Padma Purana · Chapter 3.32

nāradauvāca-
tato gaccheta rājeṃdra sugaṃdhaṃlokaviśrutam /
sarvapāpaviśuddhātmā brahmaloke mahīyate

rudrāvartaṃ tato gacchettīrthasevī narādhipa /
tatra snātvā naro rājansvargaloke mahīyate

gaṃgāyāśca naraśreṣṭha sarasvatyāśca saṃgame /
snāto'śvamedhamāpnoti svargalokaṃ ca gacchati

tatra karṇahrade snātvā devamabhyarcya śaṃkaram /
na durgatimavāpnoti svargalokaṃ ca gacchati

tataḥ kubjāmrakaṃ gacchettīrthasevī yathākramam /
gosahasramavāpnoti svargalokaṃ ca gacchati

aruṃdhatīvaṭaṃ gacchettīrthasevī narādhipa /
sāmudrakamupaspṛśya trirātropoṣito naraḥ

gosahasraphalaṃ viṃdyātsvargalokaṃ ca gacchati /
brahmāvarttaṃ tato gacchedbrahmacārī samāhitaḥ

aśvamedhamavāpnoti svargalokaṃ ca gacchati /
yamunāprabhavaṃ gacchetsamupaspṛśya yāmunam

aśvamedhaphalaṃ labdhvā brahmaloke mahīyate /
darvīsaṃkramaṇaṃ prāpya tīrthaṃ trailokyaviśrutam

aśvamedhamavāpnoti svargalokaṃ ca gacchati /
siṃdhośca prabhavaṃ gatvā siddhagaṃdharvasevitam

tatroṣya rajanīḥ paṃca dadyādbahusuvarṇakam /
atha devīṃ samāsādya naraḥ paramadurgamām

aśvamedhamavāpnoti gaccheccauśanasīṃ gatim /
ṛṣikulyāṃ samāsādya vasiṣṭhaṃ caiva bhārata

vasiṣṭhaṃ samatikramya sarve varṇā dvijātayaḥ /
ṛṣikulyāṃ naraḥ snātvā ṛṣilokaṃ prapadyate

yadi tatra vasenmāsaṃ śākāhāro narādhipa /
bhṛgutuṃgaṃ samāsādya vājimedhaphalaṃ labhet

gatvā vīrapramokṣaṃ ca sarvapāpaiḥ pramucyate /
kārtikamāghayoścaiva tīrthamāsādya durlabham

agniṣṭomātirātrābhyāṃ phalaṃ prāpnoti puṇyakṛt /
tataḥ saṃdhyāṃ samāsādya vidyātīrthamanuttamam

upaspṛśetsa vidyānāṃ sarvāsāṃ pārago bhavet /
mahāśrame vasedrātriṃ sarvapāpapramocane

ekakālaṃ nirāhāro lokānsaṃvasate śubhān /
ṣaṣṭhakālopavāsena māsamuṣya mahālaye

tīrṇastārayate jaṃtūndaśapūrvāndaśāparān /
dṛṣṭvā māheśvaraṃ puṇyaṃ paraṃ suranamaskṛtam

kṛtārthaḥ sarvakṛtyeṣu na śocenmaraṇaṃ kvacit /
sarvapāpaviśuddhātmā viṃdyādbahusuvarṇakam

atha vetasikāṃ gacchetpitāmahaniṣevitām /
aśvamedhamavāpnoti gatiṃ ca paramāṃ vrajet

atha suṃdarikāṃ tīrthaṃ prāpya siddhaniṣevitām /
rūpasya bhāgī bhavati dṛṣṭametatpurātanaiḥ

tato brāhmaṇikāṃ gatvā brahmacārī samāhitaḥ /
padmavarṇena yānena brahmalokaṃ prapadyate

tataśca naimiṣaṃ gacchetpuṇyaṃ dvijaniṣevitam /
tatra nityaṃ nivasati brahmā devagaṇaiḥ saha

naimiṣaṃ prārthayānasya pāpasyārddhaṃ praṇaśyati /
praviṣṭamānastu naraḥ sarvapāpātpramucyate