Scripture Library

Padma Purana · Chapter 3.59

3.59.1

vyāsa uvāca-
evaṃ vanāśrame sthitvā tṛtīyaṃ bhāgamāyuṣaḥ /
caturthaṃ cāyuṣo bhāgaṃ saṃnyāsena nayetkramāt

3.59.2

agnīnātmani saṃsthāpya dvijaḥ pravrajito bhavet /
yogābhyāsarataḥ śāṃto brahmavidyāparāyaṇaḥ

3.59.3

yadā manasi saṃpannaṃ vairāgyaṃ sarvavastuṣu /
tadā saṃnyāsamicchecca patitaḥ syādviparyaye

3.59.4

prājāpatyāṃ nirūpyeṣṭimāgneyīmathavā punaḥ /
dāṃtaḥ śuklakaṣāyosau brahmāśramamupāśrayet

3.59.5

jñānasaṃnyāsinaḥ kecidvedasaṃnyāsino'pare /
karmasaṃnyāsinastvanye trividhāḥ parikīrtitāḥ

3.59.6

yaḥ sarvatra vinirmukto nirdvaṃdvaścaiva nirbhayaḥ /
procyate jñānasaṃnyāsī ātmanyeva vyavasthitaḥ

3.59.7

vedamevābhyasennityaṃ nirāśīrniṣparigrahaḥ /
procyate vedasaṃnyāsī mumukṣurvijiteṃdriyaḥ

3.59.8

yastvagnimātmasākṛtvā brahmārpaṇaparo dvijaḥ /
jñeyaḥ sa karmasaṃnyāsī mahāyajñaparāyaṇaḥ

3.59.9

trayāṇāmapi caiteṣāṃ jñānī tvabhyadhiko mataḥ /
na tasya vidyate kāryaṃ na liṃgaṃ vā vipaścitaḥ

3.59.10

nirmamo nirbhayaḥ śāṃto nirdvaṃdvaḥ parṇabhojanaḥ /
jīrṇakaupīnavāsāḥ syānnagno vā dhyānatatparaḥ

3.59.11

brahmacārī jitāhāro grāmādannaṃ samāharet /
adhyātmaratirāsīta nirapekṣo nirāśiṣaḥ

3.59.12

ātmanaiva sahāyena sukhārthaṃ vicarediha /
nābhinaṃdeta maraṇaṃ nābhinaṃdeta jīvanam

3.59.13

kālameva pratīkṣeta nirdeśaṃ bhṛtako yathā /
nādhyetavyaṃ na vartavyaṃ śrotavyaṃ na kadācana

3.59.14

evaṃ jñānaparo yogī brahmabhūyāya kalpate /
ekavāsātha vā vidvānkaupīnācchādanopi vā

3.59.15

muṃḍī śikhī vātha bhavettridaṃḍī niṣparigrahaḥ /
kāṣāyavāsāḥ satataṃ dhyānayogaparāyaṇaḥ

3.59.16

grāmāṃte vṛkṣamūle vā vaseddevālayepi vā /
samaḥ śatrau tathā mitre tathā mānāpamānayoḥ

3.59.17

bhaikṣyeṇa vartayennityaṃ naikānnādī bhavetkvaccit /
yastu mohena vānyasmādekānnādī bhavedyatiḥ

3.59.18

na tasya niṣkṛtiḥ kāciddharmaśāstreṣu dṛśyate /
rāgadveṣaviyuktātmā samaloṣṭāśmakāṃcanaḥ

3.59.19

prāṇihiṃsānivṛttaśca maunī syātsarvanispṛhaḥ /
dṛṣṭipūtaṃ nyasetpādaṃ vastrapūtaṃ jalaṃ pibet

3.59.20

satyapūtāṃ vadedvāṇīṃ manaḥpūtaṃ samācaret /
naikatra nivaseddeśe varṣābhyonyatra bhikṣukaḥ

3.59.21

snātvā śaucayuto nityaṃ kamaṃḍalukaraḥ śuciḥ /
brahmacaryarato nityaṃ vanavāsarato bhavet

3.59.22

mokṣaśāstreṣu nirato brahmasūtrī jiteṃdriyaḥ /
daṃbhāhaṃkāranirmukto niṃdāpaiśunyavarjitaḥ

3.59.23

ātmajñānaguṇopeto yadi mokṣamavāpnuyāt /
abhyasetsatataṃ devaṃ praṇavākhyaṃ sanātanam

3.59.24

snātvācamya vidhānena śucirdevālayādiṣu /
yajñopavītī śāṃtātmā kuśapāṇiḥ samāhitaḥ

3.59.25

dhautakāṣāyavasano tasmiñchannatanūruhaḥ /
adhiyajñaṃ brahmajapedādhidaivikameva ca

3.59.26

ādhyātmikaṃ ca satataṃ vedāntābhihitaṃ ca yat /
putreṣu cātha nivasanbrahmacārī yatirmuniḥ

3.59.27

vedamevābhyasennityaṃ sa yāti paramāṃ gatim /
ahiṃsāsatyamasteyaṃ brahmacaryaṃ tapaḥ param

3.59.28

kṣamādayā ca saṃtoṣo vratānyasya viśeṣataḥ /
vedāṃtajñānaniṣṭho vā paṃcayajñānsamāhitaḥ

3.59.29

kuryyādaharahaḥ snātvā bhikṣārthe naiva tena hi /
homamaṃtrānjapennityaṃ kālekāle samāhitaḥ

3.59.30

svādhyāyaṃ cānvahaṃ kuryyātsāvitrīṃ saṃdhyayorjapet /
dhyāyīta satataṃ devamekāṃtaṃ parameśvaram

3.59.31

ekānnaṃ varjayennityaṃ kāmaṃ krodhaṃ parigraham /
ekavāsā dvivāsā vā śikhī yajñopavītavān /
kamaṃḍalukaro vidvāṃstridaṃḍo yāti tatparam

3.59.59

iti śrīpādme mahāpurāṇe svargakhaṃḍe yatidharmanirūpaṇaṃ nāmaikonaṣaṣṭitamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0