Padma Purana · Chapter 3.27

nārada uvāca-/
tato gaccheta dharmajña kanyātīrthamanuttamam /
kanyātīrthe naraḥ snātvā agniṣṭomaphalaṃ labhet

tato gacchennaravyāghra brahmaṇaḥ sthānamuttamam /
tatra varṇāvaraḥ snātvā brāhmaṇyaṃ labhate naraḥ

brāhmaṇastu viśuddhātmā gaccheta paramāṃ gatim /
tato gacchennaravyāghra somatīrthamanuttamam

tatra snātvā naro rājansomalokamavāpnuyāt /
saptasārasvataṃ tīrthaṃ tato gacchennarādhipa

yatra maṃkaṇakaḥ siddho brahmarṣirlokaviśrutaḥ /
purā maṃkaṇako rājankuśāgreṇeti viśrutam

kṣataḥ kila kare rājantasya śākaraso'sravat /
sa vai śākarasaṃ dṛṣṭvā harṣāviṣṭo mahātapāḥ

nanarta kila viprarṣirvismayotphullalocanaḥ /
tatastasminpranṛtte vai sthāvaraṃ jaṃgamaṃ ca yat

pranṛttamubhayaṃ vīra tejasā tasya mohitam /
brahmādibhistato devairṛṣibhiśca tapodhanaiḥ

vijñapto vai ṛṣerarthe mahādevo narādhipa /
nāyaṃ nṛtyedyathā deva tathā tvaṃ kartumarhasi

tato devo muniṃ dṛṣṭvā harṣāviṣṭena cetasā /
nṛtyaṃtamabravīccainaṃ sthirāṇāṃ hitakāmyayā

aho maharṣe dharmajña kimarthaṃ nṛtyate bhavān /
harṣasthānaṃ kimarthaṃ vā tavādya munipuṃgava

ṛṣiruvāca-/
tapasvino dharmmapathasthitasya dvijasattama /
kiṃ na paśyasi me brahmankṣatācchākarasaṃ sṛtam

yaṃ dṛṣṭvā saṃpranṛtto'haṃ harṣeṇa mahatā vṛtaḥ /
taṃ prahasyābravīddeva ṛṣiṃ rāgeṇa mohitam

ahaṃ tu vismayaṃ vipra na gacchāmīha paśya mām /
evamuktvā naraśreṣṭha mahādevena vai tadā

aṃgulyagreṇa rājeṃdra svāṃguṣṭhastāḍito'nagha /
tasya bhasmakṣatādrājanniḥsṛtaṃ himasaṃnibham

yaṃ dṛṣṭvā vrīḍito rājansa muniḥ pādayorgataḥ /
nānyaṃ devādahaṃ manye rudrātparataraṃ mahat

surāsurasya jagato gatistvamasi śūladhṛk /
tvayā sṛṣṭamidaṃ viśvaṃ trailokyaṃ sacarācaram

tvāmeva bhagavansarve praviśaṃti yugakṣaye /
devairapi na śakyastvaṃ parijñātuṃ kuto mayā

tvayi sarveśa dṛśyaṃte surāḥ śakrādayo'nagha /
sarvastvamasi lokānāṃ kartā kārayitānvaham

tvatprasādātsurāḥ sarve modaṃtīhākutobhayāḥ /
evaṃ stutvā mahādevaṃ sa ṛṣiḥ praṇato'bravīt

tvatprasādānmahādeva tapo me na kṣareta vai /
tato devaḥ prahṛṣṭātmā brahmarṣimidamabravīt

tapaste varddhatāṃ vipra matprasādātsahasradhā /
āśrame ceha vatsyāmi tvayā sārddhaṃ mahāmune

saptasārasvate snātvā arcayiṣyaṃti ye tu mām /
na teṣāṃ durlabhaṃ kiṃcidiha loke paratra vā

gacchetsārasvataṃ cāpi lokaṃ nāstyatra saṃśayaḥ /
evamuktvā mahādevastatraivāṃtaradhīyata

tatastvauśanasaṃ gacchettriṣu lokeṣu viśrutam /
yatra brahmādayo devā ṛṣayaśca tapodhanāḥ

kārtikeyaśca bhagavāṃstrisaṃdhyāṃ kila bhārata /
sānnidhyamakarottatra bhārgavapriyakāmyayā

kapālamocanaṃ tīrthaṃ sarvapāpapraṇāśanam /
tatra snātvā naravyāghra sarvapāpaiḥ pramucyate

agnitīrthaṃ tato gacchetsnātvā ca bharatarṣabha /
agnilokamavāpnoti kulaṃ caiva samuddharet

viśvāmitrasya tatraiva tīrthaṃ bharatasattama /
tatra snātvā mahārāja brāhmaṇyamabhijāyate

brahmayoniṃ samāsādya śuciḥ prayatamānasaḥ /
tatra snātvā naravyāghra brahmalokaṃ prapadyate

punātyā saptamaṃ caiva kulaṃ nāstyatra saṃśayaḥ /
tato gaccheta rājeṃdra tīrthaṃ trailokyaviśrutam

pṛthūdakamiti khyātaṃ kārtikeyasya vnṛpa /
tatrābhiṣekaṃ kurvīta pitṛdevārcane rataḥ

ajñānājjñānato vāpi striyā vā puruṣeṇa vā /
yatkiṃcidaśubhaṃ karma kṛtaṃ mānuṣabuddhinā

tatsarvaṃ naśyate tatra snātamātrasya bhārata /
aśvamedhaphalaṃ cāpi labhate svargameva ca

puṇyamāhuḥ kurukṣetraṃ kurukṣetrātsarasvatīm /
sarasvatyāśca tīrthāni tīrthebhyaśca pṛthūdakam

uttame sarvatīrthānāṃ yastyajedātmanastanum /
pṛthūdake japyaparo naiva saṃsaraṇaṃ labhet

gītaṃ sanatkumāreṇa vyāsena ca mahātmanā /
vede ca niyataṃ rājannabhigacchetpṛthūdakam

pṛthūdakātpuṇyatamaṃ nānyattīrthaṃ narottama /
etanmedhyaṃ pavitraṃ ca pāvanaṃ ca na saṃśayaḥ

tatra snātvā divaṃ yāṃti api pāpakṛto janāḥ /
pṛthūdake naraśreṣṭhamāhurevaṃ manīṣiṇaḥ

madhusravaṃ ca tatraiva tīrthaṃ bharatasattama /
tatra snātvā naro rājangosahasraphalaṃ labhet

tato gacchennaraśreṣṭha tīrthaṃ devyā yathākramam /
sarasvatyāruṇāyāśca saṃgamaṃ lokaviśrutam

trirātropoṣitaḥ snātvā mucyate brahmahatyayā /
agniṣṭomātirātrābhyāṃ phalaṃ caiva samaśnute

punātyāsaptamaṃ caiva kulaṃ nāstyatra saṃśayaḥ /
avakīrṇaṃ ca tatraiva tīrthaṃ kurukulodvaha

viprāṇāmanukaṃpārthaṃ darbhiṇā nirmitaṃ purā /
vratopanayanābhyāṃ cāpyupavāsena vā dvijaḥ

kriyāmaṃtraiśca saṃyukto brāhmaṇaḥ syānna saṃśayaḥ /
kriyāmaṃtravihīno'pi tatra snātvā nararṣabha

cīrṇavrato bhavedvipro dṛṣṭametatpurātanam /
samudrāścāpi catvāraḥ samānītāśca darbhiṇā

tatra snātvā naravyāghra na durgatimavāpnuyāt /
phalāni gosahasrāṇāṃ caturṇāṃ viṃdate ca saḥ

tato gaccheta rājendra tīrthaṃ śatasahasrakam /
sāhasrakaṃ ca tatraiva dve tīrthe lokaviśrute

ubhayorhi naraḥ snātvā gosahasraphalaṃ labhet /
dānaṃ vāpyupavāso vā sahasraguṇito bhavet

tato gaccheta rājeṃdra reṇukātīrthamuttamam /
tatrābhiṣekaṃ kurvīta pitṛdevārcane rataḥ

sarvapāpaviśuddhātmā agniṣṭomaphalaṃ labhet /
vimocana upaspṛśya jitamanyurjiteṃdriyaḥ

pratigrahakṛtaiḥ pāpaiḥ sarvaiḥ saṃparimucyate /
tataḥ paṃcavaṭaṃ gatvā brahmacārī jiteṃdriyaḥ

puṇyena mahatā yuktaḥ svargaloke mahīyate /
yatra yogīśvaraḥ sthāṇuḥ svayameva vṛṣadhvajaḥ

tamarcayitvā deveśaṃ gamanādeva sidhyati /
taijasaṃ vāruṇaṃ tīrthaṃ dīpyate svena tejasā

yatra brahmādibhirdevairṛṣibhiśca tapodhanaiḥ /
saināpatye ca devānāmabhiṣikto guhastadā

taijasasya tu pūrveṇa kurutīrthaṃ kurūdvaha /
kurutīrthe naraḥ snātvā brahmacārī jiteṃdriyaḥ

sarvapāpaviśuddhātmā rudralokaṃ prapadyate /
svargadvāraṃ tato gacchenniyato niyatāśanaḥ

agniṣṭomamavāpnoti brahmalokaṃ ca gacchati /
tato gacchedanarakaṃ tīrthasevī narādhipa

tatra snātvā naro rājanna durgatimavāpnuyāt /
tatra brahmā svayaṃ nityaṃ devaissaha mahīyate

adhyāste puruṣavyāghra nārāyaṇaparāgamaiḥ /
sānnidhyaṃ caiva rājeṃdra rudravedyāṃ kurudvaha

abhigamya tu tāṃ devīṃ na durgatimavāpnuyāt /
tatraiva ca mahārāja viśveśvaramumāpatim

abhigamya mahādevaṃ mucyate sarvakilbiṣaiḥ /
nārāyaṇaṃ cābhigamya padmanābhamariṃdama

śobhamāno mahārāja viṣṇulokaṃ prapadyate /
tīrtheṣu sarvadevānāṃ snātamātro narādhipa

sarvaduḥkhaparityakto dyotate śivavatsadā /
tatastvasthipuraṃ gacchettīrthasevī narādhipa

pāvanaṃ tīrthamāsādya tarpayetpitṛdevatāḥ /
agniṣṭomasya yajñasya phalamāpnoti bhārata

gaṃgāhradaśca tatraiva kūpaśca bharatarṣabha /
tisraḥ koṭyastu tīrthānāṃ tasminkūpe mahīyate

tatra snātvā naro rājanbrahmaloke prapadyate /
āpagāyāṃ naraḥ snātvā arcayitvā maheśvaram

gatiṃ parāmavāpnoti kulaṃ caiva samuddharet /
tataḥ sthāṇuvaṭaṃ gachettriṣulokeṣu viśrutam

tatra snātvā sthito rātriṃ rudralokamavāpnuyāt /
badarīṇāṃ vanaṃ gacchedvasiṣṭhasyāśramaṃ tataḥ

badarī bhakṣyate yatra trirātropoṣito naraḥ /
samyagdvādaśavarṣāṇi badarīṃ bhakṣayettu yaḥ

trirātropoṣitaścaiva bhavettulyo narādhipa /
iṃdramārgaṃ samāsādya tīrthasevī narādhipa

ahorātropavāsena svargaloke mahīyate /
ekarātraṃ samāsādya ekarātroṣito naraḥ

niyataḥ satyavādī ca brahmaloke mahīyate /
tathā gachecca rājeṃdra tīrthaṃ trailokyaviśrutam

ādityasyāśramo yatra tejorāśermahātmanaḥ /
tasmiṃstīrthe naraḥ snātvā pūjayitvā vibhāvasum

ādityalokaṃ vrajati kulaṃ caiva samuddharet /
somatīrthe naraḥ snātvā tīrthasevī kurūdvaha

somalokamavāpnoti naro nāstyatra saṃśayaḥ /
tato gaccheta dharmajña dadhīcasya narādhipa

tīrthaṃ puṇyatamaṃ rājanpāvanaṃ lokaviśrutam /
yatra sārasvato yātaḥ siddhiṃ sa tapasonidhiḥ

tasmiṃstīrthe naraḥ snātvā vājapeyaphalaṃ labhet /
sārasvatīṃ matiṃ caiva labhate nātra saṃśayaḥ

tataḥ kanyāśramaṃ gatvā niyato brahmacaryayā /
trirātramuṣito rājannupavāsaparāyaṇaḥ

labhetkanyāśataṃ divyaṃ bahmalokaṃ ca gacchati /
tato gaccheta dharmajña tīrthaṃ saṃnihitīmapi

yatra brahmādayo devā ṛṣayaśca tapodhanāḥ /
māsi māsi sameṣyaṃti puṇyena mahatānvitāḥ

sannihityāmupaspṛśya rāhugraste divākare /
aśvamedhaśataṃ tena iṣṭaṃ bhavati śāśvatam

pṛthivyāṃ yāni tīrthāni aṃtarikṣacarāṇi ca /
udapānāśca viprāśca puṇyānyāyatanāni ca

niḥsaṃśayamamāvāsyāṃ sameṣyaṃti narādhipa /
māsimāsi naravyāghra sannihityāṃ janeśvara

tīrthasannayanādeva sannihitī bhuvi viśrutā /
tatra snātvā ca pītvā ca svargaloke mahīyate

amāvāsyāṃ tathā caiva rāhugraste divākare /
yaḥ śrāddhaṃ kurute martyastasya puṇyaphalaṃ śṛṇu

aśvamedhasahasrasya samyagiṣṭasya yatphalam /
snāta eva tadāpnoti śrāddhaṃ kṛtvā ca mānavaḥ

yatkiṃcidduṣkṛtaṃ karmma striyā vā puruṣasya vā /
snātamātrasya tatsarvaṃ naśyate nātra saṃśayaḥ

padmavarṇena yānena brahmalokaṃ sa gacchati /
abhivādya tato nāmnā dvārapālaṃ macakrukam

gaṃgāhradaśca tatraiva tīrthaṃ bharatasattama /
tatra snāyīta dharmajña brahmacārī samāhitaḥ

rājasūyāśvamedhābhyāṃ phalaṃ viṃdati mānavaḥ /
pṛthivyāṃ naimiṣaṃ puṇyamaṃtarikṣe ca puṣkaram

trayāṇāmapi lokānāṃ kurukṣetraṃ viśiṣyate /
pāṃsavo'pi kurukṣetre vāyunāti samīritāḥ

api duṣkṛtakarmmāṇaṃ nayaṃti paramāṃ gatim /
dakṣiṇena sarasvatyāmuttareṇa sarasvatīm

ye vasaṃti kurukṣetre te vasaṃti triviṣṭape /
kurukṣetraṃ gamiṣyāmi kurukṣetre vasāmyaham

apyekāṃ vācamutmṛjya svargaloke mahīyate /
brahmavedyāṃ kurukṣetraṃ puṇyaṃ brahmarṣisevitam

tasminvasaṃti ye rājanna te śocyāḥ kathaṃcana /
taraṃḍakāraṃḍakayoryadaṃtaraṃ rāmahradānāṃ ca macakrukasya ca /
etatkurukṣetra samaṃtapaṃcakaṃ pitāmahasyottara vedirucyate

iti śrīpādmemahāpurāṇe svargakhaṃḍe saptaviṃśo'dhyāyaḥ