Padma Purana · Chapter 4.13

śaunaka uvāca-
kṛṣṇajanmāṣṭamī sūta tasyā māhātmyamuttamam /
kathayasva mahāprājña coddharasva mahārṇavāt

sūta uvāca-
kṛṣṇajanmāṣṭamīṃ brahmanbhaktyā karoti yo naraḥ /
aṃte viṣṇupuraṃ yāti kulakoṭiyuto dvija

aṣṭamī budhavāre ca some caiva dvijottama /
rohiṇīṛkṣasaṃyuktā kulakoṭivimuktidā

mahāpātakasaṃyuktaḥ karoti vratamuttamam /
sarvapāpavinirmuktaścāṃte yāti harergṛham

kṛṣṇajanmāṣṭamīṃ brahmanna karoti narādhamaḥ /
iha duḥkhamavāpnoti sa pretya narakaṃ vrajet

na karoti ca yā nārī kṛṣṇajanmāṣṭamīvratam /
varṣe varṣe tu sā mūḍhā narakaṃ yāti dāruṇam

janmāṣṭamīdine yo vai naro'śnāti vimūḍhadhīḥ /
mahānarakamaśnāti satyaṃ satyaṃ vadāmyaham

dilīpena purā pṛṣṭo vasiṣṭho munisattamaḥ /
tacchṛṇuṣva mahāprājña sarvapātakanāśanam

dilīpa uvāca-
bhādre māsyasitāṣṭamyāṃ yasyāṃ jāto janārddanaḥ /
tadahaṃ śrotumicchāmi kathayasva mahāmune

kathaṃ vā bhagavānjātaḥ śaṃkhacakragadādharaḥ /
devakījaṭhare viṣṇuḥ kiṃ kartuṃ kena hetunā

vasiṣṭha uvāca-
śṛṇu rājanpravakṣyāmi kasmājjāto janārddanaḥ /
pṛthivyāṃ tridivaṃ tyaktvā bhavate kathayāmyaham

purā vasuṃdharā hyāsītkaṃsādinṛpapīḍitā /
svādhikārapramattena kaṃsadūtena tāḍitā

kraṃdatī kraṃdatī sā tu yayau ghūrṇitalocanā /
yatra tiṣṭhati deveśa umākāṃto vṛṣadhvajaḥ

kaṃsena tāḍitā nātha iti tasmai niveditum /
bāṣpavārīṇi varṣaṃti vivarṇā sāvimānitā

kraṃdaṃtīṃ tāṃ samālokya kopena sphuritādharaḥ /
umayāsahitaḥ sarvairdevavṛṃdairanuvrataḥ

ājagāma mahādevo vidhātṛbhavanaṃ ruṣā /
gatvā covāca brahmāṇaṃ kaṃsadhvaṃsanahetave

upāyaḥ sṛjyatāṃ brahmanbhavatā viṣṇunā saha /
aiśvaraṃ tadvacaḥ śrutvā gaṃtuṃ prāha kṛtātmabhūḥ

kṣīrode yatra vaikuṃṭhaḥ supto'sti bhujagopari /
haṃsapṛṣṭhaṃ samāruhya hareraṃtikamāyayau

tatra gatvā ca taṃ dhātā devavṛṃdairharādibhiḥ /
saṃyuktaḥ stūyate vāgbhiḥ komalaṃ vāgvidāṃvaraḥ

namaḥ kamalanetrāya haraye paramātmane /
jagataḥ pālayitre ca lakṣmīkāṃta namo'stu te

iti tebhyaḥ stutiṃ śrutvā pratyuvāca janārddanaḥ /
devānkliṣṭamukhānsarvānbhavadbhirāgataṃ katham

brahmovāca-/
śṛṇu deva jagannātha yasmādasmākamāgatam /
kathayāmi suraśreṣṭha tadahaṃ lokabhāvana

śūlidattavaronmattaḥ kaṃso rājā durāsadaḥ /
vasudhā tāḍitā tena karaghātena pīḍitā

varaṃ datvā purāpyagre māyayā tu pravaṃcitaḥ /
bhāgineyaṃ vinā śaṃbho maraṇaṃ bhavitā na me

tasmādgaccha svayaṃ deva kaṃsaṃ haṃtuṃ durāsadam /
devakījaṭhare janma labdhvā gatvā ca gokulam

brahmaṇā prerito devaḥ pratyuvāca ca śūlinam /
pārvatīṃ dehi deveśa abdaṃ sthitvā gamiṣyati

umayā rakṣayā sārddhaṃ śaṃkhacakragadādharaḥ /
uddiśya mathurāṃ cakre prayāṇaṃ kamalāsanaḥ

devakījaṭhare janma lebhe tatra gadādharaḥ /
yaśodākukṣimadhyāste śarvāṇī mṛgalocanā

navamāsāṃśca viśramya kukṣau navadināṃtakān /
bhādre māsyasite pakṣe cāṣṭamīsaṃjñakā tithiḥ

rohiṇītārakāyuktā rajanīghanaghoṣitā /
tasyāṃ jāto jagannāthaḥ kaṃsārirvasudevajaḥ

vairāṭī naṃdapatnī ca yaśodā'jījanatsutām /
putraṃ padmakaraṃ padmanābhaṃ padmadalekṣaṇam

tadā harṣitumārebhe dṛṣṭvā hyānakaduṃdubhiḥ /
kaṃsāsurabhayatrastā provāca devakī tadā

vairāṭīṃ gaccha bho nātha sutaṃ pratyarpitaṃ kila /
putraṃ datvā yaśodāyai sutāṃ tasyāḥ samānaya

tasyā vacaḥ samākarṇya vasudevo'pi duḥkhitaḥ /
aṃke kumāramādāya vairāṭyabhimukhaṃyayau

yamunājalasaṃpūrṇā tatpathe madhyavartmani /
āsīdghorā mahādīrghā gambhīrodakapūrabhāk

evaṃ dṛṣṭvā taṭe sthitvā yamunāmavalokayan /
vasudevo'pi duḥkhārto vilalāpāticiṃtayā

kiṃ karomi kva gacchāmi vidhināpi hi vaṃcitaḥ /
kathamatra gamiṣyāmi vairāṭīṃ naṃdamaṃdiram

hariṇā tatra sānaṃdaṃ māyayā vaṃcitaḥ pitā /
kṣaṇamātraṃ taṭe sthitvā yamunāmavalokayan

tena dṛṣṭā punaḥ sāpi kṣaṇājjānuvahābhavat /
tāṃ dṛṣṭvā hṛṣṭa uttasthau prasthānamakarodyathā

māyāṃ kṛtvā jagannāthaḥ pituraṃkājjale'patat /
taṃ putraṃ patitaṃ dṛṣṭvā hāhākṛtvā suduḥkhitaḥ

mahopāyaṃ punaḥ kartuṃ vidhinā tena vaṃcitaḥ /
trāhi māṃ jagatāṃ nātha sutaṃ rakṣa surottama

janakakraṃditaṃ dṛṣṭvā kaṃsāriḥ kṛpayā muhuḥ /
jalakrīḍāṃ samācarya pituḥkroḍamagātpunaḥ

yathā tena yaduśreṣṭho jagāma naṃdamaṃdiram /
sutaṃ dattvā yaśodāyai sutāṃ tasyāḥ samānayat

nijāgāraṃ tataḥ prāpya patnyai pratyarpitā sutā /
devakī ca prasūteti vārtā prāptā surāriṇā

ānetuṃ prasthitā dūtāḥ sutaṃ duhitaraṃ tadā /
āgatya kaṃsadūtāste sutāṃ netuṃ pracakramuḥ

balādenāṃ samākṛṣya devakī vasudevayoḥ /
kaṃsadūtairgṛhītvā sā arpitā tu surāraye

sa dhṛtvā tāṃ mahārājaḥ sabhayo'bhūddurāsadaḥ /
śuddhakāṃcanavarṇābhāṃ pūrṇeṃdusadṛśānanām

kaṃso hasaṃtīṃ tāṃ dṛṣṭvā vidyutsphuritalocanām /
ādideśāsuraśreṣṭho jahi nītvā śilopari

ājñāṃ labdhvā'surāste vai niṣpeṣṭuṃ tāṃ pravartitāḥ /
vidyucchīghratayā gaurī jagāma śaṃkarāṃtikam

gauryuvāca-
śṛṇu rājanpravakṣyāmi yatrāste śatruruttamaḥ /
naṃdasya nilaye guptastava haṃtā'surottama

vasiṣṭha uvāca-
evamuktvā tu sā devī jagāma nijamaṃdiram /
śrutvā vākyaṃ tato devyāḥ kaṃso rājā suduḥkhitaḥ

bhaginīṃ pūtanāmāha gaccha tvaṃ naṃdamaṃdiram /
chadmanā taṃ sutaṃ hatvā gaccha te vāṃcchitaṃ bahu

dāsyāmi śatruṃ haṃtuṃ me vraja śīghrataraṃ śubhe /
ājñāṃ prāpya rākṣasī sā gokulābhimukhaṃ gatā

māyayā suṃdarī rūpā praviṣṭā tatra gokule /
payodhare garaṃ sā tu dhṛtvā haṃtumupāgatā

paśupānāṃ gṛhadvāri praviṣṭālakṣiteti ca /
gatvāṃtarutthāpya śiśuṃ stanaṃ datvāpasadgatim

tatastu śakaṭaṃ kṣiptvā tṛṇāvartādimardanam /
kālīyadamanaṃ kṛtvā gato madhupurīṃ tataḥ

gatvā kaṃso hataḥ krūraḥ kaṃsamallānajījayat /
etatte kathitaṃ rājanviṣṇorjanmadinavratam

śrutvā pāpāni naśyaṃti kuryātkiṃ vā bhaviṣyati /
ya idaṃ kurute martyo yā ca nārī harervratam

aiśvaryamatulaṃ prāpya janmanyatra yathepsitam /
pūrvaviddhā na karttavyā tṛtīyāṣaṣṭhireva ca

aṣṭamyekādaśībhūtā dharmakāmārthavāṃcchubhiḥ /
varjayitvā prayatnena saptamīsaṃyutāṣṭamī

vinā ṛkṣe'pi kartavyā navamīsaṃyutāṣṭamī /
udaye cāṣṭamī kiṃcitsakalā navamī yadi

muhūrtarohiṇīyuktā saṃpūrṇā cāṣṭamī bhavet /
aṣṭamī budhavāreṇa rohiṇīsahitā yadi

somenaiva bhavedrājankiṃkṛtairvratakoṭibhiḥ /
navamyāmudayātkiṃcitsome sāpi budhe'pi ca

api varṣaśatenāpi labhyate vā na labhyate /
vinā ṛkṣaṃ na kartavyā navamīsaṃyutāṣṭamī

kāryāviddhāpi saptamyāṃ rohiṇīsaṃyutāṣṭamī /
kalākāṣṭhāmuhūrte'pi yadā kṛṣṇāṣṭamītithiḥ

navamyāṃ saiva vā grāhyā saptamīsaṃyutā na hi /
kiṃ punarbudhavāreṇa somenāpi viśeṣataḥ

kiṃ purnarnavamīyuktā kulakoṭyāstu muktidā /
palavedhena rājeṃdra saptamyā aṣṭamīṃ tyajet

surāyābiṃdunāspṛṣṭaṃ gaṃgāṃbhaḥ kalaśaṃ yathā /
dilīpa uvāca-
kena cādau kṛtaṃ cedaṃ kena vā tatprakāśitam /
kiṃ puṇyaṃ kiṃ phalaṃ deva kathayasva mahāmune

vasiṣṭha uvāca-
citraseno mahārājā mahāpāpaparo mahān /
agamyāgamanaṃ kṛtvā svarṇasteyaṃ dvijasya ca

surāyāṃ ca sadā tṛpto vṛthāmāṃse sadā rataḥ /
evaṃ pāpasamāyukto nityaṃ prāṇivadhe rataḥ

cāṃḍālaiḥ patitaiḥ sārddhamālāpaṃ sarvadākarot /
etadevaṃ vidho rājā mṛgayāyāṃ mano dadhe

araṇye dvīpinaṃ jñātvā veṣṭayitvā ca sarvataḥ /
sāvadhānaṃ bhaṭānsarvānvākyametaduvāca ha

ahameva nihanmyenaṃ yo'nyosminprahariṣyati /
sa vadhyo nātra saṃdeho vyāghro rājñaḥ pathā yayau

salajjo'pi tato rājā vyāghraṃ paścājjagāma ha /
anekakleśaduḥkhena vyāghraṃ haṃtuṃ samāhitaḥ

kṣutpipāsākulakleśaḥ saṃdhyāyāṃ yamunātaṭe /
aṣṭamīrohiṇīyuktā taddinaṃ janmavāsaram

śvaḥkanyā yamunāyāṃ vai vrataṃ cakrurnarādhipa /
nānopahārairdravyaiśca dhūpadīpaiḥ suśobhanaiḥ

gaṃdhapuṣpaṃ tathā dravyaṃ kuṃkumādimanoharam /
annaṃ bahuguṇaṃ dṛṣṭvā bhoktuṃ tanmānasaṃkulam

rājovāca-
annābhāvānmamādyāśu prāṇā yāsyaṃti niścitam /
striya ūcuḥ-
janmāṣṭamyāṃ hare rājanna bhoktavyaṃ tvayānagha

gṛdhramāṃsaṃ kharaṃ kākaṃ gomāṃsamannameva ca /
bhuktavānnātra saṃdeho yo bhuṃkte kṛṣṇajanmani

kiṃ kiṃ chidraṃ na saṃjātaṃ saṃsāre vasatāṃ nṛṇām /
yena dehesthite prāṇe jayaṃtī na kṛtā nṛpa

tatrākṛtopavāsasya śāsanaṃ yamamaṃdiram /
yaddattaṃ pitaro nityaṃ na gṛhṇaṃti yathāvidhi

pitaraḥ pātitāḥ sarve jayaṃtyāṃ bhojane kṛte /
iti śrutvā tato rājā vrataṃ cakre narādhipa

kiṃcitpuṣpaṃ kiyadgaṃdhaṃ vastraṃ cānīya harṣitaḥ /
etadvrataṃ samāyuktaṃ tithibhāṃte ca pāraṇam /
vratasyāsya prabhāveṇa citraseno harergṛham

divyaṃ vimānamāruhya gatavānpitṛbhiḥ saha /
yatphalaṃ mathurāṃ gatvā dṛṣṭvā kṛṣṇamukhāṃbujam

tatphalaṃ prāpyate puṃsākṛṣṇajanmāṣṭamīvratāt /
yatphalaṃ dvārakāṃ gatvā dṛṣṭe viśveśvare harau /
tatphalaṃ prāpyate dīnaiḥ kṛtvā janmāṣṭamīvratam

iti śrīpādme mahāpurāṇe brahmakhaṃḍe harijanmāṣṭamīvratamāhātmyaṃnāma trayodaśo'dhyāyaḥ