પદ્મ પુરાણ · અધ્યાય 3.34

નારદ ઉવાચ-
તત્રેદં વિમલં લિગમોંકારંનામ શોભનમ્ ।
યસ્ય સ્મરણમાત્રેણ મુચ્યતે સર્વપાતકૈઃ

એતત્પરતરં જ્ઞાનં પંચાયતનમુત્તમમ્ ।
સેવિતં મુનિર્ભિર્નિત્યં વારાણસ્યાં વિમોક્ષણમ્

તત્ર સાક્ષાન્મહાદેવઃ પંચાયતનવિગ્રહઃ ।
રમતે ભગવાન્રુદ્રો જંતૂનામપવર્ગદઃ

એતત્પાશુપતં જ્ઞાનં પંચાયતનમુચ્યતે ।
તદેતદ્વિમલં લિગમોંકારં સમુપસ્થિતમ્

શાંત્યતીતા તથા શાંતિર્વિદ્યા ચૈવાપરા વરા ।
પ્રતિષ્ઠા ચ નિવૃત્તિશ્ચ પંચાત્મં લિંગમૈશ્વરમ્

પંચાનામપિ લિંગાનાં બ્રહ્માદીનાં સમાશ્રયમ્ ।
ૐકારબોધકં લિંગં પંચાયતનમુચ્યતે

સંસ્મરેદીશ્વરં લિંગં પંચાયતનમવ્યયમ્ ।
દેહાંતે પરમં જ્યોતિરાનંદં વિશતે બુધઃ

તત્ર દેવર્ષયઃ પૂર્વં સિદ્ધાબ્રહ્મર્ષયસ્તથા ।
ઉપાસ્ય દેવમીશાનમાપુરંતઃ પરં પદમ્

મત્સ્યોદર્યાસ્તટે પુણ્યે સ્થાનં ગુહ્યતમં શુભમ્ ।
ગોચર્મમાત્રં રાજેંદ્ર ૐકારેશ્વરમુત્તમમ્

કૃત્તિવાસેશ્વરં લિંગં મધ્યમેશ્વરમુત્તમમ્ ।
વિશ્વેશ્વરં તથોંકારંકંદર્પેશ્વરમેવ ચ

એતાનિ ગુહ્યલિંગાનિ વારાણસ્યાં યુધિષ્ઠિર ।
ન કશ્ચિદિહ જાનાતિ વિના શંભોરનુગ્રહાત્

કૃત્તિવાસેશ્વરસ્યૈવ માહાત્મ્યં શૃણુ પાર્થિવ ।
તસ્મિન્સ્થાને પુરા દૈત્યો હસ્તી ભૂત્વા શિવાંતિકમ્

બ્રાહ્મણાન્હંતુમાયાતો યત્ર નિત્યમુપાસતે ।
તેષાં લિંગાન્મહાદેવઃ પ્રાદુરાસીત્ત્રિલોચનઃ

રક્ષણાર્થં મહાદેવો ભક્તાનાં ભક્તવત્સલઃ ।
હત્વા ગજાકૃતિં દૈત્યં શૂલેનાવજ્ઞયા હરઃ

વાસસ્તસ્યાકરોત્કૃત્તિં કૃત્તિવાસેશ્વરસ્તતઃ ।
તત્ર સિદ્ધિં પરાં પ્રાપ્તા મુનયો હિ યુધિષ્ઠિર

તેનૈવ ચ શરીરેણ પ્રાપ્તાસ્તત્પરમં પદમ્ ।
વિદ્યાવિદ્યેશ્વરા રુદ્રાઃ શિવા યે ચ પ્રકીર્ત્તિતાઃ

કૃત્તિવાસેશ્વરં લિંગં નિત્યમાશ્રિત્ય સંસ્થિતાઃ ।
જ્ઞાત્વા કલિયુગં ઘોરમધર્મબહુલં જનાઃ

કૃત્તિવાસં ન મુંચંતિ કૃતાર્થાસ્તે ન સંશયઃ ।
જન્માંતરસહસ્રેણ મોક્ષો યત્રાપ્યતે ન વા

એકેન જન્મના મોક્ષઃ કૃત્તિવાસેઽત્ર લભ્યતે ।
આલયં સર્વસિદ્ધાનામેતત્સ્થાનં વદંતિ હિ

ગોપિતં દેવદેવેન મહાદેવેન શંભુના ।
યુગેયુગે હ્યત્ર દાંતા બ્રાહ્મણા વેદપારગાઃ

ઉપાસંતે મહાત્માનં જપંતિ શતરુદ્રિયમ્ ।
સ્તુવંતિ સતતં દેવં ત્ર્યંબકં કૃત્તિવાસસમ્ ।
ધ્યાયંતિ હૃદયે દેવં સ્થાણું સર્વાંતરં શિવમ્

ગાયંતિ સિદ્ધાઃ કિલ ગીતકાનિ વારાણસીં યે નિવસંતિ વિપ્રાઃ ।
તેષામથૈકેન ભવેદ્વિમુક્તિર્યે કૃત્તિવાસં શરણં પ્રપન્નાઃ

સંપ્રાપ્ય લોકે જગતામભીષ્ટં સુદુર્લભં વિપ્રકુલેષુ જન્મ ।
ધ્યાને સમાધાય જપંતિ રુદ્રં ધ્યાયંતિ ચિત્તે યતયો મહેશમ્

આરાધયંતિ પ્રભુમીશિતારં વારાણસીમધ્યગતા મુનીંદ્રાઃ ।
યજંતિ યજ્ઞૈરભિસંધિહીનાઃ સ્તુવંતિ રુદ્રં પ્રણમંતિ શંભુમ્

નમો ભવાયામલયોગધામ્ને સ્થાણું પ્રપદ્યે ગિરિશં પુરાણમ્ ।
સ્મરામિ રુદ્રં હૃદયે નિવિષ્ટં જાને મહાદેવમનેકરૂપમ્

ઇતિ શ્રીપાદ્મે મહાપુરાણે સ્વર્ગખંડે ચતુસ્ત્રિંશોઽધ્યાયઃ