Padma Purana · Chapter 5.110

śrīrāma uvāca-
ayamagniśikho nāma vahniḥ śivagaṇaśca vai /
sa kathaṃ tādṛśo bhūtastanme vada namastava

śaṃbhuruvāca-
ayamāsītpurā kaścitkṣattriyaḥ krodhanaḥ sadā /
naṣṭabhāryo naṣṭaseno naṣṭarāṣṭrotiduḥkhitaḥ

labdhvā lulāya dvitayaṃ kṛṣiṃ cakre sahātmajaiḥ /
ṛṇena mahatā yuktaḥ punaścātīva duḥkhitaḥ

punaśca duḥkhito rājā sarpeṇa sutanāśanāt /
tathābhūto mahīpālastatyāja kṛṣimapyuta

parityajya sutau cāpi tyaktāhāro ruroda ha /
sutāvatha samāgamya prāhatuḥ pitaraṃ tvidam

kimarthaṃ rudyate tāta naṣṭo nāyāti rodanāt /
śarīraśoṣaṇāyātha śokaste'dya bhaviṣyati

śokena cakṣuṣī naṣṭe kaṃṭho naṣṭastathā tava /
anuṣṭhānaṃ tathā naṣṭaṃ kimarthaṃ paritapyase

eko naṣṭo na cāyāti rakṣa paṃcasthitānasūn /
bahūnāṃ rakṣaṇaṃ puṇyamāśritānāṃ viśeṣataḥ

anyāśritamamuṃ śatruṃ kathaṃ śocitumarhasi /
pitovāca-
putraḥ śatruḥ kathaṃ putrau yuvāṃ śatrū tathā ca me

atyaṃtasukhinaṃ putraṃ kathaṃ śatrumabhāṣatam /
sutāvūcatuḥ
jāyamāno haredbhāryāṃ varddhamāno hareddhanam

mriyamāṇastathā prāṇāñchatrutvaṃ kimataḥ param /
yatsukhaṃ ca tvayā proktaṃ sparśanāliṃganādibhiḥ

duḥkhodarkamidaṃ rājansarvametadvadāmi te /
prasūtikāle putrasya bhāryānāśavicāraṇā

jīvitāyāmathopatnyāmātmanaḥ sukhanāśanam /
yonyaśuddhau tu jātāyāṃ saṃyogo nopapadyate

āliṃganapare gāḍhaṃ stanyenāṃgaṃ pariplute /
tathāpi yadi saṃyogaḥ śiśurodanatāḥ striyāḥ

dṛḍhaṃ śiśugataṃ cittaṃ tato vairasyameva ca /
atha cetpatito ḍiṃbho madhye maithunamudgatiḥ

ratimadhye tu vicchede duḥkhaṃ kiṃcidasannibham /
sarvakāle parimite kadācidratisaṃbhavaḥ

tatkāle bhojanaṃ nāsti svāpo nāsti ca bhāryayā /
śiśūnāṃ rakṣaṇe duḥkhaṃ vyādhitarṣagrahādibhiḥ

tanmataṃ yatsukhaṃ citraṃ yathāṃkārohaṇaṃ pituḥ /
āliṃganakṛtaṃ tāta cuṃbanādikṛtaṃ tathā

atyantamadhuroktyādi yatsukhāni nareśvara /
ratimadhye virāmasya kalāṃ nārhaṃti ṣoḍaśīm

anyānyapi ca duḥkhāni saṃti putre sahasraśaḥ /
anena tvaṃ kiṃ kriyase ihāmutra virodhinā

tyaja śokamidaṃ tasmādāvāṃ putrau sthitāviha /
śrīrājovāca-/
tyajāmi śokaṃ durvāraṃ sarvakāryavirodhinam

ātmanaśca hitaṃ kāryamihāmutra sutau mama /
purodhasaṃ tu gacchāmi mama pūrvaṃ mahāgurum

vasiṣṭhaṃ munivaryaṃ ca sa dāsyati gatiṃ mama /
evamuktvā gato vipraṃ vārāṇasyāṃ sthitaṃ gurum

daṃḍavatpraṇanāmātha muninā paripūjitaḥ /
āliṃgitaśiro ghrāto dattāsanaparigrahaḥ

uktaścāgamanaṃ kiṃ te kiṃ kāryyaṃ karavāṇi vai /
rājovāca-
gatiṃ prayaccha me vipra saṃsārataraṇāya hi

khinnohaṃ karmaṇā śaśvadbhavaṃtaṃ śaraṇaṃ gataḥ /
vasiṣṭha uvāca-
gatiṃ paśya mahāliṃgaṃ viśveśvaramiti sthitam

enaṃ pūjaya rājeṃdra devadevaṃ pinākinam /
yamārādhya purā śaktiraruṃdhatyāḥ suto muniḥ

rakṣasā bhakṣitaścāpi yamalokaṃ gato na saḥ /
kiṃcitkālaṃ gataḥ svargaṃ brahmalokamagādataḥ

brahmalokādviṣṇuloke krīḍannāste suto mama /
amuṃ paśya mahārāja lubdhakaṃ vanacāriṇam

pūjayaṃtaṃ hi viśveśaṃ patramātrai svasaṃbhṛtaiḥ /
śamīvṛkṣasya saṃbhūtaistathā pūgaprasūnakaiḥ

kadaṃbakusumairarkakusumairyūthikābhavaiḥ /
etairanyairmaheśānaṃ pūjayaṃtaṃ vilokaya

itorddhayāmamātreṇa mariṣyati tadadbhutam /
aṃtakāle samāyāte lubdhakopi śivāya vai

upahārapradānāya dṛṣṭavānpārśvato ghaṭam /
taṃ cūtaphalasaṃpūrṇaṃ śunocchiṣṭaṃ vigarhitam

saṃkalpitopahārasya hyabhāvāllubdhakastathā /
idaṃ jagau śubhaṃ vākyaṃ lokānāṃ bhaktisūcakam

puṣpābhāve harirnetraṃ phalābhāveṃgulaṃ raviḥ /
liṃgavisraṃsanekaṃ ca jamadagni ṛṣistathā

liṃgapīṭhavibhede ca gātraṃ nirbhidya dattavān /
anyairmāhaiśvarairanyatsāhasaṃ paramaṃ kṛtam

mamāpi tattathā kāryyamanyathā doṣabhāgaham /
etasminnaṃtare kaścidunmattaḥ śivamabhyagāt

atha lubdhakṛtāṃ pūjāmāhṛtyābhakṣayatkṣaṇāt /
vamanaṃ ca tathā cakre śivapīṭhetha lubdhakaḥ

śivāpakāriṇaṃ cainaṃ hanmi no vetyaciṃtayat /
atha svātmavadhāyaiva yatnamāsthāya śaṃkaraḥ

unmattena yathodbhuktā śivapūjā mayā kṛtā /
liṃgaprāvaraṇe hyeṣā tadahaṃ mama dehinaḥ

prāvṛtistvagiyaṃ tvadya nirmmoktavyā mayā drutam /
pūjāvimocanāyaitatphalahānergalaṃ tyajet

itthaṃ saṃkalpya sa tathā tīkṣṇasvadhitinādbhutam /
cakre tvacaṃ dakṣapādaṃ tvacaṃ cchitvā kaṭeradhaḥ

vāmapādaṃ tathā cakre kaṭiparyaṃtamāśuca /
hṛṣṭaścāvepitaścaiva tata ūrdhvamathācchinat

karāṃsodarahṛtkaṃṭhatvacaṃ nirbhidya lubdhakaḥ /
mastakasya tvacaṃ cāpi nirbibheda prahṛṣṭavān

tayoraṃtaratastasmādgātraṃ nirbhidya vartulam /
chittvāṃguli samādāya devāyārpitavāṃstvacam

ārādeva tathā divyarūpaḥ svakṣaścaturbhujaḥ /
nānābhūṣaṇasaṃyuktaḥ sthito viyati śāṅkaraḥ

atha śaivāḥ samāyātā dūtāḥ śatasahasraśaḥ /
vicitramukuṭākārāḥ sarvābharaṇabhūṣitāḥ

triśūlapāṇayaḥ sarve śuddhasphaṭikasaṃnibhāḥ /
caturbhujāḥ surūpāśca vimānavarasaṃsthitāḥ

sarve sūryasamāḥ śāṃtā raṃbhāvatpriyayā yutāḥ /
sūnupatnībalotsāha vilāsastrīśatānvitāḥ

tejasā sūryasadṛśāḥ puṣpavṛṣṭimavākiran /
tairāhūto lubdhakaśca nāgacchadavadacca tān

bhāryābaṃdhujanopeto gacchehamathavā na vā /
śaivāstadvacanaṃ śrutvā vākyametadathocire

yena puṇyaṃ kṛtaṃ pāpaṃ tena bhogyaṃ hi tatphalam /
lubdhaka uvāca-
aśaucānāṃ ca sarveṣāṃ dharmāṇāmekakartṛkam

māheśvarāṇāṃ dharmāṇāṃ phalaṃ ca dvibahuṣvapi /
etasminnaṃtare prāpto vīrabhadraḥ śatārbhakaḥ

nānākoṭigaṇopeto ehi lubdhakabaṃdhuyuk /
sarvaṃ tvayoktaṃ ca tathā sabhāryo jñātibaṃdhuyuk

āruhyedaṃ vimānaṃ ca śivaṃ gaccha śivaṃ tu vaḥ /
atha tadvacanātprāptaḥ śivalokaṃ vimānagaḥ

vasiṣṭha uvāca-
dṛṣṭavānasi sarvaṃ tvamīśapūjāṃ samācara /
vimuktapāpabaṃdhastvaṃ śivalokaṃ gamiṣyasi

yadi rājyaṃ tvayā prārthyaṃ mārjayeśāṃ gaṇaṃ nṛpa /
gomayodakalepaṃ ca nityameva samācara

etāvatā bhūmirājyaṃ dhruvaṃ tava bhaviṣyati /
yāvadāyuśca te rājyamaṃte śivapadaṃ bhavet

naitasmiṃstu bhavedrājyasaṃsiddhiranumṛtyutaḥ /
ato dehāṃtaraṃ prāpya śivasevāprabhāvataḥ

bhaviṣyati ca te rājyaṃ śivabhaktiḥ sthirā tathā /
śaṃbhuruvāca-
atha kṛtvā tathā pūjāṃ mṛtaḥ svargaṃ gatastataḥ

rājajanmapunaḥ prāpya rājyaṃ cakre śiverataḥ /
kadācidatha devasya gṛhamabhyagamannṛpaḥ

nānādīpasamopetaṃ maṇibhirnāgarāḍiva /
bhaṭānāmatha saṃmarda eko dīpo patannṛpe

tadāsau kupito rājā dīpamādāya satvaram /
devālayapure ramye nyakṣipatkopasaṃyutaḥ

dagdhaṃ devagṛhaṃ tena enaśca samapadyata /
atha tena punastatra dagdhaṃ veśmagṛhādikam

nirmāpayāmāsa nṛpo maheśānamathāyajat /
atha mṛtyudine prāpte rājārādhitaśaṃkaraḥ

bhasmasnāyī bhasmaśāyī japanrudraṃ mamāra ha /
śivalokaṃ gataḥ soyaṃ vīrabhadreṇa bhāṣitaḥ

bhava tvaṃ gaṇaśārdūlo mamavai paricārakaḥ /
śāṅkarānmama nirdeśādānayasva mamāṃtikam

śirohīno bhavāṃścāpi jvālāvaktro bhaviṣyati /
satūvāca mahātmānaṃ vīrabhadraṃ gaṇeśvaram

cakṣuḥ śrotraṃ tathā jihvā nāsikāsyaṃ śirogaṇaḥ /
etairvinā vyavahṛtiḥ kathaṃ me saṃbhaviṣyati

abhāve śirasaḥ kiṃ vā mayā pāpaṃ kṛtaṃ vibho /
vīrabhadra uvāca-
tvayaiva svīkṛtā pūrvaṃ devī paramasuṃdarī

maheśabhavanaṃ nityaṃ cārtuvarṇakaraṃgakaiḥ /
svastikaṃ sarvatobhadraṃ naṃdyāvartādikaṃ śubham

padmamutpalamāṃdola pādo vyajana cāmare /
triśūlaṃ śaṃkhacakre ca gadādhanurathaiva ca

triśūlaṃ ḍamaruṃkhaḍgaṃ vṛṣaṃ bhṛṃgiriṭiṃ śivam /
tathāṣṭapatraṃ kamalamanyadyaṃtrādikaṃ tathā

kalpayaṃtī pratidinaṃ sevate vṛṣabhadhvajam /
kadācidatha sā veśyā devasadmanyupasthitā

rājñaḥ kārāṃkikaḥ kaściddevaveśma samāviśat /
atha tāṃ dṛṣṭavāṃstatra sa idaṃ vākyamuktavān

kārāṅkika uvāca-
ekāṃtasaṃsthitā veśyā yuvāhaṃ sthaviraśca na /
sthaviraṃ vyādhitaṃ ṣaṃḍhamaśaktaṃ dhanavarjitam

adīrghamehanaṃ dīnaṃ puruṣaṃ yoṣidutsṛjet /
aśmaśrulaṃ malacchannaṃ jaḍaṃ durgaṃdhidūṣitam

svalpamavyasanaṃ nārī dūrataḥ parivarjjayet /
tasmānme dīyatāṃ veśye maithunaṃ jīvayāśu mām

veśyovāca-
niyataḥ sarvajātīnāmihāmutra sukhapradaḥ /
pātivratyaṃ paro dharmmaḥ strīṇāmiti hi śuśruma

yadadhīnā yadā veśyā tadā nānyena saṃgatā /
pativrateti vikhyātā tasmāttaṃ paripālayet

kārāṃkika uvāca-
yadi caivaṃ mṛtiḥ śīghraṃ bhaviṣyati na saṃśayaḥ /
atha rājāṃtikaṃ gatvā rājānamidamuktavān

veśyā veśyaiva no bhāryā neti vaktuṃ ca nocitam /
itthaṃ rājānamuktvātha maṃḍaṃ caivāranālajam

kiṃcidādāya tasyāstu maṃdiraṃ gatavānayam /
nidrāvasaramālokya prasṛjyaca karaṃ tataḥ

vastrasya vivare tatra maṃḍaṃ cikṣepa duṣṭadhīḥ /
evaṃ kṛtvā tato gatvā rājānamidamuktavān

rājannirgatya gatvātha veśyāgryāṃ tava yoṣitaḥ /
utthāpayitvā veśyāṃ tāṃ sarvāṃgaṃ draṣṭumarhasi

unmuktabaṃdhamathavā vasanaṃ paśya yatnataḥ /
veśyāveśmāthagatavānrājā kārāṃkikaṃ vacaḥ

idamāha sanidreyaṃ paśyemāṃ yāmi paśyasi /
sa tūvāca nṛpaṃ tatra na me yuktamidaṃ nṛpa

tanmātaraṃ vā pitaraṃ darśanāya niyojaya /
taddṛṣṭau sarvamevedaṃ vyaktamāśu bhaviṣyati

ānītā hyatha rājñā tu mātā vīkṣitumudyatā /
vacanāttu nṛpasyaiva vastraṃ śodhayatīva sā

tatrasthitaṃ maṃḍamatha vijñāyāṃbā hyamardayat /
mardanādvasanaṃ klinnaṃ kiṃ tadityāha pārthivaḥ

na kiṃciddeva no kiṃciditi veśyāprasūrapi /
bahuvākyena rājātha vasanaṃ vīkṣya śaṃkayā

śukraklinnamidaṃ vāsaḥ prāhaitatpaśyatāmiti /
atha dṛṣṭvā samīpasthāstathetyūcurvaco nṛpam

rājātha svagṛhaṃ gatvā daṃḍādhyakṣamabhāṣata /
idānīmeva veśyāyāḥ śiraśchiṃdhyavicārayan

darśanīyaṃ śirastasyā ghaṭikābhyaṃtare mama /
daṃḍakaśca nṛpoktyāsyāstathā kṛtvā hyadarśayat

vīrabhadra uvāca-
evaṃ kṛtaṃ tvayā pūrvaṃ prāptaṃ ca phalamadya te /
jvālayaiva hi vaktā tvaṃ śrotā draṣṭā ca jighrasi

rasaṃ jānāsi matimānatikrodhī bhaviṣyasi /
śaṃbhuruvāca-
evaṃ jvālāmukho jāto rājā māheśvaro'kṣamī

tasmāttu kṣamiṇā bhāvyaṃ paratreha sukhepsunā /
ya idaṃ śṛṇuyānnityaṃ puṇyākhyānamanuttamam

vimuktapāpabaṃdhaśca śivaloke bhaviṣyati

iti śrīpadmapurāṇe pātālakhaṃḍe śivarāghavasaṃvāde śivapūjāmāhātmyakathanaṃ/
nāma daśottaraśatatamo'dhyāyaḥ