Padma Purana · Chapter 3.34

nārada uvāca-
tatredaṃ vimalaṃ ligamoṃkāraṃnāma śobhanam /
yasya smaraṇamātreṇa mucyate sarvapātakaiḥ

etatparataraṃ jñānaṃ paṃcāyatanamuttamam /
sevitaṃ munirbhirnityaṃ vārāṇasyāṃ vimokṣaṇam

tatra sākṣānmahādevaḥ paṃcāyatanavigrahaḥ /
ramate bhagavānrudro jaṃtūnāmapavargadaḥ

etatpāśupataṃ jñānaṃ paṃcāyatanamucyate /
tadetadvimalaṃ ligamoṃkāraṃ samupasthitam

śāṃtyatītā tathā śāṃtirvidyā caivāparā varā /
pratiṣṭhā ca nivṛttiśca paṃcātmaṃ liṃgamaiśvaram

paṃcānāmapi liṃgānāṃ brahmādīnāṃ samāśrayam /
ॐkārabodhakaṃ liṃgaṃ paṃcāyatanamucyate

saṃsmaredīśvaraṃ liṃgaṃ paṃcāyatanamavyayam /
dehāṃte paramaṃ jyotirānaṃdaṃ viśate budhaḥ

tatra devarṣayaḥ pūrvaṃ siddhābrahmarṣayastathā /
upāsya devamīśānamāpuraṃtaḥ paraṃ padam

matsyodaryāstaṭe puṇye sthānaṃ guhyatamaṃ śubham /
gocarmamātraṃ rājeṃdra ॐkāreśvaramuttamam

kṛttivāseśvaraṃ liṃgaṃ madhyameśvaramuttamam /
viśveśvaraṃ tathoṃkāraṃkaṃdarpeśvarameva ca

etāni guhyaliṃgāni vārāṇasyāṃ yudhiṣṭhira /
na kaścidiha jānāti vinā śaṃbhoranugrahāt

kṛttivāseśvarasyaiva māhātmyaṃ śṛṇu pārthiva /
tasminsthāne purā daityo hastī bhūtvā śivāṃtikam

brāhmaṇānhaṃtumāyāto yatra nityamupāsate /
teṣāṃ liṃgānmahādevaḥ prādurāsīttrilocanaḥ

rakṣaṇārthaṃ mahādevo bhaktānāṃ bhaktavatsalaḥ /
hatvā gajākṛtiṃ daityaṃ śūlenāvajñayā haraḥ

vāsastasyākarotkṛttiṃ kṛttivāseśvarastataḥ /
tatra siddhiṃ parāṃ prāptā munayo hi yudhiṣṭhira

tenaiva ca śarīreṇa prāptāstatparamaṃ padam /
vidyāvidyeśvarā rudrāḥ śivā ye ca prakīrttitāḥ

kṛttivāseśvaraṃ liṃgaṃ nityamāśritya saṃsthitāḥ /
jñātvā kaliyugaṃ ghoramadharmabahulaṃ janāḥ

kṛttivāsaṃ na muṃcaṃti kṛtārthāste na saṃśayaḥ /
janmāṃtarasahasreṇa mokṣo yatrāpyate na vā

ekena janmanā mokṣaḥ kṛttivāse'tra labhyate /
ālayaṃ sarvasiddhānāmetatsthānaṃ vadaṃti hi

gopitaṃ devadevena mahādevena śaṃbhunā /
yugeyuge hyatra dāṃtā brāhmaṇā vedapāragāḥ

upāsaṃte mahātmānaṃ japaṃti śatarudriyam /
stuvaṃti satataṃ devaṃ tryaṃbakaṃ kṛttivāsasam /
dhyāyaṃti hṛdaye devaṃ sthāṇuṃ sarvāṃtaraṃ śivam

gāyaṃti siddhāḥ kila gītakāni vārāṇasīṃ ye nivasaṃti viprāḥ /
teṣāmathaikena bhavedvimuktirye kṛttivāsaṃ śaraṇaṃ prapannāḥ

saṃprāpya loke jagatāmabhīṣṭaṃ sudurlabhaṃ viprakuleṣu janma /
dhyāne samādhāya japaṃti rudraṃ dhyāyaṃti citte yatayo maheśam

ārādhayaṃti prabhumīśitāraṃ vārāṇasīmadhyagatā munīṃdrāḥ /
yajaṃti yajñairabhisaṃdhihīnāḥ stuvaṃti rudraṃ praṇamaṃti śaṃbhum

namo bhavāyāmalayogadhāmne sthāṇuṃ prapadye giriśaṃ purāṇam /
smarāmi rudraṃ hṛdaye niviṣṭaṃ jāne mahādevamanekarūpam

iti śrīpādme mahāpurāṇe svargakhaṃḍe catustriṃśo'dhyāyaḥ