Padma Purana · Chapter 3.4

ṛṣaya ūcuḥ-/
merorathottaraṃ paścātpūrvamācakṣva sūtataḥ /
nikhilena mahābuddha mālyavaṃtaṃ ca parvatam

sūta uvāca-/
dakṣiṇena tu nīlasya meroḥ pārśve tathottare /
uttarāḥ kuravo viprāḥ puṇyāḥ siddhaniṣevitāḥ

tatra vṛkṣā madhuphalā nityapuṣpaphalopagāḥ /
puṣpāṇi ca sugaṃdhīni rasavaṃti phalāni ca

sarvakāmaphalāstatra kecidvṛtyā dvijottamāḥ /
apare kṣīriṇo nāma vṛkṣāstatra dvijottamāḥ

prakṣaraṃti sadā kṣīraṃ tatra sarve'mṛtopamam /
vastrāṇi ca prasūyaṃte phaleṣvābharaṇāni ca

sarvā maṇimayī bhūmiḥ sūkṣmakāṃcanavālukā /
sarvartusukhasaṃsparśā niṣphalāśca tapodhanāḥ

devalokacyutāḥ sarve jāyaṃte tatra mānavāḥ /
śuklābhijanasaṃpannāḥ sarvasupriyadarśanāḥ

mithunāni ca jāyaṃte striyaścāpsarasopamāḥ /
teṣāṃ te kṣīriṇāṃ kṣīraṃ pibaṃtyamṛtasaṃnibham

mithunaṃ jāyate kāle samaṃtācca pravarddhate /
tulyarūpaguṇopetaṃ samaveśaṃ tathaiva ca

ekamevānurūpaṃ ca cakravākasamaṃ dvijāḥ /
nirāmayāśca te lokā nityaṃ muditamānasāḥ

daśavarṣasahasrāṇi daśavarṣaśatāni ca /
jīvaṃti te mahābhāgā na cānyonyaṃ jahatyuta

bhāruṃḍā nāma śakunāstīkṣṇatuṃḍā mahābalāḥ /
tānnirharaṃtīhamṛtāndarīṣu prakṣipaṃti ca

uttarāḥkuravo viprā vyākhyātāste samāsataḥ /
merupārśvamahaṃ pūrvaṃ pravakṣyāmi yathātatham

tasya mūrddhābhiṣekastu bhadrāśvasya tapodhanāḥ /
bhadraśālavanaṃ yatra kālāmrāśca mahādrumāḥ

kālāmrāstu mahābhāgā nityaṃpuṣpaphalāḥ śubhāḥ /
drumāśca yojanotsedhāḥ siddhacāraṇasevitāḥ

tatra te puruṣāḥ śvetāstejoyuktamahābalāḥ /
striyaḥ kumudavarṇāśca suṃdaryaḥ priyadarśanāḥ

caṃdravarṇāścaturvarṇāḥ pūrṇacaṃdranibhānanāḥ /
caṃdraśītalagātrāśca nṛtyagītaviśāradāḥ

daśavarṣasahasrāṇi tatrāyurdvijasattamāḥ /
kālāmrarasapītāste nityaṃ saṃsthitayauvanāḥ

dakṣiṇena tu nīlasya niṣadhasyottareṇa tu /
sudarśano nāma mahānjaṃbūvṛkṣaḥ sanātanaḥ

sarvakāmaphalaḥ puṇyaḥ siddhacāraṇasevitaḥ /
tasya nāmnā samākhyāto jaṃbūdvīpaḥ sanātanaḥ

yojanānāṃ sahasraṃ ca śataṃ ca dvijasattamāḥ /
tathā mālyavataḥ śṛṃge pūrve pūrvānugāṃtakāḥ

yojanānāṃ sahasrāṇi paṃcāśanmālyavāndvijāḥ /
mahārajatasaṃkāśā jāyaṃte tatra mānavāḥ

brahmalokacyutāḥ sarve sarve ca brahmavādinaḥ /
tapastapyaṃti te divyaṃ bhavaṃti hyūrdhvaretasaḥ

rakṣaṇārthaṃ tu bhūtānāṃ praviśaṃti divākaram /
ṣaṣṭistāni sahasrāṇi ṣaṣṭireva śatāni ca

aruṇasyāgrato yāṃti parivārya divākaram /
ṣaṣṭivarṣasahasrāṇi ṣaṣṭireva śatāni ca

ādityatāpataptāste viśaṃti śaśimaṃḍalam

iti śrīpādme mahāpurāṇe svargakhaṃḍe caturtho'dhyāyaḥ