Padma Purana · Chapter 3.54

vyāsa uvāca-
vedaṃ vedau tathā vedānvedāṃgāni tathā dvijāḥ /
adhītya cādhigamyārthaṃ tataḥ snāyāddvijottamaḥ

gurave tu dhanaṃ datvā snāyīta tadanujñayā /
tīrṇavratotha yuktātmā śakto vā snātumarhati

vaiṇavīṃ dhārayedyaṣṭimaṃtarvāsastathottaram /
yajñopavītadvitayaṃ sodakaṃ ca kamaṃḍalum

chatraṃ coṣṇīṣamamalaṃ pāduke cāpyupānahau /
raukme ca kuṃḍale dhārye kṛttakeśanakhaḥ śuciḥ

anyatra kāṃcanādvipro na raktāṃ bibhṛyātsrajam /
śuklāṃbaradharo nityaṃ sugaṃdhaḥ priyadarśanaḥ

na jīrṇa malavadvāsā bhavedvai vibhave sati /
na raktamulbaṇaṃ cānya dhṛtaṃ vāso na kuṃḍalam

nopānahau srajaṃ cātha pāduke ca prayojayet /
upavītamalaṃkāraṃ darśayankṛṣṇamājinam

nāpasavyaṃ parīdadhyādvāso na vikṛtaṃ vaset /
āharedvidhivaddārānsadṛśānātmanaḥ śubhān

rūpalakṣaṇasaṃyuktānyonidoṣavivarjitān /
apitṛgotrajabhavāmanyamānuṣagotrajām

āharedbrāhmaṇo bhāryāṃ śīlaśaucasamanvitām /
ṛtukālābhigāmī syādyāvatputrobhijāyate

varjayetpratiṣiddhāni prayatnena dināni tu /
ṣaṣṭhyaṣṭamīṃ paṃcadaśīṃ dvādaśīṃ ca caturdaśīm

brahmacārī bhavennityaṃ tadvajjanmatrayāhani /
ādadhīta vivāhāgniṃ juhuyājjātavedasam

etāni snātako nityaṃ pāvanāni ca pāvayet /
vedoditaṃ svakaṃ karmma nityaṃ kuryādataṃdritaḥ

akurvāṇaḥ patatyāśu narakānatibhīṣaṇān /
abhyasetprayato vedaṃ mahāyajñānna hāpayet

kuryādgṛhyāṇi kāryāṇi saṃdhyopāsanameva ca /
sakhyaṃ samādhikaiḥ kuryādupeyādīśvaraṃ sadā

daivatānyabhigaccheta kuryyādbhāryyābhipoṣaṇam /
na dharmaṃ khyāpayedvidvānna pāpaṃ gūhayedapi

kurvītātmahitaṃ nityaṃ sarvabhūtānukaṃpakaḥ /
vayasaḥ karmmaṇo'rthasya śrutasyābhijanasya ca

deśavāgbuddhisārūpyamācaranvicaretsadā /
śrutismṛtyuditaṃ samyaksādhubhiryaśca sevitaḥ

tamācāraṃ niṣeveta nehetānyatra karhicit /
yenāsya pitaro yātā yena yātāḥ pitāmahāḥ

tena yāyātsatāṃ mārgaṃ tena gacchanna duṣyati /
nityaṃ svādhyāyaśīlaḥ syānnityaṃ yajñopavītavān

satyavādī jitakrodho lobhamohavivarjitaḥ /
sāvitrījāpa nirataḥ śrāddhakṛnmucyate gṛhī

mātāpitrorhite yukto brāhmaṇasya hite rataḥ /
dātā yajvā devabhakto brahmaloke mahīyate

trivargasevī satataṃ devānāṃ ca samarcanam /
kuryādaharaharnityaṃ namasyetprayataḥ surān

vibhāgaśīlaḥ satataṃ kṣamāyukto dayālukaḥ /
gṛhasthastu samākhyāto na gṛheṇa gṛhī bhavet

kṣamā dayā ca vijñānaṃ satyaṃ caiva damaḥ śamaḥ /
adhyātmanityatā jñānametadbrāhmaṇalakṣaṇam

etasmānna pramādyeta viśeṣeṇa dvijottamaḥ /
yathāśakti carandharmmaṃ niṃditāni vivarjayet

vidhūya mohakalilaṃ labdhvā yogamanuttamam /
gṛhastho mucyate baṃdhānnātra kāryāvicāraṇā

vigarhita jaya kṣepa hiṃsā baṃdhavadhātmanām /
anyamanyu samutthānāṃ doṣāṇāṃ marṣaṇaṃ kṣamā

svaduḥkheṣveva kāruṇyaṃ paraduḥkheṣu sauhṛdam /
dayeti munayaḥ prāhuḥ sākṣāddharmasya sādhanam

caturdaśānāṃ vidyānāṃ dhāraṇā hi parārthataḥ /
vijñānamiti tadvidyādyena dharmo vivardhate

adhītya vidhivadvidyāmarthaṃ caivopalabhyate /
dharmakāryāṇi kurvīta hyetadvijñānamucyate

satyena lokaṃ jayati satyaṃ tatparamaṃ padam /
yathā bhūtā pramādaṃ tu satyamāhurmanīṣiṇaḥ

damaḥ śarīroparatiḥ śamaḥ prajñāprasādataḥ /
adhyātmamakṣaraṃ vidyā yatra gatvā na śocati

yayā sa devobhagavānvidyayā vidyate paraḥ /
sākṣādeva hṛṣīkeśastajjñānamiti kīrtitam

tanniṣṭhastatparo vidvānnityamakrodhanaḥ śuciḥ /
mahāyajñaparo vipro labhate tadanuttamam

dharmasyāyatanaṃ yatnāccharīraṃ paripālayet /
nahi dehaṃ vinā viṣṇuḥ puruṣairvidyateparaḥ

nityaṃ dharmārthakāmeṣu yujyeta niyato dvijaḥ /
na dharmavarjitaṃ kāmamarthaṃ vā manasā smaret

sīdannapi hi dharmeṇa na tvadharmaṃ samācaret /
dharmo hi bhagavāndevo gatiḥ sarveṣu jaṃtuṣu

bhūtānāṃpriyakārīsyānnaparadro hakarmadhīḥ /
na vedadevatāniṃdāṃ kuryyāttaiśca na saṃvaset

yastvimaṃ niyato martyo dharmādhyāyaṃ paṭhecchuciḥ /
adhyāpayecchrāvayedvā brahmaloke mahīyate

iti śrīpādme mahāpurāṇe svargakhaṃḍe catuḥpaṃcāśattamo'dhyāyaḥ