Padma Purana · Chapter 3.62

sūta uvāca-
evaṃ yanmahimā loke lokanistārakāraṇam /
tasya viṣṇoḥ pareśasya nānāvigrahadhāriṇaḥ

ekaṃ purāṇaṃ rūpaṃ vai tatra pādmaṃ paraṃ mahat /
brāhmaṃ mūrdhā harereva hṛdayaṃ padmasaṃjñitam

vaiṣṇavaṃ dakṣiṇo bāhuḥ śaivaṃ vāmo maheśituḥ /
ūrū bhāgavataṃ proktaṃ nābhiḥ syānnāradīyakam

mārkaṃḍeyaṃ ca dakṣāṃghrirvāmo hyāgneyamucyate /
bhaviṣyaṃ dakṣiṇo jānurviṣṇoreva mahātmanaḥ

brahmavaivartasaṃjñaṃ tu vāmajānurudāhṛtaḥ /
laiṃgaṃ ha gulphakaṃ dakṣaṃ vārāhaṃ vāmagulphakam

skāṃdaṃ purāṇaṃ lomāni tvagasya vāmanaṃ smṛtam /
kaurmaṃ pṛṣṭhaṃ samākhyātaṃ mātsyaṃ medaḥ prakīrtitam

majjā tu gāruḍaṃ proktaṃ brahmāṃḍamasthi gīyate /
evamevābhavadviṣṇuḥ purāṇāvayavo hariḥ

hṛdayaṃ tatra vai pādmaṃ yacchrutvāmṛtamaśnute /
pādmametatpurāṇaṃ tu svayaṃ devobhavaddhariḥ

yasyaikādhyāyamadhyāpya sarvaiḥ pāpaiḥ pramucyate /
tatrādimaṃ svargamidaṃ sarvapādmaphalapradam

svargakhaṃḍaṃ samākarṇya mahāpātakinopi ye /
mucyaṃte tepi pāpebhyastvaco jīrṇādyathoragāḥ

api cetsudurācāraḥ sarvadharmmabahiṣkṛtaḥ /
ādisvargaṃ samākarṇya yatphalaṃ samavāpnuyāt

ādisvargamidaṃ śrutvā tatphalaṃ labhate naraḥ /
māghemāse prayāge tu snātvā pratidinaṃ naraḥ

yathā pāpātpramucyeta tathā hi śravaṇādbhavet /
dattā tena svarṇatulā dattā caiva dharākhilā

kṛtaṃ vitaraṇaṃ tena draridre yatkṛtamṛṇam /
harernāmasahasrāṇi paṭhitāni hyabhīkṣṇaśaḥ

sarveve dāstathādhītāstattatkarmakṛtaṃ tathā /
adhyāpakāśca bahavaḥ sthāpitā vṛttidānataḥ

abhayaṃ bhayalokebhyo dattaṃ tena tathā dvijāḥ /
guṇavaṃto jñānavaṃto dharmavaṃtonumānitāḥ

meṣakarkaṭayormadhye toyaṃ dattaṃ suśītalam /
brāhmaṇārthe gavārthe ca prāṇāstyaktāśca tena hi

anyāni ca sukarmāṇi kṛtāni tena dhīmatā /
yenādikhaṃḍaṃ sadasi śrutaṃ saṃśrāvitaṃ tathā

svargakhaṃḍaṃ samādhītya nānābhogānsamaśnute /
aṃtaḥpuraganārīṇāṃ sukhasuptaḥ prabudhyate

kiṃkiṇīravasannādaistathā madhurabhāṣaṇaiḥ /
iṃdrasyārdhāsanaṃ bhuṃkte iṃdraloke vasecciram

tataḥ sūryasya bhavanaṃ caṃdralokaṃ tato vrajet /
saptarṣibhavane bhogānbhuktvā yāti tato dhruvam

tataśca brahmaṇo lokaṃ prāpya tejomayaṃ vapuḥ /
tatraiva jñānamāsādya nirvāṇaṃ paramṛcchati

sadbhiḥ saha vaseddhīmānsattīrthe snānamācaret /
kuryādeva sadālāpaṃ sacchāstraṃ śṛṇuyānnaraḥ

tatra pādmaṃ mahāśāstraṃ sarvāmnāyaphalapradam /
svargakhaṃḍaṃ ca tanmadhye mahāpuṇyaphalapradam

bhajadhvaṃ goviṃdaṃ namata harimekaṃ suravaraṃ gamiṣyadhvaṃ lokānativimalabhogānatitarām /
śṛṇudhvaṃ he lokā vadata harināmaikamatulaṃ yadīcchāvīcīnāṃ sukhataraṇamiṣṭāni labhata

iti śrīpādme mahāpurāṇe svargakhaṃḍe dviṣaṣṭitamo'dhyāyaḥ

saṃpūrṇamidamādikhaṇḍāparanāmakamādisvargakhaṃḍaṃ svargakhaṃḍaṃ vā /
śubhamastu śrīrastu /
iti śrīpādme mahāpurāṇe tṛtīyaṃ svargakhaṇḍaṃ samāptam/