Padma Purana · Chapter 3.50

ṛṣaya ūcuḥ-
bhavatā kathitaṃ sarvaṃ yatkiṃcitpṛṣṭameva ca /
idānīmapi pṛcchāma ekaṃ vada mahāmate

eteṣāṃ khalu tīrthānāṃ sevanādyatphalaṃ labhet /
sarveṣāṃ kila kṛtvaikaṃ karma kena ca labhyate

etanno brūhi sarvajña karmaivaṃ yadi vartate /
sūta uvāca-
karmayogaḥ kila prokto varṇānāṃ dvijapūrvaśaḥ

nānāvidho mahābhāgāstatra caikaṃ viśiṣyate /
haribhaktiḥ kṛtā yena manasā vacasā girā

jitaṃ tena jitaṃ tena jitameva na saṃśayaḥ /
harireva samārādhyaḥ sarvadeveśvareśvaraḥ

harināmamahāmaṃtrairnaśyetpāpapiśācakam /
hareḥ pradakṣiṇaṃ kṛtvā sakṛdapyamalāśayāḥ

sarvatīrthasamāplāvaṃ labhaṃte yanna saṃśayaḥ /
pratimāṃ ca harerdṛṣṭvā sarvatīrthaphalaṃ labhet

viṣṇunāmaparaṃ japtvā sarvamaṃtraphalaṃ labhet /
viṣṇuprasādatulasīmāghrāya dvijasattamāḥ

pracaṃḍaṃ vikarālaṃ tadyamasyāsyaṃ na paśyati /
sakṛtpraṇāmī kṛṣṇasya mātuḥ stanyaṃ pibennahi

haripāde mano yeṣāṃ tebhyo nityaṃ namonamaḥ /
pulkasaḥ śvapaco vāpi ye cānye mlecchajātayaḥ

te'pi vaṃdyā mahābhāgā haripādaikasevakāḥ /
kiṃ punarbrāhmaṇāḥ puṇyā bhaktā rājarṣayastathā

harau bhaktiṃ vidhāyaiva garbhavāsaṃ na paśyati /
hareragre svanairuccairnṛtyaṃstannāmakṛnnaraḥ

punāti bhuvanaṃ viprā gaṃgādi salilaṃ yathā /
darśanātsparśanāttasya ālāpādapi bhaktitaḥ

brahmahatyādibhiḥ pāpairmucyate nātra saṃśayaḥ /
hareḥ pradakṣiṇaṃ kurvannuccaistannāmakṛnnaraḥ

karatālādisaṃdhānaṃ susvaraṃ kalaśabditam /
brahmahatyādikaṃ pāpaṃ tenaiva karatālitam

haribhaktikathāmuktvā khyāyikāṃ śṛṇuyācca yaḥ /
tasya saṃdarśanādeva pūto bhavati mānavaḥ

kiṃ punastasya pāpānāmāśaṃkā munipuṃgavāḥ /
tīrthānāṃ ca paraṃ tīrthaṃ kṛṣṇanāma maharṣayaḥ

tīrthīkurvaṃti jagatīṃ gṛhītaṃ kṛṣṇanāma yaiḥ /
tasmānmunivarāḥ puṇyaṃ nātaḥ parataraṃ viduḥ

viṣṇuprasādanirmālyaṃ bhuktvā dhṛtvā ca mastake /
viṣṇureva bhavenmartyo yamaśokavināśanaḥ

arcanīyo namaskāryo harireva na saṃśayaḥ /
ye mahāviṣṇumavyaktaṃ devaṃ vāpi maheśvaram

ekībhāvena paśyaṃti na teṣāṃ punarudbhavaḥ /
tasmādanādinidhanaṃ viṣṇumātmānamavyayam

hariṃ caikaṃ prapaśyadhvaṃ pūjayadhvaṃ tathaiva hi /
ye samānaṃ prapaśyaṃti hariṃ vai devatāṃtaram

te yāṃti narakānghorāṃnna tāṃstu gaṇayeddhīraḥ /
mūrkhaṃ vā paṃḍitaṃ vāpi brāhmaṇaṃ keśavapriyam

śvapākaṃ vā mocayati nārāyaṇaḥ svayaṃ prabhuḥ /
nārāyaṇātparo nāsti pāparāśi davānalaḥ

kṛtvāpi pātakaṃ ghoraṃ kṛṣṇanāmnā vimucyate /
svayaṃ nārāyaṇo devaḥ svanāmni jagatāṃ guruḥ

ātmano'bhyadhikāṃ śaktiṃ sthāpayāmāsa suvratāḥ /
atra ye vivadaṃte vai āyāsalaghudarśanāt

phalānāṃ gauravāccāpi te yāṃti narakaṃ bahu /
tasmāddharau bhaktimānsyāddharināmaparāyaṇaḥ

pūjakaṃ pṛṣṭhato rakṣennāminaṃ vakṣasi prabhuḥ /
harināmamahāvajraṃ pāpaparvatadāraṇe

tasya pādau tu saphalau tadarthaṃ gatiśālinau /
tāveva dhanyāvākhyātau yau tu pūjākarau karau

uttamāṃgamuttamāṃgaṃ taddharau namrameva yat /
sā jihvā yā hariṃ stauti tanmanastatpadānugam

tāni lomāni cocyaṃte yāni tannāmni cotthitam /
kurvaṃti tacca netrāṃbu yadacyutaprasaṃgataḥ

aho lokā atitarāṃ daivadoṣeṇa vaṃcitāḥ /
nāmoccāraṇamātreṇa muktidaṃ na bhajaṃti vai

vaṃcitāste ca kaluṣāḥ strīṇāṃ saṃgaprasaṃgataḥ /
pratiṣṭhaṃti ca lomāni yeṣāṃ no kṛṣṇaśabdane

te mūrkhā hyakṛtātmānaḥ putraśokādi vihvalāḥ /
rudaṃti bahulālāpairna kṛṣṇākṣarakīrtane

jihvāṃ labdhvāpi loke'sminkṛṣṇanāmajapennahi /
labdhvāpi muktisopānaṃ helayaiva cyavaṃti te

tasmādyatnena vai viṣṇuṃ karmayogena mānavaḥ /
karmayogārccito viṣṇuḥ prasīdatyeva nānyathā

tīrthādapyadhikaṃ tīrthaṃ viṣṇorbhajanamucyate /
sarveṣāṃ khalu tīrthānāṃ snānapānāvagāhanaiḥ

yatphalaṃ labhate martyastatphalaṃ kṛṣṇasevanāt /
yajaṃte karmayogena dhanyā eva narā harim

tasmādbhajadhvaṃ munayaḥ kṛṣṇaṃ paramamaṃgalam

iti śrīpādme mahāpurāṇe svargakhaṃḍe viṣṇubhaktipraśaṃsanaṃ nāma paṃcāśattamo'dhyāyaḥ