Padma Purana · Chapter 3.2

sūta uvāca-/
ādisargamahaṃ tāvatkathayāmi dvijottamāḥ /
jñāyate yena bhagavānparamātmā sanātanaḥ

sṛṣṭeṣu pralayādūrdhvaṃ nāsītkiṃciddvijottamāḥ /
brahmasaṃjñamabhūdekaṃ jyotirvai sarvakārakam

nityaṃ niraṃjanaṃ śāṃtaṃ nirmalaṃ nityanirmalam /
ānaṃdasāgaraṃsvacchaṃ yatkāṃkṣaṃti mumukṣavaḥ

sarvajñaṃ jñānarūpatvādanaṃtamajamavyayam /
avināśi sadāsvacchamacyutaṃ vyāpakaṃ mahat

sargakāle tu saṃprāpte jñātvā taṃ jñānarūpakam /
ātmalīnaṃ vikāraṃ ca tatsraṣṭumupacakrame

tasmātpradhānamudbhūtaṃ tataścāpi mahānabhūt /
sātviko rājasaścaiva tāmasaśca tridhā mahān

pradhānenāvṛto hyeva tvacā bījamivāvṛtam /
vaikārikastaijasaśca bhūtādiścaiva tāmasaḥ

trividhoyamahaṃkāro mahattatvādajāyata /
yathā pradhānena mahānmahatā sa tathā vṛtaḥ

bhūtādistu vikurvāṇaḥ śabdatanmātrakaṃ tataḥ /
sasarja śabdatanmātrādākāśaṃ śabdalakṣaṇam

śabdamātraṃ tathākāśaṃ bhūtādiḥ samamāvṛṇot /
śabdamātraṃ tathākāśaṃ sparśamātraṃ sasarja ha

balavānabhavadvāyustasya sparśo guṇo mataḥ /
ākāśaṃ śabdamātraṃ tu sparśamātraṃ samāvṛṇot

tato vāyuvikurvāṇo rūpamātraṃ sasarja ha /
jyotirutpadyate vāyostadrūpaguṇamucyate

sparśamātrastu vai vāyū rūpamātraṃ samāvṛṇot /
jyotiścāpi vikurvāṇaṃ rasamātraṃ sasarja ha

saṃbhavaṃti tatoṃbhāṃsi rasamātrāṇi tāni tu /
rasamātrāṇicāṃbhāṃsi rūpamātraṃ samāvṛṇot

vikurvāṇānicāṃbhāṃsigaṃdhamātraṃsasarjire /
tasmājjātā mahī ceyaṃ sarvabhūtaguṇādhikā

sasaṃghāto yatastasmāttasya gaṃdho guṇo mataḥ /
tasmiṃstasmiṃstu tanmātrāttena tanmātratā smṛtā

tanmātrāṇyaviśeṣāṇi viśeṣāḥ kramaśo parāḥ /
bhūtatanmātrasargoyamahaṃkārāttu tāmasāt

kīrtitastu samāsena munivaryāstapodhanāḥ /
taijasānīṃdriyāṇyāhurdevā vaikārikā daśa

ekādaśaṃ manaścātra kīrtitaṃ tattvaciṃtakaiḥ /
jñāneṃdriyāṇi paṃcātra paṃcakarmeṃdriyāṇi ca

tāni vakṣyāmi teṣāṃ ca karmāṇi kulapāvanāḥ /
śravaṇaṃ tvakcakṣurjihvā nāsikā caiva paṃcamī

śabdādijñānasiddhyarthaṃ buddhiyuktāni paṃca vai /
pāyūpasthaṃ hastapādau kīrtitā vākcapaṃcamī

visargānaṃdanādānagatyuktikarmatatsmṛtam /
ākāśavāyutejāṃsi salilaṃ pṛthivī tathā

śabdādibhirguṇairviprāḥ saṃyuktā uttarottaraiḥ /
nānāvīryāḥ pṛthagbhūtāstataste saṃhatiṃ vinā

nāśaknuvanprajāḥ sraṣṭumasamāgatya kṛtsnaśaḥ /
sametyānyonyasaṃyogaṃ parasparamathāśrayāt

ekasaṃghāssalakṣyāśca saṃprāpyaikyamaśeṣataḥ /
puruṣādhiṣṭhitatvācca pradhānānugraheṇa ca

mahadādayo viśeṣāṃtā aṃḍamutpādayaṃti te /
tatkrameṇa vivṛddhaṃ tu jalabudbudavatsadā

bhūtebhyoṃḍaṃ mahāprājñā vṛddhaṃ tadudakeśayam /
prākṛtaṃ brahmarūpasya viṣṇoḥ sthānamanuttamam

tatrāvyaktasvarūposau viṣṇurviśveśvaraḥ prabhuḥ /
brahmarūpaṃ samāsthāya svayameva vyavasthitaḥ

svedajāṃḍamabhūttasya jarāyuśca mahīdharāḥ /
garbhodakaṃ samudrāśca tasyābhūnmahadātmanaḥ

sādridvīpasamudrāśca sajyotirlokasaṃgrahaḥ /
tasminnaṃḍebhavatsarvaṃ sadevāsuramānuṣam

anādinidhanasyaiva viṣṇornābheḥ samutthitam /
yatpadmaṃ taddhaimamaṃḍamabhūcchrīkeśavecchayā

rajoguṇadharo devaḥ svayameva hariḥ paraḥ /
brahmarūpaṃsamāsthāya jagatsraṣṭuṃ pravartate

sṛṣṭaṃ ca pātyanuyugaṃ yāvatkalpavikalpanā /
nārasiṃhādirūpeṇa rudrarupeṇa saṃharet

sabrahmarūpaṃ visṛjanmahātmā jagatsamastaṃ paripātumicchan /
rāmādirūpaṃ sa tu gṛhya yāti babhūva rudro jagadetadattum

iti śrīpādmemahāpurāṇesvargakhaṃḍedvitīyo'dhyāyaḥ