Scripture Library

Padma Purana · Chapter 5.111

5.111.1

śrīrāma uvāca-
maheśanāmamāhātmyaṃ pūjāmāhātmyameva ca /
namaskārasya māhātmyaṃ dṛṣṭimāhātmyameva ca

5.111.2

jaladānasya māhātmyaṃ dhūpadānasya sattama /
dīpagaṃdhādidānasya māhātmyaṃ vada me guro

5.111.3

śaṃbhuruvāca-
ekaikanāmamāhātmyaṃ vistarānna hi śakyate /
saṃkṣepeṇa ca te vacmi śṛṇu rāghava sādaram

5.111.4

purā tretāyuge rājā vidhṛto nāma vīryavān /
mṛte pitari bālosau bhūmirājyebhiṣecitaḥ

5.111.5

samānavayasaḥ sarvānsamīpasthāṃścakāra saḥ /
ye vṛddhā ye ca vidvāṃsaste ca tasya na saṃmatāḥ

5.111.6

yuvānaḥ saṃmatā duṣṭā akāryakaraṇāstathā /
sustryānayanadakṣāśca corakarmaviśāradāḥ

5.111.7

bhāṃḍavārtāratā lāsyanipuṇāstasya saṃmatāḥ /
vaśīkaraṇamaṃtrajñā vastrauṣadhavidastathā

5.111.8

gītanartanaśīlāśca dhūrttā dyūtavidaḥ priyāḥ /
pitṛsaṃmatakartṝṇāṃ tyāgaṃ cakre sa pārthivaḥ

5.111.9

vicārya sa ca taiḥ sārddhaṃ duṣṭaiḥ kāryamakārayat /
etādṛśāṃstathā cānyānduṣṭānsaha yuyoja ha

5.111.10

etaduktimupālaṃbya śiṣṭaṃ suhṛdamatyajat /
uromuṣṭiṃ ca phetkāraṃ ye kuryustasya te priyāḥ

5.111.11

bhagalakṣaṇatattvajñā ratitaṃtraviśāradāḥ /
rājanītivihīnaṃ tadrājyaṃ samabhavattadā

5.111.12

gajāśvarathamuṣṭrājaṃ gomahiṣyādikaṃ ca yat /
tatsarvaṃ nāśamāpannamapahārāyatastataḥ

5.111.13

ratnāni vasudhānyāni na dṛśyaṃte pure tadā /
atha bhūpāṃtareṇāsau nirjitaḥ prapalāyitaḥ

5.111.14

mahāraṇyamatho gatvā giridurgamakalpayat /
tatra cālpaparīvāraścoravṛttiṃ samāśritaḥ

5.111.15

suvarṇavastradhānyādi ratnagaṃdhādikaṃ tathā /
tatratatra vinirdiśya corānāyānavaṃcakān

5.111.16

baṃdhādyakārayattaistu dravyāharaṇakarmaṇi /
yadāhāro na vidyeta tadāhāramakalpayat

5.111.17

gomahiṣyādimāṃsena yadyannaṃ nopalabhyate /
aśvīya naramāṃsena bhojanaṃ paryyakalpayat

5.111.18

etādṛśamabhūdvṛttaṃ saṃdhyopāsādivarjitam /
ekastu sacivastasya surāpo nāma rākṣasaḥ

5.111.19

niyuṃkte sarvakālaṃ tamāharaprahareti ca /
evaṃ rakṣomate sthitvā nānādeśagatānnarān

5.111.20

nṛsahasraparīvāro hyādadyādakṛpālayaḥ /
svasyābhimatayoṣāstu jñātvā jñātvā samāharat

5.111.21

kiṃcitkālaṃ ca tā bhuktvā tāsāṃ māṃsamabhakṣayat /
evaṃ hatvā narānnārī rājyaṃ cakre suduḥsaham

5.111.22

evaṃ varṣasahasraṃ tu rājyaṃ kṛtvā narādhamaḥ /
jarāśithilasarvāṃgo valīpalitadūṣitaḥ

5.111.23

nirjīvamabhavatsthānaṃ samaṃtāddaśayojanam /
atha mṛtyudinaṃ prāptaṃ rājñastasya mahātmanaḥ

5.111.24

mṛtyukāletha saṃprāpte snātaṃ bhūmigataṃ nṛpam /
tasya cānucarāḥ sarve parivāryopatasthire

5.111.25

surāpaḥ sacivaḥ prāha kiṃ kāryaṃ mama cādiśa /
atha rājā tathā śakto nirgatāyustadārditaḥ

5.111.26

nābheradhastu kṣīṇāsuḥ kathaṃcidvākyamuktavān /
tvaṃ sarvakāle daityeṃdra praharaprāharāhara

5.111.27

ityathoktvā mamārāsau yamadūtāḥ samāyayuḥ /
vicitraṃ baṃdhane yatnaṃ cakrustāḍanatatparāḥ

5.111.28

cūrṇitā baṃdhapāśāśca hetidaṃḍāśca cūrṇitāḥ /
tadgātrasparśamātre ca tadadbhutamivābhavat

5.111.29

athāyātaḥ svayaṃ mṛtyuḥ pāśenainamayojayat /
mṛtyupāśamapicchinnaṃ vīkṣya mṛtyuraciṃtayat

5.111.30

sarvamartyamṛtirdṛṣṭā dṛṣṭā naitādṛśī kvacit /
iti ciṃtāpare mṛtyau jvālāvaktraḥ pratāpavān

5.111.31

vīrabhadreṇa nirdiṣṭaḥ sahasāyācca śūlabhṛt /
jvālāvaktramathālokya mṛtyustūrṇaṃ palāyayau

5.111.32

palāyamānaṃ taṃ dṛṣṭvā mṛtyuṃ vahnimukhastadā /
are re cora cora tvaṃ tiṣṭhatiṣṭha kva yāsyasi

5.111.33

enaso mucyate coraḥ śūlāropaṇamātrataḥ /
evamābhāṣya mṛtyuṃ taṃ śūlaprotamakalpayat

5.111.34

śūlaṃ skaṃdhagataṃ kṛtvā dūtānsaṃgrathya rajjunā /
pādaśṛṃkhalavinyastānādāya nṛpamadhyagāt

5.111.35

vimānavaramāropya gītavādyasuśobhitam /
vīrāṃtikamatho gatvā sarvamasmai nyavedayat

5.111.36

vīrabhadropi tatsarvaṃ śaṃkarāyāmitātmane /
nānāmunigaṇairdevairbrahmaviṣṇupuraḥ suraiḥ

5.111.37

sevyamānāya devāya pārvatīsahitāya ca /
praṇipatya nivedyātha śūlasthaṃmṛtyumeva ca

5.111.39

tūṣṇīṃ babhūva viśvātmā vīrabhadraḥ pratāpavān /
agnyānanaṃ vīkṣya śivo vigarhayankathaṃ tvayaitadgaṇasāhasaṃ kṛtam /
bibheṣi mṛtyorna kathaṃ yamādhikādvadasva sarvaṃ paramārthato me

5.111.40

praṇamya taṃ vahnimukho'tiroṣo mṛtyuṃ samālokya nanarta harṣāt /
uvāca cauryaṃ kṛtameva mṛtyunā tadeṣa śūle'pi mayā prarohitaḥ

5.111.41

vimocayāmāsa śivopi mṛtyuṃ dūtānaśeṣānnirujaścakāra /
mṛtyuṃ samālokya śivo babhāṣe mannāma eṣāṃ maraṇe samāste

5.111.42

maccetasāmanyadhiyāṃ ca nāmahīnākṣaraṃ vādhikavarṇayuktam /
mamaiva lokaṃ pradadāmi satyaṃ hyanena nāma prahareti bhāṣitam

5.111.43

praśabdamātraṃ tvadhikaṃ haretipadapradaṃ vai padamīrayaṃti /
ārādamūṃstvaṃ japato namasva madīyavākyaṃ ca yamaṃ vadasva

5.111.44

natiṃ yatiṃ kīrtimupāstimāśritā dāsyaṃ ca kaiṃkaryyamatha śrutiṃvadāḥ /
paṃcākṣaroktiṃ śatarudriyoktiṃ śivasya kurvaṃti na te vicāryāḥ

5.111.45

mannāmarudrākṣavibhūtidhāraṇo mamāgrato yastu purāṇavaktā /
sarveṣu pāpeṣvapi teṣu satsu praśāsmyahaṃ naiva yamādhikāraḥ

5.111.46

ye cāpi pāpānvitamāyino narāḥ parānnavastrādivadhūbhujaśca /
vārāṇasīmṛtyuparāśca ye vai śrīśailamartyāśca na te vicāryāḥ

5.111.47

yūkāśca daṃśā api matkuṇāśca mṛgādayaḥ kīṭapipīlikāśca /
sarīsṛpā vṛścikaśūkarāśca kāśīmṛtāḥ śaṃkaramāpnuvaṃti

5.111.48

idaṃ nāmagṛṇandhyāyedyo vai hṛtpadmamaṃdire /
triyaṃbakaṃ virūpākṣaṃ somaṃ somārddhabhūṣaṇam

5.111.49

trinetrakaṃ trayīnetraṃ somasūryāgnilocanam /
taṃ namaskṛtya dūrastho bhavamṛtyo mamājñayā

5.111.50

athākarṇya śivaproktaṃ mṛtyustuṣṭāva śaṃkaram /
namaste devatānātha namaste devamūrtaye

5.111.51

sarvajñāya namastubhyaṃ paśūnāṃ pataye namaḥ /
atha devo mahādevo mṛtyuṃ prāha varaṃ vṛṇu

5.111.52

stotreṇānena tuṣṭosmi mṛtyurvaramayācata /
tvadīyaṃ pālaya vibho māṃ ca śaṃkara pāpinam

5.111.53

tathetyuktvā mṛtyumīśo gaccha vatseti cābravīt /
yamalokaṃ gataḥ sopi yamāyāśeṣamuktavān

5.111.54

śaṃbhuruvāca-
ya idaṃ śṛṇuyānnityaṃ puṇyākhyānamanuttamam /
vimuktaḥ sarvapāpebhyo yāti śaṃkarasannidhim

5.111.111

iti śrīpadmapurāṇe pātālakhaṃḍe śivarāghavasaṃvāde ekādaśottaraśatatamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0