Padma Purana · Chapter 3.40

sūta uvāca-
evamuktāni tīrthāni viṣṇudehāni suvratāḥ /
eṣāmanyatamā saṃgānmukto bhavati mānavaḥ

tīrthānuśravaṇaṃ dhanyaṃ dhanyaṃ tīrthaniṣevaṇam /
pāparāśinipātāya nānyopāyaḥ kalauyuge

vāsaṃ kuryāmahaṃ tīrthe tīrthasparśamahaṃ tathā /
evaṃ yo'nudinaṃ brūte sa yāti paramaṃ mahat

pāpāni tasya naśyaṃti tīrthālāpanamātrataḥ /
tīrthāni khalu dhanyāni dhanyasevyāni suvratāḥ

tīrthānāṃ sevanādeva sevito bhavati prabhuḥ /
nārāyaṇo jagatkartā nāsti tīrthātparaṃ padam

brāhmaṇastulasī caiva aśvatthastīrthasaṃcayaḥ /
viṣṇuśca parameśānaḥ sevya eva sadā nṛbhiḥ

brāhmaṇānāṃ viśeṣeṇa sevanaṃ munipuṃgavāḥ /
sarvatīrthāvagāhāderadhikaṃ viduragrajāḥ

tasmāddvijapadaṃ sākṣātsarvatīrthamayaṃ śubham /
bhajetānudinaṃ vidvāṃstatra tīrthādhikaṃ bhavet

aśvatthasya tulasyāśca gavāṃ kuryātpradakṣiṇam /
sarvatīrthaphalaṃprāpya viṣṇuloke mahīyate

tasmādduṣkṛtakarmāṇi nāśayettīrthasevanāt /
anyathā narakaṃ yāti karmmabhogāddhi śāmyati

pāpināṃ narake vāsaḥ sukṛtī svargamaśnute /
tasmātpuṇyaṃ niṣeveta tīrthaṃ khalu vicakṣaṇaḥ

ṛṣaya ūcuḥ-
śrutāni kila tīrthāni samāhātmyāni suvrata /
idānīṃ śrotumicchāmaḥ prayāgasya viśeṣakam

prayāgaṃ tu purā proktaṃ saṃkṣepātsūta yattvayā /
viśeṣācchrotumicchāmaḥ sūta naḥ kathyatāmiti

sūta uvāca-
sādhu pṛṣṭaṃ mahābhāgāḥ prayāgaṃ prati suvratāḥ /
haṃtāhaṃ tatpravakṣyāmi prayāgasyopavarṇanam

mārkaṃḍeyena kathitaṃ yatpurā pāṃḍusūnave /
bhārate tu yadā vṛtte prāptarājye pṛthāsute

etasminnaṃtare rājā kuṃtīputro yudhiṣṭhiraḥ /
bhrātṛśokena saṃtaptaḥ ciṃtayaṃstu punaḥ punaḥ

āsīdduryodhano rājā ekādaśacamūpatiḥ /
asmānsaṃtapya bahuśaḥ sarve te nidhanaṃ gatāḥ

vāsudevaṃ samāśritya paṃcaśeṣāstu pāṃḍavāḥ /
kathaṃ droṇaṃ ca bhīṣmaṃ ca karṇaṃ caiva mahābalam

duryodhanaṃ ca rājānaṃ bhrātṛputrasamanvitam /
rājāno nihatāḥ sarve ye cānye śūramāninaḥ

vinā rājyena kartavyaṃ kiṃ bhogairjīvitenavā /
dhikkaṣṭamiti saṃciṃtya rājā vihvalatāṃ gataḥ

niśceṣṭo'tha nirutsāhaḥ kiṃ cittiṣṭhatyadhomukhaḥ /
labdhasaṃjño yadā rājā ciṃtayānaḥ punaḥ punaḥ

kaṃ care vidhinā yogaṃ niyamaṃ tīrthameva vā /
yenāhaṃ śīghramāmucye mahāpātakakilbiṣāt

yatra snātvā naro yāti viṣṇulokamanuttamam /
kathaṃ pṛcchāmi vai kṛṣṇaṃ yenedaṃ kāritaṃ mahat

dhṛtarāṣṭraṃ kathaṃ pṛcche yasya putraśataṃ hatam /
vyāsaṃ kathamahaṃ pṛcche yasya gotrakṣayaḥ kṛtaḥ

evaṃ vaiklavyamāpanno dharmaputro yudhiṣṭhiraḥ /
rudaṃtaḥ pāṃḍavāḥ sarve bhrātṛśokapariplutāḥ

ye ca tatra mahātmānaḥ sametāḥ pāṃḍavāśritāḥ /
kuṃtī ca draupadī caiva ye ca tatra samāgatāḥ

bhūmau nipatitāḥ sarve rodamānāḥ samaṃtataḥ /
vārāṇasyāṃ tu mārkaṃḍastena jñāto yudhiṣṭharaḥ

yathāviklavamāpanno rodamānaḥ suduḥkhitaḥ /
acireṇaiva kālena mārkaṃḍastu mahātapāḥ

hastināpura saṃprāpto rājadvāre sa tiṣṭhati /
dvārapālo'pi taṃ dṛṣṭvā rājñaḥ kathitavāndrutam

tvāṃ draṣṭukāmo mārkaṃḍo dvāre tiṣṭhatyasau muniḥ /
tvarito dharmaputrastu dvārametyāha tatparaḥ

yudhiṣṭhira uvāca-
svāgataṃ te mahāprājña svāgataṃ te mahāmune /
adya me saphalaṃ janma adya me pāvitaṃ kulam

adya me pitarastṛptāstvayi dṛṣṭe mahāmune /
siṃhāsana upasthāpya pādaśaucārcanādibhiḥ

yudhiṣṭhiro mahātmā vai pūjayāmāsa taṃ munim /
tatastamūce mārkaṇḍaḥ pūjito'haṃ tvayā vibho

ākhyāhi tvarito rājankimarthaṃ tvaritaṃ tvayā /
kena vā viklavībhūtaḥ kathayasva mamāgrataḥ

yudhiṣṭhira uvāca-
asmākaṃ caiva yadvṛttaṃ rājyasyārthe mahāmune /
etatsarvaṃ viditvā tu bhagavāniha cāgataḥ

mārkaṃḍeya uvāca-
śṛṇu rājanmahābāho yatra dharmo vyavasthitaḥ /
naiva dṛṣṭaṃ raṇe pāpaṃ yudhyamānasya dhīmataḥ

kiṃ punā rājadharmeṇa kṣatriyasya viśeṣataḥ /
tadevaṃ hṛdaye kṛtvā tasmātpāpaṃ na ciṃtayet

tato yudhiṣṭhiro rājā praṇamya śirasā munim /
pṛcchāmi tvāṃ muniśreṣṭha sadā traikālyadarśanam /
kathayasva samāsena mucye'haṃ yena kilbiṣāt

mārkaṃḍeya uvāca-
śṛṇu rājanmahābhāga yanmāṃ pṛcchasi bhārata /
evaṃ sāṃkhyaṃ ca yogaṃ ca tīrthaṃ caiva yudhiṣṭhira

kiṃ punarbrāhmaṇaiḥ puṇyaiḥ kīrtitaṃ vai purā vibho /
prayāgagamanaṃ śreṣṭhaṃ narāṇāṃ puṇyakarmaṇām

iti śrīpādme mahāpurāṇe svargakhaṃḍe catvāriṃśo'dhyāyaḥ