પદ્મ પુરાણ · અધ્યાય 3.4

ઋષય ઊચુઃ-।
મેરોરથોત્તરં પશ્ચાત્પૂર્વમાચક્ષ્વ સૂતતઃ ।
નિખિલેન મહાબુદ્ધ માલ્યવંતં ચ પર્વતમ્

સૂત ઉવાચ-।
દક્ષિણેન તુ નીલસ્ય મેરોઃ પાર્શ્વે તથોત્તરે ।
ઉત્તરાઃ કુરવો વિપ્રાઃ પુણ્યાઃ સિદ્ધનિષેવિતાઃ

તત્ર વૃક્ષા મધુફલા નિત્યપુષ્પફલોપગાઃ ।
પુષ્પાણિ ચ સુગંધીનિ રસવંતિ ફલાનિ ચ

સર્વકામફલાસ્તત્ર કેચિદ્વૃત્યા દ્વિજોત્તમાઃ ।
અપરે ક્ષીરિણો નામ વૃક્ષાસ્તત્ર દ્વિજોત્તમાઃ

પ્રક્ષરંતિ સદા ક્ષીરં તત્ર સર્વેઽમૃતોપમમ્ ।
વસ્ત્રાણિ ચ પ્રસૂયંતે ફલેષ્વાભરણાનિ ચ

સર્વા મણિમયી ભૂમિઃ સૂક્ષ્મકાંચનવાલુકા ।
સર્વર્તુસુખસંસ્પર્શા નિષ્ફલાશ્ચ તપોધનાઃ

દેવલોકચ્યુતાઃ સર્વે જાયંતે તત્ર માનવાઃ ।
શુક્લાભિજનસંપન્નાઃ સર્વસુપ્રિયદર્શનાઃ

મિથુનાનિ ચ જાયંતે સ્ત્રિયશ્ચાપ્સરસોપમાઃ ।
તેષાં તે ક્ષીરિણાં ક્ષીરં પિબંત્યમૃતસંનિભમ્

મિથુનં જાયતે કાલે સમંતાચ્ચ પ્રવર્દ્ધતે ।
તુલ્યરૂપગુણોપેતં સમવેશં તથૈવ ચ

એકમેવાનુરૂપં ચ ચક્રવાકસમં દ્વિજાઃ ।
નિરામયાશ્ચ તે લોકા નિત્યં મુદિતમાનસાઃ

દશવર્ષસહસ્રાણિ દશવર્ષશતાનિ ચ ।
જીવંતિ તે મહાભાગા ન ચાન્યોન્યં જહત્યુત

ભારુંડા નામ શકુનાસ્તીક્ષ્ણતુંડા મહાબલાઃ ।
તાન્નિર્હરંતીહમૃતાન્દરીષુ પ્રક્ષિપંતિ ચ

ઉત્તરાઃકુરવો વિપ્રા વ્યાખ્યાતાસ્તે સમાસતઃ ।
મેરુપાર્શ્વમહં પૂર્વં પ્રવક્ષ્યામિ યથાતથમ્

તસ્ય મૂર્દ્ધાભિષેકસ્તુ ભદ્રાશ્વસ્ય તપોધનાઃ ।
ભદ્રશાલવનં યત્ર કાલામ્રાશ્ચ મહાદ્રુમાઃ

કાલામ્રાસ્તુ મહાભાગા નિત્યંપુષ્પફલાઃ શુભાઃ ।
દ્રુમાશ્ચ યોજનોત્સેધાઃ સિદ્ધચારણસેવિતાઃ

તત્ર તે પુરુષાઃ શ્વેતાસ્તેજોયુક્તમહાબલાઃ ।
સ્ત્રિયઃ કુમુદવર્ણાશ્ચ સુંદર્યઃ પ્રિયદર્શનાઃ

ચંદ્રવર્ણાશ્ચતુર્વર્ણાઃ પૂર્ણચંદ્રનિભાનનાઃ ।
ચંદ્રશીતલગાત્રાશ્ચ નૃત્યગીતવિશારદાઃ

દશવર્ષસહસ્રાણિ તત્રાયુર્દ્વિજસત્તમાઃ ।
કાલામ્રરસપીતાસ્તે નિત્યં સંસ્થિતયૌવનાઃ

દક્ષિણેન તુ નીલસ્ય નિષધસ્યોત્તરેણ તુ ।
સુદર્શનો નામ મહાન્જંબૂવૃક્ષઃ સનાતનઃ

સર્વકામફલઃ પુણ્યઃ સિદ્ધચારણસેવિતઃ ।
તસ્ય નામ્ના સમાખ્યાતો જંબૂદ્વીપઃ સનાતનઃ

યોજનાનાં સહસ્રં ચ શતં ચ દ્વિજસત્તમાઃ ।
તથા માલ્યવતઃ શૃંગે પૂર્વે પૂર્વાનુગાંતકાઃ

યોજનાનાં સહસ્રાણિ પંચાશન્માલ્યવાન્દ્વિજાઃ ।
મહારજતસંકાશા જાયંતે તત્ર માનવાઃ

બ્રહ્મલોકચ્યુતાઃ સર્વે સર્વે ચ બ્રહ્મવાદિનઃ ।
તપસ્તપ્યંતિ તે દિવ્યં ભવંતિ હ્યૂર્ધ્વરેતસઃ

રક્ષણાર્થં તુ ભૂતાનાં પ્રવિશંતિ દિવાકરમ્ ।
ષષ્ટિસ્તાનિ સહસ્રાણિ ષષ્ટિરેવ શતાનિ ચ

અરુણસ્યાગ્રતો યાંતિ પરિવાર્ય દિવાકરમ્ ।
ષષ્ટિવર્ષસહસ્રાણિ ષષ્ટિરેવ શતાનિ ચ

આદિત્યતાપતપ્તાસ્તે વિશંતિ શશિમંડલમ્

ઇતિ શ્રીપાદ્મે મહાપુરાણે સ્વર્ગખંડે ચતુર્થોઽધ્યાયઃ