Padma Purana · Chapter 2.9

navamo'dhyāyaḥ
kaśyapa uvāca-
evaṃ saṃbodhitastatra ātmā dhyānādikaistadā /
tyaktukāmaḥ sa tatkāryaṃ paṃcātmakaṃ sa buddhimān

nimittānyeva paśyaiva prāpya tāṃstānprayāti saḥ /
vihāya kāyaṃ nirlakṣyaṃ patitaṃ naiva paśyati

sahavarddhitayornāsti saṃbaṃdhaḥ prāṇa dehayoḥ /
dhanaputrakalatraiśca saṃbaṃdhaḥ kena hetunā

evaṃ jñātvā śamaṃ gaccha klaibyaṃ mā bhaja supriye /
ayameva paraṃ brahma ayameva sanātanaḥ

ayamātmasvarūpeṇa daitya deveṣu saṃsthitaḥ /
ayaṃ brahmā ayaṃ rudro hyayaṃ viṣṇuḥ sanātanaḥ

ayaṃ sṛjati viśvāni ayaṃ pālayate prajāḥ /
saṃharatyeṣa dharmātmā dharmarūpī janārdanaḥ

anenotpāditā devā dānavāścaiva supriya /
devāścādharmanirmuktā dharmahīnāḥ sutāstava

dharmoyaṃ mādhavasyāṃgaṃ sarvadaivaiśca pālitam /
dharmaṃ ca ciṃtayeddevi dharmaṃ caiva tu pālayet

tasya viṣṇuḥ sa dharmātmā sarvadaiva prasādavān /
dharmeṇa vartitā devāḥ satyena tapasā kila

yeṣāṃ viṣṇuḥ prasanno vai dharmastairiha pālitaḥ /
viṣṇoḥ kāyamidaṃ dharmaṃ satyaṃ hṛdayameva ca

yastau pālayate nityaṃ tasya viṣṇuḥ prasīdati /
dūṣayedyaḥ satyadharmau pāpameva prapālayet

tasya viṣṇuḥ prakupyeta nāśayedativīryavān /
vaiṣṇavaiḥ pālitaṃ dharmaṃ tapaḥ satyena saṃsthitaiḥ

teṣāṃ prasanno dharmātmā rakṣāmevaṃ karoti ca /
tava putrā danoḥ putrāḥ saiṃhikeyāstathaiva ca

adharmeṇāpi pāpena vartitāḥ pāpacetasaḥ /
sūditā vāsudevena samare cakrapāṇinā

yosāvātmā mayoktaḥ pūrvameva tavāgrataḥ /
soyaṃ viṣṇurna saṃdeho dharmātmā sarvapālakaḥ

daityakāyeṣu yaḥ svasthaḥ pāpameva samāsthitaḥ /
jaghnivāndānavāndevi sa ca kruddho mahāmatiḥ

sa bāhyābhyaṃtare bhūtvā tava putrā nipātitāḥ /
yena cotpāditā devi tenaiva vinipātitāḥ

naiṣāṃ mohastu kartavyo bhavatyā vacanaṃ śṛṇu /
pāpena vartate yosau sa eva nidhanaṃ vrajet

tasmānmohaṃ parityajya sadādharmaṃ samāśraya /
ditiruvāca-
evamastu mahābhāga kariṣye vacanaṃ tava

kaśyapaṃ ca muniśreṣṭhamevamābhāṣya duḥkhitā /
saṃbodhitā sā muninā duḥkhaṃ saṃtyajya saṃsthitā

iti śrīpadmapurāṇe bhūmikhaṃḍe devāsure ditisaṃbodhanaṃ nāma navamo'dhyāyaḥ