પદ્મ પુરાણ · અધ્યાય 2.9

નવમોઽધ્યાયઃ
કશ્યપ ઉવાચ-
એવં સંબોધિતસ્તત્ર આત્મા ધ્યાનાદિકૈસ્તદા ।
ત્યક્તુકામઃ સ તત્કાર્યં પંચાત્મકં સ બુદ્ધિમાન્

નિમિત્તાન્યેવ પશ્યૈવ પ્રાપ્ય તાંસ્તાન્પ્રયાતિ સઃ ।
વિહાય કાયં નિર્લક્ષ્યં પતિતં નૈવ પશ્યતિ

સહવર્દ્ધિતયોર્નાસ્તિ સંબંધઃ પ્રાણ દેહયોઃ ।
ધનપુત્રકલત્રૈશ્ચ સંબંધઃ કેન હેતુના

એવં જ્ઞાત્વા શમં ગચ્છ ક્લૈબ્યં મા ભજ સુપ્રિયે ।
અયમેવ પરં બ્રહ્મ અયમેવ સનાતનઃ

અયમાત્મસ્વરૂપેણ દૈત્ય દેવેષુ સંસ્થિતઃ ।
અયં બ્રહ્મા અયં રુદ્રો હ્યયં વિષ્ણુઃ સનાતનઃ

અયં સૃજતિ વિશ્વાનિ અયં પાલયતે પ્રજાઃ ।
સંહરત્યેષ ધર્માત્મા ધર્મરૂપી જનાર્દનઃ

અનેનોત્પાદિતા દેવા દાનવાશ્ચૈવ સુપ્રિય ।
દેવાશ્ચાધર્મનિર્મુક્તા ધર્મહીનાઃ સુતાસ્તવ

ધર્મોયં માધવસ્યાંગં સર્વદૈવૈશ્ચ પાલિતમ્ ।
ધર્મં ચ ચિંતયેદ્દેવિ ધર્મં ચૈવ તુ પાલયેત્

તસ્ય વિષ્ણુઃ સ ધર્માત્મા સર્વદૈવ પ્રસાદવાન્ ।
ધર્મેણ વર્તિતા દેવાઃ સત્યેન તપસા કિલ

યેષાં વિષ્ણુઃ પ્રસન્નો વૈ ધર્મસ્તૈરિહ પાલિતઃ ।
વિષ્ણોઃ કાયમિદં ધર્મં સત્યં હૃદયમેવ ચ

યસ્તૌ પાલયતે નિત્યં તસ્ય વિષ્ણુઃ પ્રસીદતિ ।
દૂષયેદ્યઃ સત્યધર્મૌ પાપમેવ પ્રપાલયેત્

તસ્ય વિષ્ણુઃ પ્રકુપ્યેત નાશયેદતિવીર્યવાન્ ।
વૈષ્ણવૈઃ પાલિતં ધર્મં તપઃ સત્યેન સંસ્થિતૈઃ

તેષાં પ્રસન્નો ધર્માત્મા રક્ષામેવં કરોતિ ચ ।
તવ પુત્રા દનોઃ પુત્રાઃ સૈંહિકેયાસ્તથૈવ ચ

અધર્મેણાપિ પાપેન વર્તિતાઃ પાપચેતસઃ ।
સૂદિતા વાસુદેવેન સમરે ચક્રપાણિના

યોસાવાત્મા મયોક્તઃ પૂર્વમેવ તવાગ્રતઃ ।
સોયં વિષ્ણુર્ન સંદેહો ધર્માત્મા સર્વપાલકઃ

દૈત્યકાયેષુ યઃ સ્વસ્થઃ પાપમેવ સમાસ્થિતઃ ।
જઘ્નિવાન્દાનવાન્દેવિ સ ચ ક્રુદ્ધો મહામતિઃ

સ બાહ્યાભ્યંતરે ભૂત્વા તવ પુત્રા નિપાતિતાઃ ।
યેન ચોત્પાદિતા દેવિ તેનૈવ વિનિપાતિતાઃ

નૈષાં મોહસ્તુ કર્તવ્યો ભવત્યા વચનં શૃણુ ।
પાપેન વર્તતે યોસૌ સ એવ નિધનં વ્રજેત્

તસ્માન્મોહં પરિત્યજ્ય સદાધર્મં સમાશ્રય ।
દિતિરુવાચ-
એવમસ્તુ મહાભાગ કરિષ્યે વચનં તવ

કશ્યપં ચ મુનિશ્રેષ્ઠમેવમાભાષ્ય દુઃખિતા ।
સંબોધિતા સા મુનિના દુઃખં સંત્યજ્ય સંસ્થિતા

ઇતિ શ્રીપદ્મપુરાણે ભૂમિખંડે દેવાસુરે દિતિસંબોધનં નામ નવમોઽધ્યાયઃ