Padma Purana · Chapter 3.58

vyāsa uvāca-
evaṃ gṛhāśrame sthitvā dvitīyaṃ bhāgamāyuṣaḥ /
vānaprasthāśramaṃ gacchetsadāraḥ sāgnireva ca

nikṣipya bhāryāṃ putreṣu gacchedvanamathāpi vā /
dṛṣṭvāpatyasya vāpatyaṃ jarjarīkṛtavigrahaḥ

śuklapakṣasya pūrvāhṇe praśaste cottarāyaṇe /
gatvāraṇyaṃ niyamavāṃstapaḥ kuryātsamāhitaḥ

phalamūlāni pūtāni nityamāhāramāharet /
yadāhāro bhavettena pūjayetpitṛdevatāḥ

pūjayedatithiṃ nityaṃ snātvā cābhyarcayetsurān /
gṛhādādāya cāśnīyādaṣṭau grāsānsamāhitaḥ

jaṭāśca bibhṛyānnityaṃ nakharomāṇi notsṛjet /
svādhyāyaṃ sarvathā kuryānniyacchedvācamanyataḥ

agnihotraṃ ca juhuyātpaṃcayajñānsamācaret /
utpannairvividhairmedhyaiḥ śākamūlaphalena vā

cīravāsā bhavennityaṃ snāyāttriṣavaṇaṃ śuciḥ /
sarvabhūtānukaṃpaśca pratigrahavivarjitaḥ

darśena paurṇamāsena yajeta niyataṃ dvijaḥ /
ṛtviṣṭyāgrayaṇe caiva cāturmāsyāni kārayet

uttarāyaṇaṃ ca kramaśo dakṣiṇāyanameva ca /
vāsaṃtaśāradairmeddhyairutpannaiḥ svayamāhṛtaiḥ

puroḍāśāṃścarūṃścaiva vidhivannirvapetpṛthak /
devatābhyaḥ pitṛbhyaśca dattvā medhyataraṃ haviḥ

śeṣaṃ samupabhuṃjīta lavaṇaṃ ca svayaṃkṛtam /
varjjayenmadyamāṃsāni bhaumāni kavakāni ca

bhūstṛṇaṃ śaṣpakaṃ caiva śleṣmātaka phalāni ca /
na phālakṛṣṭamaśnīyādutsṛṣṭamapi kenacit

na grāmajātānyārtopi puṣpāṇi ca phalāni ca /
śrāvaṇenaiva vidhinā vahniṃ paricaretsadā

na druhyetsarvabhūtāni nirdvaṃdvo nirbhayo bhavet /
na naktaṃ kiṃcidaśnīyādrātrau dhyānaparo bhavet

jiteṃdriyo jitakrodhastattvajñānaviciṃtakaḥ /
brahmacārī bhavennityaṃ na patnīmapi saṃśrayet

yastu patnyā vanaṃ gatvā maithunaṃ kāmataścaret /
tadvrataṃ tasya lupyeta prāyaścittīyate dvijaḥ

tatra yo jāyate garbho na sa spṛśyo dvijātibhiḥ /
na hi vededhikārosya tadvaṃśepyevameva hi

bhūmau śayīta satataṃ sāvitrījapyatatparaḥ /
śaraṇyaḥ sarvabhūtānāṃ sadvibhāgaparaḥ sadā

parivādaṃ mṛṣāvādaṃ nidrālasye ca varjayet /
ekāgniraniketaḥ syātprokṣitāṃ bhūmimāśrayet

mṛgaiḥ saha careddāṃtastaiḥ sahaiva ca saṃvaset /
śilāyāṃ śarkarāyāṃ vā śayīta susamāhitaḥ

sadyaḥ prakṣālako vā syānmāsasaṃcayikopi vā /
ṣaṇmāsanicayo vāpi samānicaya eva vā

naktaṃ cānnaṃ samaśnīyāddivā cāhṛtya śaktitaḥ /
caturthakālako vā syātkiṃ vāpyaṣṭamakālikaḥ

cāṃdrāyaṇavidhānairvā śuklekṛṣṇe ca varjayet /
pakṣepakṣe samaśnīyādyavāgūṃ kvathitāṃ sakṛt

puṣpamūlaphalairvāpi kevalairvartayetsadā /
svābhāvikaiḥ svayaṃśīrṇairvaikhānasamate sthitaḥ

bhūmau vā parivarteta tiṣṭhedvā prapadairdinam /
sthānāsanābhyāṃ viharenna kvaciddhairyyamutsṛjet

grīṣme paṃcatapāśca syādvarṣāsvabhrāvakāśikaḥ /
ārdravāsāśca hemaṃte kramaśo varddhayettapaḥ

upaspṛśettriṣavaṇaṃ pitṛdevāṃśca tarpayet /
ekapādena tiṣṭheta marīciṃ vā pibetsadā

paṃcāgnidhūmago vā syādūṣmagaḥ somapopi vā /
payaḥ pibecchuklapakṣe kṛṣṇapakṣe tu gomayam

śīrṇaparṇāśano vā syātkṛcchrairvā vartayetsadā /
yogābhyāsarataśca syādrudrādhyāyī bhavetsadā

atharvaśirasodhyetā vedāṃtābhyāsatatparaḥ /
yamānseveta satataṃ niyamāṃścāpyataṃdritaḥ

atha cāgnīnsamāropya svātmani dhyānatatparaḥ

anagniraniketo vā munirmokṣaparo bhavet /
tāpaseṣveva vipreṣu yātrikaṃ bhaikṣamāharet

gṛhamedhiṣu cānyeṣu dvijeṣu vanacāriṣu /
grāmādāhṛtya cāśnīyādaṣṭau grāsānvane vasan

pratigṛhya puṭenaiva pāṇinā śakalena vā /
vividhāścopaniṣada ātmasaṃsiddhaye japet

vidyāviśeṣānsāvitrīṃ rudrādhyāyaṃ tathaiva ca /
mahāprasthānikaṃ vāsau kuryyādanaśanaṃ tathā /
agnipraveśamanyadvā brahmārpaṇavidhau sthitaḥ

iti śrīpādme mahāpurāṇe svargakhaṃḍe vānaprasthāśramācāradharmo nāmāṣṭapaṃcāśattamo'dhyāyaḥ