Padma Purana · Chapter 3.55

vyāsa uvāca-
na hiṃsyātsarvabhūtāni nānṛtaṃ vāvadetkvacit /
nāhitaṃ nāpriṃyaṃ vācyaṃ na stenaḥ syātkadācana

tṛṇaṃ vā yadi vā śākaṃ mṛdaṃ vā jalameva ca /
parasyāpaharañjaṃturnarakaṃ pratipadyate

na rājñaḥ pratigṛhṇīyānna śūdrātpatitādapi /
na cānyasmādaśaktaścenniṃditānvarjayedbudhaḥ

nityaṃ yācanako na syātpunastaṃ naiva yācayet /
prāṇānapaharatyevaṃ yācakastasya durmateḥ

na devadravyahārī syādviśeṣeṇa dvijottamaḥ /
brahmasvaṃ vā nāpaharedāpatsvapi kadācana

na viṣaṃ viṣamityāhurbrahmasvaṃ viṣamucyate /
devasvaṃ cāpi yatnena sadā pariharettataḥ

puṣpaṃ śākodakaṃ kāṣṭhaṃ tathā mūlaṃ phalaṃ tṛṇam /
adattāni ca na steyaṃ manuḥ prāha prajāpatiḥ

gṛhītavyāni puṣpāṇi devārcanavidhau dvijaḥ /
naikasmādeva niyatamananujñāya kevalam

tṛṇaṃ kāṣṭhaṃ phalaṃ puṣpaṃ prakāśaṃ vai haredbudhaḥ /
dharmārthaṃ kevalaṃ prāhuranyathā patito bhavet

tilamudgayavādīnāṃ muṣṭirgrāhyā pathisthitaiḥ /
kṣudhitairnānyathā viprā dharmādibhiriti sthitiḥ

na dharmasyāpadeśena pāpaṃ kṛtvā vrataṃ caret /
vratena pāpaṃ vyāguhya kurvanstrīśūdra daṃbhanam

pretyeha cedṛśo vipro garhyate brahmavādibhiḥ /
chadmanācaritaṃ yacca vrataṃ rakṣāṃsi gacchati

aliṃgī liṃgiveṣeṇa yo vṛttimupatiṣṭhati /
saligiṃno haredenastiryagyonau ca jāyate

yācanaṃ yonisaṃbaṃdhaṃ sahavāsaṃ ca bhāṣaṇam /
kurvāṇaḥ patate nityaṃ tasmādyatnena varjayet

devadrohaṃ na kurvīta gurudrohaṃ tathaiva ca /
devadrohādgurudrohaḥ koṭikoṭiguṇādhikaḥ

janāpavādo nāstikyaṃ tasmātkoṭiguṇādhikam /
gobhiśca daivatairvipraiḥ kṛṣyā rājopasevayā

kulānyakulatāṃ yāṃti yāni hīnāni dharmmataḥ /
kuvicāraiḥ kriyālopairvedānadhyayanena ca

kulānyakulatāṃ yāṃti brāhmaṇā'tikrameṇa ca /
anṛtātpāradāryācca tathā'bhakṣyasya bhakṣaṇāt

agotradharmmācaraṇātkṣipraṃ naśyati vai kulam /
aśrotriyeṣu dānāccā vṛṣaleṣu tathaiva ca

vihitācārahīneṣu kṣipraṃ naśyati vai kulam /
adhārmikairvṛte grāme na vyādhibahule vaset

śūdrarājye ca na vasenna pākhaṃḍajanairvṛte /
himavadviṃdhyayormadhyaṃ pūrvapaścimayoḥ śubham

muktvā samudrayordeśaṃ nānyatra nivaseddvijaḥ /
kṛṣṇo vā yatra carati mṛgo nityaṃ svabhāvataḥ

puṇyā vā viśrutā nadyastatra vā nivaseddvijaḥ /
ardhakrośaṃ nadīkūlaṃ varjayitvā dvijottamaḥ

nānyatra nivasetpuṇyaṃ nāṃtyajagrāmasannidhau /
na saṃvasecca patitairna cāṃḍālairna pulkasaiḥ

na mūrkhairnāvaliptaiśca nānyairjāyāvasāyibhiḥ /
ekaśayyāsane paṃktirbhāṃḍe pakvānnamiśraṇam

yajanādhyāpane yonistathaiva sahabhojanam /
sahādhyāyastu daśamaḥ sahayājanameva ca

ekādaśa samuddiṣṭā doṣāḥ sāṃkaryasaṃsthitāḥ /
samīpe cāpyavasthānātpāpaṃ saṃkramate nṛṇām

tasmātsarvaprayatnena sāṃkaryyaṃ parivarjayet /
ekapaṃktyupaviṣṭā ye na spṛśaṃti parasparam

bhasmanā kṛtamaryyādā na teṣāṃ saṃkaro bhavet /
agninā bhasmanā caiva salilena vilekhataḥ

dvāreṇa staṃbhamārgeṇa ṣaḍbhiḥ paṃktirvibhidyate /
na kuryācchuṣkavairāṇi vivādaṃ na ca paiśunam

parakṣetre gāṃ caraṃtīṃ na cācakṣīta karhicit /
na saṃvasetsūcakena na kaṃ vai marmaṇi spṛśet

na sūryapariveṣaṃ vā neṃdracāpaṃ parāhnikam /
parasmai kathayedvidvānśaśinaṃ vātha kāṃcanam

na kuryādbahubhiḥ sārddhaṃ virodhaṃ baṃdhubhistathā /
ātmanaḥ pratikūlāni pareṣāṃ na samācaret

tithiṃ pakṣasya na brūyānnakṣatrāṇi na nirdiśet /
nodakyāmabhibhāṣeta nāśuciṃ vā dvijottamaḥ

na devaguruviprāṇāṃ dīyamānaṃ tu vārayet /
na cātmānaṃ praśaṃsedvā paraniṃdāṃ ca varjayet

vedaniṃdāṃ devaniṃdāṃ prayatnena vivarjayet /
yastu devānṛṣīṃścaiva vedānvā niṃdate dvijaḥ

na tasya niṣkṛtirdṛṣṭā śāstreṣviha munīśvarāḥ /
niṃdayedvā guruṃ devaṃ vedaṃ vāsopabṛṃhaṇam

kalpakoṭiśataṃ sāgraṃ raurave pacyate naraḥ /
tūṣṇīmāsīta niṃdāyāṃ na brūyātkiṃciduttaram

karṇau pidhāya gaṃtavyaṃ na cainamavalokayet /
varjjayedvai rahasyāni pareṣāṃ garhaṇaṃ budhaḥ

vivādaṃ svajanaiḥ sārddhaṃ nakuryyādvai kadācana /
na pāpaṃ pāpināṃ brūyādapāpaṃ vā dvijottamaḥ

satyena tulyo doṣaḥ syādasatyāddoṣavānbhavet /
nṛṇāṃ mithyābhiśastānāṃ pataṃtyaśrūṇi rodanāt

tāni putrānpaśūnghnaṃti teṣāṃ mithyābhiśaṃsinām /
brahmahatyā surāpāne steye gurvaṃganāgame

dṛṣṭaṃ vai śodhanaṃ vṛddhairnāsti mithyābhiśaṃsane /
nekṣetodyaṃtamādityaṃ śaśinaṃ vā'nimittataḥ

nāstaṃ yāṃtaṃ na vāristhaṃ nopaspṛṣṭaṃ na madhyagam /
tirohitaṃ samīkṣeta nādarśādyanugāminam

na nagnāṃ striyamīkṣeta puruṣaṃ vā kadācana /
na ca mūtraṃ purīṣaṃ vā na ca saṃsṛṣṭamaithunam

nāśuciḥ sūryasomādīngrahānālokayedbudhaḥ /
nābhibhāṣeta ca paramucchiṣṭo vāvaguṃṭhitaḥ

na paśyetpretasaṃsparśaṃ na kruddhasya gurormukham /
na tailodakayośchāyāṃ na paṃktiṃ bhojane sati

na muktabaṃdhanaṃ paśyennonmattaṃ gajameva vā /
nāśnīyādbhāryayā sārddhaṃ naināmīkṣeta cāśnatīm

kṣuvatīṃ jṛṃbhamāṇāṃ vā nāsanasthāṃ yathāsukham /
nodake cātmano rūpaṃ śubhaṃ vāśubhameva vā

na laṃghayecca matimānnādhitiṣṭhetkadācana /
na śūdrāya matiṃ dadyātkṛsaraṃ pāyasaṃ dadhi

nocchiṣṭaṃ vā madhu ghṛtaṃ na ca kṛṣṇājinaṃ haviḥ /
na caivāsmai vrataṃ brūyānna ca dharmaṃ vadedbudhaḥ

na ca krodhavaśaṃ gaccheddveṣaṃ rāgaṃ ca varjayet /
lobhaṃ daṃbhaṃ tathā śāṭhyaṃ hyasūyāṃ jñānakutsanam

īrṣyāṃ madaṃ tathāśokaṃ mohaṃ ca parivarjayet /
na kuryātkasyacitpīḍāṃ sutaṃ śiṣyaṃ tu tāḍayet

na hīnānupaseveta na ca tṛṣṇāmatiḥ kvacit /
nātmānaṃ cāvamanyeta dainyaṃ yatnena varjayet

na viśiṣṭamasatkuryānnātmānaṃ vāsanādbudhaḥ /
na nakhena likhedbhūmiṃ gāṃ ca saṃveśayannahi

na nadīṣu nadīṃ brūyātparvateṣu ca parvatān /
āvāse bhojane vāpi na tyajetsahayāyinam

nāvagāhedapo nagno vahniṃ nātivrajettathā /
śirobhyaṃgāvaśiṣṭena tailenāṃgaṃ na lepayet

na sarpa śastraiḥ krīḍeta svāni khāni na saṃspṛśet /
romāṇi ca rahasyāni nāśiṣṭena saha vrajet

na pāṇi pāda vāṅnetra cāpalyaṃ samupāśrayet /
na śiśnodaracāpalyaṃ na ca śravaṇayoḥ kvacit

na cāṃganakhavādyaṃ vai kuryānnāṃjalinā pibet /
nābhihanyājjalaṃ padbhyāṃ pāṇinā vā kadācana

na śātayediṣṭikābhirmūlāni ca phalāni ca /
na mlecchabhāṣaṇaṃ śikṣennākarṣecca padāsanam

nakhabhedanamāsphoṭaṃ chedanaṃ vā vilekhanam /
kuryyādvimarddanaṃ dhīmānnākasmādeva niṣphalam

notsaṃge bhakṣayedbhakṣyaṃ vṛthā ceṣṭāṃ na cācaret /
na nṛtyedathavā gāyenna vāditrāṇi vādayet

na saṃhatābhyāṃ pāṇibhyāṃ kaṃḍūyedātmanaḥ śiraḥ /
na laukikaistavairdevāṃstoṣayedvākpaterapi

nākṣaiḥ krīḍenna dhāveta nāpsu viṇmūtramācaret /
nocchiṣṭaḥ saṃviśennityaṃ na nagnaḥ snānamācaret

na gacchaṃstu paṭhedvāpi na caiva svaśiraḥ spṛśet /
na daṃtairnakharomāṇi cchiṃdyātsuptaṃ na bodhayet

nābālātapamāsevetpretadhūmaṃ vivarjayet /
naiva svapyācchūnyagehe svayaṃ nopānahau haret

nākāraṇādvā niṣṭhīvenna bāhubhyāṃ nadīṃ taret /
na pādakṣālanaṃ kuryātpādenaiva kadācana

nāgnau pratāpayetpādau na kāṃsye dhāvayedbudhaḥ /
nābhiprasārayeddevaṃ brāhmaṇāngāmathāpi vā

vāyvagninṛpaviprānvā sūryaṃ vā śaśinaṃ prati /
aśuddhaḥ śayanaṃ pānaṃ svādhyāyaṃ snāna bhojanam

bahirniṣkramaṇaṃ caiva na kurvīta kadācana /
svapnamadhyayanaṃ snānamudvartaṃ bhojanaṃ gatim

ubhayoḥ saṃdhyayornityaṃ madhyāhne caiva varjayet /
na spṛśetpāṇinocchiṣṭo vipro go brāhmaṇānalān

na cālanaṃ padā vāpi na devapratimāṃ spṛśet /
nāśuddhogniṃ paricarenna devānkīrtayedṛṣīn

nāvagāhedagādhāṃbu dhāvayennā'nimittataḥ /
na vāmahastenoddhṛtya pibedvaktreṇa vā jalam

nottaredanupaspṛśya nāpsu retaḥ samutsṛjet /
amedhyāliptamarhaṃ vā lohitaṃ vā viṣāṇi vā

vyatikrāmenna sravaṃtīṃ nāpsu maithunamācaret /
caityavṛkṣaṃ na vai chiṃdyānnāpsu ṣṭhīvanamācaret

nāsthibhasmakapālāni na keśānna ca kaṃṭakān /
tuṣāṃgārakarīṣaṃ vā nādhitiṣṭhetkadācana

na cāgniṃ laṃghayeddhīmānnopadadhyādadhaḥ kvacit /
na cainaṃ pādataḥ kuryyācchūrpeṇa na dhamedbudhaḥ

na vṛkṣamavaroheta nāvekṣetāśuciḥ kvacit /
agnau na ca kṣipedagniṃ nādbhiḥ praśamayettathā

suhṛnmaraṇamātraṃ vā svayaṃ na śrāvayetparān /
apaṇyaṃ kūṭapaṇyaṃ vā vikrayena prayojayet

na vahniṃ mukhaniḥśvāsairjvālayennāśucirbudhaḥ /
puṇyasthānodakasthāne sīmāṃtaṃ vāhayenna tu

na bhiṃdyātpūrvasamayamabhyupetaṃ kadācana /
parasparaṃ paśūnvyāghrānpakṣiṇo na ca yodhayet

parabādhāṃ na kurvīta jalavātātapādibhiḥ /
kārayitvā sukarmāṇi gurūnpaścānna vaṃcayet

sāyaṃprātargṛhadvārānrakṣārthaṃ parighaṭṭayet /
bahirmālyaṃ sugaṃdhiṃ vā bhāryayā saha bhojanam

vigṛhya vādaṃ kṛtvā vā praveśaṃ ca vivarjayet /
nakhādanbrāhmaṇastiṣṭhenna jalpedvā hasedbudhaḥ

svamagniṃ caiva hastena spṛśennāpsuciraṃ vaset /
na pakṣakeṇopadhamenna śūrpeṇa ca pāṇinā

mukhenāgniṃ samiṃdhīta mukhādagnirajāyata /
parastriyaṃ na bhāṣeta nāyājyaṃ yājayedbudhaḥ

naikaścaretsadā vipraḥ samudāyaṃ ca varjayet /
na devāyatanaṃ gacchetkadācidvā'pradakṣiṇam

na pīḍayedvā vastrāṇi na devāyatane svapet /
naikodhvānaṃ prapadyeta nādhārmikajanai saha

na vyādhidūṣitairvāpi na śūdraiḥ patitena vā /
nopānadvarjito vātha jalādirahitastathā

na vartmani citiṃ vāmamatikrāmetkvaciddvijaḥ /
na niṃdedyoginaḥ siddhānvratino vā yatīṃstathā

devatāyatanaṃ prājñā devānāṃ caiva satriṇām /
nākrāmetkāmataśchāyāṃ brāhmaṇānāṃ ca gorapi

svāṃ tu nākrāmayecchāyāṃ patitādyairna rogibhiḥ /
nāṃgārabhasmakeśādiṣvadhitiṣṭhetkadācana

varjayenmārjanī reṇuṃ snānavastra ghaṭodakam /
na bhakṣayedabhakṣyāṇi nāpeyaṃ ca pibeddvijaḥ

iti śrīpādme mahāpurāṇe svargakhaṃḍe paṃcapaṃcāśattamo'dhyāyaḥ