Padma Purana · Chapter 5.108

śrīrāma uvāca-
bhasmotpattiṃ mahābhāga bhasmamāhātmyameva ca /
bhasmasaṃdhāraṇe puṇyaṃ bhasmadāne ca tadvada

śaṃbhuruvāca-
bhasmotpattiṃ pravakṣyāmi sarvapāpapraṇāśinīm /
smaraṇātkīrtanādrāma tāṃ śṛṇuṣva narādhipa

ya ekaḥ śāśvato devo brahmavaṃdyaḥ sadāśivaḥ /
trilocano guṇādhāro guṇātīto'kṣarovyayaḥ

sisṛkṣā tasya jātātha vīkṣyātmasthaṃ guṇatrayam /
vedatrayamidaṃ jñeyaṃ guṇatrayamidaṃ hi yat

pṛthakkṛtvātmanastāta tatrasthānaṃ vibhajya ca /
dakṣiṇāṃgesṛjatputraṃ brahmāṇaṃ vāmato harim

pṛṣṭhadeśe maheśānaṃ trīnputrānasṛjadvibhuḥ /
jātamātrāstrayo devā brahmaviṣṇumaheśvarāḥ

idamūcurvacaḥ spaṣṭaṃ ko bhavānke vayaṃtviti /
tānāha ca śivaḥ putrānyūyaṃ putrā ahaṃ pitā

idaṃ guṇatrayaṃ putrā bhajadhvaṃ karmahetukam /
putrā ūcuḥ -
kaṃ vā guṇaṃ ko bhajatāṃ kiyaṃtaṃ kālamīśvara

kathaṃ guṇanivṛttiśca bhavedetadvadasva naḥ /
śiva uvāca-
yāvajjñānaṃ hi bhavatāṃ yāvadāyurathāpi vā

dhāraṇaṃ tāvadevasyādekaikasya guṇasya ca /
satvaṃ brahmā rajoviṣṇurbhajenmaheśvarastamaḥ

ityuktamātre deveśe brahmā satvamathāgrahīt /
na ca cālayituṃ śakto dhāraṇe kimu śaktimān

taṃ guṇaṃ tu tiraskṛtya rajoguṇamathāgrahīt /
na ca cālayituṃ śakto jagrāhātha tamoguṇam

na ca cālayituṃ śakto nipapāta ruroda ca /
viṣṇuśca vāmahastena rajoguṇamadhārayat

aṃgulībhyāṃ maheśo'pi tamoguṇamadhārayat /
satvamekoṃgulībhyāṃ ca satvaṃ viṣṇumathādadhāt

brahmāṇaṃ pādapīṭhe ca dadhāra ca nanarta ca

nṛtyaṃtamatyaṃtavilāsarūpaṃ gokṣīrarūpaṃ taruṇaṃ trinetram /
sarvaṃ dadhānaṃ kṛtakautukaṃ śivaṃ samīkṣya putrānvarado babhāṣe

śiva uvāca-
prīto'smi tava putrāhaṃ varaṃ vṛṇu yathepsitam /
athāha pitaraṃ putro varamenaṃ dadasva me

māmuddiśya kṛtā pūjā tava pūjā bhavecchiva /
tiṣṭhermayi sadā tvaṃ ca tvamevāhaṃ ca vāvyayaḥ

śiva uvāca-
evametanmahābhāga bhaviṣyati na saṃśayaḥ /
raktagaurāvimau putrau brahmaviṣṇū mamaiva tu

bāhumūlastharomau ca mamākārau tathānaghau /
atha brahmāṇamāhedaṃ bhajatvekaṃ guṇaṃ bhavān

brahmovāca-
tvannirdiṣṭaṃ guṇamahaṃ dhartuṃ śakto na hīśvara /
dhārayiṣye rajo deva satvaṃ bhajatu vai hariḥ

avaśiṣṭaṃ guṇaṃ cāyamīśvaro dhārayiṣyati /
śaṃbhuruvāca-
guṇānādāyate devā naśekurnityadhāraṇam

kartuṃ bharaṇaśaktyarthaṃ śivamityavadatpunaḥ /
guṇānvayaṃ sarvakālaṃ na ca dhārayituṃ kṣamāḥ

dīyatāṃ bhagavañchaktiryadi bhostvaṃ varapradaḥ /
atha tadvacanaṃ śrutvā śivo vākyamabhāṣata

śiva uvāca-
vidyāśaktiḥ samastānāṃ śaktirityabhidhīyate /
guṇatrayāśrayā vidyā avidyā ca tadāśrayā

guṇatrayaṃ ca dagdhvaiva tatsāraṃ dhartumarhatha /
yacca kiṃcidbhavettatra bhavadbhirdhriyatāṃ hi tat

athāhustatsutā vākyaṃ na dāho jvalanaṃ vinā /
śivaḥ prāha maheśasya locane vahnirasti vai

guṇatrayamidaṃ dhenurvidyā syādgomayaṃ śubham /
mūtraṃ copaniṣatproktaṃ kuryādbhasma tataḥ param

vatsāstu smṛtayo yasyāstatsaṃbhūtaṃ tu gomayam /
āgāva iti maṃtreṇa dhenuṃ tatrābhimaṃtrayet

gāvo gāvo gāva iti prāśayettu tṛṇaṃ jalam /
upoṣya ca caturddaśyāṃ śukle kṛṣṇe'thavā vratī

paredyuḥ prātarutthāya śucirbhūtvā samāhitaḥ /
kṛtasnāno dhautavastro gomayārthaṃ vrajettu gām

utthāpya tāṃ prayatnena gāyatryā mūtramāharet /
sauvarṇe rājate tāmre dhārayenmṛnmaye ghaṭe

pauṣkare vā palāśe vā pātre gośṛṃga eva vā /
ādadhīta hi gomūtraṃ gaṃdhadvāreti gomayam

abhūmipātaṃ gṛhṇīyātpātre pūrvodite'dhike /
gomayaṃ śodhayedvidvāñchrīrme bhajatu maṃtrataḥ

alakṣmīrmayīti maṃtreṇa gomayasyāpamārjanam /
saṃ tvā siṃcāmi maṃtreṇa gomūtraṃ gomaye kṣipet

paṃcānāṃ tveti maṃtreṇa piṃḍāṃścaiva caturddaśa /
kuryātsaṃśoṣya kiraṇaistaraṇerāharettu tān

nidadhyādatha pūrvoktapātre gomayapiṃḍakān /
svagṛhyoktavidhānena pratiṣṭhāpyāgnimiṃdhayet

piṃḍānvinikṣipettattadarṇadevāya piṃḍakān /
āghārāvājyabhāgau ca prakṣipya dvau hunetsudhīḥ

tato nidhanapataye trayodaśajayādayaḥ /
hotavyāḥ paṃcabrahmāṇi namo hiraṇyabāhave

iti sarvāhutīrhutvā caturthyaṃtaistu maṃtrakaiḥ /
tataḥ śarvāya rudrāya yasya vaikaṃkatīti ca

etaistu juhuyādvidvānanājñātatrayaṃ tathā /
vyāhṛtīratha hutvā tu tataḥ sviṣṭakṛtaṃ hunet

idhmaśeṣaṃ tu nirvartya pūrṇapātrodakaṃ tataḥ /
pūrṇamāsāṃtayajuṣā jalenānyena bṛṃhayet

brāhmaṇeṣvamṛtamiti tajjalaṃ śirasi kṣipet /
prācyāmiti diśāṃ liṃgairdikṣu toyaṃ vinikṣipet

brahmaṇe dakṣiṇāṃ datvā śāṃte pulakamāharet /
āhariṣyāmi devānāṃ sarveṣāṃ karmaguptaye

jātavedasamene tvāṃ pulākaṃ cchādayādya me /
maṃtreṇānena taṃ vahniṃ pulāke chādayedatha

tridinaṃ jvalanasthityai chādanaṃ pulakaiḥ smṛtam /
brāhmaṇānbhojayedbhaktyā svayaṃ bhuṃjīta vāgyataḥ

bhasmādhikamabhīpsaṃstu hyadhikaṃ gomayaṃ haret /
dinatrayeṇa yadi vā ekasmindivase bahu

tṛtīye vā caturthe vā prātaḥsnātvā sitāṃbaraḥ /
śuklayajñopavītī ca śuklamālyānulepanaḥ

śukladaṃto bhasmadigdho maṃtreṇānena maṃtravit /
tadveti coccārayitvā bhasmasatyaṃ na saṃtyajet

tata āvāhanamukhā upacārāstu ṣoḍaśa /
kartavyā hutadānena tato'gnimupasaṃharet

agne bhasmeti maṃtreṇa gṛhṇīyādbhasma codbhavam /
agnirasmīti maṃtreṇa pramṛjya ca tataḥ param

saṃyojya gaṃgāsalilaiḥ kapilāpayasāthavā /
caṃdraṃ kuṃkumakāśmīramuśīraṃ caṃdanaṃ tathā

agurudvitayaṃ caiva cūrṇayitvā tu sūkṣmataḥ /
kṣipedbhasmani taccūrṇamomiti brahmamaṃtrataḥ

tataḥ payaḥ secane ca gaditaḥ kapilā manuḥ /
amṛtaṃ devi te kṣīraṃ pavitramiha varddhitam

tavaprasādānmucyaṃte manujāḥ sarvapāpmanaḥ /
praṇavenāvahedvidvānbhasmano vaṭakānatha

aṇoraṇīyāniti hi maṃtreṇa tu vicakṣaṇam /
śaṃbhuruvāca-
itthaṃ tu bhasmasaṃpādya śuṣkamādāya maṃtravit

praṇavena vimṛjyātha saptapraṇavamaṃtritam /
īśānena śirodeśaṃ mukhaṃ tatpuruṣeṇa ca

urodeśamaghoreṇa guhyaṃ vāmena maṃtrayet /
sadyojātena vai pādau sarvāṃgaṃ praṇavena tu

tata uddhūlya sarvāṃgamāpādatalamastakam /
tata ācamya vasanaṃ dhautaṃ śvetaṃ pradhārayet

punarācamya karma svaṃ kartumarhati sarvataḥ /
tato bhasmasamādāya pramṛjya praṇavena tu

trinetraṃ triguṇādhāraṃ trayāṇāṃ janakaṃ vibhum /
smarannamaḥ śivāyeti lalāṭe tu tripuṃḍrakam

namaḥ śivābhyāmityuktvā bāhvorvāpi tripuṃḍrakam /
aghorāya nama iti ubhābhyāṃ ca prakoṣṭhayoḥ

bhīmāyeti tataḥ pṛṣṭhe śirodhi paścime tathā /
nīlakaṃṭhāya śirasi kṣipetsarvātmane namaḥ

prakṣālyātha tato hastau karmānuṣṭhānamācaret /
śiva uvāca-
yūyamevaṃ prakāreṇa bhasma kṛtvā praghṛṣya ca

guṇāndhārayituṃ śaktāstataḥ srakṣyatha vai prajāḥ /
śaṃbhuruvāca-
itthaṃ śivoditā devā brahmaviṣṇumaheśvarāḥ

tathā kṛtvā ca vidhinā hamahamikayā tadā /
anyonyabodhanāśaktāḥ praṇamya śivamūcire

kaṃ guṇaṃ dhārayetko vā śivaḥ prāha sutānatha /
karmaśaktiṃ tathā jñānaṃ mukhareṇvaiva naśyati

alpāyurdṛśyate brahmā manubhiścāsya jīvitam /
yo'haṃ brahmāṃḍamālābhirbhūṣito brahmagopanam

rajoguṇamavaṣṭabhya na ca jānāsi māṃ tadā /
brahmādhikabalo viṣṇurāyuṣi brahmaṇo'dhikaḥ

brahmāṃḍamālābharaṇe maheśasya mamaiva tu /
caturniḥśvāsamātreṇa viṣṇorāyurudāhṛtam

brahmaṇo'dhikasatvatvātsatvamālaṃbatāṃ hariḥ /
jānāti sarvakālaṃ māṃ kvacideva na vismaret

sātvikaikaiva pūjāsya rājasī tāmasī na tu /
śāṃtaṃ śivaṃ satvaguṇaṃ rajavaktrāvamānataḥ

nabhonīlaṃ tathā caiva guṇaṃ śaṃbhustathābhajat /
satvaṃ rajastamaścāpi dadhāra ca purā kila

ato'sya vividhā pūjā śaṃkarasya vidhīyate /
rajaśca tamasāyuktaṃ dāruṇaṃ parikīrtitam

dāruṇāpi tataḥ pūjā śaṃkare gatidā matā /
rajaśca tamasāyuktamalaṃ śāstrapravartakam

vicchinnāpi tataḥ pūjā śaṃkare phaladā matā /
tamaśca satvasaṃyuktaṃ miśrakaṃ ca pravartakam

miśrapūjā viphaladā śaṃkare lokaśaṃkare /
yādṛśaṃ tādṛśaṃ vāpi niyamenārcanaṃ vibhoḥ

śaṃkarasyāśuphaladaṃ yādṛśasyāpi dehinaḥ /
śaṃbhuruvāca-
etatsaṃkṣepataḥ proktaṃ vidhānaṃ bhasmano'nagha

vaktṛśrotṛjanānāṃ ca samastāghavināśanam

iti śrīpadmapurāṇe pātālakhaṃḍe śivarāghavasaṃvāde bhasmotpattividhānaṃ nāmāṣṭottaraśatatamo'dhyāyaḥ