Padma Purana · Chapter 2.98

sūta uvāca-
evamukte śubhe vākye vijvalena mahātmanā //
kuṃjalo vadatāṃ śreṣṭhaḥ stotraṃ puṇyamudairayat

dhyātvā natvā hṛṣīkeśaṃ sarvakleśavināśanam //
sarvaśreyaḥ pradātāraṃ hareḥ stotramudīritam

vāsudevābhidhānaṃ tatsarvaśreyaḥ pradāyakam //
mokṣadvāraṃ sukhopetaṃ śāṃtidaṃ puṣṭivarddhanam

sarvakāmapradātāraṃ jñānadaṃ jñānavarddhanam //
vāsudevasya yatstotraṃ vijvalāya prakāśitam

vāsudevābhidhānaṃ cāprameyaṃ puṇyavarddhanam //
so'vagamya pituḥ sarvaṃ vijvalaḥ pakṣiṇāṃvaraḥ

tatragaṃtuṃpracakrāmapituḥpṛṣṭaṃtadānṛpa //
evaṃ gaṃtuṃ kṛtamatiṃ vijvalaṃ jñānapāragam

uvāca putraṃ dharmātmā upakārasamudyatam

kuṃjala uvāca-
putra tasya mahajjāne pātakaṃ bhūpateḥ śṛṇu //
yato gatvā paṭha svatvaṃ subāhoścopaśṛṇvataḥ

yathāyathā śroṣyati stotramuttamaṃ tathā tathā jñānamayo bhaviṣyati //
śrīvāsudevasya na saṃśayo vai tasya prasādātsuśivaṃ mayoktam

āmaṃtrya sa guruṃ paścāduḍḍīya laghuvikramaḥ //
ānaṃdakānanaṃ puṇyaṃ saṃprāpto vijvalastadā

vṛkṣacchāyāṃ samāśritya upaviṣṭo mudānvitaḥ /
samālokya sa rājānaṃ vimānenāgataṃ punaḥ

eṣyatyasau kadā rājā subāhuḥ priyayā saha //
pātakānmocayiṣyāmi stotreṇānena vai kadā

tāvadvimānaḥ saṃprāptaḥ kiṃkiṇījālamaṃḍitaḥ //
ghaṃṭāravasamākīrṇo vīṇāveṇusamanvitaḥ

gaṃdharvasvarasaṃghuṣṭaścāpsarobhiḥ samanvitaḥ //
sarvakāmasamṛddhastu annodakavivarjitaḥ

tasminyāne sthito rājā subāhuḥ priyayā saha //
samuttīrṇo vimānātsa sutārkṣya priyayā saha

śastramādāya tīkṣṇaṃ tu yāvatkṛṃtati tacchavam //
tāvaddhi vijvalenāpi samāhvānaṃ kṛtaṃ tadā

bho bhoḥ puruṣaśārdūla devopama bhavānidam //
karoti nirghṛṇaṃ karma nṛśaṃsairna ca śakyate

kartuṃ puruṣaśārdūla ko'yaṃ vidhiviparyayaḥ //
duṣkṛtaṃ sāhasaṃ karma niṃdyaṃ lokeṣu sarvadā

vedācāravihīnaṃ tu kasmātprārabdhavāni ha //
tanme tvaṃ kāraṇaṃ sarvaṃ kathayasva yathā tathā

ityevaṃ bhāṣitaṃ tasya vijvalasya mahātmanaḥ //
samākarṇya mahārājaḥ svapriyāṃ vākyamabravīt

priye varṣaśataṃ bhuktaṃ mayedaṃ pāpakarmaṇā //
kadā na bhāṣitaṃ kena yathāyaṃ paribhāṣate

mamaivaṃ pīḍyamānasya kṣudhayā hṛdayaṃ priye //
nirgataṃ cotsukaṃ kāṃte śāṃtiścitte pravartate

yāvadasya śrutaṃ vākyaṃ sarvaduḥkhasya śāṃtidam //
tāvaccitte samāhlādo vartate cāruhāsini

koyaṃ devo nu gaṃdharvaḥ sahasrākṣo bhaviṣyati //
munīnāṃ syādvacaḥ satyaṃ yaduktaṃ muninā purā

evamābhāṣitaṃ śrutvā priyasyānaṃtaraṃ priyā //
rājānaṃ pratyuvācātha bhāryā patiparāyaṇā

satyamuktaṃ tvayā nātha idamāścaryamuttamam //
yathā te vartate kāṃta mama citte tathā punaḥ

pakṣirūpadharaḥ ko'yaṃ pṛcchate hitakārivat //
evamābhāṣitaṃ śrutvā priyāyāḥ pṛthivīpatiḥ

baddhāṃjalipuṭobhūtvā pakṣiṇaṃ vākyamabravīt //
subāhuruvāca-
svāgataṃ te mahāprājña pakṣirūpadharaḥ prabho

śirasā bhāryayā sārddhaṃ tava pādāṃbujadvayam //
namaskaromyahaṃ puṇyamastu nastvatprasādataḥ

bhavānkaḥ pakṣirūpeṇa puṇyamevaṃ prabhāṣate //
yādṛśaṃ kriyatekarma pūrvadehena sattama

sukṛtaṃ duṣkṛtaṃ vāpi tadihaiva prabhujyate //
atha tenātmakaṃ vṛttaṃ tasyāgre ca niveditam

yathoktaṃ kuṃjalenāpi pitrā pūrvaṃ śrutaṃ tathā //
kathayasvātmavṛttāṃtaṃ bhavānko māṃ prabhāṣate

subāhuṃ pratyuvācedaṃ vākyaṃ pakṣivarastadā //
vijvala uvāca-
śukajātyāṃ samutpannaḥ kuṃjalonāma me pitā

tasyāhaṃ vijvalo nāma tṛtīyastu suteṣvaham //
nāhaṃ devo na gaṃdharvo na ca siddho mahābhuja

nityameva prapaśyāmi karma caivaṃ sudāruṇam //
kiyatkālaṃ mahatkarma sāhasākārasaṃyutam

kariṣyasi mahārāja tanme kathaya sāṃpratam //
subāhuruvāca-
vāsudevābhidhānaṃ yatpūrvamuktaṃ hi brāhmaṇaiḥ

śroṣyāmyahaṃ yadā bhadra gatiṃ svāṃ prāpnuyāṃ tadā //
puṇyātmanā bhāṣitaṃ vai muninā saṃyatātmanā

tadāhaṃ pātakānmukto bhaviṣyāmi na saṃśayaḥ //
vijvala uvāca-
tavārthe pṛcchitastātastena me kathitaṃ ca yat

tattedyāhaṃ pravakṣyāmi śāśvataṃ śṛṇu sattama

ॐasya śrīvāsudevābhidhānasya stotrasya nāradaṛṣiranuṣṭupchaṃdaḥ /
ॐkārodevatā sarvapātakanāśanārthe caturvargasādhanārthe ca jape viniyogaḥ /
ॐnamo bhagavate vāsudevāya iti maṃtraḥ /
pāvanaṃ paramaṃ puṇyaṃ vedajñaṃ vedamaṃdiram //
vidyādhāraṃ bhavādhāraṃ praṇavaṃ vai namāmyaham

nirāvāsaṃ nirākāraṃ suprakāśaṃ mahodayam //
nirguṇaṃ guṇasaṃbaddhaṃ namāmi praṇavaṃ param

mahākāṃtaṃ mahotsāhaṃ mahāmohavināśanam //
ācinvaṃtaṃ jagatsarvaṃ guṇātītaṃ namāmyaham

bhāti sarvatra yo bhūtvā bhūtānāṃ bhūtivarddhanaḥ/ /
abhayaṃ bhikṣusaṃbaddhaṃ namāmi praṇavaṃ śivam

gāyatrīsāma gāyaṃtaṃ gītaṃ gītapriyaṃ śubham //
gaṃdharvagītabhoktāraṃ praṇavaṃ praṇamāmyaham

vicāraṃ vedarūpaṃ taṃ yajñasthaṃ bhaktavatsalam //
yoniṃ sarvasya lokasya ॐkāraṃ praṇamāmyaham

tārakaṃ sarvabhūtānāṃ naurūpeṇa virājitam //
saṃsārārṇavamagnānāṃ namāmi praṇavaṃ harim

sarvalokeṣu vasate ekarūpeṇa naikadhā //
dhāmakaivalyarūpeṇa namāmi praṇavaṃ śivam

sūkṣmaṃ sūkṣmataraṃ śuddhaṃ nirguṇaṃ guṇanāyakam //
varjitaṃ prākṛtairbhāvairvedasthānaṃ namāmyaham

devadaityaviyogaiśca varjitaṃ tuṣṭibhiḥ sadā //
daivaiśca yogibhirdhyeyaṃ tamoṃkāraṃ namāmyaham

vyāpakaṃ viśvavettāraṃ vijñānaṃ paramaṃ śubham //
śivaṃ śivaguṇaṃ śāṃtaṃ vaṃde praṇavamīśvaram

yasya māyāṃ praviṣṭāstu brahmādyāśca surāsurāḥ/ /
na viṃdaṃti paraṃ śuddhaṃ mokṣadvāraṃ namāmyaham

ānaṃdakaṃdāya viśuddhabuddhaye śuddhāya haṃsāya parāvarāya/ /
namo'stu tasmai gaṇanāyakāya śrīvāsudevāya mahāprabhāya

śrīpāṃcajanyena virājamānaṃ raviprabheṇāpi sudarśanena //
gadābjakenāpi virājamānaṃ prabhuṃ sadainaṃ śaraṇaṃ prapadye

yaṃ vedaguhyaṃ saguṇaṃ guṇānāmādhārabhūtaṃ sacarācarasya //
yaṃ sūryavaiśvānaratulyatejasaṃ taṃ vāsudevaṃ śaraṇaṃ prapadye

kṣudhānidhānaṃ vimalaṃ surūpamānaṃdamānena virājamānam /
yaṃ prāpya jīvaṃti surādilokāstaṃ vāsudevaṃ śaraṇaṃ prapadye

tamoghanānāṃ svakarairvināśaṃ karoti nityaṃ parikarmahetuḥ //
uddyotamānaṃ ravidīptatejasaṃ taṃ vāsudevaṃ śaraṇaṃ prapadye

yo bhāti sarvatra raviprabhāvaiḥ karoti śoṣaṃ ca rasaṃ dadāti //
yaḥ prāṇināmaṃtaragaḥ sa vāyustaṃ vāsudevaṃ śaraṇaṃ prapadye

svecchānurūpeṇa sa devadevo bibharti lokānsakalānmahīpān //
saṃtāraṇe nauriva vartate yastaṃ vāsudevaṃ śaraṇaṃ prapadye

aṃtargato lokamayaḥ sadaiva pacatyasau sthāvarajaṃgamānām //
svāhāmukho devagaṇasya hetustaṃ vāsudevaṃ śaraṇaṃ prapadye

rasaiḥ supuṇyaiḥ sakalaiḥ sahaiva puṣṇāti saumyo guṇadaśca loke //
annāni yonirmala tejasaiva taṃ vāsudevaṃ śaraṇaṃ prapadye

astyeva sarvatra vināśahetuḥ sarvāśrayaḥ sarvamayaḥ sa sarvaḥ //
vinā hṛṣīkairviṣayānprabhuṃkte taṃ vāsudevaṃ śaraṇaṃ prapadye

jīvasvarūpeṇa bibharti lokāṃstataḥ svamūrtānsacarācarāṃśca //
niṣkevalo jñānamayaḥ suśuddhastaṃ vāsudevaṃ śaraṇaṃ prapadye

daityāṃtakaṃ duḥkhavināśamūlaṃ śāṃtaṃ paraṃ śaktimayaṃ viśālam //
yaṃ prāpya devā vinayaṃ prayāṃti taṃ vāsudevaṃ śaraṇaṃ prapadye

sukhaṃ sukhāṃtaṃ sukhadaṃ sureśaṃ jñānārṇavaṃ taṃ munipaṃ sureśam //
satyāśrayaṃ satyaguṇopaviṣṭaṃ taṃ vāsudevaṃ śaraṇaṃ prapadye

yajñāṃgarūpaṃ paramārtharūpaṃ māyānvitaṃ māpatimugrapuṇyam //
vijñānamekaṃ jagatāṃ nivāsaṃ taṃ vāsudevaṃ śaraṇaṃ prapadye

aṃbhodhimadhye śayanaṃ hitasya nāgāṃgabhoge śayanaṃ viśāle //
śrīpādapadmadvayameva tasya tadvāsudevasya namāmi nityam

puṇyānvitaṃ śaṃkarameva nityaṃ tīrthairanekaiḥ parisevyamānam //
tatpādapadmadvayameva tasya śrīvāsudevasya aghāpahaṃ tat

pādāṃbujaṃ raktamahotpalābhamaṃbhojasalliṃgajayopayuktam //
alaṃkṛtaṃ nūpuramudrikābhiḥ śrīvāsudevasya namāmi nityam

devaiḥ susiddhairmunibhiḥ sadaiva nutaṃ subhaktyā uragādhipaiśca //
tatpādapaṃkeruhamevapuṇyaṃ śrīvāsudevasya namāmi nityam

yasyāpi pādāṃbhasi majjamānāḥ pūtā divaṃ yāṃti vikalmaṣāste //
mokṣaṃ labhaṃte munayaḥ sutuṣṭāstaṃ vāsudevaṃ śaraṇaṃ prapadye

pādodakaṃ tiṣṭhati yatra viṣṇorgaṃgāditīrthāni sadaiva tatra //
pibaṃti yedyāpi sapāpadehāste yāṃti śuddhāḥ sugṛhaṃ murāreḥ

pādodakenāpyabhiṣicyamānā ugraiśca pāpaiḥ pariliptadehāḥ //
te yāṃti muktiṃ parameśvarasya tasyaiva pādau satataṃ namāmi

naivedyamātreṇa subhakṣitena sucakriṇastasya mahātmanastu //
śrīvājapeyasya phalaṃ labhaṃte sarvārthayuktāśca narā bhavaṃti

nārāyaṇaṃ taṃ narakādhināśanaṃ māyāvihīnaṃ sakalaṃ guṇajñam //
yaṃ dhyāyamānāḥ sugatiṃ prayāṃti taṃ vāsudevaṃ śaraṇaṃ prapadye

yo vaṃdyastvṛṣisiddhacāraṇagaṇairdevaiḥ sadā pūjyate //
yo viśvasya visṛṣṭihetukaraṇe brahmādidevaprabhuḥ //
yaḥ saṃsāramahārṇave nipatitasyoddhārako vatsala-/
stasyaivāpi namāmyahaṃ sucaraṇau bhaktyā varau pāvanau

yo dṛṣṭo makhamaṃḍape suragaṇaiḥ śrīvāmanaḥ sāmagaḥ //
sāmodgītakutūhalaḥ suragaṇaistrailokya ekaḥ prabhuḥ / /
kurvaṃtaṃ nayanekṣaṇaiḥ śubhakarairniṣpāpatāṃ tadbale-/
stasyāhaṃ caraṇāraviṃdayugalaṃ vaṃde paraṃ pāvanam

rājaṃtaṃ dvijamaṃḍale makhamukhe brahmaśriyāśobhitaṃ //
divyenāpi sutejasā karamayaṃ yaṃ ceṃdranīlopamam /
devānāṃ hitakāmyayā sutanujaṃ vairocanasyāpi taṃ-/
yācaṃtaṃ mama dīyatāṃ tripadakaṃ vaṃde prabhuṃ vāmanam

taṃ draṣṭuṃ ravimaṃḍale munigaṇaiḥ saṃprāptavaṃtaṃ divaṃ //
caṃdrārkāstamayāṃtare kila padā saṃcchādayaṃtaṃ tadā //
tasyaivāpi sucakriṇaḥ suragaṇāḥ prāpurlayaṃ sāṃprataṃ-/
kā ye viśvavikośaketamatulaṃ naumi prabhorvikramam

iti śrīpadmapurāṇe bhūmikhaṃḍe venopākhyāne gurutīrthamāhātmye cyavanacaritre'ṣṭanavatitamo'dhyāyaḥ