Padma Purana · Chapter 3.61

sūta uvāca-
evamuktā purā viprā vyāsenāmitatejasā /
etāvaduktvā bhagavānvyāsaḥ satyavatīsutaḥ

samāśvāsya munīnsarvānjagāma ca yathāgatam /
bhavadbhyastu mayā proktaṃ varṇāśramavidhānakam

evaṃ kṛtvā priyo viṣṇorbhavatyeva na cānyathā /
rahasyaṃ tatra vakṣyāmi śṛṇuta dvijasattamāḥ

ye cātra kathitā dharmā varṇāśramanibaṃdhanāḥ /
haribhaktikalāṃśāṃśa samānā na hi te dvijāḥ

puṃsāmekeha vai sādhyā haribhaktiḥ kalau yuge /
yugāṃtareṇa dharmā hi sevitavyā nareṇa hi

kalau nārāyaṇaṃ devaṃ yajate yaḥ sa dharmmabhāk /
dāmodaraṃ hṛṣīkeśaṃ puruhūtaṃ sanātanam

hṛdi kṛtvā paraṃ śāṃtaṃ jitameva jagattrayam /
kalikāloragādaṃśātkilbiṣātkālakūṭataḥ

haribhaktisudhāṃ pītvā ullaṃghyo bhavati dvijaḥ /
kiṃ japaiḥ śrīharernāma gṛhītaṃ yadi mānuṣaiḥ

kiṃ snānairviṣṇupādāṃbu mastake yena dhāryate /
kiṃ yajñena hareḥ pādapadmaṃ yena dhṛtaṃ hṛdi

kiṃ dānena hareḥ karma sabhāyāṃ vai prakāśitam /
harerguṇagaṇānśrutvā yaḥ prahṛṣyetpunaḥ punaḥ

samādhinā prahṛṣṭasya sā gatiḥ kṛṣṇacetasaḥ /
tatra vighnakarāḥ proktāḥ pākhaṃḍālāpapeśalāḥ

nāryastatsaṃginaścāpi haribhaktivighātakāḥ /
nārīṇāṃ nayanādeśaḥ surāṇāmapi durjayaḥ

sa yena vijito loke haribhaktaḥ sa ucyate /
mādyaṃti munayopyatra nārīcaritalolupāḥ

haribhaktiḥ kutaḥ puṃsāṃ nārībhaktijuṣāṃ dvijāḥ /
rākṣasyaḥ kāminīveṣāścaraṃti jagati dvijāḥ /
narāṇāṃ buddhikavalaṃ kurvaṃti satataṃ hitāḥ

tāvadvidyā prabhavati tāvajjñānaṃ pravartate /
tāvatsunirmalā medhā sarvaśāstravidhāriṇī

tāvajjapastapastāvattāvatīrthaniṣevaṇam /
tāvacca guruśuśrūṣā tāvaddhi taraṇe matiḥ

tāvatprabodho bhavati vivekastāvadeva hi /
tāvatsatāṃ saṃgarucistāvatpaurāṇalālasā

yāvatsīmaṃtinī lolanayanāṃdolanaṃ nahi /
janopari patedviprāḥ sarvadharmavilopanam

tatra ye haripādābjamadhuleśaprasāditāḥ /
teṣāṃ na nārīlolākṣikṣepaṇaṃ hi prabhurbhavet

janmajanma hṛṣīkeśa sevanaṃ yaiḥ kṛtaṃ dvijāḥ /
dvije dattaṃ hutaṃ vahnau viratistatra tatra hi

nārīṇāṃ kila kiṃ nāma sauṃdaryyaṃ paricakṣate /
bhūṣaṇānāṃ ca vastrāṇāṃ cākacakyaṃ taducyate

snehātmajñānarahitaṃ nārīrūpaṃ kutaḥ smṛtam /
pūyamūtrapurīṣāsṛktvaṅmedosthivasānvitam

kalevaraṃ hi tannāma kutaḥ sauṃdaryyamatra hi /
tadevaṃ pṛthagāciṃtya spṛṣṭvā snātvā śucirbhavet

taiḥ saṃhitaṃ śaṃrīraṃ hi dṛśyate suṃdaraṃ janaiḥ /
ahotidurdaśā nṝṇāṃ durdaiva ghaṭitā dvijāḥ

kucāvṛteṃge puruṣo nārī buddhvā pravarttate /
kā nārī vā pumānko vā vicāre sati kiṃcana

tasmātsarvātmanā sādhurnārīsaṃgaṃ vivarjayet /
ko nāma nārīmāsādya siddhiṃ prāpnoti bhūtale

kāminī kāminīsaṃgi saṃgamityapi saṃtyajet /
tatsaṃgādrauravamiti sākṣādeva pratīyate

ajñānāllolupā lokāstatra daivena vaṃcitāḥ /
sākṣānnarakakuṃḍesminnārīyonau pacennaraḥ

yata evāgataḥ pṛthvyāṃ tasminneva punā ramet /
yataḥ prasarate nityaṃ mūtraṃ reto malotthitam

tatraiva ramate lokaḥ kastasmādaśucirbhavet /
tatrātikaṣṭaṃ lokesminnaho daivaviḍaṃbanā

punaḥ punā ramettatra aho nistrapatā nṛṇām /
tasmādvicārayeddhīmānnārīdoṣagaṇānbahūn

maithunādbalahāniḥ syānnidrāti taruṇāyate /
nidrayāpahṛtajñānaḥ svalpāyurjāyate naraḥ

tasmātprayatnato dhīmānnārīṃ mṛtyumivātmanaḥ /
paśyedgoviṃdapādābje mano vai ramayedbudhaḥ

ihāmutra sukhaṃ taddhi goviṃdapadasevanam /
vihāya ko mahāmūḍho nārīpādaṃ hi sevate

janārddanāṃghrisevā hi hyapunarbhavadāyinī /
nārīṇāṃ yonisevā hi yonisaṃkaṭakāriṇī

punaḥpunaḥ patedyonau yaṃtraniṣpācito yathā /
punastāmevābhilaṣedvidyādasya viḍaṃbanam

ūrdhvabāhurahaṃ vacmi śṛṇu me paramaṃ vacaḥ /
goviṃde dhehi hṛdayaṃ na yonau yātanājuṣi

nārīsaṃgaṃ parityajya yaścāpi parivarttate /
padepadeśvamedhasya phalamāpnoti mānavaḥ

kulāṃganā daivayogādūḍhā yadi nṛṇāṃ satī /
putramutpādya yastatra tatsaṃgaṃ parivarjayet

tasya tuṣṭo jagannātho bhavatyeva na saṃśayaḥ /
nārīsaṃgo hi dharmajñairasatsaṃgaḥ prakīrtyate

tasminsati harau bhaktiḥ sudṛḍhā naiva jāyate /
sarvasaṃgaṃ parityajya harau bhaktiṃ samācaret

haribhaktiśca loketra durllabhā hi matā mama /
harau yasya bhavedbhaktiḥ sa kṛtārtho na saṃśayaḥ

tattadevācaretkarma hariḥ prīṇāti yena hi /
tasmiṃstuṣṭe jagattuṣṭaṃ prīṇite prīṇitaṃ jagat

harau bhaktiṃ vinā nṝṇāṃ vṛthā janma prakīrtitam /
brahmeśādi surā yasya yajaṃte prītihetave

nārāyaṇamanāvyaktaṃ na taṃ seveta ko janaḥ /
tasya mātā mahābhāgā pitā tasya mahākṛtī

janārddanapadadvaṃdvaṃ hṛdaye yena dhāryate /
janārdanajagadvaṃdya śaraṇāgatavatsala

itīrayaṃti ye martyā na teṣāṃ niraye gatiḥ /
brāhmaṇā hi viśeṣeṇa pratyakṣaṃ harirūpiṇaḥ

pūjayeyuryathāyogaṃ haristeṣāṃ prasīdati /
viṣṇurbrāhmaṇarūpeṇa vicaretpṛthivīmimām

brāhmaṇena vinā karmma siddhiṃ prāpnoti naiva hi /
dvijapādāṃbubhaktyā yaiḥ pītvā śirasi cārpitam

tarpitā pitarastena ātmāpi kila tāritaḥ /
brāhmaṇānāṃ mukhe yena dattaṃ madhuramarcitam

sākṣātkṛṣṇamukhe dattaṃ tadvai bhuṃkte hariḥ svayam /
ahotidurllabhā lokā pratyakṣe keśave dvije

pratimādiṣu sevaṃte tadabhāve hi tatkriyā /
brāhmaṇānāmadhiṣṭhānātpṛthvī dhanyeti gīyate

teṣāṃ pāṇau ca yaddattaṃ haripāṇau tadarpitam /
tebhyaḥ kṛtānnamaskārāttiraskāro hi pāpmatām

mucyate brahmahatyādi pāpebhyo vipravaṃdanāt /
tasmātsatāṃ samārādhyo brāhmaṇo viṣṇubuddhitaḥ

kṣudhitasya dvijasyāsye yatkiṃciddīyate yadi /
pretya pīpūṣadhārābhiḥ siṃcate kalpakoṭikam

dvijatuṃḍaṃ mahākṣetramanūṣaramakaṃṭakam /
tatra cedupyate kiṃcitkoṭikoṭiphalaṃ labhet

saghṛtaṃ bhojanaṃ cāsmai dattvā kalpaṃ sa modate /
nānāsumiṣṭamannaṃ yo dadāti dvijatuṣṭaye

tasya lokā mahābhogāḥ koṭikalpāṃtamuktidāḥ /
brāhmaṇaṃ ca puraskṛtya brāhmaṇenānukīrtitam

purāṇaṃ śṛṇuyānnityaṃ mahāpāpadavānalam /
purāṇaṃ sarvatīrtheṣu tīrthaṃ cādhikamucyate

yasyaikapādaśravaṇāddharireva prasīdati /
yathā sūryavapurbhūtvā prakāśāya careddhariḥ

sarveṣāṃ jagatāmeva harirālokahetave /
tathaivāṃtaḥprakāśāya purāṇāvayavo hariḥ

vicarediha bhūteṣu purāṇaṃ pāvanaṃ param /
tasmādyadi hareḥ prīterutpāde dhīyate matiḥ

śrotavyamaniśaṃ puṃbhiḥ purāṇaṃ kṛṣṇarūpiṇam /
viṣṇubhaktena śāṃtena śrotavyamapi durlabham

purāṇākhyānamamalamamalīkaraṇaṃ param /
yasminvedārthamāhṛtya hariṇā vyāsarūpiṇā

purāṇaṃ nirmitaṃ vipra tasmāttatparamo bhavet /
purāṇe niścito dharmo dharmaśca keśavaḥ svayam

tasmātkṛte purāṇe hi śrute viṣṇurbhavediti /
sākṣātsvayaṃ harirvipraḥ purāṇaṃ ca tathāvidham

etayoḥ saṃgamāsādya harireva bhevannaraḥ /
tathā gaṃgāṃbusekena nāśayetkilbiṣaṃ svakam

keśavo dravarūpeṇa pāpāttārayate mahīm /
vaiṣṇavo viṣṇubhajanasyākāṃkṣī yadi vartate

gaṃgāṃbusekamamalamamalīkaraṇaṃ caret /
viṣṇubhaktipradā devī gaṃgā bhuvi ca gīyate

viṣṇurūpā hi sā gaṃgā lokavistārakāriṇī

brāhmaṇeṣu purāṇeṣu gaṃgāyāṃ goṣu pippale /
nārāyaṇadhiyā puṃbhirbhaktiḥ kāryā hyahaitukī

pratyakṣaviṣṇurūpā hi tatvajñairniścitā amī /
tasmātsatatamabhyarcyā viṣṇubhaktyabhilāṣiṇā

viṣṇau bhaktiṃ vinā nṝṇāṃ niṣphalaṃ janma ucyate /
kalikālapayorāśiṃ pāpagrāhasamākulam

viṣayāmajjanāvartaṃ durbodhaphenilaṃ param /
mahāduṣṭajanavyāla mahābhīmaṃ bhayānakam

dustaraṃ ca taraṃtyeva haribhaktitari sthitāḥ /
tasmādyateta vai loko viṣṇubhaktiprasādhane

kiṃ sukhaṃ labhate jaṃturasadvārtāvadhāraṇe /
hareradbhutalīlasya līlākhyānena sajjate

tadvicitrakathāloke nānāviṣayamiśritāḥ /
śrotavyā yadi vai nṝṇāṃ viṣaye sajjate manaḥ

nirvāṇe yadi vā cittaṃ śrotavyā tadapi dvijāḥ /
helayā śravaṇāccāpi tasya tuṣṭo bhaveddhariḥ

niṣkriyopi hṛṣīkeśo nānākarma cakāra saḥ /
śuśrūṣūṇāṃ hitārthāya bhaktānāṃ bhaktavatsalaḥ

na labhyate karmaṇāpi vājapeyaśatādinā /
rājasūyāyutenāpi yathā bhaktyā sa labhyate

yatpadaṃ cetasā sevyaṃ sadbhirācaritaṃ muhuḥ /
bhavābdhitaraṇe sāramāśrayadhvaṃ hareḥ padam

re re viṣayasaṃlubdhāḥ pāmarā niṣṭhurā narāḥ /
raurave hi kimātmānamātmanā pātayiṣyatha

vinā goviṃdasaumyāṃghrisevanaṃ mā gamiṣyati /
anāyāsena duḥkhānāṃ taraṇaṃ yadi vāṃchatha

bhajadhvaṃ kṛṣṇacaraṇāvapunarbhavakāraṇe /
kuta evāgato martyaḥ kuta eva punarvrajet

etadvicārya matimānāśrayeddharmasaṃgraham /
nānānarakasaṃpātādutthito yadi pūruṣaḥ

sthāvarādi tanuṃ labdhvā yadi bhāgyavaśātpunaḥ /
mānuṣyaṃ labhate tatra garbhavāsotiduḥkhadaḥ

tataḥ karmavaśājjaṃturyadi vā jāyate bhuvi /
bālyādibahudoṣeṇa pīḍito bhavati dvijāḥ

punaryauvanamāsādya dāridryeṇa prapīḍyate /
rogeṇa guruṇā vāpi anāvṛṣṭyādinā tathā

vārddhakena labhetpīḍāmanirvācyāmitastataḥ /
manasaścalanādvyādhestato maraṇamāpnuyāt

na tasmādadhikaṃ duḥkhaṃ saṃsārepyanubhūyate /
tataḥ karmmavaśājjaṃturyamaloke prapīḍyate

tatrātiyātanāṃ bhuktvā punareva prajāyate /
jāyate mriyate jaṃtu mriyate jāyate punaḥ

anārādhita goviṃdacaraṇe tvīdṛśī daśā /
anāyāsena maraṇaṃ vināyāsena jīvanam

anārādhitagoviṃdacaraṇasya na jāyate /
dhanaṃ yadi bhavedgehe rakṣaṇāttasya kiṃ phalam

yadāsau kṛṣyate yāmyairdūtaiḥ kiṃ dhanamanviyāt /
tasmāddvijātisatkāryaṃ draviṇaṃ sarvasaukhyadam

dānaṃ svargasya sopānaṃ dānaṃ kilbiṣanāśanam /
goviṃdabhaktibhajanaṃ mahāpuṇyavivarddhanam

balaṃ yadi bhavenmartye na vṛthā tadvyayaṃ caret /
hareragre nṛtyagītaṃ kuryādevamataṃdritaḥ

yatkiṃcidvidyate puṃsāṃ tacca kṛṣṇe samarpayet /
kṛṣṇārpitaṃ kuśaladamanyārpitamasaukhyadam

cakṣurbhyāṃ śrīharereva pratimādinirūpaṇam /
śrotrābhyāṃ kalayetkṛṣṇa guṇanāmānyaharniśam

jihvayā haripādāṃbu svāditavyaṃ vicakṣaṇaiḥ /
ghrāṇenāghrāya goviṃdapādābjatulasīdalam

tvacā spṛṣṭvā harerbhaktaṃ manasādhyāya tatpadam /
kṛtārtho jāyate jaṃturnātra kāryā vicāraṇā

tanmanā hi bhavetprājñastathā syāttadgatāśayaḥ /
tamevāṃtebhyeti loko nātra kāryā vicāraṇā

cetasā cāpyanudhyātaḥ svapadaṃ yaḥ prayacchati /
nārāyaṇamanādyaṃtaṃ na taṃ seveta ko janaḥ

satata niyatacitto viṣṇupādāraviṃde vitaraṇamanuśakti prītaye tasya kuryāt /
natimatiratimasyāṃghridvaye saṃvidadhyātsa hi khalu naraloke pūjyatāmāpnuyācca

iti śrīpādme mahāpurāṇe svargakhaṃḍe ekaṣaṣṭitamo'dhyāyaḥ