Padma Purana · Chapter 3.28

nārada uvāca-/
tato gaccheta dharmmajña dharmmatīrthaṃ purātanam /
yatra dharmo mahābhāgastaptavānuttamaṃ tapaḥ

tena tīrthaṃ kṛtaṃ puṇyaṃ svena nāmnā ca cihnitam /
tatra snātvā naro rājandharmaśīlaḥ samāhitaḥ

āsaptamaṃ kulaṃ caiva punīte nātra saṃśayaḥ /
tato gaccheta dharmajña kalāpa vanamuttamam

kṛcchreṇa mahatā gatvā tatra snātvā samāhitaḥ /
agniṣṭomamavāpnoti viṣṇulokaṃ ca gacchati

saugaṃdhikaṃ vanaṃ rājaṃstato gaccheta mānavaḥ /
yatra brahmādayo devā ṛṣayaśca tapodhanāḥ

siddhacāraṇagaṃdharvāḥ kinnarāḥ sa mahoragāḥ /
tadvanaṃ praviśanneva sarvapāpaiḥ pramucyate

tato hi sā saricchreṣṭhā nadīnāmuttamā nadī /
plakṣādevī smṛtā rājanmahā puṇyā sarasvatī

tatrābhiṣekaṃ kurvīta valmīkānniḥsṛte jale /
arcayitvā pitṝndevānaśvamedhaphalaṃ labhet

īśānādhyuṣitaṃ nāma tatra tīrthaṃ sudurlabham /
ṣaḍguṇaṃ yannipāteṣu valmīkāditi niścayaḥ

kapilānāṃ sahasraṃ ca vājimedhaṃ ca viṃdati /
tatra snātvā naravyāghra dṛṣṭametatpurātanaiḥ

sugaṃdhāṃ śatakuṃbhāṃ ca paṃcayajñaṃ ca bhārata /
abhigamya naraśreṣṭha svargaloke mahīyate

triśūlapātraṃ tatraiva tīrthamāsādya durlabham /
tatrābhiṣekaṃ kurvīta pitṛdevārcane rataḥ

gāṇapatyaṃ ca labhate dehaṃ tyaktvā na saṃśayaḥ /
tato rājagṛhaṃ gaccheddevyāḥ sthānaṃ sudurlabham

śākaṃbharīti vikhyātā triṣulokeṣu viśrutā /
divyaṃ varṣasahasraṃ ca śākena kila bhārata

āhāraṃ sā kṛtavatī māsimāsi narādhipa /
ṛṣayo'bhyāgatāstatra devyā bhaktāstapodhanāḥ

ātithyaṃ ca kṛtaṃ teṣāṃ śākena kila bhārata /
tataḥ śākaṃbharītyevaṃ nāma tasyāḥ pratiṣṭhitam

śākaṃbharīṃ samāsādya brahmacārī samāhitaḥ /
trirātramuṣitaḥ śākaṃ bhakṣayenniyataḥ śuciḥ

śākāhārasya yatsamyagvarṣairdvādaśabhiḥ phalam /
tatphalaṃ tasya bhavati devyāśchaṃdena bhārata

tato gacchetsuvarṇākhyaṃ triṣulokeṣu viśrutam /
yatra kṛṣṇaḥ prasādārthaṃ rudramārādhayatpurā

varāṃśca subahūm̐llebhe devairapi sa durllabhān /
uktaśca tripuraghnena parituṣṭena bhārata

api cātmāpriyataro loke kṛṣṇa bhaviṣyasi /
tvanmukhaṃ ca jagatkṛtsnaṃ bhaviṣyati na saṃśayaḥ

tatrābhigamya rājeṃdra pūjayitvā vṛṣadhvajam /
aśvamedhamavāpnoti gāṇapatyaṃ ca viṃdati

dhūmāvatīṃ tato gacchettrirātramuṣito naraḥ /
manasā prārthitānkāmām̐llabhate nātra saṃśayaḥ

devyāstu dakṣiṇārdhe narathāvartto narādhipa /
tatrāgatya tu dharmajña śraddadhāno jiteṃdriyaḥ

mahādevaprasādena gaccheta paramāṃ gatim /
pradakṣiṇamupāvṛtya gaccheta bharatarṣabha