પદ્મ પુરાણ · અધ્યાય 3.32

નારદૌવાચ-
તતો ગચ્છેત રાજેંદ્ર સુગંધંલોકવિશ્રુતમ્ ।
સર્વપાપવિશુદ્ધાત્મા બ્રહ્મલોકે મહીયતે

રુદ્રાવર્તં તતો ગચ્છેત્તીર્થસેવી નરાધિપ ।
તત્ર સ્નાત્વા નરો રાજન્સ્વર્ગલોકે મહીયતે

ગંગાયાશ્ચ નરશ્રેષ્ઠ સરસ્વત્યાશ્ચ સંગમે ।
સ્નાતોઽશ્વમેધમાપ્નોતિ સ્વર્ગલોકં ચ ગચ્છતિ

તત્ર કર્ણહ્રદે સ્નાત્વા દેવમભ્યર્ચ્ય શંકરમ્ ।
ન દુર્ગતિમવાપ્નોતિ સ્વર્ગલોકં ચ ગચ્છતિ

તતઃ કુબ્જામ્રકં ગચ્છેત્તીર્થસેવી યથાક્રમમ્ ।
ગોસહસ્રમવાપ્નોતિ સ્વર્ગલોકં ચ ગચ્છતિ

અરુંધતીવટં ગચ્છેત્તીર્થસેવી નરાધિપ ।
સામુદ્રકમુપસ્પૃશ્ય ત્રિરાત્રોપોષિતો નરઃ

ગોસહસ્રફલં વિંદ્યાત્સ્વર્ગલોકં ચ ગચ્છતિ ।
બ્રહ્માવર્ત્તં તતો ગચ્છેદ્બ્રહ્મચારી સમાહિતઃ

અશ્વમેધમવાપ્નોતિ સ્વર્ગલોકં ચ ગચ્છતિ ।
યમુનાપ્રભવં ગચ્છેત્સમુપસ્પૃશ્ય યામુનમ્

અશ્વમેધફલં લબ્ધ્વા બ્રહ્મલોકે મહીયતે ।
દર્વીસંક્રમણં પ્રાપ્ય તીર્થં ત્રૈલોક્યવિશ્રુતમ્

અશ્વમેધમવાપ્નોતિ સ્વર્ગલોકં ચ ગચ્છતિ ।
સિંધોશ્ચ પ્રભવં ગત્વા સિદ્ધગંધર્વસેવિતમ્

તત્રોષ્ય રજનીઃ પંચ દદ્યાદ્બહુસુવર્ણકમ્ ।
અથ દેવીં સમાસાદ્ય નરઃ પરમદુર્ગમામ્

અશ્વમેધમવાપ્નોતિ ગચ્છેચ્ચૌશનસીં ગતિમ્ ।
ઋષિકુલ્યાં સમાસાદ્ય વસિષ્ઠં ચૈવ ભારત

વસિષ્ઠં સમતિક્રમ્ય સર્વે વર્ણા દ્વિજાતયઃ ।
ઋષિકુલ્યાં નરઃ સ્નાત્વા ઋષિલોકં પ્રપદ્યતે

યદિ તત્ર વસેન્માસં શાકાહારો નરાધિપ ।
ભૃગુતુંગં સમાસાદ્ય વાજિમેધફલં લભેત્

ગત્વા વીરપ્રમોક્ષં ચ સર્વપાપૈઃ પ્રમુચ્યતે ।
કાર્તિકમાઘયોશ્ચૈવ તીર્થમાસાદ્ય દુર્લભમ્

અગ્નિષ્ટોમાતિરાત્રાભ્યાં ફલં પ્રાપ્નોતિ પુણ્યકૃત્ ।
તતઃ સંધ્યાં સમાસાદ્ય વિદ્યાતીર્થમનુત્તમમ્

ઉપસ્પૃશેત્સ વિદ્યાનાં સર્વાસાં પારગો ભવેત્ ।
મહાશ્રમે વસેદ્રાત્રિં સર્વપાપપ્રમોચને

એકકાલં નિરાહારો લોકાન્સંવસતે શુભાન્ ।
ષષ્ઠકાલોપવાસેન માસમુષ્ય મહાલયે

તીર્ણસ્તારયતે જંતૂન્દશપૂર્વાન્દશાપરાન્ ।
દૃષ્ટ્વા માહેશ્વરં પુણ્યં પરં સુરનમસ્કૃતમ્

કૃતાર્થઃ સર્વકૃત્યેષુ ન શોચેન્મરણં ક્વચિત્ ।
સર્વપાપવિશુદ્ધાત્મા વિંદ્યાદ્બહુસુવર્ણકમ્

અથ વેતસિકાં ગચ્છેત્પિતામહનિષેવિતામ્ ।
અશ્વમેધમવાપ્નોતિ ગતિં ચ પરમાં વ્રજેત્

અથ સુંદરિકાં તીર્થં પ્રાપ્ય સિદ્ધનિષેવિતામ્ ।
રૂપસ્ય ભાગી ભવતિ દૃષ્ટમેતત્પુરાતનૈઃ

તતો બ્રાહ્મણિકાં ગત્વા બ્રહ્મચારી સમાહિતઃ ।
પદ્મવર્ણેન યાનેન બ્રહ્મલોકં પ્રપદ્યતે

તતશ્ચ નૈમિષં ગચ્છેત્પુણ્યં દ્વિજનિષેવિતમ્ ।
તત્ર નિત્યં નિવસતિ બ્રહ્મા દેવગણૈઃ સહ

નૈમિષં પ્રાર્થયાનસ્ય પાપસ્યાર્દ્ધં પ્રણશ્યતિ ।
પ્રવિષ્ટમાનસ્તુ નરઃ સર્વપાપાત્પ્રમુચ્યતે