પદ્મ પુરાણ · અધ્યાય 3.62

સૂત ઉવાચ-
એવં યન્મહિમા લોકે લોકનિસ્તારકારણમ્ ।
તસ્ય વિષ્ણોઃ પરેશસ્ય નાનાવિગ્રહધારિણઃ

એકં પુરાણં રૂપં વૈ તત્ર પાદ્મં પરં મહત્ ।
બ્રાહ્મં મૂર્ધા હરેરેવ હૃદયં પદ્મસંજ્ઞિતમ્

વૈષ્ણવં દક્ષિણો બાહુઃ શૈવં વામો મહેશિતુઃ ।
ઊરૂ ભાગવતં પ્રોક્તં નાભિઃ સ્યાન્નારદીયકમ્

માર્કંડેયં ચ દક્ષાંઘ્રિર્વામો હ્યાગ્નેયમુચ્યતે ।
ભવિષ્યં દક્ષિણો જાનુર્વિષ્ણોરેવ મહાત્મનઃ

બ્રહ્મવૈવર્તસંજ્ઞં તુ વામજાનુરુદાહૃતઃ ।
લૈંગં હ ગુલ્ફકં દક્ષં વારાહં વામગુલ્ફકમ્

સ્કાંદં પુરાણં લોમાનિ ત્વગસ્ય વામનં સ્મૃતમ્ ।
કૌર્મં પૃષ્ઠં સમાખ્યાતં માત્સ્યં મેદઃ પ્રકીર્તિતમ્

મજ્જા તુ ગારુડં પ્રોક્તં બ્રહ્માંડમસ્થિ ગીયતે ।
એવમેવાભવદ્વિષ્ણુઃ પુરાણાવયવો હરિઃ

હૃદયં તત્ર વૈ પાદ્મં યચ્છ્રુત્વામૃતમશ્નુતે ।
પાદ્મમેતત્પુરાણં તુ સ્વયં દેવોભવદ્ધરિઃ

યસ્યૈકાધ્યાયમધ્યાપ્ય સર્વૈઃ પાપૈઃ પ્રમુચ્યતે ।
તત્રાદિમં સ્વર્ગમિદં સર્વપાદ્મફલપ્રદમ્

સ્વર્ગખંડં સમાકર્ણ્ય મહાપાતકિનોપિ યે ।
મુચ્યંતે તેપિ પાપેભ્યસ્ત્વચો જીર્ણાદ્યથોરગાઃ

અપિ ચેત્સુદુરાચારઃ સર્વધર્મ્મબહિષ્કૃતઃ ।
આદિસ્વર્ગં સમાકર્ણ્ય યત્ફલં સમવાપ્નુયાત્

આદિસ્વર્ગમિદં શ્રુત્વા તત્ફલં લભતે નરઃ ।
માઘેમાસે પ્રયાગે તુ સ્નાત્વા પ્રતિદિનં નરઃ

યથા પાપાત્પ્રમુચ્યેત તથા હિ શ્રવણાદ્ભવેત્ ।
દત્તા તેન સ્વર્ણતુલા દત્તા ચૈવ ધરાખિલા

કૃતં વિતરણં તેન દ્રરિદ્રે યત્કૃતમૃણમ્ ।
હરેર્નામસહસ્રાણિ પઠિતાનિ હ્યભીક્ષ્ણશઃ

સર્વેવે દાસ્તથાધીતાસ્તત્તત્કર્મકૃતં તથા ।
અધ્યાપકાશ્ચ બહવઃ સ્થાપિતા વૃત્તિદાનતઃ

અભયં ભયલોકેભ્યો દત્તં તેન તથા દ્વિજાઃ ।
ગુણવંતો જ્ઞાનવંતો ધર્મવંતોનુમાનિતાઃ

મેષકર્કટયોર્મધ્યે તોયં દત્તં સુશીતલમ્ ।
બ્રાહ્મણાર્થે ગવાર્થે ચ પ્રાણાસ્ત્યક્તાશ્ચ તેન હિ

અન્યાનિ ચ સુકર્માણિ કૃતાનિ તેન ધીમતા ।
યેનાદિખંડં સદસિ શ્રુતં સંશ્રાવિતં તથા

સ્વર્ગખંડં સમાધીત્ય નાનાભોગાન્સમશ્નુતે ।
અંતઃપુરગનારીણાં સુખસુપ્તઃ પ્રબુધ્યતે

કિંકિણીરવસન્નાદૈસ્તથા મધુરભાષણૈઃ ।
ઇંદ્રસ્યાર્ધાસનં ભુંક્તે ઇંદ્રલોકે વસેચ્ચિરમ્

તતઃ સૂર્યસ્ય ભવનં ચંદ્રલોકં તતો વ્રજેત્ ।
સપ્તર્ષિભવને ભોગાન્ભુક્ત્વા યાતિ તતો ધ્રુવમ્

તતશ્ચ બ્રહ્મણો લોકં પ્રાપ્ય તેજોમયં વપુઃ ।
તત્રૈવ જ્ઞાનમાસાદ્ય નિર્વાણં પરમૃચ્છતિ

સદ્ભિઃ સહ વસેદ્ધીમાન્સત્તીર્થે સ્નાનમાચરેત્ ।
કુર્યાદેવ સદાલાપં સચ્છાસ્ત્રં શૃણુયાન્નરઃ

તત્ર પાદ્મં મહાશાસ્ત્રં સર્વામ્નાયફલપ્રદમ્ ।
સ્વર્ગખંડં ચ તન્મધ્યે મહાપુણ્યફલપ્રદમ્

ભજધ્વં ગોવિંદં નમત હરિમેકં સુરવરં ગમિષ્યધ્વં લોકાનતિવિમલભોગાનતિતરામ્ ।
શૃણુધ્વં હે લોકા વદત હરિનામૈકમતુલં યદીચ્છાવીચીનાં સુખતરણમિષ્ટાનિ લભત

ઇતિ શ્રીપાદ્મે મહાપુરાણે સ્વર્ગખંડે દ્વિષષ્ટિતમોઽધ્યાયઃ

સંપૂર્ણમિદમાદિખણ્ડાપરનામકમાદિસ્વર્ગખંડં સ્વર્ગખંડં વા ।
શુભમસ્તુ શ્રીરસ્તુ ।
ઇતિ શ્રીપાદ્મે મહાપુરાણે તૃતીયં સ્વર્ગખણ્ડં સમાપ્તમ્।