete kiṃ puṇyakartāro viṣṇumāyāthavā mune

śaṃbhuruvāca-
ete hi brāhmaṇāḥ puṇyā gṛhasthāśramavāsinaḥ /
yeṣāmeva ca sa grāso datto daśarathena te

teṣāṃ tu mamacittānāṃ kadācidabhavanmatiḥ /
yatheha sukhinaḥ sarve vayaṃ cānyopajīvinaḥ

asmānevānujīvaṃti śataśo manujā iha /
yena puṇyena ca vayaṃ sarvekāmānumodinaḥ

sustrīkṛtopacārāśca sarve rājyasukhānvitāḥ /
jarāmaraṇahīnāśca yuvānaḥ sarvadaiva hi

vicāryaivaṃ dvijāḥ sarve vasiṣṭhasyāśramaṃ yayuḥ /
āgatānatha saṃpūjya vasiṣṭho vākyamuktavān

kimarthamāgatā yūyaṃ śīghraṃ brūta dvijottamāḥ /
dvijā ūcuḥ -
vayamicchāmahe sarve sarvasaṃpatsamanvite

vimāne kāmage roḍhuṃ tatsaṃpādaya no guro /
tatteṣāṃ ciṃtitaṃ śrutvā vasiṣṭho vākyamabravīt

purāṇaṃ sarvadā viprāḥ śrotavyaṃ pāpanāśanam /
dharmaścārthaśca kāmaśca mokṣastatraiva dṛśyate

tathetyuktvātha sunayaḥ purāṇakuśalaṃ munim /
jagmuraṃgirasaṃ śreṣṭhaṃ sarvaśāstraviśāradam

sarvāgamapurāṇajñaṃ sadā satkarmmacāriṇam /
idamūcurnamaskṛtya vayaṃ saphalajīvinaḥ

kṛtakṛtyā vayaṃ brahmansākṣāddṛṣṭo'si yanmune /
aṃgirā uvāca-
yatkāryamāgatā yūyaṃ tatkāryaṃ karavāṇyaham

purāṇaṃ śrotukāmāstu yūyamatra samāgatāḥ /
kīrtayiṣye vidhānaṃ vaḥ samastāghavināśanam

sarvajñānapradaṃ devaṃ tatvavijñānasaṃbhavam /
śivabhaktipradaṃ hṛdyaṃ viṣṇubhaktipradaṃ śubham

vicitrasvagatiprāpti jñānadaṃ ramaṇīpradam /
nānāvidhaśubhajñānaṃ ratitaṃtraprakāśakam

bhuktimuktipradhānaṃ ca vidhidarśanadīpakam /
vicitrabhaktikathanaṃ bhaktisāhasakīrtanam

vratapratiṣṭhādānādi bhasmapūjāvidhipradram /
purāṇaṃ pādmamuditaṃ brahmapadmopanirvṛtam

maheśvareṇa kathitaṃ pramathākṛtivarṇanam /
etadanyatra kathitaṃ purāṇe pādma eva tu

dilīpenapurāpṛṣṭovasiṣṭhaḥproktavānidam /
tacchṛṇudhvaṃ munivarā jñānaṃ sarvaṃ bhaviṣyati

atha tadvacanādviprāḥ purāṇaśravaṇe ratāḥ /
kathaṃ śrotavyamadhunā kiṃ kṛtvetyabruvanmunim

so'pi sarvaṃ samācaṣṭa śṛṇu dharmaṃ sanātanam /
namaskṛtya purāṇajñaṃ dadyāccārghāsanaṃ tataḥ

niṣīda tatra cetyuktvā gaṃdhapuṣpaiḥ samarcayet /
ātmayogaṃ ca tāṃbūlamadhikaṃ vā samarpayet

brūhi puṇyakathāṃ brahmanpaurāṇikīmitīrayet /
na khaṭvāsanamāruhya noccāsanamathāpi vā

nīcāsano vai śṛṇuyāddharmmakāmārthasiddhaye /
śṛṇvityuktvā purāṇajña imaṃ maṃtramudīrayet

namo hariṃharamatho gaṇeśaṃ bhāratīmataḥ /
iṣṭadevaṃ namaskṛtvā purāṇaṃ vaktumarhati

arddhayāmaṃ pratidinaṃ yadi vāpīcchayā bhavet /
evaṃ pāṭhasamāptiṃ ca śrutvā kṛtyaṃ samācaret

śrotuśca tūṣṇīṃ mananaṃ tūṣṇīṃ śravaṇameva vā /
anyathā bhāratī kruddhyet tatkrodhānmūkatā bhavet

tasmātpurāṇaśrotā ca tāṃbūlādisamarpaṇam /
vaktuśca jīvikākāryā svasāmarthyānusārataḥ

purāṇaprakrame deyaṃ sacelodgamanīyakam /
sūkṣmāṃbaramatho vāpi vastradvitayamarpayet

āsanaṃ tu mahaccitraṃ ramyamūrjasvalaṃ mṛdu /
suvarṇaṃ vā tathā dadyādgo bhū gehādikaṃ tathā

etatsamastaṃ vipreṃdrā dakṣiṇāmūrtinā purā /
śaṃkareṇa munīnāṃ hi bhāṣitaṃ ca divaukasām

atha te munayaḥ sarve taṃ praṇamyāsanasthitam /
pṛthakpṛthakca tāṃbūlaṃ datvā śuśrūṣavaḥ sthitāḥ

tenāpi kathitaṃ sarvaṃ purāṇaṃ sarvasaṃpradam /
upāṃtādhyāyaparyyaṃtaṃ śrutavaṃto dvijottamāḥ

dilīpa uvāca-
kāmagena vimānena sarvasaṃpatsamṛddhinā /
sarvataḥ sukhayuktena puṇyasthānamupasthitam

vasiṣṭha uvāca-
nālaṃ pṛṣṭaṃ tvayā rājannitopyatiśayāṃtaraiḥ /
krīḍamānā bhaviṣyaṃti yena tatpuṇyamucyate

sudhādhavalitaṃ kṛtvā śivaveśmasamaṃ tataḥ /
striyo rūpavilāsāḍhyāḥ sarvālaṃkārabhūṣitāḥ

nānāsugītakuśalā nānānṛtyaviśāradāḥ /
catasro'ṣṭau ṣaḍathavā marddaladhvanikāḥ striyaḥ

vaśinyau dve āvajikyau koṇikādhamane ubhe /
lāsikyastu catasraḥ syuḥ saṃtuṣṭaikātha gāyikā

ekā dve vā sugītajñe'mukhare hi prakīrtite /
koṇavādyakṛte dve tu tūṣṇīṃbhūtāḥ ṣaḍaṣṭa vā

sarvā rūpavilāsinyaḥ sarvāścāpatitastanāḥ /
ratitaṃtrādhikuśalāstata evāviśaṃkitāḥ

susūkṣmā vastraveṣāśca vidyuccaṃcaladṛṣṭayaḥ /
etādṛśībhiryoṣābhiryena nṛtyaṃ hi kāritam

ekasmindivase rājanvatsarānsavimānagaḥ /
śatastrīvīkṣitamukho yuvā bahubhirarcitaḥ

ānaṃdapoṣasaṃpūrṇaḥ krodherṣyādivivarjitaḥ /
paṃcagaṃdhaviliptāṃgaḥ sacaṃdrā hidalānanaḥ

sūryopamastu yoṣāśca sarvāstā daśanānvitāḥ /
sadyovikasitāmodi pārijātakṛtasrajaḥ

sarvā vikasitārohi raktasaṃdhikṛtasrajaḥ /
dhammille vakṣasi tathā bibhratyaḥ susmitādharāḥ

caratyetādṛśībhistu nṛtyagītānumoditaḥ /
evaṃ vimānago bhūtvā uṣitvā kālamakṣayam

paścājjāyeta nṛpatirevaṃ kṛtvā punastathā /
rājyaṃ svargaphalaṃ bhuktvā śivabhakto bhaviṣyati

śaṃbhuruvāca-/
dilīpāya vasiṣṭhoktaṃ munīnāmaṃgirobravīt /
te tathā kṛtavaṃtaśca tauryyatrikamumāpateḥ

śrutvā purāṇaṃ pādmaṃ ca samagraṃ sukhino bhavan /
ta ete brāhmaṇā rāma vimānavaramāsthitāḥ

dṛśyaṃte khe ca sukhinaḥ sadā muditamānasāḥ /
etatte sarvamākhyātaṃ purāṇeṣu viniścitam

itaḥ paraṃ ca kiṃ bhūyaḥ śrotumicchasi rāghava

ti śrīpadmapurāṇe pātālakhaṃḍe śivarāghavasaṃvāde trayodaśottaraśatatamo'dhyāyaḥ