Padma Purana · Chapter 3.1

namāmi govindapadāraviṃdaṃ sadeṃdirāvaṃditamuttamāḍhyam /
jagajjanānāṃ hṛdi saṃniviṣṭaṃ mahājanaikāyanamuttamottamam

ekadā munayaḥ sarve jvalajjvalanasannibhāḥ /
himavadvāsinaḥ sarve munayo vedapāragāḥ

trikālajñā mahātmāno nānāpuṇyasamāśrayāḥ /
maheṃdrādriratā ye ca ye ca viṃdhyanivāsinaḥ

ye'rbudāraṇyaniratāḥ puṣkarāraṇyavāsinaḥ /
śrīśailaniratā ye ca kurukṣetranivāsinaḥ

dharmmāraṇyaratā ye ca daṃḍakāraṇyavāsinaḥ /
jaṃbūmārgaratā ye ca ye ca satyanivāsinaḥ

ete cānye ca bahavaḥ saśiṣyā munayo'malāḥ /
naimiṣaṃ samupāyātāḥ śaunakaṃ draṣṭumutsukāḥ

taṃ pūjayitvā vidhivattena te ca supūjitāḥ /
āsaneṣu vicitreṣu bṛsyādiṣu yathākramam

śaunakena pradatteṣu āsīnāste tapodhanāḥ /
kṛṣṇāśritāḥ kathāḥ puṇyāḥ parasparamathābruvan

kathāṃteṣu tatasteṣāṃ munīnāṃ bhāvitātmanām /
ājagāma mahātejāḥ sūtastatra mahādyutiḥ

vyāsaśiṣyaḥ purāṇajño romaharṣaṇasaṃjñakaḥ /
tānpraṇamya yathānyāyaṃ sa taiścaivābhipūjitaḥ

upaviṣṭaṃ yathāyogyaṃ śaunakādyā maharṣayaḥ /
vyāsaśiṣyaṃ sukhāsīnaṃ sūtaṃ vai romaharṣaṇam

taṃ papracchurmahābhāgāḥ śaunakādyāstapodhanāḥ /
ṛṣaya ūcuḥ-/
paurāṇika mahābuddhe romaharṣaṇa suvrata

tvattaḥ śrutā mahāpuṇyāḥ purā paurāṇikīḥ kathāḥ /
sāṃprataṃ ca pravṛttāḥ sma kathāyāṃ sakṣaṇā hareḥ

sa vai puṃsāṃ parodharmo yato bhaktiradhokṣaje /
punaḥ purāṇamācakṣva harivārtā samanvitam

hareranyā kathā sūta śmaśānasadṛśī smṛtā /
haristīrthasvarūpeṇa svayaṃ tiṣṭhati tacchrutam

tīrthānāṃ puṇyadātṝṇāṃ nāmāni kila kīrtaya /
kuta etatsamutpannaṃ kena vā paripālyate

kasminvilayamabhyeti jagadetaccarācaram /
kṣetrāṇi kāni puṇyāni ke ca pūjyāḥ śiloccayāḥ

nadyaśca kāḥ parāḥ puṇyā nṛṇāṃ pāpaharāḥ śubhāḥ /
etatsarvaṃ mahābhāga kathayasva yathākramam

sūta uvāca-/
sādhusādhu mahābhāgāḥ sādhupṛṣṭaṃ tapodhanāḥ /
taṃ praṇamya pravakṣyāmi purāṇaṃ padmasaṃjñakam

pārāśaryaṃ paramapuruṣaṃ viśvavedyaikayoniṃ vidyādhāraṃ vipulamatidaṃ vedavedāṃtavedyam /
śaśvacchāṃtaṃ svamativiṣayaṃ śuddhatejoviśālaṃ vedavyāsaṃ vitatayaśasaṃ sarvadāhaṃ namāmi

namo bhagavate tasmai vyāsāyāmitatejase /
yasya prasādādvakṣyāmi nārāyaṇakathāmimām

pravakṣyāmi mahāpuṇyaṃ purāṇaṃ padmasaṃjñitam /
sahasraṃ paṃcapaṃcāśatṣaḍbhiḥ khaṃḍaiḥ samanvitam

tatrādāvādikhaṃḍaṃ syādbhūmikhaṃḍaṃ tataḥ param /
brahmakhaṃḍaṃ ca tatpaścāttataḥ pātālakhaṃḍakam

kriyākhaṃḍaṃ tataḥ khyātamuttaraṃ khaṃḍamaṃtimam /
etadeva mahāpadmamadbhutaṃ yanmayaṃ jagat

tadvṛttāṃtāśrayaṃ tasmātpādmamityucyate budhaiḥ /
etatpurāṇamamalaṃ viṣṇumāhātmyamuttamam

devadevohariryadvai brahmaṇe proktavānpurā /
brahmā tannāradāyāha nārado'smadguroḥ puraḥ

vyāsaḥ sarvapurāṇāni setihāsāni saṃhitāḥ /
adhyāpayāmāsa muhurmāmatipriyamātmanaḥ

tatte'haṃ saṃpravakṣyāmi purāṇamatidurlabham /
yacchrutvā brahmahatyādi pāpebhyo mucyate naraḥ

sarvatīrthābhiṣekaṃ ca labhate śṛṇute hi yaḥ /
śraddhayā parayā bhaktyā śrutamātreṇa muktidaḥ

aśraddhayāpi śṛṇute labhate puṇyasaṃcayam /
tasmātsarvaprayatnena padmaṃ śrotrātithī kuru

tatrādikhaṃḍaṃ vakṣyāmi puṇyaṃ pāpavināśanam /
śṛṇvaṃtu munayaḥ sarve saśiṣyāstvatra ye sthitāḥ

iti śrīpādme mahāpurāṇe svargakhaṃḍe prathamo'dhyāyaḥ