Padma Purana · Chapter 3.53

vyāsa uvāca-
evaṃ daṃḍādibhiryuktaḥ śaucācārasamanvitaḥ /
āhūtodhyāpanaṃ kuryādvīkṣyamāṇo gurormukham

nityamudyatapāṇiḥ syātsādhvācāraḥ susaṃyataḥ /
āsyatāmiti coktaḥ sannāsītābhimukhaṃ guroḥ

pratiśravaṇasaṃbhāṣe śayāno na samācaret /
āsīno na ca bhuṃjāno na tiṣṭhenna parāṅmukhaḥ

nīcaiḥ śayyāsanaṃ cāsya sarvadā gurusannidhau /
gurostu cakṣurviṣayena yatheṣṭāsano bhavet

nodāharedasya nāma parokṣamapi kevalam /
na caivāsyānukurvīta gatibhāṣaṇaceṣṭitam

guroryatra parīvādo niṃdā vāpi pravartate /
karṇau tatra pidhātavyau gaṃtavyaṃ vā tato'nyataḥ

dūrastho nārcayedenaṃ na kruddho nāṃtike striyaḥ /
na caivāsyottaraṃ brūyātsthito nāsīta sannidhau

udakuṃbhaṃ kuśānpuṣpaṃ samidho'syāharetsadā /
mārjanaṃ lepanaṃ nityamaṃgānāṃ vai samācaret

nāsya nirmālyaśayanaṃ pādukopānahāvapi /
ākrāmedāsanaṃ cāsya cchāyādīnvā kadācana

sādhayeddaṃtakāṣṭhādīṃllabdhaṃ cāsmai nivedayet /
anāpṛcchya na gaṃtavyaṃ bhavetpriyahite rataḥ

na pādau sārayedasya sannidhāne kadācana /
jṛṃbhitaṃ hasitaṃ caiva kaṃṭhaprāvaraṇaṃ tathā

varjayetsannidhau nityamaṃgasphoṭanameva ca /
yathākālamadhīyīta yāvanna vimanā guruḥ

āsīno'dho guroḥ pārśve sevāṃ ca susamāhitaḥ /
āsane śayane yāne naiva tiṣṭhetkadācana

dhāvaṃtamanudhāveta gacchaṃtamanugacchati /
gośvoṣṭrayānaprāsāde tathādhoviṣṭareṣu ca

āsīta guruṇā sārddhaṃ śilāphalaka nauṣu ca /
jiteṃdriyaḥ syātsatataṃ vaśyātmākrodhanaḥ śuciḥ

prayuṃjīta sadā vācaṃ madhurāṃ hitakāriṇīm /
gaṃdhamālyaṃ rasaṃ kalpaṃ śuktiṃ prāṇivihiṃsanam

abhyaṃjanāṃjanonmarddacchatradhāraṇameva ca /
kāmaṃ lobhaṃ bhayaṃ nidrāṃ gītavāditranartanam

ātarjanaṃ parīvādaṃ strīprekṣālaṃbhanaṃ tathā /
paropaghātaṃ paiśunyaṃ prayatnena vivarjayet

udakuṃbhaṃ sumanaso gośakṛnmṛttikā kuśān /
āharedyāvadannāni bhaikṣyaṃ cāharahaścaret

ghṛtaṃ ca lavaṇaṃ sarvaṃ varjyaṃ paryuṣitaṃ ca yat /
anṛtyadarśī satataṃ bhavedgītādi nispṛhaḥ

nādityaṃ vai samīheta nācareddaṃtadhāvanam /
ekāṃtamaśucistrībhiḥ śūdrādyairabhibhāṣaṇam

gurūcchiṣṭaṃ bheṣajānnaṃ prayuṃjīta na kāmataḥ /
malāpakarṣaṇaṃ snānaṃ nācareddhi kadācana

na kuryānmānasaṃ vipro gurostyāge kathaṃcana /
mohādvā yadi vā lobhāttyaktvā tu patito bhavet

laukikaṃ vaidikaṃ vāpi tathādhyātmikameva vā /
ādadīta yato jñānaṃ taṃ na druhyetkadācana

gurorapyavaliptasya kāryākāryamajānataḥ /
utpathapratipannasya na manustyāgamabravīt

gurorgurau sannihite guruvadvṛttimācaret /
natvābhisṛṣṭo guruṇā svāngurūnabhivādayet

vidyāguruṣvetadevaṃ nityāvṛttiṣu yogiṣu /
pratiṣedhatsu cādharmāddhitaṃ copadiśatsu ca

śreyaḥ svaguruvadvṛttiṃ nityameva samācaret /
guruputreṣu dāreṣu guroścaiva svabaṃdhuṣu

bālaḥ saṃmānayenmānyāñchiṣṭo vā yadi karmmaṇi /
adhyāpayanguroḥ sūnuṃ guruvanmānamarhati

utsādanaṃ ca gātrāṇāṃ snāpanocchiṣṭabhojanaḥ /
na kuryādguruputrasya pādayoḥ śaucameva ca

guruvatpratipūjyāśca savarṇā guruyoṣitaḥ /
asavarṇāśca saṃpūjyāḥ pratyutthānābhivādanaiḥ

abhyaṃjanaṃ snāpanaṃ ca gātrotsādanameva ca /
gurupatnyā na kāryāṇi keśānāṃ ca prasādhanam

gurupatnī tu yuvatī nābhivādyā tu pādayoḥ /
kurvīta vaṃdanaṃ bhūmyāmasāvahamiti bruvan

viproṣya pādagrahaṇapūrvakaṃ cābhivādanam /
gurudāreṣu kurvīta satāṃ dharmmamanusmaran

mātṛṣvasā mātulānī śvaśrūścātha pitṛṣvasā /
saṃpūjyā gurupatnīvatsamāstā gurubhāryayā

bhrātṛbhāryāśca saṃgrāhyā savarṇā hanyahanyapi /
viproṣya tūpasaṃgrāhyā jñātisaṃbaṃdhiyoṣitaḥ

piturbhaginyā mātuśca jāyasyāṃ ca svasaryapi /
mātṛvadvṛttimātiṣṭhenmātā tābhyo garīyasī

evamācārasaṃpannamātmavaṃtamadāṃbhikam /
vedamadhyāpayeddharmmaṃ purāṇāṃgāni nityaśaḥ

saṃvatsaroṣite śiṣye gururjñānamanirdiśan /
harate duṣkṛtaṃ tasya śiṣyasya vasato guruḥ

ācāryaputraḥ śuśrūṣurjñānado dhārmikaḥ śuciḥ /
śaktonnadoṃbudaḥ sādhuradhyāpyādaśa dharmataḥ

kṛtakaṃṭhastathā'drohaḥ medhāvī gurukṛnnaraḥ /
āptaḥ priyo'tha vidhivatṣaḍadhyāpyā dvijātayaḥ

eteṣu brāhmaṇe dānamanyatra tu yathocitam /
ācamya saṃyato nityamadhīyīta udaṅmukhaḥ

upasaṃgṛhya tatpādau vīkṣyamāṇo gurormukham /
adhīṣva bho iti brūyādvirāmo'stviti cā'ramet

prākkūlānparyupāsīta pavitraiścaiva pāvakaḥ /
prāṇāyāmaistribhiḥ pūtastatoṃkāramarhati

brāhmaṇaḥ praṇavaṃ kuryādaṃte'pi vidhivaddvijāḥ /
kuryādadhyāpanaṃ nityaṃ sabrahmāṃjalipūrvataḥ

sarveṣāmeva bhūtānāṃ vedaścakṣuḥ sanātanaḥ /
adhīyītāpyayaṃ nityaṃ brāhmaṇyāddhīyate'nyathā

adhīyīta ṛco nityaṃ kṣīrāhutyā sadevatāḥ /
prīṇāti tarpayankālaṃ kāmairhūtāḥ sadaivatāḥ

yajūṃṣyadhīte niyataṃ dadhnā prīṇāti devatāḥ /
sāmānyadhīte prīṇāti ghṛtāhutibhiranvaham

atharvāṃgiraso nityaṃ madhvā prīṇāti devatāḥ /
dharmāṃgāni purāṇāni māṃsaistarpayatesurān

prātaśca sāyaṃ prayato naityakaṃ vidhimāśritaḥ /
gāyatrīṃ samadhīyīta gatvāraṇyaṃ samāhitaḥ

sahasraparamāṃ devīṃ śatamadhyāṃ daśāvarām /
gāyatrīṃ vai japennityaṃ japayajñaḥ prakīrtitaḥ

gāyatrīṃ caiva vedāṃśca tulayā tolayatprabhuḥ /
ekataścaturovedā gāyatrīṃ ca tathaikataḥ

ॐkāramāditaḥ kṛtvā vyāhṛtīstadanaṃtaram /
tato'dhīyīta sāvitrīmekāgraḥ śraddhayānvitaḥ

purākalpe samutpannā bhūrbhuvaḥ svaḥ sanātanāḥ /
mahāvyāhṛtayastisraḥ sarvāśubhanibarhaṇāḥ

pradhānaṃ puruṣaḥ kālo viṣṇubrahmamaheśvarāḥ /
satvaṃrajastamastisraḥ kramādvyāhṛtayaḥ smṛtāḥ

ॐkārastatparaṃ brahma sāvitrī syāttaduttaram /
eṣa maṃtro mahāyogaḥ sārātsāra udāhṛtaḥ

yo'dhīte'hanyahanyetāṃ gāyatrīṃ vedamātaram /
vijñāyārthaṃ brahmacārī sa yāti paramāṃ gatim

gāyatrī vedajananī gāyatrī lokapāvanī /
gāyatryā na paraṃ japyametadvijñāyamucyate

śrāvaṇasya tu māsasya paurṇamāsyāṃ dvijottamāḥ /
āṣāḍhyāṃ proṣṭhapadyāṃ vā vedopākaraṇaṃ smṛtam

yatsūryayāmyagamanaṃ māsānviprorddhapaṃcamān /
adhīyīta śucau deśe brahmacārī samāhitaḥ

puṣye tucchaṃdasāṃ kuryādbahirutsarjanaṃ dvijaḥ /
māsi śuklasya vā prāpte pūrvāhṇe prathame'hani

chadāṃsi ca dvijo'bhyasyecchuklapakṣe tu vai dvijaḥ /
vedāṃgāni purāṇāni kṛṣṇapakṣeṣu mānavaḥ

imānnityamanadhyāyānadhīyāno vivarjayet /
adhyāpanaṃ ca kurvāṇo'bhyasyannapi prayatnataḥ

karṇaśrave'nile rātrau divāpāṃsusamūhane /
vidyutstanitavarṣeṣu maholkānāṃ ca saṃplave

akālikamanadhyāyameteṣvāha prajāpatiḥ /
etānabhyudinānvidyādyadā prāduṣkṛtāgniṣu

tadā vidyādanadhyāyamanṛtau cābhradarśane /
nirghāte bhūmicalane jyotiṣāṃ copasarjane

etānakālikānvidyādanadhyāyānṛtāvapi /
prāduṣkṛteṣvagniṣu ca vidyutstanitanisvane

sajyotiḥ syādanadhyāyaḥ śeṣe rātrau yathā divā /
nityānadhyāya eva syādgrāmeṣu nagareṣu ca

dharmanaipuṇyakāmānāṃ pūtigaṃdhe ca nityaśaḥ /
aṃtaḥ śavagategrāme vṛṣalasya ca sannidhau

anadhyāyorudyamāne samaye jaladasya ca /
udake cārdharātre ca viṇmūtraṃ ca visarjayan

ucchiṣṭaḥ śrāddhabhukcaiva manasāpi na ciṃtayet /
pratigṛhya dvijo vidvānekoddiṣṭasya vetanam

tryahaṃ na kārayedbrahma rājño rāhośca sūtake /
yāvadekānnaniṣṭhā syātsnehālopaśca tiṣṭhati

viprasya viduṣo dehe tāvadbrahma na kīrtayet /
śayānaḥ prauḍhapādaśca kṛtvā caivāvasakthikām

nādhīyītāmiṣaṃ jagdhvā śūdraśrāddhānnameva ca /
nīhāre bāṇaśabde ca saṃdhyayorubhayorapi

amāvāsyā caturdaśyoḥ paurṇamāsyaṣṭamīṣu ca /
upākarmaṇi cotsarge trirātraṃ kṣapaṇaṃ smṛtam

aṣṭakāsu ahorātramṛtvaṃtāsu ca rātriṣu /
mārgaśīrṣe tathā pauṣe māghamāse tathaiva ca

tisro'ṣṭakāḥ samākhyātā kṛṣṇapakṣeṣu sūribhiḥ /
śleṣmātakasya cchāyāyāṃ śālmalermadhukasya ca

kadācidapi nādhyeyaṃ kovidārakapitthayoḥ /
samānavidye ca mṛte tathā sabrahmacāriṇi

ācārye saṃsthite cāpi trirātraṃ kṣapaṇaṃ smṛtam /
chidrāṇyetāni viprāṇāmanadhyāyāḥ prakīrtitāḥ

hiṃsaṃti rākṣasāsteṣu tasmādetānvivarjayet /
naityakenāstyanadhyāyaḥ saṃdhyopāsanameva ca

upākarmmaṇi homāṃte homamadhye tathaiva ca /
ekāmṛcamathaikaṃ vā yajuḥ sāmāni vā punaḥ

nāṣṭakādyāsvadhīyīta mārute cābhidhāvati /
anadhyāyastu nāṃgeṣu netihāsapurāṇayoḥ

na dharmaśāstreṣvanyeṣu sarvāṇyetāni varjayet /
eṣa dharmaḥ samāsena kīrtito brahmacāriṇaḥ

brahmaṇā'bhihitaḥ pūrvamṛṣīṇāṃ bhāvitātmanām /
yo'nyatra kurute yatnamanadhītya śrutiṃ dvijaḥ

sa saṃmūḍho na saṃbhāṣyo vedabāhyo dvijātibhiḥ /
na vedapāṭhamātreṇa saṃtuṣṭo vai bhaveddvijaḥ

pāṭhamātrāvasānastu paṃke gauriva sīdati /
yo'dhītya vidhivadvedaṃ vedārthaṃ na vicārayet

sa saṃmūḍhaḥ śūdrakalpaḥ pātratāṃ na prapadyate /
yaditvātyaṃtikaṃ vāsaṃ kartumicchati vai gurau

yuktaḥ paricaredenamāśarīravimokṣaṇam /
gatvā vanaṃ ca vidhivajjuhuyājjātavedasam

adhīyīta tathā nityaṃ brahmaniṣṭhaḥ samāhitaḥ /
sāvitrīṃ śatarudrīyaṃ vedāṃtāṃśca viśeṣataḥ /
abhyasetsatataṃ yukto bhikṣāśanaparāyaṇaḥ

etadvidhānaṃ paramaṃ purāṇaṃ vedāgame samyagihoditaṃ vaḥ /
purā maharṣipravarābhipṛṣṭaḥ svāyaṃbhuvo yanmanurāha devaḥ

iti śrīpādme mahāpurāṇe svargakhaṃḍe karmayogakathanaṃ nāma tripaṃcāśattamo'dhyāyaḥ